เมนู

นิคมนกถาวณฺณนา

เถรานํ มหากสฺสปาทีนํ วํโส ปเวณี อนฺวโย เอตสฺสาติ เถรวํสนฺวโย, เตน; จตุมหานิกาเยสุ เถริเยนาติ อตฺโถฯ

ทสพลสฺส สมฺมาสมฺพุทฺธสฺส คุณคณานํ ปริทีปนโต ทสพลคุณคณปริทีปนสฺสฯ อยญฺหิ อาคโม พฺรหฺมชาลาทีสุ, มหาปทานาทีสุ, สมฺปสาทนียาทีสุ จ ตตฺถ ตตฺถ วิเสสโต พุทฺธคุณานํ ปกาสนวเสน ปวตฺโตติฯ ตถา หิ วุตฺตํ อาทิโต ‘‘สทฺธาวหคุณสฺสา’’ติ (ที. นิ. อฏฺฐ. 1.คนฺถารมฺภกถา)ฯ

มหาฏฺฐกถาย สารนฺติ ทีฆนิกายมหาอฏฺฐกถายํ อตฺถสารํฯ

เอกูนสฏฺฐิมตฺโตติ โถกํ อูนภาวโต มตฺต-สทฺทคฺคหณํฯ

มูลกฏฺฐกถาสารนฺติ ปุพฺเพ วุตฺตํ ทีฆนิกายมหาอฏฺฐกถาสารเมว ปุน นิคมนวเสน วทติฯ อถ วา มูลกฏฺฐกถาสารนฺติ โปราณฏฺฐกถาสุ อตฺถสารํ, เตเนตํ ทสฺเสติ ‘‘ทีฆนิกายมหาอฏฺฐกถายํ อตฺถสารํ อาทาย อิมํ สุมงฺคลวิลาสินิํ กโรนฺโต เสสมหานิกายานมฺปิ มูลกฏฺฐกถาสุ อิธ วินิโยคกฺขมํ อตฺถสารํ อาทายเยว อกาสิ’’นฺติฯ

‘‘มหาวิหารวาสีน’’นฺติ [มหาวิหาเร นิวาสินํ (อฏฺฐกถายํ)] จ อิทํ ปุริมปจฺฉิมปเทหิ สทฺธิํ สมฺพนฺธิตพฺพํ ‘‘มหาวิหารวาสีนํ สมยํ ปกาสยนฺติํ, มหาวิหารวาสีนํ มูลกฏฺฐกถาสารํ อาทายา’’ติ จฯ เตน ปุญฺเญนฯ โหตุ สพฺโพ สุขี โลโกติ กามาวจราทิวิภาโค สพฺโพปิ สตฺตโลโก ยถารหํ โพธิตฺตยาธิคมนวเสน สมฺปตฺเตน นิพฺพานสุเขน สุขิโต โหตูติ สเทวกสฺส โลกสฺส อจฺจนฺตสุขาธิคมาย อตฺตโน ปุญฺญํ ปริณาเมติฯ

ปริมาณโต สาธิกฏฺฐวีสสหสฺสนวุติภาณวารา นิฏฺฐิตาติฯ ปริมาณโต สาธิกฏฺฐวีสสหสฺสมตฺตคนฺเถน ทีฆนิกายฏีกา รจิตาจริยธมฺมปาเลนฯ

มิจฺฉาทิฏฺฐาทิโจเรหิ , สีลาทิธนสญฺจยํ;

รกฺขณตฺถาย สกฺกจฺจํ, มญฺชูสํ วิย การิตนฺติฯ (เอตฺถนฺตเร ปาโฐ ปจฺฉา ลิขิโต)

นิฏฺฐิตา สุมงฺคลวิลาสินิยา ทีฆนิกายฏฺฐกถาย ลีนตฺถปฺปกาสนาฯ

ทีฆนิกายฏีกา นิฏฺฐิตาฯ