ถาวรํ ปริวตฺเตยฺย, ตถา กตฺวา จ ภุญฺชตุ;
วลฺลาทิํ ผาติกมฺเมน, คณฺเห เสสมภาชิยนฺติฯ
41. ปกิณฺณกนิทฺเทโส
ปกิณฺณกนฺติ –
[335]
สทฺวารพนฺธเน ฐาเน, โสทุกฺขลกปาสเก;
สยนฺเตน ทิวา ทฺวารํ, พนฺเธยฺย ปริวฏฺฏกํฯ
[336]
สนฺเต วิญฺญุมฺหิ ปุริเส, อาโภโค จาปิ กปฺปติ;
สวเส ตํ วินาการํ, สยนฺโต ทุกฺกฏํ ผุเสฯ
[337]
รตนานิตฺถิรูปานิ, ธญฺญมิตฺถิปสาธนํ;
ตูริยาวุธภณฺฑานิ, อามสนฺตสฺส ทุกฺกฏํฯ
[338]
สิตฺถเตโลทเตเลหิ, ผณหตฺถผเณหิ วา;
โกจฺเฉนวาปิ โย เกเส, โอสณฺเฐยฺยสฺส ทุกฺกฏํฯ
[339]
เนกปาวุรณา เอกตฺถรณา วา ตุวฏฺฏยุํ;
ตเถกมญฺเจ ภุญฺเชยฺยุํ, เอกสฺมิํ วาปิ ภาชเนฯ
[340]
จตุรงฺคุลโต อูนมธิกฏฺฐงฺคุลํ ตถา;
ทนฺตกฏฺฐํ น ขาเทยฺย, ลสุณํ น อกลฺลโกฯ
[341]
หีนุกฺกฏฺเฐหิ อุกฺกฏฺฐํ, หีนํ วา ชาติอาทิหิ;
อุชุํ วาญฺญาปเทเสน, วเท ทุพฺภาสิตํ ทวาฯ
[342]
ทีเฆ นเข จ เกเส จ, นาสโลเม น ธารเย;
น ลพฺภํ วีสติมฏฺฐํ, สมฺพาเธ โลมหารณํฯ
[343]
ยถาวุฑฺฒํ น พาเธยฺย, สงฺฆุทฺทิฏฺฐํว สงฺฆิกํ;
อโธตอลฺลปาเทหิ, นกฺกเม สยนาสนํ;
สุโธตปาทกํ วาปิ, ตเถว สอุปาหโนฯ
[344]
สงฺฆาฏิยา น ปลฺลตฺเถ, ภิตฺตาทิํ น อปสฺสเย;
ปริกมฺมกตํ สนฺเต, อุทเก โน น อาจเมฯ
[345]
อกปฺปิยสมาทาเน, ทวา สิลาปวิชฺฌเน;
เทสนาย สภาคาย, อาวิกมฺเม จ ทุกฺกฏํฯ
[346]
ปฏิสฺสววิสํวาเท, สุทฺธจิตฺตสฺส ทุกฺกฏํ;
ปฏิสฺสวกฺขเณ เอว, ปาจิตฺติ อิตรสฺส ตุฯ
[347]
น รุกฺขมภิรูเหยฺย, สติ กิจฺเจว โปริสํ;
อาปทาสุ ยถากามํ, กปฺปตี อภิรูหิตุํฯ
[348]
วินาทฺธานํ วชนฺตสฺส, ทุกฺกฏํ ปริสาวนํ;
ยาจมานสฺส อทฺธาเน, อททนฺตสฺส ทุกฺกฏํฯ
[349]
ถุลฺลจฺจยํ ผุเส องฺคชาตจฺเฉเทน ทุกฺกฏํ;
อาพาธปฺปจฺจยาญฺญตฺร, เสสงฺเค อตฺตฆาตเนฯ
[350]
จิตฺตโปตฺถกรูปานิ, น กเร น จ การเย;
น วุฏฺฐาเปยฺย ภุญฺชนฺตํ, อารามารญฺญเคหสุฯ
[351]
ยานานิ ปุมยุตฺตานิ, สิวิกํ หตฺถวฏฺฏกํ;
ปาฏงฺกิญฺจ คิลานสฺส, กปฺปตี อภิรูหิตุํฯ
[352]
พุทฺธํ ธมฺมญฺจ สงฺฆญฺจ, อารพฺภ กรเณ ทวํ;
ทุกฺกฏํ ปริสํ วาปิ, อญฺญสฺส อุปลาฬเนฯ
[353]
กายํ อูรุํ นิมิตฺตํ วา, ภิกฺขุนีนํ น ทสฺสเย;
วิวริตฺวา น สิญฺเจยฺย, ตา กทฺทมุทกาทินาฯ
[354]
น คณฺหโต จ โอวาทํ, น ปจฺจาหรโตปิ จ;
พาลํ คิลานํ คมิยํ, วชฺชยิตฺวาน ทุกฺกฏํฯ
[355]
โลกายตํ น วาเจยฺย, ปลิตํ น จ คาหเย;
เปฬายปิ น ภุญฺเชยฺย, น กีเฬ กิญฺจิ กีฬิตํฯ
[356]
ปารุเป น นิวาเสยฺย, คิหิปารุตนิวาสนํ;
สํเวลฺลิยํ นิวาเสยฺย, ทายํ นาลิมฺปเยยฺย วาฯ
[357]
วฑฺฒิํ ปโยชเย ยาเจ, โนญฺญาตกปฺปวาริเต;
อตฺตโน ปริโภคตฺถํ, ทินฺนมญฺญสฺส โน ทเท;
อคฺคํ คเหตฺวา ภุตฺวา วา, กติปาหํ ปุโน ทเทฯ
[358]
อุทฺทิสฺส ยาจเน รกฺขํ, ญตฺวาญตฺวา ว ทณฺฑินํ;
คีวาสฺส ทณฺฑิเต ทณฺโฑ, สยํ ทณฺฑาปเน ปน;
ทณฺฑสฺส อคฺฆเภเทน, เญยฺยา ปาราชิกาทิกาฯ
[359]
หรนฺเตสุ ปริกฺขารํ, ‘‘โจโร โจโร’’ติ ภาสิเต;
อนตฺถาเยสํ คณฺหนฺเต, ทณฺฑํ คีวาสฺส ตตฺตกํฯ
[360]
วิฆาสุจฺจารสงฺการ-มุตฺตํ ฉฑฺเฑยฺย ทุกฺกฏํ;
พหิ ปาการกุฏฺฏานํ, วฬญฺเช นาวโลกิย;
หริเต วาปิ วีหาทิ-นาฬิเกราทิโรปิเมฯ
[361]
โยชาเปตุํ ปโยเชตุํ, ปยุตฺตานิ จ ปสฺสิตุํ;
น ลพฺภํ ธมฺมยุตฺตมฺปิ, นจฺจํ คีตญฺจ วาทิตํ;
‘‘อุปหารํ กโรมา’’ติ, วุตฺเต วา สมฺปฏิจฺฉิตุํฯ
[362]
ราชาคารํ โปกฺขรณิํ, อุยฺยานํ จิตฺตคารกํ;
กีฬตฺถํ คจฺฉโต ทฏฺฐุํ, อารามํ ทุกฺกฏํ กตํฯ
[363]
นเว น ปฏิพาเหยฺยา-สเนนุณฺเห น จีวรํ;
นิทเหยฺย ขมาเปยฺย, ครุนา จ ปณามิโตฯ
[364]
อกฺโกสเน ปรมฺมุขา, อาปตฺตีหิ จ สตฺตหิ;
ภิกฺขุํ อุปาสกํ วาปิ, อญฺเญเนว จ ทุกฺกฏํฯ
[365]
น ลพฺภํ วินิปาเตตุํ, สทฺธาเทยฺยญฺจ จีวรํ;
ลพฺภํ ปิตูนํ เสสานํ, ญาตีนมฺปิ น ลพฺภติฯ
[366]
วสฺสํวุตฺโถญฺญโตญฺญตฺร , ภาคํ คณฺเหยฺย ทุกฺกฏํ;
ปฏิเทยฺย นฏฺเฐ ชิณฺเณ, คีวา โน เทยฺย โจทิโต;
ธุรนิกฺเขปโต เตสํ, โหติ ภณฺฑคฺฆการิโยฯ
[367]
น สนฺตรุตฺตโร คามํ, กลฺโล วา สอุปาหโน;
ปวิเสยฺย น ธาเรยฺย, จามรีมกสพีชนิํฯ
[368]
อคิลาโน น ฉินฺเทยฺย, เกเส กตฺตริยา พหิ;
อารามโต น ธาเรยฺย, ฉตฺตํ ลพฺภติ คุตฺติยาฯ
[369]
คาเหยฺย นุภโตกาชํ, เอกนฺตริกกาชกํ;
สีสกฺขนฺธกฏิภารา, หตฺโถลมฺโพ จ ลพฺภติฯ
[370]
อาปตฺติยา อโนกาส-กตํ โจเทยฺย ทุกฺกฏํ;
สุทฺธสฺส จ อวตฺถุสฺมิํ, ตถา โอกาสการเณฯ
[371]
อฏฺฐงฺคุลาธิกํ มญฺจปฏิปาทํ น ธารเย;
ปกตงฺคุเลน สตฺตานํ, มญฺจํ วา อุจฺจปาทกํฯ
[372]
มูคพฺพตาทิํ คณฺเหยฺย, ทุกฺกฏํ ติตฺถิยพฺพตํ;
ขุรภณฺฑํ ปริหเร, ตถา นฺหาปิตปุพฺพโกฯ
[373]
ยํ กิญฺจิ ยาจิตุํ หตฺถกมฺมํ ตทนุสารโต;
ลทฺธํ คเหตุํ นิกฺกมฺมมยาจิตฺวาปิ กปฺปติ;
กาเรตุมาหราเปตุํ, ยํ กิญฺจิปรสนฺตกํฯ
[374]
คิหีนํ โคปเก เทนฺเต, คเหตุํ เทติ ยตฺตกํ;
ลพฺภํ ยถาปริจฺเฉทํ, สงฺฆเจติยสนฺตเกฯ
[375]
ทฺวีหาปชฺเชยฺย อาปตฺติํ, กายวาจาหิ วา ฉหิ;
อลชฺชิญฺญาณกุกฺกุจฺจปกตตฺตา สติปฺลวา;
อกปฺปิเย วา กปฺปิเย, กปฺปากปฺปิยสญฺญิตาฯ
[376]
อลชฺชิญฺญาณตาปตฺติํ , กายวาจาหิ ฉาทเย;
ลิงฺเค สงฺเฆ คเณกสฺมิํ, จตุธาปตฺติวุฏฺฐิติฯ
[377]
ปริกโถภาสวิญฺญตฺติ, น ลพฺภา ปจฺจยทฺวเย;
วิญฺญตฺติเยว ตติเย, เสเส สพฺพมฺปิ ลพฺภติฯ
[378]
น รูหตจฺจเย ทานํ, ปญฺจนฺนํ สหธมฺมินํ;
สงฺฆสฺเสว จ ตํ โหติ, คิหีนํ ปน รูหติฯ
[379]
ภิกฺขุ วา สามเณโร วา, กาลํ กยิราถูปสฺสเย;
ภิกฺขุสงฺโฆว ทายชฺโช, ตตฺถ เสเสปฺยยํนโยฯ
[380]
ปุริมสฺเสวิมํ ทินฺนํ, เทหิ เนตฺวาสุกสฺสติ;
ปจฺฉิมสฺเสว ทมฺมีติ, ทินฺนํ ญตฺวา อิมํ วิธิํ;
คณฺเห วิสฺสาสคาหํ วาธิฏฺเฐ มตกจีวรํฯ
[381]
โลหภณฺเฑ ปหรณิํ, ทารุภณฺเฑ จ ทารุชํ;
ปตฺตํ ปาทุกปลฺลงฺกํ, อาสนฺทิํ มตฺติกามเย;
ฐเปตฺวา กปฺปติ สพฺพํ, กตกํ กุมฺภการิกนฺติฯ
42. เทสนานิทฺเทโส
เทสนาติ –
[382]
จาโค โย ภิกฺขุภาวสฺส, สา ปาราชิกเทสนา;
ยถาวุตฺเตน วุฏฺฐานํ, ครุกาปตฺติเทสนาฯ
[383]
อุกฺกุฏิกํ นิสีทิตฺวา, ปคฺคณฺหิตฺวาน อญฺชลิํ;
ถุลฺลจฺจยาทิํ เทเสยฺย, เอวเมกสฺส สนฺติเกฯ