3. มาฆสุตฺตํ
[84] สาวตฺถินิทานํ ฯ อถ โข มาโฆ เทวปุตฺโต อภิกฺกนฺตาย รตฺติยา อภิกฺกนฺตวณฺโณ เกวลกปฺปํ เชตวนํ โอภาเสตฺวา เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ อฏฺฐาสิ ฯ เอกมนฺตํ ฐิโต โข มาโฆ เทวปุตฺโต ภควนฺตํ คาถาย อชฺฌภาสิ –
‘‘กิํสุ เฉตฺวา สุขํ เสติ, กิํสุ เฉตฺวา น โสจติ;
กิสฺสสฺสุ เอกธมฺมสฺส, วธํ โรเจสิ โคตมา’’ติฯ
‘‘โกธํ เฉตฺวา สุขํ เสติ, โกธํ เฉตฺวา น โสจติ;
โกธสฺส วิสมูลสฺส, มธุรคฺคสฺส วตฺรภู;
วธํ อริยา ปสํสนฺติ, ตญฺหิ เฉตฺวา น โสจตี’’ติฯ
4. มาคธสุตฺตํ
[85] สาวตฺถินิทานํฯ เอกมนฺตํ ฐิโต โข มาคโธ เทวปุตฺโต ภควนฺตํ คาถาย อชฺฌภาสิ –
‘‘กติ โลกสฺมิํ ปชฺโชตา, เยหิ โลโก ปกาสติ;
ภวนฺตํ ปุฏฺฐุมาคมฺม, กถํ ชาเนมุ ตํ มย’’นฺติฯ
‘‘จตฺตาโร โลเก ปชฺโชตา, ปญฺจเมตฺถ น วิชฺชติ;
ทิวา ตปติ อาทิจฺโจ, รตฺติมาภาติ จนฺทิมาฯ
‘‘อถ อคฺคิ ทิวารตฺติํ, ตตฺถ ตตฺถ ปกาสติ;
สมฺพุทฺโธ ตปตํ เสฏฺโฐ, เอสา อาภา อนุตฺตรา’’ติฯ
5. ทามลิสุตฺตํ
[86] สาวตฺถินิทานํฯ อถ โข ทามลิ เทวปุตฺโต อภิกฺกนฺตาย รตฺติยา อภิกฺกนฺตวณฺโณ เกวลกปฺปํ เชตวนํ โอภาเสตฺวา เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ อฏฺฐาสิฯ เอกมนฺตํ ฐิโต โข ทามลิ เทวปุตฺโต ภควโต สนฺติเก อิมํ คาถํ อภาสิ –
‘‘กรณียเมตํ พฺราหฺมเณน, ปธานํ อกิลาสุนา;
กามานํ วิปฺปหาเนน, น เตนาสีสเต ภว’’นฺติฯ
‘‘นตฺถิ กิจฺจํ พฺราหฺมณสฺส (ทามลีติ ภควา),
กตกิจฺโจ หิ พฺราหฺมโณฯ
‘‘ยาว น คาธํ ลภติ นทีสุ,
อายูหติ สพฺพคตฺเตภิ ชนฺตุ;
คาธญฺจ ลทฺธาน ถเล ฐิโต โย,
นายูหตี ปารคโต หิ โสว [โสติ (สี. ปี. ก.), โหติ (สฺยา. กํ.), โส (?)]ฯ
‘‘เอสูปมา ทามลิ พฺราหฺมณสฺส,
ขีณาสวสฺส นิปกสฺส ฌายิโน;
ปปฺปุยฺย ชาติมรณสฺส อนฺตํ,
นายูหตี ปารคโต หิ โส’’ติ [โหตีติ (สฺยา. กํ.)]ฯ
6. กามทสุตฺตํ
[87] สาวตฺถินิทานํ ฯ เอกมนฺตํ ฐิโต โข กามโท เทวปุตฺโต ภควนฺตํ เอตทโวจ – ‘‘ทุกฺกรํ ภควา, สุทุกฺกรํ ภควา’’ติฯ
‘‘ทุกฺกรํ วาปิ กโรนฺติ (กามทาติ ภควา),
เสขา สีลสมาหิตา;
ฐิตตฺตา อนคาริยุเปตสฺส,
ตุฏฺฐิ โหติ สุขาวหา’’ติฯ
‘‘ทุลฺลภา ภควา ยทิทํ ตุฏฺฐี’’ติฯ
‘‘ทุลฺลภํ วาปิ ลภนฺตฺนฺตฺติ (กามทาติ ภควา),
จิตฺตวูปสเม รตา;
เยสํ ทิวา จ รตฺโต จ,
ภาวนาย รโต มโน’’ติฯ
‘‘ทุสฺสมาทหํ ภควา ยทิทํ จิตฺต’’นฺติฯ
‘‘ทุสฺสมาทหํ วาปิ สมาทหนฺตฺนฺตฺติ (กามทาติ ภควา),
อินฺทฺริยูปสเม รตา;
เต เฉตฺวา มจฺจุโน ชาลํ,
อริยา คจฺฉนฺติ กามทา’’ติฯ