ทุติยํ อุปคจฺเฉยฺย, ฉินฺนวสฺโสนุปาคโต;

น ปกฺกเมยฺย เตมาสํ, อวสิตฺวาน จาริกํฯ

[313]

มาตาปิตูนมตฺถาย, ปญฺจนฺนํ สหธมฺมินํ;

คิลานตทุปฏฺฐาก-ภตฺตเมสิสฺสโมสธํฯ

[314]

ปุจฺฉิสฺสามิ อุปฏฺฐิสฺสํ, คนฺตฺวานภิรตํ อหํ;

วูปกาสิสฺสํ กุกฺกุจฺจํ, ทิฏฺฐิํ ครุกมาทิกํฯ

[315]

กริสฺสํ วาปิ กาเรสฺสํ, วิโนทนํ วิเวจนํ;

วุฏฺฐานํ วาปิ อุสฺสุกฺกํ, คนฺตุมิจฺเจวมาทินา;

ลพฺภํ สตฺตาหกิจฺเจน, ปหิตาปหิเตปิ วาฯ

[316]

สงฺฆกมฺเม วเช ธมฺม-สฺสวนตฺถํ นิมนฺติโต;

ครูหิ ปหิโต วาปิ, ครูนํ วาปิ ปสฺสิตุํฯ

[317]

น ภณฺฑโธวนุทฺเทส-ญาตุปฏฺฐากทสฺสเน;

ลพฺภํ น ปาปุเณยฺยชฺเช-วาคมิสฺสนฺตุทูรโคฯ

[318]

เสสญาตีหิ ปหิเต, ภิกฺขุนิสฺสิตเกน จ;

อุปาสโกปาสิกาหิ, นิทฺทิสิตฺวาว เปสิเตฯ

[319]

วสฺสจฺเฉเท อนาปตฺติ, อนฺตราเย สตตฺตโน;

สงฺฆสามคฺคิยา วา โน, ฉินฺนวสฺโส ปวารเยฯ

[320]

อชฺโฌกาเส จ รุกฺขสฺส, สุสิเร วิฏเปปิ วา;

ฉวกุฏิฉตฺตจาฏี-สูปคนฺตุํ น วฏฺฏติฯ

[321]

อเสนาสนิเกนาปิ, อุปคนฺตุํ น ลพฺภติ;

ปวาเรตุญฺจ ลพฺภติ, นาวาสตฺถวชูปโคติฯ

40. อเวภงฺคิยนิทฺเทโส

อเวภงฺคิยนฺติ –

[322]

อารามารามวตฺถูนิ, วิหาโร ตสฺส วตฺถุ จ;

มญฺโจ ปีฐํ ภิสิ พิพฺโพ-หนาทิสยนาสนํฯ

[323]

โลหกุมฺภี กฏาโห จ,

โลหภาณกวารโก;

กุฐารี วาสิ ผรสุ,

กุทฺทาโล จ นิขาทนํฯ

[324]

วลฺลิ เวฬุ ติณํ ปณฺณํ, มุญฺชปพฺพชมตฺติกา;

ทารุมตฺติกภณฺฑานิ, ปญฺเจเต อวิภาชิยาฯ

[325]

ถุลฺลจฺจยํ ภาชยโต, ภาชิตาปิ อภาชิตา;

ครุภณฺฑานิ วุจฺจนฺติ, เอเตวิสฺสชฺชิยานิ จฯ

[326]

วลฺลิฑฺฒพาหุมตฺตาปิ , เวฬุ อฏฺฐงฺคุลายโต;

ติณาทิ มุฏฺฐิมตฺตมฺปิ, ปณฺณํ เอกมฺปิ มตฺติกาฯ

[327]

ปากตา ปญฺจวณฺณา วา, สุธากงฺคุฏฺฐ อาทิกา;

ตาลปกฺกปฺปมาณาปิ, ทินฺนา วา ตตฺถชาตกาฯ

[328]

รกฺขิตา สงฺฆิกา รชฺชุ-โยตฺตาทีปิ อภาชิยา;

นิฏฺฐิเต ภาชิยา กมฺเม, สงฺฆิเก เจติยสฺส วาฯ

[329]

ปตฺตาทิ ภิกฺขุสารุปฺปํ, ตถา วิปฺปกตากตํ;

ภาชิยํ โลหภณฺเฑสุ, วารกํ ปาทคณฺหกํฯ

[330]

เวฬุมฺหิ ภาชิยา เตล-นาฬิ กตฺตรทณฺฑโก;

ฉตฺตทณฺฑสลากาโย, ตโถปาหนทณฺฑโกฯ

[331]

อนุญฺญาตวาสิทณฺโฑ, กรณฺโฑ ปาทคณฺหโก;

อรณญฺชนิสิงฺคาทิ, ภิกฺขูปกรณํ ตถาฯ

[332]

ตจฺฉิตานิฏฺฐิตํ ทารุภณฺฑํ ทนฺตญฺจ ภาชิยํ;

ภิกฺขูปกรเณ ปาทฆฏโก มตฺติกามโยฯ

[333]

ภาชิยํ กปฺปิยํ จมฺมํ, เอฬจมฺมมภาชิยํ;

ครุนา ครุภณฺฑญฺจ, ถาวรํ ถาวเรน จฯ

[334]

ถาวรํ ปริวตฺเตยฺย, ตถา กตฺวา จ ภุญฺชตุ;

วลฺลาทิํ ผาติกมฺเมน, คณฺเห เสสมภาชิยนฺติฯ

41. ปกิณฺณกนิทฺเทโส

ปกิณฺณกนฺติ –

[335]

สทฺวารพนฺธเน ฐาเน, โสทุกฺขลกปาสเก;

สยนฺเตน ทิวา ทฺวารํ, พนฺเธยฺย ปริวฏฺฏกํฯ

[336]

สนฺเต วิญฺญุมฺหิ ปุริเส, อาโภโค จาปิ กปฺปติ;

สวเส ตํ วินาการํ, สยนฺโต ทุกฺกฏํ ผุเสฯ

[337]

รตนานิตฺถิรูปานิ, ธญฺญมิตฺถิปสาธนํ;

ตูริยาวุธภณฺฑานิ, อามสนฺตสฺส ทุกฺกฏํฯ

[338]

สิตฺถเตโลทเตเลหิ, ผณหตฺถผเณหิ วา;

โกจฺเฉนวาปิ โย เกเส, โอสณฺเฐยฺยสฺส ทุกฺกฏํฯ

[339]

เนกปาวุรณา เอกตฺถรณา วา ตุวฏฺฏยุํ;

ตเถกมญฺเจ ภุญฺเชยฺยุํ, เอกสฺมิํ วาปิ ภาชเนฯ

[340]

จตุรงฺคุลโต อูนมธิกฏฺฐงฺคุลํ ตถา;

ทนฺตกฏฺฐํ น ขาเทยฺย, ลสุณํ น อกลฺลโกฯ

[341]

หีนุกฺกฏฺเฐหิ อุกฺกฏฺฐํ, หีนํ วา ชาติอาทิหิ;

อุชุํ วาญฺญาปเทเสน, วเท ทุพฺภาสิตํ ทวาฯ

[342]

ทีเฆ นเข จ เกเส จ, นาสโลเม น ธารเย;

น ลพฺภํ วีสติมฏฺฐํ, สมฺพาเธ โลมหารณํฯ

[343]

ยถาวุฑฺฒํ น พาเธยฺย, สงฺฆุทฺทิฏฺฐํว สงฺฆิกํ;

อโธตอลฺลปาเทหิ, นกฺกเม สยนาสนํ;

สุโธตปาทกํ วาปิ, ตเถว สอุปาหโนฯ

[344]