มหารงฺคมหานาม-รงฺครตฺตา จุปาหนาฯ สพฺพมญฺเชฏฺฐิกา จิตฺรา, นีลปีตาทิวทฺธิกา; ติตฺติรปตฺติกา เมณฺฑ-อชวิสาณวทฺธิกาฯ ขลฺลพทฺธา ปุฏพทฺธา, ตูลปุณฺณา จุปาหนา; ปาลิคุณฺฐิมกา โมร-ปิญฺเฉน ปริสิพฺพิตาฯ วิจฺฉิกาฬิกตา สีหพฺยคฺฆุทฺทาชินทีปินํ; มชฺชารกาฬโกลูกจมฺเมหิ จ ปริกฺขฏา; ปาทุกา สงฺกมนียา, โกจิ ธาเรยฺย ทุกฺกฏํฯ นีลาทิวณฺณํ สกลํ, ปุญฺฉิตฺวา เวกเทสกํ; อุปาหนา วฬญฺเชยฺย, หาเรตฺวา ขลฺลกาทิกนฺติฯ 23. อโนโลกิยนิทฺเทโส อโนโลกิยนฺติ – สารตฺโต อิตฺถิยา โยนิํ, มุขํ วา ภิกฺขทายิยา; ปรสฺส ปตฺตมุชฺฌานสญฺญี วา อตฺตโน มุขํ; อาทาโสทกปตฺเต วา, โอโลเกยฺยสฺส ทุกฺกฏนฺติฯ 24. อญฺชนีนิทฺเทโส วฏฺฏาฏฺฐโสฬสํสา วา, มฏฺฐา วฏฺฏติ อญฺชนี; ติสฺโสปิ มูเล คีวายํ, เลขา เอกาว พนฺธิตุํฯ ยํ กิญฺจิ รูปํ มาลาทิกมฺมํ มกรทนฺตกํ; โคมุตฺตกฑฺฒจนฺทาทิ-วิการํ เนตฺถ วฏฺฏติฯ ลพฺเภกวณฺณสุตฺเตน, สิพฺพิตุํ ถวิกา ตถา; สิปาฏิ กุญฺจิกาโกโส, สลากาปิ อจิตฺตกาฯ |