ทิฏฺฐินิสฺสยปฺปหานวณฺณนา

[196] ปชหนตฺถนฺติ อจฺจนฺตาย ปฏินิสฺสชฺชนตฺถํฯ ยสฺมา เตน ปชหเนน สพฺเพ ทิฏฺฐินิสฺสยา สมฺมเทว อติกฺกนฺตา โหนฺติ วีติกฺกนฺตา, ตสฺมา ‘‘สมติกฺกมายาติ ตสฺเสว เววจน’’นฺติ อโวจฯ น เกวลํ สติปฏฺฐานา กถิตมตฺตา, อถ โข เวเนยฺยสนฺตาเน ปติฏฺฐาปิตาติ ทสฺเสตุํ ‘‘เทสิตา’’ติ วตฺวา ‘‘ปญฺญตฺตา’’ติ วุตฺตนฺติ อาห ‘‘เทสิตาติ กถิตาฯ ปญฺญตฺตาติ ฐปิตา’’ติฯ อิทานิ สติปฏฺฐานเทสนาย ทิฏฺฐินิสฺสยานํ เอกนฺติกํ ปหานาวหภาวํ ทสฺเสตุํ ‘‘สติปฏฺฐานภาวนาย หี’’ติอาทิ วุตฺตํฯ ตตฺถ สติปฏฺฐานภาวนายาติ อิมินา เตสํ ภาวนาย เอว เนสํ ปหานํ, เทสนา ปน ตทุปนิสฺสยภาวโต ตถา วุตฺตาติ ทสฺเสติฯ เสสํ สพฺพํ สุวิญฺเญยฺยเมวาติฯ

ปาสาทิกสุตฺตวณฺณนาย ลีนตฺถปฺปกาสนาฯ