[309] เอวํ จตุวีสติอาการํ อนตฺถตลกฺขณํ ทสฺเสตฺวา อิทานิ สตฺตรสาการํ อตฺถตลกฺขณํ ทสฺเสนฺโต อาห ‘‘อหเตนา’’ติอาทิ ฯ ตตฺถ ปริโภคํ น หนิตฺถ น คจฺฉิตฺถาติ อหตํ, ปริโภเคน น หนิตพฺพํ น หิํสิตพฺพนฺติ วา อหตนฺติ ทสฺเสนฺโต อาห ‘‘อปริภุตฺเตนา’’ติฯ ‘‘อหตสทิเสนา’’ติ อิมินา อหตกปฺเปนาติ เอตฺถ กปฺปสทฺโท สทิสตฺโถติ ทสฺเสติฯ ปาปณิเกนาติ เอตฺถ ปสาริโต อาปโณ ปาปโณ, ตสฺมิํ ปติตํ ปาปณิกนฺติ ทสฺเสนฺโต อาห ‘‘อาปณทฺวาเร ปติต’’นฺติฯ ‘‘ปิโลติก’’นฺติ อิมินา ณิกปจฺจยสฺส สรูปํ ทสฺเสติฯ วุตฺตวิปลฺลาเสเนวาติ วุตฺเตหิ ‘‘นิมิตฺตกเตนา’’ติอาทีหิ วิปลฺลาเสน เอวฯ ตตฺถาติ ปริวาเร ฯ หีติ สจฺจํ, ยสฺมา วาฯ อิธาติ กถินกฺขนฺธเกฯ อวุจฺจมาเนน เตน วจเนน ปริหายตีติ สมฺพนฺโธฯ

[310] ตตฺถาติ ‘‘กถญฺจ ภิกฺขเว อุพฺภตํ โหติ กถิน’’นฺติอาทิปาเฐฯ ชเนตฺติโย มาตโรติ โยชนาฯ อิมินา ธมฺเมน ปุตฺเต มาเนตีติ มาตา, ธมฺเมน ปุตฺเตหิ มานิยตีติ วา มาตา, สา วิย โหนฺตีติ มาติกาติ ทสฺเสติฯ กถินุพฺภารนฺติ จ กถินุทฺธารนฺติ จ อตฺถโต สทิสํฯ เอตาติ เอตา ปทชาติโยฯ ตาสูติ อฏฺฐสุ มาติกาสุฯ อสฺสาติ กถินุพฺภารสฺสฯ

188. อาทายสตฺตกกถา

[311] น ปจฺเจสฺสนฺติ เอตฺถ ปตีตฺยูปสคฺคสฺส ปุนตฺถํ, อิธาตุยา จ คตฺยตฺถํ ทสฺเสนฺโต อาห ‘‘น ปุน อาคมิสฺส’’นฺติฯ เอวํ ปกฺกมโต ฉิชฺชตีติ สมฺพนฺโธฯ

เอตญฺจาติ ปกฺกมนนฺติกํ, กถินุทฺธารญฺจฯ ตาหนฺติ เต อหํฯ เตติ ตุยฺหํฯ

อญฺญนฺติ อตฺตโน วิหารโต อญฺญํฯ เอวํ โหตีติ เอโส ปริวิตกฺโก โหติฯ โสติ อาวาสปลิโพโธฯ อาทิจฺจพนฺธุนา วุตฺโตติ โยชนาฯ

ทฺเว ปลิโพธา เอกโต ฉิชฺชนฺตีติ สมฺพนฺโธฯ อปุพฺพํ อจริมนฺติ เอกปหาเรเนวฯ โส ปลิโพธูปจฺเฉโท กสฺมา วิตฺถารโต น วุตฺโตติ อาห ‘‘โส ปนา’’ติอาทิฯ

โส ปนาติ ปลิโพธูปจฺเฉโท ปนฯ น วุตฺโตติ สมฺพนฺโธฯ เอตฺถาติ อิมสฺมิํ กถินุพฺภาเรฯ กสฺมา อยํ กถินุทฺธาโร ‘‘นาสนนฺติโก’’ติ วุตฺโตติ อาห ‘‘ยสฺมา’’ติอาทิฯ ตสฺสาติ ภิกฺขุโนฯ

อาสาวจฺเฉทิเก ฉิชฺชตีติ สมฺพนฺโธฯ อยํ ปนาติ อาสาวจฺเฉทิโก กถินุทฺธาโร ปนฯ อเนกปเภโท โหตีติ สมฺพนฺโธฯ ตสฺสาติ ภิกฺขุสฺสฯ วุตฺโตติ อยํ อาสาวจฺเฉทิโก กถินุทฺธาโร วุตฺโตติ โยชนาฯ เอตฺถ ปนาติ อิมสฺมิํ ปน ฐาเนฯ ตตฺถาติ สีมาติกฺกนฺติเกฯ

[312-325] เอวนฺติอาทิ นิคมนํฯ สตฺตเกติ อฏฺฐสุ มาติกาสุ อาสาวจฺเฉทโต เสเส สตฺตปมาเณ, สตฺตสมูเห วาฯ เตเยวาติ สตฺตเก เอวฯ ตโตติ วารโตฯ เย เยติ กถินุทฺธาราฯ อิตเรหีติ อาสาวจฺเฉทโต อญฺเญหิฯ เย ปลิโพธา วุตฺตาติ สมฺพนฺโธฯ อาวาโส จชียติ อเนนาติ จตฺตนฺติ วจนตฺถํ ทสฺเสนฺโต อาห ‘‘เยน จิตฺเตนา’’ติอาทิฯ ตนฺติ จิตฺตํฯ ‘‘เอเสว นโย’’ติ อิมินา อาวาโส วมียติ อเนนาติ วนฺตํฯ อาวาสโต มุจฺจติ อเนนาติ มุตฺตนฺติ วจนตฺถํ อติทิสติฯ สพฺพตฺถาติ สพฺพสฺมิํ กถินกฺขนฺธเกฯ

อิติ กถินกฺขนฺธกวณฺณนาย โยชนา สมตฺตาฯ

8. จีวรกฺขนฺธกํ