สตฺติสูลูปมาติ สตฺติยา จ สูเลน จ สทิสาฯ เอตฺถาติ อิมิสฺสํ อฏฺฐกถายํฯ มชฺฌิมฏฺฐกถายํ อลคทฺทูปมสุตฺเต (ม. นิ. อฏฺฐ. 1.234 อาทโย) คเหตพฺโพฯ เอวํสทฺทโขสทฺทานมนฺตเร วิยสทฺทสฺส พฺยาเทสภาวํ ทสฺเสตุํ วุตฺตํ ‘‘เอวํ วิย โข’’ติฯ อฏฺฐมํฯ

9. อุกฺขิตฺตสมฺโภคสิกฺขาปทํ

[424] นวเม อนุธมฺมสฺส สรูปํ ทสฺเสตุํ วุตฺตํ ‘‘อนุโลมวตฺตํ ทิสฺวา กตา โอสารณา’’ติฯ อิมินา อนุโลมวตฺตํ ทิสฺวา กโต โอสารณสงฺขาโต ธมฺโม อนุธมฺโมติ ทสฺเสติฯ โอสารณาติ ปเวสนาฯ เตเนวาติ อุกฺขิตฺตกสฺส อกฏานุธมฺมตฺตา เอวฯ อสฺสาติ ‘‘อกฏานุธมฺเมนา’’ติ ปทสฺสฯ

ททโต วา คณฺหโต วาติ วาสทฺโท อนิยมวิกปฺปตฺโถติฯ นวมํฯ