วณฺณอาสยสณฺฐาน-คนฺโธกาเสหิ ภาวนา;
ปฏิกฺกูลาติ โกฏฺฐาเส, อุทฺธุมาตาทิวตฺถุสุ;
คเหตฺวา อสุภาการํ, ปวตฺตา ภาวนาสุภํฯ
[468]
‘‘มรณํ เม ภวิสฺสติ, ชีวิตํ อุจฺฉิชฺชิสฺสติ;
มรณํ มรณํ วา’’ติ, ภาวยิตฺวาน โยนิโสฯ
[469]
วธกสฺเสวุปฏฺฐานา, สมฺปตฺตีนํ วิปตฺติโต;
อุปสํหรโต กายพหุสาธารณา ตถาฯ
[470]
อายุทุพฺพลโต กาลววตฺถานสฺสภาวโต;
อทฺธานสฺส ปริจฺเฉทา, ภาวนา มรณสฺสตีติฯ
50. วิปสฺสนานิทฺเทโส
วิปสฺสนาติ –
[471]
นามรูปํ ปริคฺคยฺห, ตโต ตสฺส จ ปจฺจยํ;
หุตฺวา อภาวโตนิจฺจา, อุทยพฺพยปีฬนาฯ
[472]
ทุกฺขา อวสวตฺติตฺตา, อนตฺตาติ ติลกฺขณํ;
อาโรเปตฺวาน สงฺขาเร, สมฺมสนฺโต ปุนปฺปุนํ;
ปาปุเณยฺยานุปุพฺเพน, สพฺพสํโยชนกฺขยนฺติฯ
นิคมนกถา
[473]
อธิสีลาธิจิตฺตานํ, อธิปญฺญาย สิกฺขนา;
ภิกฺขุกิจฺจมโต ขุทฺทสิกฺขายํ สมุทาหฏาฯ
[474]
มหโต กิตฺติสทฺทสฺส, ยสฺส โลกวิจาริโน;
ปริสฺสโม น สมฺโภติ, มาลุตสฺเสว นิจฺจโสฯ
[475]