นิคมนกถา
เอตฺตาวตา จ –
สทฺธมฺเม ปาฏวตฺถาย, สาสนสฺส จ วุทฺธิยา;
วณฺณนา ยา สมารทฺธา, สีลกฺขนฺธกถาย สาฯ
สาธุวิลาสินี นาม, สพฺพโส ปรินิฏฺฐิตา;
ปณฺณาสาย สาธิกาย, ภาณวารปฺปมาณโตฯ
อเนกเสติภินฺโท โย, อนนฺตพลวาหโน;
สิรีปวราทินาโม, ราชา นานารฏฺฐิสฺสโรฯ
ชมฺพุทีปตเล รมฺเม, มรมฺมวิสเย อกา;
ตมฺพทีปรฏฺเฐ ปุรํ, อมรปุรนามกํฯ
มณฺฑลาจลสามนฺตํ, เอราวตีนทิสฺสิตํ;
นานาชนานมาวาสํ, เหมปาสาทลงฺกตํฯ
ตตฺราภิเสกปตฺโต โส, รชฺชํ กาเรสิ ธมฺมโต;
ราชาคารมหาถูปํ, อกาสิ สมฺปสาทนํฯ
อุทฺธมฺมํ อุพฺพินยญฺจ, ปหาย ชินสาสนํ;
วิโสเธสิ ยถาภูตํ, สตตํ ทฬฺหมานโสฯ
เตเนว การิเต รมฺเม, ฉายูทกสมปฺปิเต;
ทฺวิปาการปริกฺขิตฺเต, ภาวนาภิรตารเหฯ
มหามุนิสมญฺญา ยา, สมฺพุทฺธสมฺมุขา กตา;
ปฏิมา ตํปาสาทมฺหา, อุชุอาสนฺนทกฺขิเณฯ
อโสการามอาราเม , ปญฺจภูมิมหาลเย;
รตนภูมิกิตฺติ วฺหเย, ธมฺมปาสาทลงฺกเตฯ
ตถา ทกฺขิณเทวิยา, นครสมีเป กเต;
ปุพฺพุตฺตเร ชยภูมิ-กิตฺตาภิธานเกปิ จฯ
ตเถวุตฺตรเทวิยา , นครพฺภนฺตเร กเต;
โสณฺณคุหถูปนฺติเก, ปริมาณกนามเกฯ
ตถา จ อุปราเชน, กเต นครปจฺฉิเม;
มหาคุหถูปนฺติเก, มงฺคลาวาสนามเกฯ
อิติ โสณฺณวิหาเรสุ, วสํเนเกสุ วารโต;
สกฺกโต สพฺพราชูนํ, ติกฺขตฺตุํ ลทฺธลญฺฉโนฯ
ญาณาภิวํสธมฺมเสนาปตีติ สุวิขฺยาโต;
ทฺเววิภงฺคาทิธารณา, อุปชฺฌาจริยตํ ปตฺโตฯ
ลงฺกาทีปาคตานมฺปิ, ปรทีปนิวาสินํ;
ภิกฺขูนํ วาจโก ธมฺมํ, ปฏิปตฺติํ นิโยชโกฯ
ยํ นิสฺสาย วิโสเธสิ, สาสนํ เอส ภูปติ;
อตฺถพฺยญฺชนสมฺปนฺนํ, โส’กาสิ วณฺณนํ อิมํฯ
สมฺพุทฺธปรินิพฺพานา, ปญฺจตาลีสเก’ทฺธเก;
ติสเต ทฺวิสหสฺเส จ, สมฺปตฺเต สา สุนิฏฺฐิตาฯ
เปฏกาลงฺการวฺหยํ, เนตฺติสํวณฺณนํ สุภํ;
อิมญฺจ สงฺขโรนฺเตน, ยํ ปุญฺญํ ปสุตํ มยาฯ
อญฺญมฺปิ เตน ปุญฺเญน, ปตฺวาน โพธิมุตฺตมํ;
ตารยิตฺวา พหู สตฺเต, โมเจยฺยํ ภวพนฺธนาฯ
สทา รกฺขนฺตุ ราชาโน, ธมฺเมเนว ปชํ อิมํ;
นิรตา ปุญฺญกมฺเมสุ, โชเตนฺตุ ชินสาสนํฯ
อิเม จ ปาณิโน สพฺเพ, สพฺพทา นิรุปทฺทวา;
นิจฺจํ กลฺยาณสงฺกปฺปา, ปปฺโปนฺตุ อมตํ ปทนฺติฯ
อิติ ทีฆนิกายฏฺฐกถาย สีลกฺขนฺธวคฺคสํวณฺณนาย
สาธุวิลาสินี นาม อภินวฏีกา สมตฺตาฯ
สีลกฺขนฺธวคฺคอภินวฏีกา นิฏฺฐิตาฯ