‘‘วาจํ มนญฺจ ปณิธาย สมฺมา,

กาเยน ปาปานิ อกุพฺพมาโน;

พวฺหนฺนปานํ ฆรมาวสนฺโต,

สทฺโธ มุทู สํวิภาคี วทญฺญู;

เอเตสุ ธมฺเมสุ ฐิโต จตูสุ,

ธมฺเม ฐิโต ปรโลกํ น ภาเย’’ติฯ

6. นชีรติสุตฺตํ

[76]

‘‘กิํ ชีรติ กิํ น ชีรติ, กิํสุ อุปฺปโถติ วุจฺจติ;

กิํสุ ธมฺมานํ ปริปนฺโถ, กิํสุ รตฺตินฺทิวกฺขโย;

กิํ มลํ พฺรหฺมจริยสฺส, กิํ สินานมโนทกํฯ

‘‘กติ โลกสฺมิํ ฉิทฺทานิ, ยตฺถ วิตฺตํ [จิตฺตํ (สี. สฺยา. กํ. ปี.)] น ติฏฺฐติ;

ภควนฺตํ ปุฏฺฐุมาคมฺม, กถํ ชาเนมุ ตํ มย’’นฺติฯ

‘‘รูปํ ชีรติ มจฺจานํ, นามโคตฺตํ น ชีรติ;

ราโค อุปฺปโถติ วุจฺจติฯ

‘‘โลโภ ธมฺมานํ ปริปนฺโถ, วโย รตฺตินฺทิวกฺขโย;

อิตฺถี มลํ พฺรหฺมจริยสฺส, เอตฺถายํ สชฺชเต ปชา;

ตโป จ พฺรหฺมจริยญฺจ, ตํ สินานมโนทกํฯ

‘‘ฉ โลกสฺมิํ ฉิทฺทานิ, ยตฺถ วิตฺตํ น ติฏฺฐติ;

อาลสฺยญฺจ [อาลสฺสญฺจ (สี. ปี.)] ปมาโท จ, อนุฏฺฐานํ อสํยโม;

นิทฺทา ตนฺที [ตนฺทิ (สี.)] จ เต ฉิทฺเท, สพฺพโส ตํ วิวชฺชเย’’ติฯ

7. อิสฺสริยสุตฺตํ

[77]

‘‘กิํสุ อิสฺสริยํ โลเก, กิํสุ ภณฺฑานมุตฺตมํ;

กิํสุ สตฺถมลํ โลเก, กิํสุ โลกสฺมิมพฺพุทํฯ

‘‘กิํสุ หรนฺตํ วาเรนฺติ, หรนฺโต ปน โก ปิโย;

กิํสุ ปุนปฺปุนายนฺตํ, อภินนฺทนฺติ ปณฺฑิตา’’ติฯ

‘‘วโส อิสฺสริยํ โลเก, อิตฺถี ภณฺฑานมุตฺตมํ;

โกโธ สตฺถมลํ โลเก, โจรา โลกสฺมิมพฺพุทาฯ

‘‘โจรํ หรนฺตํ วาเรนฺติ, หรนฺโต สมโณ ปิโย;

สมณํ ปุนปฺปุนายนฺตํ, อภินนฺทนฺติ ปณฺฑิตา’’ติฯ

8. กามสุตฺตํ

[78]

‘‘กิมตฺถกาโม น ทเท, กิํ มจฺโจ น ปริจฺจเช;

กิํสุ มุญฺเจยฺย กลฺยาณํ, ปาปิกํ น จ โมจเย’’ติฯ

‘‘อตฺตานํ น ทเท โปโส, อตฺตานํ น ปริจฺจเช;

วาจํ มุญฺเจยฺย กลฺยาณํ, ปาปิกญฺจ น โมจเย’’ติฯ

9. ปาเถยฺยสุตฺตํ

[79]

‘‘กิํสุ พนฺธติ ปาเถยฺยํ, กิํสุ โภคานมาสโย;

กิํสุ นรํ ปริกสฺสติ, กิํสุ โลกสฺมิ ทุชฺชหํ;

กิสฺมิํ พทฺธา ปุถู สตฺตา, ปาเสน สกุณี ยถา’’ติฯ

‘‘สทฺธา พนฺธติ ปาเถยฺยํ, สิรี โภคานมาสโย;

อิจฺฉา นรํ ปริกสฺสติ, อิจฺฉา โลกสฺมิ ทุชฺชหา;

อิจฺฉาพทฺธา ปุถู สตฺตา, ปาเสน สกุณี ยถา’’ติฯ

10. ปชฺโชตสุตฺตํ

[80]

‘‘กิํสุ โลกสฺมิ ปชฺโชโต, กิํสุ โลกสฺมิ ชาคโร;

กิํสุ กมฺเม สชีวานํ, กิมสฺส อิริยาปโถฯ

‘‘กิํสุ อลสํ อนลสญฺจ [กิํ อาลสฺยานาลสฺยญฺจ (ก.)], มาตา ปุตฺตํว โปสติ;

กิํ ภูตา อุปชีวนฺติ, เย ปาณา ปถวิสฺสิตา’’ติฯ

‘‘ปญฺญา โลกสฺมิ ปชฺโชโต, สติ โลกสฺมิ ชาคโร;

คาโว กมฺเม สชีวานํ, สีตสฺส อิริยาปโถฯ

‘‘วุฏฺฐิ อลสํ อนลสญฺจ, มาตา ปุตฺตํว โปสติ;

วุฏฺฐิํ ภูตา อุปชีวนฺติ, เย ปาณา ปถวิสฺสิตา’’ติฯ