อุปฺปนฺนปจฺจยา เอวํ, ปญฺจนฺนมฺปิ อกปฺปิยา;

อภูตาโรจนารูป-สํโวหารุคฺคหาทิสาฯ

[304]

หราเปตฺวา หริตฺวาปิ, ปิตูนํ เสสญาตินํ;

ปตฺตานํ วตฺถุปูชตฺถํ, ทาตุํ ปุปฺผานิ ลพฺภติ;

มณฺฑนตฺถญฺจ ลิงฺคาทิ-ปูชตฺถญฺจ น ลพฺภติฯ

[305]

ตถา ผลํ คิลานานํ, สมฺปตฺติสฺสริยสฺส จ;

ปริพฺพยวิหีนานํ, ทาตุํ สปรสนฺตกํฯ

[306]

ภาเชนฺเต ผลปุปฺผมฺหิ, เทยฺยํ ปตฺตสฺส กสฺสจิ;

สมฺมเตนาปโลเกตฺวา, ทาตพฺพมิตเรน ตุฯ

[307]

วิหาเร วา ปริจฺฉิชฺช, กตฺวาน กติกํ ตโต;

เทยฺยํ ยถาปริจฺเฉทํ, คิลานสฺเสตรสฺส วา;

ยาจมานสฺส กติกํ, วตฺวา รุกฺขาว ทสฺสิยาฯ

[308]

สิรีสกสวาทีนํ, จุณฺเณ เสเส จ นิจฺฉโย;

ยถาวุตฺตนโย เอว, ปณฺณมฺเปตฺถ ปเวสเยติฯ

39. วสฺสูปนายิกนิทฺเทโส

วสฺสูปนายิกา เจวาติ –

[309]

ปุริมิกา ปจฺฉิมิกา, ทุเว วสฺสูปนายิกา;

ตตฺถาลยปริคฺคาโห, วจีเภโท จ เอทิโสฯ

[310]

‘‘อิมสฺมิํ วิหาเร อิมํ, เตมาสํ วสฺสํ อุเปมิ;

อิธ วสฺสํ อุเปมี’’ติ, จิตฺตุปฺปาเทตฺถ อาลโยฯ

[311]

โนเปตุกาโม อาวาสํ, ตทหูติกฺกเมยฺย วา;

ภเวยฺย ทุกฺกฏาปตฺติ, ชานํ วานุปคจฺฉโตฯ

[312]

ทุติยํ อุปคจฺเฉยฺย, ฉินฺนวสฺโสนุปาคโต;

น ปกฺกเมยฺย เตมาสํ, อวสิตฺวาน จาริกํฯ

[313]

มาตาปิตูนมตฺถาย, ปญฺจนฺนํ สหธมฺมินํ;

คิลานตทุปฏฺฐาก-ภตฺตเมสิสฺสโมสธํฯ

[314]

ปุจฺฉิสฺสามิ อุปฏฺฐิสฺสํ, คนฺตฺวานภิรตํ อหํ;

วูปกาสิสฺสํ กุกฺกุจฺจํ, ทิฏฺฐิํ ครุกมาทิกํฯ

[315]

กริสฺสํ วาปิ กาเรสฺสํ, วิโนทนํ วิเวจนํ;

วุฏฺฐานํ วาปิ อุสฺสุกฺกํ, คนฺตุมิจฺเจวมาทินา;

ลพฺภํ สตฺตาหกิจฺเจน, ปหิตาปหิเตปิ วาฯ

[316]

สงฺฆกมฺเม วเช ธมฺม-สฺสวนตฺถํ นิมนฺติโต;

ครูหิ ปหิโต วาปิ, ครูนํ วาปิ ปสฺสิตุํฯ

[317]

น ภณฺฑโธวนุทฺเทส-ญาตุปฏฺฐากทสฺสเน;

ลพฺภํ น ปาปุเณยฺยชฺเช-วาคมิสฺสนฺตุทูรโคฯ

[318]

เสสญาตีหิ ปหิเต, ภิกฺขุนิสฺสิตเกน จ;

อุปาสโกปาสิกาหิ, นิทฺทิสิตฺวาว เปสิเตฯ

[319]

วสฺสจฺเฉเท อนาปตฺติ, อนฺตราเย สตตฺตโน;

สงฺฆสามคฺคิยา วา โน, ฉินฺนวสฺโส ปวารเยฯ

[320]

อชฺโฌกาเส จ รุกฺขสฺส, สุสิเร วิฏเปปิ วา;

ฉวกุฏิฉตฺตจาฏี-สูปคนฺตุํ น วฏฺฏติฯ

[321]

อเสนาสนิเกนาปิ, อุปคนฺตุํ น ลพฺภติ;

ปวาเรตุญฺจ ลพฺภติ, นาวาสตฺถวชูปโคติฯ

40. อเวภงฺคิยนิทฺเทโส

อเวภงฺคิยนฺติ –

[322]

อารามารามวตฺถูนิ, วิหาโร ตสฺส วตฺถุ จ;

มญฺโจ ปีฐํ ภิสิ พิพฺโพ-หนาทิสยนาสนํฯ

[323]