เมนู

26. สมานาสนิกนิทฺเทโส

สมานาสนิโกปิ จาติ –

[195]

ติวสฺสนฺตรานุญฺญาตํ, ภิกฺขูนเมกมาสนํ;

สตฺตวสฺสติวสฺเสหิ, ปญฺจวสฺโส นิสีทิตุํฯ

[196]

ฐเปตฺวา ปณฺฑกํ อิตฺถิํ, อุภโตพฺยญฺชนํ มุนิ;

ทีฆาสเน อนุญฺญาสิ, สพฺเพเหว นิสีทิตุํฯ

[197]

อนฺตํ ทีฆาสนํ ติณฺณํ, ยํ ปโหติ นิสีทิตุํ;

มญฺจเก วาปิ ปีเฐ วา, ทฺวินฺนํ ลพฺภํ นิสีทิตุนฺติฯ

27. อสํวาสิกนิทฺเทโส

อสํวาสิโก จาติ –

[198]

อุกฺขิตฺโตนุปสมฺปนฺโน, ภิกฺขุนี ฉินฺนมูลโก;

นานาสํวาสนิสฺสีม-ฏฺฐิตเวหายสณฺฐิตา;

เอกาทส อภพฺพา จ, อสํวาสาติ ทีปิตาติฯ

28. กมฺมนิทฺเทโส

กมฺมญฺจาติ –

[199]

วคฺเคน อธมฺมกมฺมํ, สมคฺเคน อธมฺมิกํ;

วคฺเคน ธมฺมกมฺมญฺจ, สมคฺเคน จ ธมฺมิกํ;

จตุตฺถํเยวานุญฺญาตํ, เสสกมฺเมสุ ทุกฺกฏํฯ

[200]

จตุวคฺโค ปญฺจวคฺโค, ทสวีสติวคฺคิโก;

ติเรกวีสติวคฺโค, ปญฺจ สงฺฆา วิภาวิตาฯ

[201]

จตุวคฺเคตฺถ อพฺภานุ-ปสมฺปทาปวารณา;

ปญฺจวคฺโค จ อพฺภานํ, มชฺฌเทสุปสมฺปทํฯ

[202]

ทสวคฺโค จ อพฺภานํ, ฐเปตฺวา สพฺพกมฺมิโก;

อิตโร สพฺพกมฺเมสุ, กมฺมปฺปตฺโตติ ทีปิโตฯ

[203]

จตุวคฺเคน กตฺตพฺเพ, จตฺตาโร ปกตตฺตกา;

กมฺมปฺปตฺตา ปเร ฉนฺทา-รหา เสเสปฺยยํ นโยฯ

[204]

จตุวคฺคาทิกตฺตพฺพํ, อสํวาสกมฺมารห;

ครุกฏฺเฐสฺวญฺญตรํ, กตฺวาน คณปูรกํ;

ปริวาสาทิกํ กมฺมํ, กตํ กุปฺปญฺจ ทุกฺกฏํฯ

[205]

อธมฺมกมฺมํ วาเรยฺย, อนฺตราเย ทุเว ตโย;

ทิฏฺฐาวิเมโกธิฏฺฐานํ, วาเรนฺเตว ตโตธิกาฯ

[206]

กมฺมารหา อสํวาสา, ขิตฺตจิตฺตทุขฏฺฏิตา;

เอเตสํ สงฺฆมชฺฌมฺหิ, ปฏิกฺเขโป น รุหติฯ

[207]

ปกตตฺเตกสีมฏฺฐ-สมสํวาสภิกฺขุโน;

อาโรเจนฺตสฺสนฺตมโส-นนฺตรสฺสาปิ รูหติฯ

[208]

โกเปตุํ ธมฺมิกํ กมฺมํ, ปฏิกฺโกเสยฺย สมฺมุขา;

ติโรกฺขา กายสามคฺคิํ, ฉนฺทํ โน เทยฺย ทุกฺกฏนฺติฯ

29. มิจฺฉาชีววิวชฺชนานิทฺเทโส

มิจฺฉาชีววิวชฺชนาติ –

[209]

ทารุํ เวฬุํ ผลํ ปุปฺผํ, จุณฺณํ นฺหานมุโขทกํ;

มตฺติกาทนฺตกฏฺฐาทิํ, น ทเท กุลสงฺคหาฯ

[210]

ปาริภฏกตามุคฺค-สูปฺยตาวตฺถุวิชฺชยา;

ปเหณทูตกมฺเมน, ชงฺฆเปสนิเยน วาฯ

[211]