อิทฺธิปาฏิหาริยวณฺณนา

[483-4] อาทีนวนฺติ โทสํฯ คนฺธารีติ จูฬคนฺธารี, มหาคนฺธารีติ ทฺเว คนฺธารีวิชฺชาฯ ตตฺถ จูฬคนฺธารี นาม ติวสฺสโต โอรํ มตานํ สตฺตานํ อุปปนฺนฏฺฐานชานนวิชฺชาฯ มหาคนฺธารี ตมฺปิ ชานาติ ตโต อุตฺตริปิ อิทฺธิวิธญาณกปฺปํ เยภุยฺเยน อิทฺธิวิธกิจฺจํ สาเธติฯ ตสฺสา กิร วิชฺชาย สาธโก ปุคฺคโล ตาทิเส เทสกาเล มนฺตํ ปริชปฺปิตฺวา พหุธาปิ อตฺตานํ ทสฺเสติ, หตฺถิอาทีนิปิ ทสฺเสติ, ทสฺสนีโยปิ โหติ, อคฺคิถมฺภมฺปิ กโรติ, ชลถมฺภมฺปิ กโรติ, อากาเสปิ อตฺตานํ ทสฺเสติฯ สพฺพํ อินฺทชาลสทิสํ ทฏฺฐพฺพํฯ อฏฺโฏติ ทุกฺขิโต พาธิโต, เตนาห ‘‘ปีฬิโต’’ติฯ