[167] น กเรติ หตฺถกมฺมาทิกํ ปริกมฺมํ สยมฺปิ น กเรยฺยาติ อตฺโถฯ ปฏิจฺฉาทีสูติ นิทฺธารเณ ภุมฺมํ, ชนฺตาฆรุทกวตฺถปฺปฏิจฺฉาทีนํ มชฺเฌติ อตฺโถฯ ปริกมฺเม ทุเว กปฺปิยาติ สมฺพนฺโธฯ ปริกมฺเมติ ชนฺตาฆเร อุทเกปิ อุปชฺฌายาทีนํ กตฺตพฺพปริกมฺมวิสเย, น อภิวาทนาทีสุฯ ทุเวติ ชนฺตาฆรอุทกปฺปฏิจฺฉาทโยฯ ฉาเทนฺติ เอตายาติ ฉาทิ, วตฺถสฺส ฉาทิ วตฺถจฺฉาทิฯ สพฺพตฺถาติ สพฺพกมฺเมสูติฯ

นคฺคนิทฺเทสวณฺณนา นิฏฺฐิตาฯ

19. นฺหานกปฺปนิทฺเทสวณฺณนา

[168] กปฺปนํ กปฺปิยตา กปฺโป, นฺหาเน กปฺโป นฺหานกปฺโปฯ นวโก เถรานํ ปุรโต อุปริ วา น จ นฺหาเยยฺยาติ สมฺพนฺโธฯ น จาติ นเยวฯ ปุรโตติ อภิมุเขฯ อุปรีติ นทิยา อุปริฯ

[169-171] กุฏฺฏตฺถมฺภตรุฏฺฏาเน กายํ น ฆํสเยติ สมฺพนฺโธฯ ตตฺถ กุฏฺฏํ นาม อิฏฺฐกทารุสิลาภิตฺติฯ ถมฺโภ นาม นหานติตฺเถ นิขนิตฺวา ฐปิโตฯ ตรูติ รุกฺโขฯ อฏฺฏานํ นาม ตจฺเฉตฺวา อฏฺฐปทากาเรน ราชิโย ฉินฺทิตฺวา นหานติตฺเถ นิขาตผลกํฯ คนฺธพฺพหตฺเถน วา…เป.… มลฺลเกน วา กายํ สรีเรน วา อญฺญมญฺญํ น ฆํสเยติ สมฺพนฺโธฯ คนฺธพฺพหตฺเถนาติ ทารุมยหตฺเถนฯ กุรุวินฺทกสุตฺติยาติ กุรุวินฺทกปาสาณจุณฺณานิ ลาขาย พนฺธิตฺวา กตคุฬิกาวลิยา สุตฺเตน อาวุณิตสุตฺติยาฯ มลฺลเกนาติ มกรทนฺตเก ฉินฺทิตฺวา ปทุมกณฺณิกสณฺฐาเนน กตมลฺลเกนฯ สรีเรนาติ อตฺตโน กาเยนฯ อญฺญมญฺญสฺส อญฺญมญฺญํ กิริยากรณสงฺขาเต กิริยาพฺยภิหาเร ทฺวิตฺตํฯ กปาล…เป.… ปุถุปาณิ จ สพฺเพสํ วฏฺฏตีติ สมฺพนฺโธฯ กปาลญฺจ อิฏฺฐกา จ, ตาสํ ขณฺฑานิฯ