11. อรณสุตฺตํ
[81]
‘‘เกสูธ อรณา โลเก, เกสํ วุสิตํ น นสฺสติ;
เกธ อิจฺฉํ ปริชานนฺติ, เกสํ โภชิสฺสิยํ สทาฯ
‘‘กิํสุ มาตา ปิตา ภาตา, วนฺทนฺติ นํ ปติฏฺฐิตํ;
กิํสุ อิธ ชาติหีนํ, อภิวาเทนฺติ ขตฺติยา’’ติฯ
‘‘สมณีธ อรณา โลเก, สมณานํ วุสิตํ น นสฺสติ;
สมณา อิจฺฉํ ปริชานนฺติ, สมณานํ โภชิสฺสิยํ สทาฯ
‘‘สมณํ มาตา ปิตา ภาตา, วนฺทนฺติ นํ ปติฏฺฐิตํ;
สมณีธ ชาติหีนํ, อภิวาเทนฺติ ขตฺติยา’’ติฯ
เฉตฺวาวคฺโค อฏฺฐโมฯ
ตสฺสุทฺทานํ –
เฉตฺวา รถญฺจ จิตฺตญฺจ, วุฏฺฐิ ภีตา นชีรติ;
อิสฺสรํ กามํ ปาเถยฺยํ, ปชฺโชโต อรเณน จาติฯ
เทวตาสํยุตฺตํ สมตฺตํฯ
2. เทวปุตฺตสํยุตฺตํ
1. ปฐมวคฺโค
1. ปฐมกสฺสปสุตฺตํ
[82] เอวํ เม สุตํ – เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส อาราเมฯ อถ โข กสฺสโป เทวปุตฺโต อภิกฺกนฺตาย รตฺติยา อภิกฺกนฺตวณฺโณ เกวลกปฺปํ เชตวนํ โอภาเสตฺวา เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ อฏฺฐาสิฯ เอกมนฺตํ ฐิโต โข กสฺสโป เทวปุตฺโต ภควนฺตํ เอตทโวจ – ‘‘ภิกฺขุํ ภควา ปกาเสสิ, โน จ ภิกฺขุโน อนุสาส’’นฺติฯ ‘‘เตน หิ กสฺสป, ตญฺเญเวตฺถ ปฏิภาตู’’ติฯ
‘‘สุภาสิตสฺส สิกฺเขถ, สมณูปาสนสฺส จ;
เอกาสนสฺส จ รโห, จิตฺตวูปสมสฺส จา’’ติฯ
อิทมโวจ กสฺสโป เทวปุตฺโต; สมนุญฺโญ สตฺถา อโหสิฯ อถ โข กสฺสโป เทวปุตฺโต ‘‘สมนุญฺโญ เม สตฺถา’’ติ ภควนฺตํ อภิวาเทตฺวา ปทกฺขิณํ กตฺวา ตตฺเถวนฺตรธายีติฯ
2. ทุติยกสฺสปสุตฺตํ
[83] สาวตฺถินิทานํฯ เอกมนฺตํ ฐิโต โข กสฺสโป เทวปุตฺโต ภควโต สนฺติเก อิมํ คาถํ อภาสิ –
‘‘ภิกฺขุ สิยา ฌายี วิมุตฺตจิตฺโต,
อากงฺเข เจ หทยสฺสานุปตฺติํ;
โลกสฺส ญตฺวา อุทยพฺพยญฺจ,
สุเจตโส อนิสฺสิโต ตทานิสํโส’’ติฯ