[158] น กเรยฺย อุภยํ น กเรยฺยุภยํฯ

[159] กูเปติ (จูฬว. 374) วจฺจกูเปฯ กฏฺฐนฺติ อวเลขนกฏฺฐํฯ ปสฺสาวโทณิยา เขฬํ น กาตพฺพนฺติ อตฺโถฯ นาวเลเขยฺย ผรุเสนาติ ผาลิตกฏฺเฐน วา ขเรน วา คณฺฐิเกน วา กณฺฏเกน วา สุสิเรน วา ปูตินา วา นาวเลขิตพฺพนฺติ อตฺโถฯ อุหตญฺจาปีติ คูถมกฺขิตมฺปิ โธวเย อตฺตนา วา ปเรน วา กตนฺติ อธิปฺปาโยฯ

[160] อุพฺภชิตฺวา น นิกฺขเมติ เอตฺถ ‘‘วจฺจปาทุกาย ฐิเตน ปฏิจฺฉาเทตพฺพ’’นฺติ (จูฬว. 374) หิ วุตฺตํ, ปุน ‘‘อาจมนปาทุกายํ ฐิเตน อุพฺภชิตพฺพ’’นฺติ (จูฬว. 374) จ วุตฺตํฯ ‘‘จปุ จปู’’ติ สทฺทํ กตฺวา นาจเมยฺยาติ อตฺโถฯ วจฺจปฺปสฺสาวฏฺฐานิกวินิจฺฉโยฯ

วจฺจปฺปสฺสาวฏฺฐานิกนิทฺเทสวณฺณนา นิฏฺฐิตาฯ

17. อาปุจฺฉกรณนิทฺเทสวณฺณนา

[161] เถเรนาติ สงฺฆตฺเถเรนฯ

[162] ตตฺถ ตตฺถ สนฺนิปติตานํ สพฺเพสํ วุฑฺโฒ วุฑฺฒตโร, ตสฺมิํ วุฑฺฒตราคเม ปุน อาปุจฺฉนํ นตฺถิฯ ภตฺตคฺเค จานุโมทโตติ เอตฺถ ทานปตินา ยาจิเตน ทหเรน วุฑฺเฒน อนาปุจฺฉิตฺวา กเถตุํ วฏฺฏตีติ วทนฺติฯ

[163] เอกวิหารเกติ เอโกวรเก วุฑฺเฒน วสนฺโต อนาปุจฺฉา น สชฺฌาเยยฺยาติ อตฺโถฯ อุทฺเทสํ ปริปุจฺฉญฺจ โน ทเทติ อุทฺเทสํ วา ปริปุจฺฉํ วา โน ทเทยฺยฯ

[164] น วิวเรยฺย น ถเกยฺย จาติ สมฺพนฺโธฯ ทฺวารํ นาม มหาวฬญฺชํ, ตตฺถ อาปุจฺฉนกิจฺจํ นตฺถิฯ

[165] วุฑฺเฒน จงฺกเม จงฺกมนฺโตปิ เยน วุฑฺโฒ, เตน ปริวตฺตเยติ สมฺพนฺโธฯ อาปุจฺฉกรณวินิจฺฉโยฯ

อาปุจฺฉกรณนิทฺเทสวณฺณนา นิฏฺฐิตาฯ

18. นคฺคนิทฺเทสวณฺณนา

[166] ‘‘น ตฺเวว นคฺเคน อาคนฺตพฺพํ, โย อาคจฺเฉยฺย, อาปตฺติ ทุกฺกฏสฺสา’’ติ (ปารา. 517) วุตฺตตฺตา (จูฬว. 261;) ‘‘นคฺโค มคฺคํ น วเช’’ติ วุตฺตํฯ

[167] ปฏิจฺฉาทิสูติ ‘‘เตน โข ปน สมเยน ภิกฺขู ชนฺตาฆเรปิ อุทเกปิ ปริกมฺมํ กาตุํ กุกฺกุจฺจายนฺติฯ อนุชานามิ, ภิกฺขเว, ติสฺโส ปฏิจฺฉาทิโย ชนฺตาฆรปฺปฏิจฺฉาทิํ อุทกปฺปฏิจฺฉาทิํ วตฺถปฺปฏิจฺฉาทิ’’นฺติ เอวํ วุตฺตาสุ ตีสุ ปฏิจฺฉาทีสูติ อตฺโถฯ ทุเวติ เอตาสุ ตีสุ ปฏิจฺฉาทีสุ อุทกชนฺตาฆรปฺปฏิจฺฉาทิโย ปริกมฺเม กปฺปนฺตีติ อธิปฺปาโยฯ วตฺถจฺฉาทีติ วตฺถปฺปฏิจฺฉาทิฯ สพฺพตฺถาติ ขาทนียสายนียาทีสุ สพฺพกมฺเมสุ กปฺปิยาติ อตฺโถฯ นคฺควินิจฺฉโยฯ

นคฺคนิทฺเทสวณฺณนา นิฏฺฐิตาฯ

19. นฺหานกปฺปนิทฺเทสวณฺณนา

[168] ปุรโตติ (จูฬว. 372) เถรานํ ปุรโต อุปริ วา น จ นฺหาเยยฺยาติ อตฺโถฯ