กาลยามมติกฺกนฺตา , ปาจิตฺติํ ชนยนฺตุโภ;

ชนยนฺติ อุโภเปเต, อนฺโตวุตฺถญฺจ สนฺนิธิํฯ

[100]

สตฺตาหกาลิเก สตฺต, อหานิ อตินามิเต;

ปาจิตฺติ ปาฬินารุฬฺเห, สปฺปิอาทิมฺหิ ทุกฺกฏํฯ

[101]

นิสฺสฏฺฐลทฺธํ มกฺเขยฺย, นงฺคํ นชฺโฌหเรยฺย จ;

วิกปฺเปนฺตสฺส สตฺตาเห, สามเณรสฺสธิฏฺฐโต;

มกฺขนาทิญฺจ นาปตฺติ, อญฺญสฺส ททโตปิ จฯ

[102]

ยาวกาลิกอาทีนิ, สํสฏฺฐานิ สหตฺตนา;

คาหาปยนฺติ สพฺภาวํ, ตสฺมา เอวมุทีริตํฯ

[103]

ปุเร ปฏิคฺคหิตญฺจ, สตฺตาหํ ยาวชีวิกํ;

เสสกาลิกสมฺมิสฺสํ, ปาจิตฺติ ปริภุญฺชโตฯ

[104]

ยาวกาลิกสมฺมิสฺสํ, อิตรํ กาลิกตฺตยํ;

ปฏิคฺคหิตํ ตทหุ, ตทเหว จ ภุญฺชเยฯ

[105]

ยามกาลิกสมฺมิสฺสํ, เสสเมวํ วิชานิยํ;

สตฺตาหกาลิกมิสฺสญฺจ, สตฺตาหํ กปฺปเตตรนฺติฯ

9. ปฏิคฺคาหนิทฺเทโส

ปฏิคฺคาโหติ –

[106]

ทาตุกามาภิหาโร จ, หตฺถปาเสรณกฺขมํ;

ติธา เทนฺเต ทฺวิธา คาโห, ปญฺจงฺเควํ ปฏิคฺคโหฯ

[107]

อสํหาริเย ตตฺถชาเต, สุขุเม จิญฺจอาทินํ;

ปณฺเณ วาสยฺหภาเร จ, ปฏิคฺคาโห น รูหติฯ

[108]

สิกฺขามรณลิงฺเคหิ, อนเปกฺขวิสคฺคโต;

อจฺเฉทานุปสมฺปนฺน-ทานา คาโหปสมฺมติฯ

[109]

อปฺปฏิคฺคหิตํ สพฺพํ, ปาจิตฺติ ปริภุญฺชโต;

สุทฺธญฺจ นาติพหลํ, กปฺปเต อุทกํ ตถาฯ

[110]

องฺคลคฺคมวิจฺฉินฺนํ, ทนฺตกฺขิกณฺณคูถกํ;

โลณสฺสุเขฬสิงฺฆาณิ-เสมฺหมุตฺตกรีสกํฯ

[111]

คูถมตฺติกมุตฺตานิ, ฉาริกญฺจ ตถาวิเธ;

สามํ คเหตฺวา เสเวยฺย, อสนฺเต กปฺปการเกฯ

[112]

ทุรูปจิณฺเณ รโชกิณฺเณ, อถุคฺคหปฺปฏิคฺคเห;

อนฺโตวุตฺเถ สยํปกฺเก, อนฺโตปกฺเก จ ทุกฺกฏนฺติฯ

10. อกปฺปิยมํสนิทฺเทโส

มํเสสุ จ อกปฺปิยนฺติ –

[113]

มนุสฺสหตฺถิอสฺสานํ, มํสํ สุนขทีปินํ;

สีหพฺยคฺฆตรจฺฉานํ, อจฺฉสฺส อุรคสฺส จฯ

[114]

อุทฺทิสฺสกตมํสญฺจ, ยญฺจ อปฺปฏิเวกฺขิตํ;

ถุลฺลจฺจยํ มนุสฺสานํ, มํเส เสเสสุ ทุกฺกฏํฯ

[115]

อฏฺฐีปิ โลหิตํ จมฺมํ, โลมเมสํ น กปฺปติ;

สจิตฺตกํว อุทฺทิสฺส-กตํ เสสา อจิตฺตกาติฯ

11. นิสฺสคฺคิยนิทฺเทโส

นิสฺสคฺคิยานีติ –

[116]

อรูปิยํ รูปิเยน, รูปิยํ อิตเรน จ;

รูปิยํ ปริวตฺเตยฺย, นิสฺสคฺคิ อิธ รูปิยํฯ

[117]

กหาปโณ สชฺฌุ สิงฺคี, โวหารูปคมาสกํ;

วตฺถมุตฺตาทิ อิตรํ, กปฺปํ ทุกฺกฏวตฺถุ จฯ

[118]