เมนู

[310] เถโรติ สาริปุตฺตตฺเถโร, อาคจฺฉตีติ สมฺพนฺโธฯ อิทนฺติ คิลานปฏิชคฺคนาทิฯ อสฺสาติ เถรสฺสฯ อคฺคาสนนฺติอาทีสุ อคฺคสทฺโท ปฐมตฺโถปิ อุตฺตมตฺโถปิ ยุชฺชติฯ เตน วุตฺตํ ‘‘เถราสน’’นฺติอาทิฯ อนฺตรา สตฺถีนนฺติ เอตฺถ อนฺตราติ ภุมฺมตฺเถ นิสฺสกฺกวจนํฯ สตฺถิสทฺโท จ อูรุสงฺขาโต ปาทวาจโกติ อาห ‘‘จตุนฺนํ ปาทานํ อนฺตเร’’ติฯ

[315] ปติฏฺฐาเปสีติ เอตฺถ กํ วยํ กตฺวา ปติฏฺฐาเปสีติ อาห ‘‘อฏฺฐารสโกฏิปริจฺจาคํ กตฺวา’’ติฯ เอวนฺติอาทิ นิคมนํฯ

อาสนปฺปฏิพาหนาทิกถา

[316] วิปฺปกตโภชเนนาติ เอตฺถ วิปฺปกตสทฺโท อนิฏฺฐิตปริยาโยติ อาห ‘‘อนิฏฺฐิเต โภชเน’’ติฯ ปกิริยิตฺถ, ปกิริยิสฺสเต วา ปกตํ, น ปกตํ วิปฺปกตนฺติ วิคฺคโห กาตพฺโพ, อตฺถโต ปน ‘‘กริยมาโน อนิฏฺฐิโต’’ติ วุตฺตํ โหติฯ เอตฺถาติ ฐาเนฯ อติสมีปนฺติ ภุญฺชมานสฺส ภิกฺขุสฺส อติอาสนฺนํฯ ตสฺสาติ ภุญฺชมานสฺส ภิกฺขุสฺสฯ ปิวิตฺวา วาติ ยาคุํ ปิวิตฺวา วาฯ ขาทิตฺวา วาติ ขชฺชกํ ขาทิตฺวา วาฯ ริตฺตหตฺถมฺปีติ ตุจฺฉหตฺถมฺปิฯ ปิสทฺเทน อามิสหตฺถํ ปน ปเควาติ ทสฺเสติฯ หีติ สจฺจํ, ยสฺมา วาฯ โสติ ริตฺตหตฺโถ ภิกฺขุฯ

อาปตฺตินฺติ ทุกฺกฏาปตฺติํฯ นฺติ วิปฺปกตโภชนํ ภิกฺขุํฯ โสติ ปจฺฉา อาคโต ภิกฺขุฯ อยญฺจ ภิกฺขูติ วิปฺปกตโภชโน อยญฺจ ภิกฺขุฯ เตนาติ วิปฺปกตโภชเนน นวเกน วา วุฑฺฒตเรน วา ภิกฺขุนาฯ กิํ นวเกน วุฑฺฒตรํ อาณาเปตุํ วฏฺฏตีติ อาห ‘‘วุฑฺฒตรํ หี’’ติอาทิฯ หีติ สจฺจํ, ยสฺมา วาฯ โสติ วุฑฺฒตโร ภิกฺขุฯ ตโตติ อุทกํ อาหราเปตุํ อาณตฺติโตฯ นฺติ กมฺมํฯ

โยติ ภิกฺขุฯ ‘‘เอวรูปสฺสา’’ติ ปเทน ตสฺส นิยมนํ เวทิตพฺพํฯ กาสสฺส เขฬมลฺลกํ ฐเปตพฺพํฯ