น กเร นิตฺถุนํ วจฺจํ, ทนฺตกฏฺฐญฺจ ขาทยํ;

วจฺจปสฺสาวโทณีนํ, น กเรยฺยุภยํ พหิฯ

[159]

กูเป กฏฺฐํ น ปาเตยฺย, เขฬํ ปสฺสาวโทณิยา;

นาวเลเขยฺย ผรุเส-นุหตญฺจาปิ โธวเยฯ

[160]

น นิกฺขเมยฺย สหสา-วุพฺภชิตฺวา น นิกฺขเม;

จปุ จปุ นาจเมยฺย, อุกฺลาปญฺจ วิโสธเยติฯ

17. อาปุจฺฉกรณนิทฺเทโส

อาปุจฺฉกรณนฺติ –

[161]

อนชฺฌิฏฺโฐว เถเรน, ปาติโมกฺขํ น อุทฺทิเส;

ธมฺมํ น กถเย ปญฺหํ, น ปุจฺเฉ น จ วิสฺสเชฯ

[162]

อาปุจฺฉิตฺวา กเถนฺตสฺส, ปุน วุฑฺฒตราคเม;

ปุน อาปุจฺฉนํ นตฺถิ, ภตฺตคฺเค จานุโมทโตฯ

[163]

วสนฺโต จ อนาปุจฺฉา, วุฑฺเฒเนกวิหารเก;

น สชฺฌาเยยฺย อุทฺเทสํ, ปริปุจฺฉญฺจ โน ทเทฯ

[164]

ธมฺมํ น ภาสเย ทีปํ, น กเร น จ วิชฺฌเป;

วาตปานํ กวาฏํ วา, วิวเรยฺย ถเกยฺย จฯ

[165]

จงฺกเม จงฺกมนฺโตปิ, วุฑฺเฒน ปริวตฺตเย;

เยน วุฑฺโฒ ส สงฺฆาฏิ-กณฺเณเนนํ น ฆฏฺฏเยติฯ

18. นคฺคนิทฺเทโส

นคฺโคติ –

[166]

นคฺโค มคฺคํ วเช ภุญฺเช, ปิเว ขาเท น สายเย;

น คณฺเห น ทเท เนว, วนฺเท วนฺทาปเยยฺย วาฯ

[167]

ปริกมฺมํ น กาเรยฺย, น กเร ปฏิฉาทิสุ;

ปริกมฺเม ทุเว วตฺถ-จฺฉาทิ สพฺพตฺถ กปฺปิยาติฯ

19. นฺหานกปฺปนิทฺเทโส

นฺหานกปฺโปติ –

[168]

น จ นฺหาเยยฺย เถรานํ, ปุรโตปริ วา ตถา;

ทเทยฺย โอตรนฺตานํ, มคฺคมุตฺตรมานโกฯ

[169]

กุฏฺฏตฺถมฺภตรุฏฺฏาเน, นฺหายมาโน น ฆํสเย;

กายํ คนฺธพฺพหตฺเถน, กุรุวินฺทกสุตฺติยาฯ

[170]

มลฺลเกนาญฺญมญฺญํ วา, สรีเรน น ฆํสเย;

กปาลิฏฺฐกขณฺฑานิ, วตฺถวฏฺฏิ จ วฏฺฏติฯ

[171]

สพฺเพสํ ปุถุปาณี จา-กลฺลสฺสากตมลฺลกํ;

ปาสาณเผณกถลา, กปฺปนฺติ ปาทฆํสเนติฯ

20. อวนฺทิยนิทฺเทโส

อวนฺทิโยติ –

[172]

อุกฺขิตฺตานุปสมฺปนฺน-นานาสํวาสอิตฺถิโย;

นโว จ ครุกฏฺโฐ จ, ปณฺฑโก จ อวนฺทิยาติฯ

21. จมฺมนิทฺเทโส

จมฺมนฺติ –

[173]

มิคาเชฬกจมฺมานิ, กปฺปนฺติ ปริภุญฺชิตุํ;

โรหิเตณิปสทา จ, กุรุงฺคา มิคชาติกาฯ

[174]

อนุญฺญาตตฺตยา อญฺญํ, จมฺมํ ทุกฺกฏวตฺถุกํ;

ถวิโกปาหเน จมฺมํ, สพฺพํ กปฺปติมานุสนฺติฯ

22. อุปาหนนิทฺเทโส

อุปาหนา เจวาติ –

[175]

มชฺฌเทเส น กปฺปนฺติ, คณงฺคณูปาหนา นวา;

สพฺพสฺส กปฺปนฺตาราเม, สพฺพตฺถากลฺลกสฺส จฯ

[176]