ปจฺจตฺถรณ ปริกฺขาร-มุขปุญฺฉนโจฬกํ;

ทสํ ปฺยรตฺตนาทิณฺณกปฺปํ ลพฺภํ นิสีทนํฯ

[51]

อทสํ รชิตํเยว, เสสจีวรปญฺจกํ;

กปฺปตาทิณฺณกปฺปํว, สทสํว นิสีทนํฯ

[52]

อนธิฏฺฐิตนิสฺสฏฺฐํ, กปฺเปตฺวา ปริภุญฺชเย;

หตฺถทีฆํ ตโตปฑฺฒ-วิตฺถารญฺจ วิกปฺปิยํฯ

[53]

ติจีวรสฺส ภิกฺขุสฺส, สพฺพเมตํ ปกาสิตํ;

ปริกฺขารโจฬิโย สพฺพํ, ตถา วตฺวา อธิฏฺฐติฯ

[54]

อจฺเฉทวิสฺสชฺชนคาหวิพฺภมา ,

ปจฺจุทฺธโร มารณลิงฺคสิกฺขา;

สพฺเพสฺวธิฏฺฐานวิโยคการณา,

วินิวิทฺธฉิทฺทญฺจ ติจีวรสฺสฯ

[55]

กุสวากผลกานิ, กมฺพลํ เกสวาลชํ;

ถุลฺลจฺจยํ ธารยโตลูกปกฺขาชินกฺขิเปฯ

[56]

กทเลรกกฺกทุสฺเส, โปตฺถเก จาปิ ทุกฺกฏํ;

สพฺพนีลกมญฺเชฏฺฐ-ปีตโลหิตกณฺหเกฯ

[57]

มหารงฺคมหานาม-รงฺครตฺเต ติรีฏเก;

อจฺฉินฺนทีฆทสเก, ผลปุปฺผทเส ตถา;

กญฺจุเก เวฐเน สพฺพํ, ลภติจฺฉินฺนจีวโรติฯ

4. รชนนิทฺเทโส

รชนานิ จาติ –

[58]

มูลกฺขนฺธตจปตฺต-ผลปุปฺผปฺปเภทโต;

รชนา ฉปฺปการานิ, อนุญฺญาตานิ สตฺถุนาฯ

[59]

มูเล หลิทฺทิํ ขนฺเธ จ, มญฺเชฏฺฐ ตุงฺคหารเก;

อลฺลิํ นีลญฺจ ปตฺเตสุ, ตเจ โลทฺทญฺจ กณฺฑุลํ;

กุสุมฺภํ กิํสุกํ ปุปฺเผ, สพฺพํ ลพฺภํ วิวชฺชิยาติฯ

5. ปตฺตนิทฺเทโส

ปตฺโต จาติ –

[60]

อโยปตฺโต ภูมิปตฺโต, ชาติยา กปฺปิยา ทุเว;

อุกฺกฏฺโฐ มชฺฌิโม เจว, โอมโก จ ปมาณโตฯ

[61]

อุกฺกฏฺโฐ มคเธ นาฬิ-ทฺวยตณฺฑุลสาธิตํ;

คณฺหาติ โอทนํ สูปํ, พฺยญฺชนญฺจ ตทูปิยํฯ

[62]

มชฺฌิโม ตสฺสุปฑฺโฒว, ตโตปฑฺโฒว โอมโก;

อุกฺกฏฺฐโต จ อุกฺกฏฺโฐ, อปตฺโต โอมโกมโกฯ

[63]

อติเรกปตฺโต ธาเรยฺโย, ทสาหปรมํ สโก;

กปฺโป นิสฺสคฺคิโย โหติ, ตสฺมิํ กาเลตินามิเตฯ

[64]

อจฺเฉททานคาเหหิ, วิพฺภมา มรณุทฺธฏา;

ลิงฺคสิกฺขาหิ ฉิทฺเทน, ปตฺตาธิฏฺฐานมุชฺฌติฯ

[65]

ปตฺตํ น ปฏิสาเมยฺย, โสทกํ น จ โอตเป;

อุณฺเห น นิทเห ภุมฺยา, น ฐเป โน จ ลคฺคเยฯ

[66]

มิฑฺฒนฺเต ปริภณฺฑนฺเต, องฺเก วา อาตปตฺตเก;

ปาเทสุ มญฺจปีเฐ วา, ฐเปตุํ น จ กปฺปติฯ

[67]

น นีหเรยฺย อุจฺฉิฏฺโฐ-ทกญฺจ จลกฏฺฐิกํ;

ปตฺเตน ปตฺตหตฺโถ วา, กวาฏํ น ปณามเยฯ

[68]

ภูมิอาธารเก ทารุทณฺฑาธาเร สุสชฺชิเต;

ทุเว ปตฺเต ฐเปยฺเยกํ, นิกฺกุชฺชิตฺวาน ภูมิยํฯ

[69]