สุวณฺณพิมฺพิสกวณฺณนฺติ สุวิรจิต อปสฺเสนสทิสํฯ

กสฺมา ปเนตฺถ ปาเวยฺยกา ปาฬิยํ สพฺพปจฺฉโต คหิตา, กิํ เต กุสินาราย อาสนฺนตราปิ สพฺพปจฺฉโต อุฏฺฐิตา? อาม, สพฺพปจฺฉโต อุฏฺฐิตาติ ทสฺเสตุํ ‘‘ตตฺถ ปาเวยฺยกา’’ติอาทิ วุตฺตํฯ

ธาตุปาสนตฺถนฺติ สตฺถุ ธาตูนํ ปยิรุปาสนายฯ เนสํ ปกฺขา อเหสุํ ‘‘ญาเยน เตสํ สนฺตกา ธาตุโย’’ติฯ

[237] โทณคชฺชิตํ นาม อโวจ สตฺถุ อวตฺถตฺตยูปสํหิตํฯ เอตทตฺถเมว หิ ภควา มคฺคํ คจฺฉนฺโต ‘‘ปจฺฉโต อาคจฺฉนฺโต โทโณ พฺราหฺมโณ ยาว เม ปทวฬญฺชํ ปสฺสติ, ตาว มา วิคจฺฉตู’’ติ อธิฏฺฐาย อญฺญตรสฺมิํ รุกฺขมูเล นิสีทิฯ โทโณปิ โข พฺราหฺมโณ ‘‘อิมานิ สเทวเก โลเก อคฺคปุคฺคลสฺส ปทานี’’ติ สลฺลกฺเขนฺโต ปทานุสาเรน สตฺถุ สนฺติกํ อุปคจฺฉิ, สตฺถาปิสฺส ธมฺมํ เทเสสิ, เตนปิ โส ภควติ นิวิฏฺฐสทฺโธ อโหสิฯ เอตทโวจ, กิํ อโวจาติ อาห ‘‘สุณนฺตุ…เป.… อโวจา’’ติฯ

กาเยน เอกสนฺนิปาตา วาจาย เอกวจนา อภินฺนวจนา เอวํ สมคฺคา โหถฯ ตสฺส ปนิทํ การณนฺติ อาห ‘‘สมฺโมทมานา’’ติฯ เตนาห ‘‘จิตฺเตนาปิ อญฺญมญฺญํ สมฺโมทมานา โหถา’’ติฯ

[238] ตโต ตโต สมาคตสงฺฆานนฺติ ตโต ตโต อตฺตโน วสนฏฺฐานโต สมาคนฺตฺวา สนฺนิปติตภาเวน สมาคตสงฺฆานํฯ ตถา สมาปติตสมูหภาเวน สมาคตคณานํฯ วจนสมฺปฏิจฺฉเนน ปฏิสฺสุณิตฺวาฯ

ธาตุถูปปูชาวณฺณนา

[239] ยกฺขคฺคาโห เทวตาเวโสฯ ขิปิตกํ ธาตุกฺโขภํ อุปฺปาเทตฺวา ขิปิตกโรโคฯ อโรจโก อาหารสฺส อรุจฺจนโรโคฯ

สตฺตมทิวเสติ สตฺตวสฺสสตฺตมาสโต ปรโต สตฺตเม ทิวเสฯ พลานุรูเปนาติ วิภวพลานุรูเปนฯ

ปจฺฉา สงฺคีติการกาติ ทุติยํ ตติยํ สงฺคีติการกาฯ