‘‘โกธํ เฉตฺวา สุขํ เสติ, โกธํ เฉตฺวา น โสจติ;
โกธสฺส วิสมูลสฺส, มธุรคฺคสฺส เทวเต;
วธํ อริยา ปสํสนฺติ, ตญฺหิ เฉตฺวา น โสจตี’’ติฯ
2. รถสุตฺตํ
[72]
‘‘กิํสุ รถสฺส ปญฺญาณํ, กิํสุ ปญฺญาณมคฺคิโน;
กิํสุ รฏฺฐสฺส ปญฺญาณํ, กิํสุ ปญฺญาณมิตฺถิยา’’ติฯ
‘‘ธโช รถสฺส ปญฺญาณํ, ธูโม ปญฺญาณมคฺคิโน;
ราชา รฏฺฐสฺส ปญฺญาณํ, ภตฺตา ปญฺญาณมิตฺถิยา’’ติฯ
3. วิตฺตสุตฺตํ
[73]
‘‘กิํสูธ วิตฺตํ ปุริสสฺส เสฏฺฐํ, กิํสุ สุจิณฺโณ สุขมาวหติ;
กิํสุ หเว สาทุตรํ [สาธุตรํ (ก.)] รสานํ, กถํชีวิํ [กิํสุชีวิํ (ก.)] ชีวิตมาหุ เสฏฺฐ’’นฺติฯ
‘‘สทฺธีธ วิตฺตํ ปุริสสฺส เสฏฺฐํ, ธมฺโม สุจิณฺโณ สุขมาวหติ;
สจฺจํ หเว สาทุตรํ รสานํ, ปญฺญาชีวิํ ชีวิตมาหุ เสฏฺฐ’’นฺติฯ
4. วุฏฺฐิสุตฺตํ
[74]
‘‘กิํสุ อุปฺปตตํ เสฏฺฐํ, กิํสุ นิปตตํ วรํ;
กิํสุ ปวชมานานํ, กิํสุ ปวทตํ วร’’นฺติฯ
‘‘พีชํ อุปฺปตตํ เสฏฺฐํ, วุฏฺฐิ นิปตตํ วรา;
คาโว ปวชมานานํ, ปุตฺโต ปวทตํ วโรติฯ
‘‘วิชฺชา อุปฺปตตํ เสฏฺฐา, อวิชฺชา นิปตตํ วรา;
สงฺโฆ ปวชมานานํ, พุทฺโธ ปวทตํ วโร’’ติฯ
5. ภีตาสุตฺตํ
[75]
‘‘กิํสูธ ภีตา ชนตา อเนกา,
มคฺโค จเนกายตนปฺปวุตฺโต;
ปุจฺฉามิ ตํ โคตม ภูริปญฺญ,
กิสฺมิํ ฐิโต ปรโลกํ น ภาเย’’ติฯ
‘‘วาจํ มนญฺจ ปณิธาย สมฺมา,
กาเยน ปาปานิ อกุพฺพมาโน;
พวฺหนฺนปานํ ฆรมาวสนฺโต,
สทฺโธ มุทู สํวิภาคี วทญฺญู;
เอเตสุ ธมฺเมสุ ฐิโต จตูสุ,
ธมฺเม ฐิโต ปรโลกํ น ภาเย’’ติฯ
6. นชีรติสุตฺตํ
[76]
‘‘กิํ ชีรติ กิํ น ชีรติ, กิํสุ อุปฺปโถติ วุจฺจติ;
กิํสุ ธมฺมานํ ปริปนฺโถ, กิํสุ รตฺตินฺทิวกฺขโย;
กิํ มลํ พฺรหฺมจริยสฺส, กิํ สินานมโนทกํฯ
‘‘กติ โลกสฺมิํ ฉิทฺทานิ, ยตฺถ วิตฺตํ [จิตฺตํ (สี. สฺยา. กํ. ปี.)] น ติฏฺฐติ;
ภควนฺตํ ปุฏฺฐุมาคมฺม, กถํ ชาเนมุ ตํ มย’’นฺติฯ
‘‘รูปํ ชีรติ มจฺจานํ, นามโคตฺตํ น ชีรติ;
ราโค อุปฺปโถติ วุจฺจติฯ
‘‘โลโภ ธมฺมานํ ปริปนฺโถ, วโย รตฺตินฺทิวกฺขโย;
อิตฺถี มลํ พฺรหฺมจริยสฺส, เอตฺถายํ สชฺชเต ปชา;
ตโป จ พฺรหฺมจริยญฺจ, ตํ สินานมโนทกํฯ
‘‘ฉ โลกสฺมิํ ฉิทฺทานิ, ยตฺถ วิตฺตํ น ติฏฺฐติ;
อาลสฺยญฺจ [อาลสฺสญฺจ (สี. ปี.)] ปมาโท จ, อนุฏฺฐานํ อสํยโม;
นิทฺทา ตนฺที [ตนฺทิ (สี.)] จ เต ฉิทฺเท, สพฺพโส ตํ วิวชฺชเย’’ติฯ
7. อิสฺสริยสุตฺตํ
[77]
‘‘กิํสุ อิสฺสริยํ โลเก, กิํสุ ภณฺฑานมุตฺตมํ;
กิํสุ สตฺถมลํ โลเก, กิํสุ โลกสฺมิมพฺพุทํฯ
‘‘กิํสุ หรนฺตํ วาเรนฺติ, หรนฺโต ปน โก ปิโย;
กิํสุ ปุนปฺปุนายนฺตํ, อภินนฺทนฺติ ปณฺฑิตา’’ติฯ