2. ทุติยนิสฺสคฺคิยปาจิตฺติยสิกฺขาปทํ

[738] ทุติเย อหตโจฬานมฺปิ เสทมลาทิกิลินฺเน วิรูปตฺตา ‘‘ชิณฺณโจฬา’’ติ วุตฺตํฯ ‘‘อปิ อยฺยาหี’’ติอิมินา ‘‘อป อยฺยาหี’’ติปทวิภาคํ นิวตฺเตติฯ

[740] สพฺพมฺปิ เอตํ จีวรนฺติ โยชนาฯ เอวํ ปฏิลทฺธนฺติ เอวํ นิสฺสชฺชิตฺวา ลทฺธํฯ ยถาทาเนเยวาติ ยถา ทายเกหิ ทินฺนํ, ตสฺมิํ ทาเนเยว อุปเนตพฺพํ, อกาลจีวเรเยว ปกฺขิปิตพฺพนฺติ อตฺโถติฯ ทุติยํฯ

3. ตติยนิสฺสคฺคิยปาจิตฺติยสิกฺขาปทํ

[743] ตติเย หนฺทสทฺโท ววสฺสคฺคตฺเถ นิปาโตติ อาห ‘‘หนฺทาติ คณฺหา’’ติฯ พหูนิ นิสฺสคฺคิยานีติ สมฺพนฺโธฯ สํหริตฺวาติ วิสุํ วิสุํ สงฺฆริตฺวาติฯ ตติยํฯ

4. จตุตฺถนิสฺสคฺคิยปาจิตฺติยสิกฺขาปทํ

[748] จตุตฺเถ กิณาติ อเนนาติ กยนฺติ วจนตฺเถน มูลํ กยํ นามาติ อาห ‘‘มูเลนา’’ติฯ สาติ ถุลฺลนนฺทา, อาห กิราติ สมฺพนฺโธฯ ญาธาตุยา อวโพธนตฺถโต อญฺญมฺปิ ญาธาตุยา ยาจนตฺถํ ทสฺเสนฺโต อาห ‘‘ยาจิตฺวา วา’’ติฯ

[752] ยนฺติ สพฺพิเตลาทิฯ ตญฺเญวาติ สพฺพิเตลาทิเมวฯ ยมกนฺติ สพฺพิํ สห เตเลน ยุคฬํ กตฺวาฯ เวชฺเชนาติ ภิสกฺเกนฯ โส หิ อายุพฺเพทสงฺขาตํ วิชฺชํ ชานาตีติ เวชฺโชติ จ โรคญฺจ ตสฺส นิทานญฺจ เภสชฺชญฺจ วิทติ ชานาตีติปิ เวชฺโชติ จ วุจฺจติฯ ตโตติ เวชฺเชน วุตฺตการณาฯ กหาปณสฺสาติ กหาปเณน, อาภตนฺติ สมฺพนฺโธติฯ จตุตฺถํฯ

5. ปญฺจมนิสฺสคฺคิยปาจิตฺติยสิกฺขาปทํ

[753] ปญฺจเม สาติ สิกฺขมานาฯ อยนฺติ สิกฺขมานาฯ อทฺธาติ เอกํเสนฯ ‘‘เจตาเปตฺวา’’ติ เอตฺถ จิติสทฺโท ชานนตฺโถติ อาห ‘‘ชานาเปตฺวา’’ติฯ ปญฺจมํฯ

6. ฉฏฺฐนิสฺสคฺคิยปาจิตฺติยสิกฺขาปทํ

[758] ฉฏฺเฐ ฉนฺทํ อุปฺปาเทตฺวา คหิตํ ฉนฺทกนฺติ วจนตฺถํ ทสฺเสนฺโต อาห ‘‘ฉนฺทก’’นฺติอาทิฯ ธมฺมกิจฺจนฺติ ปุญฺญกรณียํฯ ธมฺมสทฺโท เหตฺถ ปุญฺญวาจโกฯ ยนฺติ วตฺถุํฯ ปเรสนฺติ อตฺตนา อญฺเญสํฯ ‘‘เอต’’นฺติ ‘‘ฉนฺทก’’นฺติ เอตํ นามํฯ ‘‘อญฺญสฺสตฺถาย ทินฺเนนา’’ติอิมินา อญฺญสฺส อตฺโถ อญฺญทตฺโถ, ทกาโร ปทสนฺธิกโร, ตทตฺถาย ทินฺโน อญฺญทตฺถิโกติ วจนตฺถํ ทสฺเสติฯ ‘‘อญฺญํ อุทฺทิสิตฺวา ทินฺเนนา’’ติอิมินา อญฺญํ อุทฺทิสิตฺวา ทินฺนํ อญฺญุทฺทิสิกนฺติ วจนตฺถํ ทสฺเสติฯ ‘‘สงฺฆสฺส ปริจฺจตฺเตนา’’ติ อิมินา สงฺฆสฺส ปริจฺจตฺโต สงฺฆิโกติ วจนตฺถํ ทสฺเสติฯ

[762] ยทตฺถายาติ เยสํ จีวราทีนํ อตฺถายฯ ยสทฺเทน สมาสภาวโต ปุพฺเพ นิคฺคหิตาคโม โหติฯ ตนฺติ จีวราทิกํฯ ตุมฺเหหีติ ทายเก สนฺธาย วุตฺตํฯ อุปทฺทเวสูติ ทุพฺภิกฺขาทิอุปสคฺเคสุฯ ยํ วา ตํ วาติ จีวรํ วา อญฺเญ วา ปิณฺฑปาตาทิเกติ ยํ วา ตํ วาติฯ ฉฏฺฐํฯ

7. สตฺตมนิสฺสคฺคิยปาจิตฺติยสิกฺขาปทํ

[764] สตฺตเม สญฺญาจิเกนาติ เอตฺถ สํสทฺทสฺส สยมตฺเถ ปวตฺติภาวํ ทสฺเสตุํ วุตฺตํ ‘‘สยํ ยาจิตเกนา’’ติฯ เอตเทวาติ ‘‘สญฺญาจิเกนา’’ติ ปทเมวฯ เอตฺถาติ อิมสฺมิํ สิกฺขาปเทติฯ สตฺตมํฯ

8. อฏฺฐมนิสฺสคฺคิยปาจิตฺติยสิกฺขาปทํ

[769] อฏฺฐเม คณสฺสาติ ภิกฺขุนิคณสฺสฯ อิมินา ‘‘มหาชนิเกนา’’ติ เอตฺถ ภิกฺขุนิคโณว มหาชโนติ อธิปฺเปโตติ ทีเปตีติฯ อฏฺฐมํฯ

9. นวมนิสฺสคฺคิยปาจิตฺติยสิกฺขาปทํ

[774] นวเม อิโตติ อิมสฺมา อฏฺฐมสิกฺขาปทโตฯ อธิกตรนฺติ อติเรกตรนฺติฯ นวมํฯ