วาสตฺถาย กเต เคเห, สงฺฆิเก เวกสนฺตเก;

กปฺปิยา กุฏิ ลทฺธพฺพา, สหเสยฺยปฺปโหนเกฯ

[138]

เคเห สงฺฆสฺส เวกสฺส, กรมาเนวมีรยํ;

ปฐมิฏฺฐกถมฺภาทิํ, ฐเปยฺยุสฺสาวนนฺติกา;

‘‘กปฺปิยกุฏิํ กโรม, กปฺปิยกุฏิํ กโรมา’’ติฯ

[139]

เยภุยฺเยนาปริกฺขิตฺโต, อาราโม สกโลปิ วา;

วุจฺจเต ‘‘โคนิสาที’’ติ, สมฺมุตี สงฺฆสมฺมตาฯ

[140]

ภิกฺขุํ ฐเปตฺวา อญฺเญหิ, ทินฺโน เตสํว สนฺตโก;

อตฺถาย กปฺปกุฏิยา, เคโห คหปตี มโตฯ

[141]

อกปฺปกุฏิยา วุตฺถสปฺปิอาทีหิ มิสฺสิตํ;

วเชยฺย อนฺโตวุตฺถตฺตํ, ปุริมํ กาลิกทฺวยํฯ

[142]

เตเหว ภิกฺขุนา ปกฺกํ, กปฺปเต ยาวชีวิกํ;

นิรามิสํว สตฺตาหํ, สามิเส สามปากตาฯ

[143]

อุสฺสาวนนฺติกา เยหิ, ถมฺภาทีหิ อธิฏฺฐิตา;

เตสุเยวาปนีเตสุ, ตทญฺเญสุปิ ติฏฺฐติฯ

[144]

สพฺเพสุ อปนีเตสุ, ภเว ชหิตวตฺถุกา;

โคนิสาที ปริกฺขิตฺเต, เสสา ฉทนวิพฺภมาติฯ

15. อุปชฺฌาจริยวตฺตนิทฺเทโส

อุปชฺฌาจริยวตฺตานีติ –

[145]

นิสฺสายุปชฺฌาจริเย, วสมาโน สุเปสโล;

ทนฺตกฏฺฐาสนํ โตยํ, ยาคุํ กาเล ทเท สทาฯ

[146]

ปตฺเต วตฺตํ จเร คาม-ปฺปเวเส คมนาคเม;

อาสเน ปาทปีเฐ จ, กถโลปาหนจีวเรฯ

[147]

ปริโภชนียปานีย-วจฺจปฺปสฺสาวฐานิสุ ;

วิหารโสธเน วตฺตํ, ปุน ปญฺญาปเน ตถาฯ

[148]

น ปปฺโผเฏยฺย โสเธนฺโต, ปฏิวาเต จ สงฺคเณ;

วิหารํ ภิกฺขุ ปานีย-สามนฺตา สยนาสนํฯ

[149]

นฺหาเน นฺหาตสฺส กาตพฺเพ, รงฺคปาเก จ โธวเน;

สิพฺพเน จีวเร เถเว, รชนฺโต น วเช ฐิเตฯ

[150]

เอกจฺจสฺส อนาปุจฺฉา, ปตฺตํ วา จีวรานิ วา;

น ทเทยฺย น คณฺเหยฺย, ปริกฺขารญฺจ กิญฺจนํฯ

[151]

เอกจฺจํ ปจฺฉโต กาตุํ, คนฺตุํ วา ตสฺส ปจฺฉโต;

ปิณฺฑปาตญฺจ นินฺเนตุํ, นีหราเปตุมตฺตโนฯ

[152]

กิจฺจยํ ปริกมฺมํ วา, เกสจฺเฉทญฺจ อตฺตโน;

การาเปตุํ ว กาตุํ วา, อนาปุจฺฉา น วฏฺฏติฯ

[153]

คามํ สุสานํ นิสฺสีมํ, ทิสํ วา คนฺตุมิจฺฉโต;

อตฺตโน กิจฺจยํ วาปิ, อนาปุจฺฉา น วฏฺฏติฯ

[154]

อุปฺปนฺนํ อรติํ ทิฏฺฐิํ, กุกฺกุจฺจํ วา วิโนทเย;

กเรยฺย วาปิ อุสฺสุกฺกํ, สงฺฆายตฺเตสุ กมฺมสุฯ

[155]

คิลาเนสุ อุปฏฺเฐยฺย, วุฏฺฐานํ เนสมาคเม;

วตฺตเภเทน สพฺพตฺถ, อนาทเรน ทุกฺกฏนฺติฯ

16. วจฺจปสฺสาวฏฺฐานิกนิทฺเทโส

วจฺจปสฺสาวฏฺฐานิกนฺติ –

[156]

น กเรยฺย ยถาวุฑฺฒํ, วจฺจํ ยาตานุปุพฺพิยา;

วจฺจปสฺสาวกุฏิโย, นฺหานติตฺถญฺจ ลพฺภติฯ

[157]

ปวิเสยฺยุพฺภชิตฺวา โน, สหสา ปวิเสยฺย จ;

อุกฺกาสิตฺวาวุพฺภเชยฺย, ปาทุกาสฺเวว สณฺฐิโตฯ

[158]