ปถวี จ ปริกฺขาโร, เภสชฺชุคฺคหทูสนํ;

วสฺสูปนายิกา เจวาเวภงฺคิยํ ปกิณฺณกํฯ

(ช)

เทสนา ฉนฺททานาทิ, อุโปสถปฺปวารณา;

สํวโร สุทฺธิ สนฺโตโส, จตุรกฺขา วิปสฺสนาติฯ

1. ปาราชิกนิทฺเทโส

ปาราชิกา จ จตฺตาโรติ –

[1]

มคฺคตฺตเย อนิกฺขิตฺตสิกฺโข สนฺถตสนฺถเต;

อลฺโลกาเส นิมิตฺตํ สํ, ติลมตฺตมฺปิ สนฺถตํฯ

[2]

อสนฺถตมุปาทิณฺณํ, ปเวสนฺโต จุโตถ วา;

ปเวสนฏฺฐิตุทฺธารปวิฏฺฐกฺขณสาทโกฯ

[3]

อาทิเยยฺย หเรยฺยาวหเรยฺย อิริยาปถํ;

โกเปยฺย ฐานา จาเวยฺย, สงฺเกตํ วีตินามเยฯ

[4]

อทินฺนํ เถยฺยจิตฺเตน, ภเว ปาราชิโกถ วา;

เถยฺยาพลกุสจฺฉนฺนปริกปฺปาวหารโก;

ภณฺฑกาลคฺฆเทเสหิ, ปริโภเคตฺถ นิจฺฉโยฯ

[5]

มนุสฺสวิคฺคหํ จิจฺจ, ชีวิตา วา วิโยชเย;

สตฺถหารกํ วาสฺส มรณเจตโน อุปนิกฺขิเปฯ

[6]

คาเหยฺย มรณูปายํ, วเทยฺย มรเณ คุณํ;

จุโต ปโยคา สาหตฺถินิสฺสคฺคาณตฺติถาวราฯ

[7]

อิทฺธิวิชฺชามยา กาลวตฺถาวุธิริยาปถา;

กฺริยาวิเสโส โอกาโส, ฉ อาณตฺตินิยามกาฯ

[8]

ฌานาทิเภท โนสนฺตมตฺตนตฺตุปนายิกํ;

กตฺวา โกฏฺฐาสเมเกกํ, ปจฺจุปฺปนฺนภวสฺสิตํฯ

[9]

อญฺญาปเทสรหิตํ , ทีเปนฺโตนธิมานิโก;

กาเยน วาจา วิญฺญตฺติ-ปเถ ญาเต จุโต ภเวฯ

[10]

ปาราชิเกเต จตฺตาโร, อสํวาสา ยถา ปุเร;

อภพฺพา ภิกฺขุภาวาย, สีสจฺฉินฺโนว ชีวิตุํฯ

[11]

ปริยาโย จ อาณตฺติ, ตติเย ทุติเย ปน;

อาณตฺติเยว เสเสสุ, ทฺวยเมตํ น ลพฺภติฯ

[12]

เสเวตุกามตาจิตฺตํ , มคฺเค มคฺคปฺปเวสนํ;

อิมํ เมถุนธมฺมสฺส, อาหุ องฺคทฺวยํ พุธาฯ

[13]

มนุสฺสสํ ตถาสญฺญี, เถยฺยจิตฺตญฺจ วตฺถุโน;

ครุตา อวหาโร จ, อทินฺนาทานเหตุโยฯ

[14]

ปาโณ มานุสฺสโก ปาณ-สญฺญิตา ฆาตเจตนา;

ปโยโค เตน มรณํ, ปญฺเจเต วธเหตุโยฯ

[15]

อสนฺตตา อตฺตนิ ปาปมิจฺฉตา-

ยาโรจนา ตสฺส มนุสฺสชาติตา;

นาญฺญาปเทโส จ ตเทว ชานนํ,

ปญฺเจตฺถ องฺคานิ อสนฺตทีปเนฯ

[16]

อสาธารณา จตฺตาโร, ภิกฺขุนีนมภพฺพกา;

เอกาทส จ วิพฺภนฺตา, ภิกฺขุนี มุทุปิฏฺฐิโกฯ

[17]

ลมฺพี มุเขน คณฺหนฺโต, องฺคชาตํ ปรสฺส จ;

ตตฺเถวาภินิสีทนฺโต, จตฺตาโร อนุโลมิกาฯ

[18]

มคฺเค มคฺคปฺปเวสนา, เมถุนสฺส อิธาคตา;

จตฺตาโรติ จตุพฺพีส, สโมธานา ปราชิกาติฯ

2. สงฺฆาทิเสสนิทฺเทโส

ครุกา นวาติ –

[19]

โมเจตุกามตา สุกฺก-สฺสุปกฺกมฺม วิโมจยํ;

อญฺญตฺร สุปินนฺเตน, สมโณ ครุกํ ผุเสฯ

[20]

อิตฺถิสญฺญี มนุสฺสิตฺถิํ, กายสํสคฺคราควา;

สมฺผุสนฺโต อุปกฺกมฺม, สมโณ ครุกํ ผุเสฯ

[21]

ตถา สุณนฺติํ วิญฺญุญฺจ, มคฺคํ วารพฺภ เมถุนํ;

ทุฏฺฐุลฺลวาจาราเคน, โอภาเสตฺวา ครุํ ผุเสฯ

[22]

วตฺวาตฺตกามุปฏฺฐาน-วณฺณํ เมถุนราคิโน;

วาจา เมถุนยุตฺเตน, ครุํ เมถุนยาจเนฯ

[23]

ปฏิคฺคเหตฺวา สนฺเทสํ, อิตฺถิยา ปุริสสฺส วา;

วีมํสิตฺวา หรํ ปจฺจา, สมโณ ครุกํ ผุเสฯ

[24]

สํยาจิตปริกฺขารํ, กตฺวาเทสิตวตฺถุกํ;

กุฏิํ ปมาณาติกฺกนฺตํ, อตฺตุทฺเทสํ ครุํ ผุเสฯ

[25]

มหลฺลกํ วิหารํ วา, กตฺวาเทสิตวตฺถุกํ;

อตฺตโน วสนตฺถาย, สมโณ ครุกํ ผุเสฯ

[26]

อมูลเกน โจเทนฺโต, โจทาเปนฺโตว วตฺถุนา;

อนฺติเมน จ จาเวตุํ, สุณมานํ ครุํ ผุเสฯ

[27]

อญฺญสฺส กิริยํ ทิสฺวา, เตน เลเสน โจทยํ;

วตฺถุนา อนฺติเมนาญฺญํ, จาเวตุํ ครุกํ ผุเสฯ

[28]

ฉาเทติ ชานมาปนฺนํ, ปริวเสยฺย ตาวตา;

จเรยฺย สงฺเฆ มานตฺตํ, ปริวุตฺโถ ฉ รตฺติโยฯ

จิณฺณมานตฺตมพฺเภยฺย, ตํ สงฺโฆ วีสตีคโณฯ

[29]