ปุริมสฺมิํ อาวาเสติ สมฺพนฺโธ ฯ ตโตติ เอตฺถ ตสทฺทสฺส วิสยํ ทสฺเสนฺโต อาห ‘‘พหุตรํ วสิตวิหารโต’’ติฯ อิทญฺจาติ ‘‘อมุตฺร อุปฑฺโฒ จีวรปฏิวีโส ทาตพฺโพ’’ติ วจนญฺจฯ เอกสีมวิหาเรหีติ เอกิสฺสํ อุปจารสีมายํ ฐิเตหิ วิหาเรหิฯ นานาสีมวิหาเรติ นานาอุปจารสีมายํ ฐิเต วิหาเรฯ เสนาสนคฺคาโหติ ปุริมอุปจารสีมายํ เสนาสนคฺคาโหฯ ตตฺถาติ ปสฺสมฺภนวิหาเรฯ เสสนฺติ จีวรโต เสสํฯ สพฺพตฺถาติ สพฺเพสุ วิหาเรสุฯ อนฺโตสีมคตสฺสาติ อนฺโตอุปจารสีมายํ คตสฺส, ภิกฺขุโนติ สมฺพนฺโธฯ จีวรํ เสนาสนคฺคาหสฺเสว ปาปุณาติ, เสสํ ปน อามิสเภสชฺชาทิสพฺพํ อญฺญวิหารโต อาคนฺตฺวา อนฺโตสีมคตสฺส ปาปุณาตีติ อธิปฺปาโยฯ

224. คิลานวตฺถุกถา

[365] มญฺจเก นิปาเตสุนฺติ เอตฺถ มญฺจเก นิปาตนํ นาม มญฺจเก นิปชฺชาปนนฺติ อาห ‘‘มญฺจเก นิปชฺชาเปสุ’’นฺติฯ มุตฺตกรีสกิลิฏฺฐนฺติ มุตฺตกรีเสหิ กิลิฏฺฐํฯ โยติ โย โกจิฯ มนฺติ มมฯ ตมตฺถํ ทสฺเสนฺโต อาห ‘‘โอวาทานุสาสนีกรเณนา’’ติฯ มม โอวาทสฺส จ อนุสาสนิยา จ กรเณนาติ อตฺโถฯ เอตฺถาติ ‘‘โย ภิกฺขเว มํ อุปฏฺฐเหยฺยา’’ติอาทิปาเฐฯ สุตฺตสฺส เนยฺยตฺถตฺตา อคเหตพฺพตฺถํ ทสฺเสนฺโต อาห ‘‘ภควโต จา’’ติอาทิฯ ยสฺสาติ คิลานสฺสฯ อุปชฺฌายาทโยติ เอตฺถ อาทิสทฺเทน อาจริยสทฺธิวิหาริกอนฺเตวาสิกสมานุปชฺฌายกสมานาจริยกสงฺขาเต ปญฺจ ชเน สงฺคณฺหาติฯ เอกจาริโก วา โหตีติ สมฺพนฺโธฯ สงฺฆตฺเถโรปีติ ปิสทฺโท ปเคว อญฺเญสนฺติ ทสฺเสติฯ

[366] อภิกฺกมนฺตํ วาติ เอตฺถ อภิมุขํ กมตีติ อภิกฺกมนฺโตติ วุตฺเต วฑฺฒนตฺโถติ อาห ‘‘วฑฺฒนฺตํ วา’’ติฯ อาพาธํ นาวิกโรตีติ สมฺพนฺโธฯ อิมินา อนฺตปจฺจยสฺส สรูปํ ทสฺเสติฯ อิทํ นาม โภชนนฺติ สมฺพนฺโธฯ