84. ปกฺขคณนาทิอุคฺคหณานุชานนกถา

[156] กตินํ ปูรณีติ กตินํ ติถีนํ ปูรณีฯ โก ทิวโสติ กิตฺตโก ทิวโสฯ อยฺยายตฺตนฺติ อยฺเยหิ ภิกฺขูหิ อายตฺตํ อาพทฺธํฯ สํหริตฺวาติ ปุน สลากํ สํหริตฺวาฯ อยํ ปาโฐ เกสุจิ อฏฺฐกถาโปตฺถเกสุ นตฺถิฯ กาลวโตติ เอตฺถ วนฺตุปจฺจโย สฺวตฺโถติ อาห ‘‘กาลสฺเสวา’’ติฯ เอวสทฺโท ปน สมฺภวโต ยุชฺชิยติฯ ปเควาติ ปาโตวฯ

[158] สายมฺปีติ สายนฺเหปิฯ ปิสทฺเทน อญฺญมฺปิ สรณกาลํ สมฺปิณฺเฑติฯ

[159] อาณาเปตุนฺติ เอตฺถ อนาณาเปตพฺพภิกฺขู อปเนตฺวา อาณาเปตพฺพภิกฺขู ทสฺเสตุํ วุตฺตํ ‘‘กิญฺจิ กมฺม’’นฺติอาทิฯ สทากาลเมว กิญฺจิ กมฺมํ กโรนฺโตติ โยชนาฯ ธมฺมกถิกาทีสูติอาทิสทฺเทน คณวาจกาทโย สงฺคณฺหาติฯ วาเรนาติ ปริยาเยนฯ สมฺมุญฺจนินฺติ ยฏฺฐิสมฺมุญฺจนิํ วา มุฏฺฐิสมฺมุญฺจนิํ วาฯ สมํ, สุฏฺฐุ วา มุญฺจติ โสเธติ อิมายาติ สมฺมุญฺจนี, ตาลุโช ปฐโมฯ ตมฺปีติ สาขาภงฺคมฺปิฯ

[160] วุตฺตนเยเนวาติ สมฺมชฺชเน วุตฺตนเยเนวฯ ปุน อาหริตพฺพานีติ สงฺฆิกาวาสํ อาสนานิ ปุน อาหริตพฺพานิฯ ตฏฺฏิกาโยปีติ เวณุอาทิมยา ตฏฺฏิกาโยปิฯ

[161] กปลฺลิกา วาติ กปาเลสุ ปริยาปนฺนา ปทีปกปาลา วาฯ ตนฺติ เตลาทิํฯ ปริเยสิตพฺพานีติ อนวชฺชปริเยสเนน ปริเยสิตพฺพานิฯ