อนุปฺปทานปฺปฏิปิณฺฑ-เวชฺชกมฺเมน วา ปน;
นาญฺเญน วาปิ สมฺพุทฺธปฺปฏิกุฏฺเฐน ชีวเยฯ
[212]
วิญฺญตฺติเนสนาภูตุลฺลปนากุหนาทิหิ;
กุลทูสาทินุปฺปนฺนปจฺจเย ปริวชฺชเยติฯ
30. วตฺตนิทฺเทโส
วตฺตนฺติ –
[213]
อาคนฺตุโก น อารามํ, ปวิเส สอุปาหโน;
สฉตฺโตคุณฺฐิโต สีเส, กริตฺวา วาปิ จีวรํฯ
[214]
ปานีเยน น โธเวยฺย, ปาเท วุฑฺฒตเรปิ จ;
อาวาสิเกภิวาเทยฺย, ปุจฺเฉยฺย สยนาสนํฯ
[215]
คมิโก ปฏิสาเมตฺวา, ทารุมตฺติกภณฺฑกํ;
วิหารญฺจ ถเกตฺวาน, อาปุจฺฉ สยนาสนํฯ
[216]
อาปุจฺฉิตพฺเพ อสติ, สํโคเปตฺวาน สาธุกํ;
ปกฺกเมยฺยญฺญถา ตสฺส, ปกฺกนฺตุํ น จ กปฺปติฯ
[217]
อาวาสิโก ปญฺญาเปยฺย, วุฑฺฒาคนฺตุสฺส อาสนํ;
อุปนิกฺขิเป ปาโทท-ปฺปภุติํ ปตฺตจีวรํฯ
[218]
ปจฺจุคฺคนฺตฺวาน คณฺเหยฺย, ปานีเยน จ ปุจฺฉเย;
อาคนฺตุเกภิวาเทยฺย, ปญฺญเป สยนาสนํฯ
[219]
อชฺฌาวุตฺถมวุตฺถํ วา, โคจราโคจรํ วเท;
วจฺจปสฺสาวฐานานิ, กติกํ เสกฺขสมฺมุติํฯ
[220]
ปเวสนิกฺขเม กาลํ, ปริโภชิยปานิยํ;
นิสินฺโนว นวกสฺส, เอตํ สพฺพํ สมุทฺทิเสติฯ
31. วิกปฺปนานิทฺเทโส
วิกปฺปนา เจวาติ –
[221]
สมฺมุขา ปรมฺมุขาติ, ทุเว วุตฺตา วิกปฺปนา;
สมฺมุขาย วิกปฺเปนฺโต, พฺยตฺตสฺเสกสฺส สนฺติเก;
‘‘อิมํ จีวรํ ตุยฺหํ, วิกปฺเปมี’’ติ ภาสเยฯ
[222]
เอตฺตาวตา นิเธตุํว, กปฺปตี น จ กปฺปติ;
ปริโภคาทิกํ เตน, อปฺปจฺจุทฺธฏภาวโตฯ
[223] ‘‘มยฺหํ สนฺตกํ ปริภุญฺช วา วิสฺสชฺเชหิ วา ยถาปจฺจยํ วา กโรหี’’ติ –
เตน ปจฺจุทฺธเฏเยว, ปริโภคาทิ กปฺปติฯ
[224]
อปรา สมฺมุขาเวกา, ภิกฺขุสฺเสกสฺส สนฺติเก;
คเหตฺวา นามเมกสฺส, ปญฺจนฺนํ สหธมฺมินํฯ
[225] ‘‘อิมํ จีวรํ ติสฺสสฺส ภิกฺขุโน, ติสฺสาย ภิกฺขุนิยา, ติสฺสสฺส สามเณรสฺส, ติสฺสาย สามเณริยา, ติสฺสาย สิกฺขมานาย วิกปฺเปมี’’ติ วตฺตพฺพํฯ
เตน ภิกฺขุนา ‘‘ติสฺสสฺส ภิกฺขุโน, ติสฺสาย ภิกฺขุนิยา, ติสฺสสฺส สามเณรสฺส , ติสฺสาย สามเณริยา, ติสฺสาย สิกฺขมานาย สนฺตกํ ปริภุญฺช วา วิสฺสชฺเชหิ วา ยถาปจฺจยํ วา กโรหี’’ติ วตฺตพฺพํฯ
[226]
ปรมฺมุขาวิกปฺปเน-กสฺสนฺติเกวมีรเย;
‘‘อิมํ จีวรํ ตุยฺหํ วิกปฺปนตฺถาย ทมฺมี’’ติฯ
[227] เตน วตฺตพฺโพ ‘‘โก เต มิตฺโต วา สนฺทิฏฺโฐ วา’’ติฯ