นิพฺพฏฺฏพีชํ โนพีช-มกตญฺจาปิ กปฺปติ;

กฏาหพทฺธพีชานิ, พหิทฺธา วาปิ การเยฯ

[128]

เอกาพทฺเธสุ พีเชสุ, ภาชเน วาปิ ภูมิยํ;

กเต จ กปฺปิเยกสฺมิํ, สพฺเพสฺเวว กตํ ภเวฯ

[129]

นิกฺขิตฺเต กปฺปิยํ กตฺวา, มูลปณฺณานิ ชายรุํ;

กปฺปิยํ ปุน กาเรยฺย, ภูตคาโม หิ โส ตทาฯ

[130]

สปณฺโณ วา อปณฺโณ วา, เสวาโลทกสมฺภโว;

เจติยาทีสุ เสวาโล, นิพฺพฏฺฏทฺวตฺติปตฺตโก;

ภูตคาโมว พีชมฺปิ, มูลปณฺเณ วินิคฺคเตฯ

[131]

ฆฏาทิปิฏฺเฐ เสวาโล, มกุฬํ อหิฉตฺตกํ;

ทุกฺกฏสฺเสว วตฺถูนิ, ผุลฺลมพฺยวหาริกํฯ

[132]

ลาขานิยฺยาสฉตฺตานิ, อลฺลรุกฺเข วิโกปิย;

คณฺหโต ตตฺถ ปาจิตฺติ, ฉินฺทโต วาปิ อกฺขรํฯ

[133]

ปีเฬตุํ นาฬิเกราทิํ, ทารุมกฺกฏกาทินา;

ฉินฺทิตุํ คณฺฐิกํ กาตุํ, ติณาทิํ น จ กปฺปติฯ

[134]

ภูตคามํ ว พีชํ วา, ฉินฺท ภินฺโทจินาหิ วา;

ผาเลหิ วิชฺฌ ปจ วา, นิยเมตฺวา น ภาสเยฯ

[135]

อิมํ กโรหิ กปฺปิยํ, อิมํ คณฺเหทมาหร;

อิมํ เทหิ อิมํ โสเธเหวํ วฏฺฏติ ภาสิตุนฺติฯ

14. ภูมินิทฺเทโส

ภูมิโยติ –

[136]

สมฺมุตุสฺสาวนนฺตา จ, โคนิสาที คหาปติ;

กปฺปิยา ภูมิโย ยาสุ, วุตฺถํ ปกฺกญฺจ กปฺปติฯ

[137]

วาสตฺถาย กเต เคเห, สงฺฆิเก เวกสนฺตเก;

กปฺปิยา กุฏิ ลทฺธพฺพา, สหเสยฺยปฺปโหนเกฯ

[138]

เคเห สงฺฆสฺส เวกสฺส, กรมาเนวมีรยํ;

ปฐมิฏฺฐกถมฺภาทิํ, ฐเปยฺยุสฺสาวนนฺติกา;

‘‘กปฺปิยกุฏิํ กโรม, กปฺปิยกุฏิํ กโรมา’’ติฯ

[139]

เยภุยฺเยนาปริกฺขิตฺโต, อาราโม สกโลปิ วา;

วุจฺจเต ‘‘โคนิสาที’’ติ, สมฺมุตี สงฺฆสมฺมตาฯ

[140]

ภิกฺขุํ ฐเปตฺวา อญฺเญหิ, ทินฺโน เตสํว สนฺตโก;

อตฺถาย กปฺปกุฏิยา, เคโห คหปตี มโตฯ

[141]

อกปฺปกุฏิยา วุตฺถสปฺปิอาทีหิ มิสฺสิตํ;

วเชยฺย อนฺโตวุตฺถตฺตํ, ปุริมํ กาลิกทฺวยํฯ

[142]

เตเหว ภิกฺขุนา ปกฺกํ, กปฺปเต ยาวชีวิกํ;

นิรามิสํว สตฺตาหํ, สามิเส สามปากตาฯ

[143]

อุสฺสาวนนฺติกา เยหิ, ถมฺภาทีหิ อธิฏฺฐิตา;

เตสุเยวาปนีเตสุ, ตทญฺเญสุปิ ติฏฺฐติฯ

[144]

สพฺเพสุ อปนีเตสุ, ภเว ชหิตวตฺถุกา;

โคนิสาที ปริกฺขิตฺเต, เสสา ฉทนวิพฺภมาติฯ

15. อุปชฺฌาจริยวตฺตนิทฺเทโส

อุปชฺฌาจริยวตฺตานีติ –

[145]

นิสฺสายุปชฺฌาจริเย, วสมาโน สุเปสโล;

ทนฺตกฏฺฐาสนํ โตยํ, ยาคุํ กาเล ทเท สทาฯ

[146]

ปตฺเต วตฺตํ จเร คาม-ปฺปเวเส คมนาคเม;

อาสเน ปาทปีเฐ จ, กถโลปาหนจีวเรฯ

[147]

ปริโภชนียปานีย-วจฺจปฺปสฺสาวฐานิสุ ;

วิหารโสธเน วตฺตํ, ปุน ปญฺญาปเน ตถาฯ

[148]