ปุพฺพสหปฺปโยโค จ, สํวิธาหรณมฺปิ จ;

สงฺเกตกมฺมํ นิมิตฺตํ, ปุพฺพปฺปโยคปญฺจกํฯ

[7]

เถยฺยาปสยฺหปริกปฺป-ปฺปฏิจฺฉนฺนกุสาทิกา;

อวหารา อิเม ปญฺจ, วิญฺญาตพฺพา วิภาวินาฯ

[8]

มนุสฺสปาณํ ปาโณติ, ชานํ วธกเจตสา;

ชีวิตา โย วิโยเชติ, สาสนา โส ปราชิโตฯ

[9]

ฌานาทิเภทํ หทเย อสนฺตํ,

อญฺญปเทสญฺจ วินาธิมานํ;

มนุสฺสชาติสฺส วเทยฺย ภิกฺขุ,

ญาตกฺขเณ เตน ปราชิโก ภเวติฯ

2. ครุกาปตฺตินิทฺเทโส

[10]

โมเจตุกามจิตฺเตน, อุปกฺกมฺม วิโมจยํ;

สุกฺกมญฺญตฺร สุปินา, สมโณ ครุกํ ผุเสฯ

[11]

กายสํสคฺคราเคน , มนุสฺสิตฺถิํ ปรามสํ;

อิตฺถิสญฺญี อุปกฺกมฺม, สมโณ ครุกํ ผุเสฯ

[12]

ทุฏฺฐุลฺลวาจสฺสาเทน, มคฺคํ วารพฺภ เมถุนํ;

โอภาสนฺโต มนุสฺสิตฺถิํ, สุณมานํ ครุํ ผุเสฯ

[13]

วณฺณํ วตฺวาตฺตโนกาม-ปาริจริยาย เมถุนํ;

อิตฺถิํ เมถุนราเคน, ยาจมาโน ครุํ ผุเสฯ

[14]

สนฺเทสํ ปฏิคฺคณฺหิตฺวา, ปุริสสฺสิตฺถิยาปิ วา;

วีมํสิตฺวา หรํปจฺจา, สมโณ ครุกํ ผุเสฯ

[15]

จาเวตุกาโม โจเทนฺโต, อมูลนฺติมวตฺถุนา;

โจทาปยํ วา สมโณ, สุณมานํ ครุํ ผุเสฯ

[16]

เลสมตฺตํ อุปาทาย, อมูลนฺติมวตฺถุนา;

จาเวตุกาโม โจเทนฺโต, สุณมานํ ครุํ ผุเสติฯ

3. นิสฺสคฺคิยนิทฺเทโส

[17]

วิกปฺปนมธิฏฺฐาน-มกตฺวา กาลจีวรํ;

ทสาหมติมาเปติ, ตสฺส นิสฺสคฺคิยํ สิยาฯ

[18]

ภิกฺขุสมฺมุติยาญฺญตฺร, ติจีวรมธิฏฺฐิตํ;

เอกาหมติมาเปติ, นิสฺสคฺคิ สมยํ วินาฯ

[19]

อญฺญาติกา ภิกฺขุนิยา, ปุราณจีวรํ ปน;

โธวาเปติ รชาเปติ, อาโกฏาเปติ ตํ สิยาฯ

[20]

อญฺญาติกา ภิกฺขุนิยา, หตฺถโต กิญฺจิ มูลกํ;

อทตฺวา จีวราทาเน, นิสฺสคฺคิยมุทีริตํฯ

[21]

อปฺปวาริตมญฺญาติํ, วิญฺญาเปนฺตสฺส จีวรํ;

อญฺญตฺร สมยา ตสฺส, นิสฺสคฺคิยมุทีริตํฯ

[22]

รชตํ ชาตรูปํ วา, มาสกํ วา กหาปณํ;

คณฺเหยฺย วา คณฺหาเปยฺย, นิสฺสคฺคิ สาทิเยยฺย วาฯ

[23]

ปริวตฺเตยฺย นิสฺสคฺคิ, รชตาทิ จตุพฺพิธํ;

กปฺปิยํ กปฺปิเยนาปิ, ฐเปตฺวา สหธมฺมิเกฯ

[24]

วิกปฺปนมธิฏฺฐาน-มกตฺวาน ปมาณิกํ;

ทสาหมติมาเปติ, ปตฺตํ นิสฺสคฺคิยํ สิยาฯ

[25]

ปญฺจพนฺธนโต อูน-ปตฺเต สติ ปรํ ปน;

วิญฺญาเปติ นวํ ปตฺตํ, ตสฺส นิสฺสคฺคิยํ สิยาฯ

[26]

ปฏิคฺคเหตฺวา ภุญฺชนฺโต, สปฺปิเตลาทิกํ ปน;

สตฺตาหมติมาเปติ, ตสฺส นิสฺสคฺคิยํ สิยาฯ

[27]

ภิกฺขุสฺส จีวรํ ทตฺวา, อจฺฉินฺทนฺตสฺส ตํ ปุน;

สกสญฺญาย นิสฺสคฺคิ, อจฺฉินฺทาปยโตปิ วาฯ

[28]