‘‘อิมํ คเหตฺวา ภุตฺวา วา, อิมํ เทหิ กรานย;

เทมิ วา’’ติ สมาปนฺเน, นิสฺสคฺคิ กยวิกฺกเยฯ

[119]

อตฺตโน อญฺญโต ลาภํ, สงฺฆสฺสญฺญสฺส วา นตํ;

ปริณาเมยฺย นิสฺสคฺคิ, ปาจิตฺติ จาปิ ทุกฺกฏํฯ

[120]

อนิสฺสชฺชิตฺวา นิสฺสคฺคิํ, ปริภุญฺเช น เทยฺย วา;

นิสฺสฏฺฐํ สกสญฺญาย, ทุกฺกฏํ อญฺญเถตรนฺติฯ

12. ปาจิตฺติยนิทฺเทโส

ปาจิตฺตีติ –

[121]

มุสาวาโทมสาวาเท, เปสุญฺญหรเณ ตถา;

ปทโสธมฺมสาคาเร, อุชฺฌาปนกขียเนฯ

[122]

ตลสตฺติอนาทรกุกฺกุจฺจุปฺปาทเนสุ จ;

คามปฺปเวสนาปุจฺฉา, โภชเน จ ปรมฺปราฯ

[123]

อนุทฺธริตฺวา คมเน, เสยฺยํ เสนาสนานิ วา;

อิตฺถิยาทฺธานคมเน, เอเกกาย นิสีทเนฯ

[124]

ภีสาปนาโกฏนอญฺญวาเท,

วิเหสทุฏฺฐุลฺลปกาสฉาเท;

หาโสทเก นิจฺฉุภเน วิหารา,

ปาจิตฺติ วุตฺตานุปขชฺชสยเนติฯ

13. สมณกปฺปนิทฺเทโส

สมณกปฺปาติ –

[125]

ภูตคามสมารมฺเภ, ปาจิตฺติ กตกปฺปิยํ;

นเขน วาคฺคิสตฺเถหิ, ภเว สมณกปฺปิยํฯ

[126]

ส มูลขนฺธพีชคฺค-ผฬุพีชปฺปภาวิโต;

อารมฺเภ ทุกฺกฏํ พีชํ, ภูตคามวิโยชิตํฯ

[127]

นิพฺพฏฺฏพีชํ โนพีช-มกตญฺจาปิ กปฺปติ;

กฏาหพทฺธพีชานิ, พหิทฺธา วาปิ การเยฯ

[128]

เอกาพทฺเธสุ พีเชสุ, ภาชเน วาปิ ภูมิยํ;

กเต จ กปฺปิเยกสฺมิํ, สพฺเพสฺเวว กตํ ภเวฯ

[129]

นิกฺขิตฺเต กปฺปิยํ กตฺวา, มูลปณฺณานิ ชายรุํ;

กปฺปิยํ ปุน กาเรยฺย, ภูตคาโม หิ โส ตทาฯ

[130]

สปณฺโณ วา อปณฺโณ วา, เสวาโลทกสมฺภโว;

เจติยาทีสุ เสวาโล, นิพฺพฏฺฏทฺวตฺติปตฺตโก;

ภูตคาโมว พีชมฺปิ, มูลปณฺเณ วินิคฺคเตฯ

[131]

ฆฏาทิปิฏฺเฐ เสวาโล, มกุฬํ อหิฉตฺตกํ;

ทุกฺกฏสฺเสว วตฺถูนิ, ผุลฺลมพฺยวหาริกํฯ

[132]

ลาขานิยฺยาสฉตฺตานิ, อลฺลรุกฺเข วิโกปิย;

คณฺหโต ตตฺถ ปาจิตฺติ, ฉินฺทโต วาปิ อกฺขรํฯ

[133]

ปีเฬตุํ นาฬิเกราทิํ, ทารุมกฺกฏกาทินา;

ฉินฺทิตุํ คณฺฐิกํ กาตุํ, ติณาทิํ น จ กปฺปติฯ

[134]

ภูตคามํ ว พีชํ วา, ฉินฺท ภินฺโทจินาหิ วา;

ผาเลหิ วิชฺฌ ปจ วา, นิยเมตฺวา น ภาสเยฯ

[135]

อิมํ กโรหิ กปฺปิยํ, อิมํ คณฺเหทมาหร;

อิมํ เทหิ อิมํ โสเธเหวํ วฏฺฏติ ภาสิตุนฺติฯ

14. ภูมินิทฺเทโส

ภูมิโยติ –

[136]

สมฺมุตุสฺสาวนนฺตา จ, โคนิสาที คหาปติ;

กปฺปิยา ภูมิโย ยาสุ, วุตฺถํ ปกฺกญฺจ กปฺปติฯ

[137]