อปฺปวาริตมญฺญาติํ , สุตฺตํ ยาจิย จีวรํ;
วายาเปนฺตสฺส นิสฺสคฺคิ, วินา ญาติปฺปวาริเตฯ
[29]
ชานนฺโต ภิกฺขุ สงฺฆสฺส, ลาภํ ปริณตํ ปน;
อตฺตโน ปริณาเมติ, ตสฺส นิสฺสคฺคิยํ สิยาติฯ
4. ปาจิตฺติยนิทฺเทโส
[30]
สมฺปชานมุสาวาเท, ปาจิตฺติยมุทีริตํ;
ภิกฺขุญฺจ โอมสนฺตสฺส, เปสุญฺญหรเณปิ จฯ
[31]
ฐเปตฺวา ภิกฺขุนิํ ภิกฺขุํ, อญฺเญน ปิฏกตฺตยํ;
ปทโสธมฺมํ ภณนฺตสฺส, ปาจิตฺติยมุทีริตํฯ
[32]
อนุปสมฺปนฺเนเนว, สยิตฺวาน ติรตฺติยํ;
ปาจิตฺติ สหเสยฺยาย, จตุตฺถตฺถงฺคเต ปุนฯ
[33]
อิตฺถิยา เอกรตฺตมฺปิ, เสยฺยํ กปฺปยโตปิ วา;
เทเสนฺตสฺส วินา วิญฺญุํ, ธมฺมญฺจ ฉปฺปทุตฺตริํฯ
[34]
ทุฏฺฐุลฺลํ ภิกฺขุโน วชฺชํ, ภิกฺขุสมฺมุติยา วินา;
อภิกฺขุโน วทนฺตสฺส, ปาจิตฺติยมุทีริตํฯ
[35]
ขเณยฺย วา ขณาเปยฺย, ปถวิญฺจ อกปฺปิยํ;
ภูตคามํ วิโกเปยฺย, ตสฺส ปาจิตฺติยํ สิยาฯ
[36]
อชฺโฌกาเส ตุ มญฺจาทิํ, กตฺวา สนฺถรณาทิกํ;
สงฺฆิกํ ยาติ ปาจิตฺติ, อกตฺวาปุจฺฉนาทิกํฯ
[37]
สงฺฆิกาวสเถ เสยฺยํ, กตฺวา สนฺถรณาทิกํ;
อกตฺวาปุจฺฉนาทิํ โย, ยาติ ปาจิตฺติ ตสฺสปิฯ
[38]
ชานํ สปฺปาณกํ โตยํ, ปาจิตฺติ ปริภุญฺชโต;
อญฺญาติกา ภิกฺขุนิยา, ฐเปตฺวา ปาริวตฺตกํฯ
[39]
จีวรํ เทติ ปาจิตฺติ, จีวรํ สิพฺพโตปิ จ;
อติริตฺตํ อกาเรตฺวา, ปวาเรตฺวาน ภุญฺชโตฯ
[40]
ภิกฺขุํ อาสาทนาเปกฺโข, ปวาเรติ ปวาริตํ;
อนติริตฺเตน ภุตฺเต ตุ, ปาจิตฺติยมุทีริตํฯ
[41]
สนฺนิธิโภชนํ ภุญฺเช, วิกาเล ยาวกาลิกํ;
ภุญฺชโต วาปิ ปาจิตฺติ, อคิลาโน ปณีตกํฯ
[42]
วิญฺญาเปตฺวาน ภุญฺเชยฺย, สปฺปิภตฺตาทิกมฺปิ จ;
อปฺปฏิคฺคหิตํ ภุญฺเช, ทนฺตกฏฺโฐทกํ วินาฯ
[43]
ติตฺถิยสฺส ทเท กิญฺจิ, ภุญฺชิตพฺพํ สหตฺถโต;
นิสชฺชํ วารโห กปฺเป, มาตุคาเมน เจกโตฯ
[44]
สุราเมรยปาเนปิ, ปาจิตฺติยมุทีริตํ;
องฺคุลิปโตทเก จาปิ, หสธมฺเมปิ โจทเกฯ
[45]
อนาทเรปิ ปาจิตฺติ, ภิกฺขุํ ภีสยโตปิ วา;
ภยานกํ กถํ กตฺวา, ทสฺเสตฺวา วา ภยานกํฯ
[46]
ฐเปตฺวา ปจฺจยํ กิญฺจิ, อคิลาโน ชเลยฺย วา;
โชติํ ชลาปเยยฺยาปิ, ตสฺส ปาจิตฺติยํ สิยาฯ
[47]
กปฺปพินฺทุมนาทาย, นวจีวรโภคิโน;
หสาเปกฺขสฺส ปาจิตฺติ, ภิกฺขุโน จีวราทิกํฯ
[48]
อปเนตฺวา นิเธนฺตสฺส, นิธาเปนฺตสฺส วา ปน;
ชานํ ปาณํ มาเรนฺตสฺส, ติรจฺฉานคตมฺปิ จฯ
[49]
ฉาเทตุกาโม ฉาเทติ, ทุฏฺฐุลฺลํ ภิกฺขุโนปิ จ;
คามนฺตรคตสฺสาปิ, สํวิธายิตฺถิยา สหฯ
[50]
ภิกฺขุํ ปหรโต วาปิ, ตลสตฺติกมุคฺคิเร;
โจเทติ วา โจทาเปติ, ครุกามูลเกนปิฯ
[51]
กุกฺกุจฺจุปฺปาทเน จาปิ, ภณฺฑนตฺถายุปสฺสุติํ;
โสตุํ ภณฺฑนชาตานํ, ยาติ ปาจิตฺติยํ สิยาฯ
[52]
สงฺฆสฺส ลาภํ ปริณามิตํ ตุ,
นาเมติ โย ตํ ปรปุคฺคลสฺส;
ปุจฺฉํ อกตฺวาปิ จ สนฺตภิกฺขุํ,
ปาจิตฺติ คามสฺส คเต วิกาเลติฯ
5. ปกิณฺณกนิทฺเทโส
[53]
สงฺฆิกํ ครุภณฺฑํ โย, เทติ อญฺญสฺส อิสฺสโร;
ถุลฺลจฺจยํ ยถาวตฺถุํ, เถยฺยา ปาราชิกาทิปิฯ
[54]
กุสาทิมยจีรานิ, กมฺพลํ เกสวาลชํ;
สมยํ วินา ธารยโต, ลูกปกฺขาชินกฺขิปํฯ
[55]
สตฺถกมฺเม วตฺถิกมฺเม, สํ นิมิตฺตญฺจ ฉินฺทโต;
ถุลฺลจฺจยํ มนุสฺสานํ, มํสาทิโภชเนปิ วาฯ
[56]
กทเลรกกฺกทุสฺสานิ , โปตฺถกํ สพฺพนีลกํ;
สพฺพปีตาทิกญฺจาปิ, ธารยนฺตสฺส ทุกฺกฏํฯ
[57]
หตฺถิสฺสุรคโสณานํ, สีหพฺยคฺฆจฺฉทีปินํ;
ตรจฺฉสฺส จ มํสาทิํ, อุทฺทิสฺสกตกมฺปิ จฯ
[58]
อนาปุจฺฉิตมํสญฺจ, ภุญฺชโต ทุกฺกฏํ สิยา;
ยาตานุปุพฺพํ หิตฺวาน, ทกติตฺถาทิกํ วเชฯ
[59]