สงฺขนาภิวิสาณฏฺฐิ-นฬทนฺตมยา ตถา;

ผลกฏฺฐมยา เวฬุ-ลาขาโลหมยาปิ จฯ

[186]

อญฺชนิโย สลากาโย, ธูมเนตฺตา จ ลพฺภเร;

ตถา สตฺถกทณฺฑานิ, นตฺถุทานา จ ตมฺมยาติฯ

25. อกปฺปิยสยนนิทฺเทโส

อกปฺปิยสยนานีติ –

[187]

อาสนฺที ตูลี ปลฺลงฺโก, ปฏิกํ โคนจิตฺตกํ;

ปฏลี วิกตี อุทฺท-โลมี เอกนฺตโลมิกาฯ

[188]

กุตฺตํ โกเสยฺยํ กฏฺฏิสฺสํ, หตฺถิอสฺสรถตฺถรา;

ชินปฺปเวณิกทลี-มิคปฺปวรอตฺถราฯ

[189]

สโลหิตวิตานญฺจุ-ภโตรตฺตูปธานกํ ;

อกปฺปิยานิ เอตานิ, ทุกฺกฏํ ปริภุญฺชโตฯ

[190]

อาสนฺทาทิตฺตยา เสเส, ลพฺภเต คิหิสนฺตเก;

ธมฺมาสเน จ ภตฺตคฺเค, ฆเร จาปิ นิสีทิตุํ;

ภูมตฺถรณสงฺเขเป, สยิตุญฺจาปิ กปฺปติฯ

[191]

จตุรํสปีฐา สตฺตงฺคา, ปญฺจงฺคา อุจฺจปาทกา;

ตูโลนทฺธา ฆเรเยว, มญฺจปีฐา นิสีทิตุํฯ

[192]

โจฬวากุณฺณปณฺณานํ, ติณานญฺเจว ปูริตา;

จีวรจฺฉวิโย ปญฺจ, ภิสี สพฺพตฺถ กปฺปิยาฯ

[193]

ตูลตฺตยํ ภิสิคพฺโภ, โลมานิ มิคปกฺขินํ;

พิมฺโพหเน อนุญฺญาตํ, ตูลวชฺชา มสูรเกฯ

[194]

มนุสฺสโลมมุณฺณายํ, ปณฺเณ ปุปฺผํ ตมาลกํ;

สุทฺธํ น อาสนญฺเจว, ลพฺภมปฺปฏิเวกฺขิตนฺติฯ

26. สมานาสนิกนิทฺเทโส

สมานาสนิโกปิ จาติ –

[195]

ติวสฺสนฺตรานุญฺญาตํ, ภิกฺขูนเมกมาสนํ;

สตฺตวสฺสติวสฺเสหิ, ปญฺจวสฺโส นิสีทิตุํฯ

[196]

ฐเปตฺวา ปณฺฑกํ อิตฺถิํ, อุภโตพฺยญฺชนํ มุนิ;

ทีฆาสเน อนุญฺญาสิ, สพฺเพเหว นิสีทิตุํฯ

[197]

อนฺตํ ทีฆาสนํ ติณฺณํ, ยํ ปโหติ นิสีทิตุํ;

มญฺจเก วาปิ ปีเฐ วา, ทฺวินฺนํ ลพฺภํ นิสีทิตุนฺติฯ

27. อสํวาสิกนิทฺเทโส

อสํวาสิโก จาติ –

[198]

อุกฺขิตฺโตนุปสมฺปนฺโน, ภิกฺขุนี ฉินฺนมูลโก;

นานาสํวาสนิสฺสีม-ฏฺฐิตเวหายสณฺฐิตา;

เอกาทส อภพฺพา จ, อสํวาสาติ ทีปิตาติฯ

28. กมฺมนิทฺเทโส

กมฺมญฺจาติ –

[199]

วคฺเคน อธมฺมกมฺมํ, สมคฺเคน อธมฺมิกํ;

วคฺเคน ธมฺมกมฺมญฺจ, สมคฺเคน จ ธมฺมิกํ;

จตุตฺถํเยวานุญฺญาตํ, เสสกมฺเมสุ ทุกฺกฏํฯ

[200]

จตุวคฺโค ปญฺจวคฺโค, ทสวีสติวคฺคิโก;

ติเรกวีสติวคฺโค, ปญฺจ สงฺฆา วิภาวิตาฯ

[201]

จตุวคฺเคตฺถ อพฺภานุ-ปสมฺปทาปวารณา;

ปญฺจวคฺโค จ อพฺภานํ, มชฺฌเทสุปสมฺปทํฯ

[202]