อาปตฺตินุกฺขิตฺตมนนฺตราย
ปหุตฺตตาโย ตถสญฺญิตา จ;
ฉาเทตุกาโม อถ ฉาทนาติ,
ฉนฺนา ทสงฺเคหฺยรุณุคฺคมมฺหีติฯ
3. จีวรนิทฺเทโส
จีวรนฺติ –
[30]
โขมโกเสยฺยกปฺปาส-สาณภงฺคานิ กมฺพลํ;
กปฺปิยานิ ฉเฬตานิ, สานุโลมานิ ชาติโตฯ
[31]
ทุกูลญฺเจว ปฏฺฏุณฺณ-ปฏํ โสมารจีนชํ;
อิทฺธิชํ เทวทินฺนญฺจ, ตสฺส ตสฺสานุโลมิกํฯ
[32]
ติจีวรํ ปริกฺขาร-โจฬํ วสฺสิกสาฏิกํ;
อธิฏฺเฐ น วิกปฺเปยฺย, มุขปุญฺฉนนิสีทนํฯ
[33]
ปจฺจตฺถรณกํ กณฺฑุ-จฺฉาทิเมตฺถ ติจีวรํ;
น วเสยฺย วิเนกาหํ, จาตุมาสํ นิสีทนํฯ
[34]
‘‘อิมํ สงฺฆาฏิํธิฏฺฐามิ’’, สงฺฆาฏิมิจฺจธิฏฺฐเย;
อหตฺถปาสเมตนฺติ, เสเสสุปิ อยํ นโยฯ
[35]
อธิฏฺฐหนฺโต สงฺฆาฏิ-ปฺปภุติํ ปุพฺพจีวรํ;
ปจฺจุทฺธริตฺวาธิฏฺเฐยฺย, ปตฺตาธิฏฺฐหเน ตถาฯ
[36]
เอตํ อิมํ ว สงฺฆาฏิํ, สํเส ปจฺจุทฺธรามิติ;
เอวํ สพฺพานิ นาเมน, วตฺวา ปจฺจุทฺธเร วิทูฯ
[37]
สงฺฆาฏิ ปจฺฉิมนฺเตน, ทีฆโส มุฏฺฐิปญฺจโก;
อุตฺตมนฺเตน สุคต-จีวรูนาปิ วฏฺฏติฯ
[38]
มุฏฺฐิตฺติกญฺจ ติริยํ, ตถา เอกํสิกสฺสปิ;
อนฺตรวาสโก จาปิ, ทีฆโส มุฏฺฐิปญฺจโก;
อฑฺฒเตยฺโย ทฺวิหตฺโถ วา, ติริยนฺเตน วฏฺฏติฯ
[39]