ปจฺฉา อาคตานํ ทาตพฺพเมวาติ ทุติยภาเค อทาตพฺเพเยว ปจฺฉา อาคตานํ ทาตพฺพเมวฯ สพฺพสนฺนิปาตฏฺฐาเนเยวาติ สพฺเพสํ ภิกฺขูนํ สนฺนิปาตฏฺฐาเนวฯ ภาชนียภณฺฑํ นาม ภาชนฏฺฐานํ สมฺปตฺตสฺเสว ปาปุณาติ, น อสมฺปตฺตสฺสฯ สพฺพสนฺนิปาตฏฺฐาเน จ เยภุยฺเยน สมฺปตฺโต โหติ, เตน วุตฺตํ ‘‘สพฺพสนฺนิปาตฏฺฐาเนเยวา’’ติฯ

ยถาฐิตํเยวาติ กิญฺจิ อภาเชตฺวา ยถาฐิตํเยวฯ ‘‘ทุคฺคหิต’’นฺติ วตฺวา ตทตฺถํ ทสฺเสนฺโต อาห ‘‘ตํ คตคตฏฺฐาเน สงฺฆิกเมว โหตี’’ติฯ อาวชฺเชตฺวาติ ปริณาเมตฺวาฯ ตมฺปีติ ถาลเก ปกฺขิตฺตํ สพฺพิมฺปิฯ ถินนฺติ ฆนภาเวน ติฏฺฐตีติ ถินํ, ฆนนฺติ วุตฺตํ โหติฯ วุตฺตปริจฺเฉทโตติ ‘‘ทส ภิกฺขู, ทเสว จ สพฺพิกุมฺภา’’ติ วุตฺตปริจฺเฉทโตฯ

คาถายํ ปาฬินฺติ วินยปาฬิํฯ อฏฺฐกถญฺเจวาติ ตสฺสา อฏฺฐกถญฺเจวฯ วิจกฺขโณติ วิวิธํ อตฺถํ จกฺขติ ปสฺสตีติ วิจกฺขโณฯ เอวนฺติ ยถาวุตฺตนเยนฯ ตตฺรายํ โยชนา – เอวํ วิจกฺขโณ ภิกฺขุ ปาฬิํ, อฏฺฐกถญฺเจว โอโลเกตฺวา อปฺปมตฺโตว หุตฺวา สงฺฆิเก ปจฺจเย ภาชเยติฯ

อิติ ปจฺจยภาชนียกถาย โยชนา สมตฺตาฯ

อุปฑฺฒภาโคติ ภิกฺขูนํ ลทฺธภาคโต อุปฑฺโฒ ภาโคฯ เสสํ สุวิญฺเญยฺยเมวฯ

อิติ เสนาสนกฺขนฺธกวณฺณนาย โยชนา สมตฺตาฯ

7. สงฺฆเภทกกฺขนฺธกํ