ปุพฺเพ ปิตรา สทฺธิํ สตฺถุ สนฺติกํ คนฺตฺวา เทสนาย สุตปุพฺพตํ สนฺธายาห ‘‘ฌานาภิญฺญาทิ…เป.… โสตุกาโม’’ติฯ ทสฺสเนนาติ น ทสฺสนมตฺตํ, ทิสฺวา ปน เตน สทฺธิํ อาลาปสลฺลาปํ กตฺวา ตโต อกิริยวาทํ สุตฺวา เตสํ อนตฺตมโน อโหสิฯ คุณกถายาติ อภูตคุณกถายฯ เตนาห ‘‘สุฏฺฐุตรํ อนตฺตมโน หุตฺวา’’ติฯ ยทิ อนตฺตมโน, กสฺมา ตุณฺหี อโหสีติ อาห ‘‘อนตฺตมโน สมาโนปี’’ติอาทิฯ

[152] โคสาลายาติ เอวํ นามเก คาเมฯ วสฺสานกาเล คุนฺนํ ติฏฺฐนสาลาติ เอเกฯ

[153] ปฏิกิฏฺฐตรนฺติ นิหีนตรํฯ ตนฺตาวุตานีติ ตนฺเต ปสาเรตฺวา วีตานิฯ ‘‘สีเต สีโต’’ติอาทินา ฉหากาเรหิ ตสฺส นิหีนสฺส นิหีนตรตํ ทสฺเสติฯ

[154] วจฺจํ กตฺวาปีติ ปิ-สทฺเทน โภชนํ ภุญฺชิตฺวาปิ เกนจิ อสุจินา มกฺขิโต ปีติ อิมมตฺถํ สมฺปิณฺเฑติฯ วาลิกถูปํ กตฺวาติ วตฺตวเสน วาลิกาย ถูปํ กตฺวาฯ

[156] ปลิพุทฺธนกิเลโสติ สํสาเร ปลิพุทฺธนกิจฺโจ ราคาทิกิเลโส เขตฺตวตฺถุปุตฺตทาราทิวิสโยฯ

โกมารภจฺจชีวกกถาวณฺณนา

[157] น ยถาธิปฺปายํ วตฺตตีติ กตฺวา วุตฺตํ ‘‘อนตฺโถ วต เม’’ติฯ ชีวกสฺส ตุณฺหีภาโว มม อธิปฺปายสฺส มทฺทนสทิโส, ตสฺมา ตํ ปุจฺฉิตฺวา กถาปเนน มม อธิปฺปาโย ปูเรตพฺโพติ อยเมตฺถ รญฺโญ อชฺฌาสโยติ ทสฺเสนฺโต ‘‘หตฺถิมฺหิ นุ โข ปนา’’ติอาทิมาหฯ กิํ ตุณฺหีติ กิํ การณา ตุณฺหี, กิํ ตํ การณํ, เยน ตุวํ ตุณฺหีติ วุตฺตํ โหติฯ เตนาห ‘‘เกน การเณน ตุณฺหี’’ติฯ