26. สมานาสนิกนิทฺเทสวณฺณนา

[195] ติวสฺสนฺตรเมกมาสนํ ภิกฺขูนํ อนุญฺญาตนฺติ สมฺพนฺโธฯ ตตฺถ เอกสฺมิํ อาสเน มญฺจาทิเก ทฺวินฺนํ อาสนํ นิสีทนํ เอกมาสนํฯ ม-กาโร สนฺธิโชฯ กีทิสนฺติ อาห ‘‘ติวสฺสนฺตร’’นฺติฯ ติณฺณํ วสฺสานมนฺตรเมตสฺสาติ ติวสฺสนฺตโร, ทฺวีหิ วสฺเสหิ มหนฺตตโร วา ทหรตโร วา ภิกฺขุ, โส อสฺส อตฺถีติ ติวสฺสนฺตรํ, ติวสฺสนฺตรวนฺตนฺติ อตฺโถฯ โย ปน เอเกน วสฺเสน มหนฺตตโร วา ทหรตโร วา เอกวสฺโสเยว วา, ตพฺพนฺตตาย วตฺตพฺพเมว นตฺถิฯ อถ วา ติวสฺสนฺตรนฺติ กรณตฺเถ อุปโยควจนํ, ติวสฺสนฺตเรน สทฺธินฺติ อตฺโถฯ ตเมว สมตฺเถติ ‘‘สตฺตวสฺเส’’จฺจาทินาฯ

[196] มุนิ อนุญฺญาสีติ สมฺพนฺโธฯ สพฺเพเหวาติ สมานาสนิกอสมานาสนิเกหิ สพฺเพเหว สทฺธิํฯ

[197] ทีฆาสนํ ทสฺเสติ ‘‘อนฺต’’นฺติอาทินาฯ ยํ ติณฺณํ นิสีทิตุํ ปโหติ, ตํ อนฺตํ ทีฆาสนนฺติ สมฺพนฺโธฯ อนฺตนฺติ ปจฺฉิมํฯ อทีฆาสเน ปน สมานาสนิกา นิสีทิตุํ ลพฺภนฺตีติ ทสฺเสนฺโต ‘‘มญฺจเก’’ติอาทิมาหฯ สพฺพตฺถ อยถากรณโต ทุกฺกฏนฺติฯ

สมานาสนิกนิทฺเทสวณฺณนา นิฏฺฐิตาฯ

27. อสํวาสนิทฺเทสวณฺณนา

[198] อุกฺขิตฺโตติ กมฺมนานาสํวาสกสงฺขาโต อาปตฺติยา อทสฺสเน, อปฺปฏิกมฺเม, ปาปิกาย ทิฏฺฐิยา อปฺปฏินิสฺสคฺเค อุกฺขิตฺตโกฯ อนุปสมฺปนฺโนติ สิกฺขมานสามเณรสามเณริสิกฺขาปจฺจกฺขาตสงฺขาโต อนุปสมฺปนฺโนฯ ฉินฺนมูลโกติ อนฺติมวตฺถุอชฺฌาปนฺโนฯ อุกฺขิตฺตเกสุ ‘‘ธมฺมวาทิโน เอเต’’ติ อุปฺปนฺนาย ลทฺธิยา นานาภูโต สํวาโส เอตสฺสาติ นานาสํวาโส, อุกฺขิตฺตานุวตฺตกสงฺขาโต ลทฺธินานาสํวาสโกฯ สีมโต นิคฺคตา นิสฺสีมา, สีมนฺตริกา พหิสีมา จ, ตตฺถ หตฺถปาเส เจปิ ฐิโต, สีมานานาสํวาสโก นิสฺสีมฏฺฐิโตฯ เวหายเส อากาเส ฐิโต เวหายสณฺฐิโต พินฺทาคเมนฯ ตตฺถ ‘‘นานาสํวาโส จา’’ติอาทินา สมาหารทฺวนฺเทปิ กฺวจิ นปุํสกลิงฺคํ พฺยภิจรตีติ นปุํสกตฺตาภาโว ยถา ‘‘มคฺคามคฺโค’’ติฯ เอกกมฺมํ เอกุทฺเทโส สมสิกฺขตาติ อยํ ติวิโธปิ สํวาโส นามฯ โส เยสํ นตฺถิ, เต อสํวาสาฯ เอเต หตฺถปาสโต พหิกรณวเสน วชฺเชตพฺพาฯ เอเตสุ หิ ติวิเธ อุกฺขิตฺตเก สติ อุโปสถาทิกํ กมฺมํ กโรนฺตสฺส ปาจิตฺติยํ, อิตเรสุ ทุกฺกฏนฺติฯ

อสํวาสนิทฺเทสวณฺณนา นิฏฺฐิตาฯ