‘‘ฉนฺโท นิทานํ คาถานํ, อกฺขรา ตาสํ วิยญฺชนํ;
นามสนฺนิสฺสิตา คาถา, กวิ คาถานมาสโย’’ติฯ
ชราวคฺโค ฉฏฺโฐฯ
ตสฺสุทฺทานํ –
ชรา อชรสา มิตฺตํ, วตฺถุ ตีณิ ชนานิ จ;
อุปฺปโถ จ ทุติโย จ, กวินา ปูริโต วคฺโคติฯ
7. อทฺธวคฺโค
1. นามสุตฺตํ
[61]
‘‘กิํสุ สพฺพํ อทฺธภวิ [อนฺวภวิ (สี.)], กิสฺมา ภิยฺโย น วิชฺชติ;
กิสฺสสฺสุ เอกธมฺมสฺส, สพฺเพว วสมนฺวคู’’ติ [วสมทฺธคู (ก.)]ฯ
‘‘นามํ สพฺพํ อทฺธภวิ, นามา ภิยฺโย น วิชฺชติ;
นามสฺส เอกธมฺมสฺส, สพฺเพว วสมนฺวคู’’ติฯ
2. จิตฺตสุตฺตํ
[62]
‘‘เกนสฺสุ นียติ โลโก, เกนสฺสุ ปริกสฺสติ;
กิสฺสสฺสุ เอกธมฺมสฺส, สพฺเพว วสมนฺวคู’’ติฯ
‘‘จิตฺเตน นียติ โลโก, จิตฺเตน ปริกสฺสติ;
จิตฺตสฺส เอกธมฺมสฺส, สพฺเพว วสมนฺวคู’’ติฯ
3. ตณฺหาสุตฺตํ
[63]
‘‘เกนสฺสุ นียติ โลโก, เกนสฺสุ ปริกสฺสติ;
กิสฺสสฺสุ เอกธมฺมสฺส, สพฺเพว วสมนฺวคู’’ติฯ
‘‘ตณฺหาย นียติ โลโก, ตณฺหาย ปริกสฺสติ;
ตณฺหาย เอกธมฺมสฺส, สพฺเพว วสมนฺวคู’’ติฯ
4. สํโยชนสุตฺตํ
[64]
‘‘กิํสุ สํโยชโน โลโก, กิํสุ ตสฺส วิจารณํ;
กิสฺสสฺสุ วิปฺปหาเนน, นิพฺพานํ อิติ วุจฺจตี’’ติฯ
‘‘นนฺทีสํโยชโน [นนฺทิสํโยชโน (สี. สฺยา. กํ.)] โลโก, วิตกฺกสฺส วิจารณํ;
ตณฺหาย วิปฺปหาเนน, นิพฺพานํ อิติ วุจฺจตี’’ติฯ
5. พนฺธนสุตฺตํ
[65]
‘‘กิํสุ สมฺพนฺธโน โลโก, กิํสุ ตสฺส วิจารณํ;
กิสฺสสฺสุ วิปฺปหาเนน, สพฺพํ ฉินฺทติ พนฺธน’’นฺติฯ
‘‘นนฺทีสมฺพนฺธโน โลโก, วิตกฺกสฺส วิจารณํ;
ตณฺหาย วิปฺปหาเนน, สพฺพํ ฉินฺทติ พนฺธน’’นฺติฯ
6. อตฺตหตสุตฺตํ
[66]
‘‘เกนสฺสุพฺภาหโต โลโก, เกนสฺสุ ปริวาริโต;
เกน สลฺเลน โอติณฺโณ, กิสฺส ธูปายิโต สทา’’ติฯ
‘‘มจฺจุนาพฺภาหโต โลโก, ชราย ปริวาริโต;
ตณฺหาสลฺเลน โอติณฺโณ, อิจฺฉาธูปายิโต สทา’’ติฯ
7. อุฑฺฑิตสุตฺตํ
[67]
‘‘เกนสฺสุ อุฑฺฑิโต โลโก, เกนสฺสุ ปริวาริโต;
เกนสฺสุ ปิหิโต โลโก, กิสฺมิํ โลโก ปติฏฺฐิโต’’ติฯ
‘‘ตณฺหาย อุฑฺฑิโต โลโก, ชราย ปริวาริโต;
มจฺจุนา ปิหิโต โลโก, ทุกฺเข โลโก ปติฏฺฐิโต’’ติฯ
8. ปิหิตสุตฺตํ
[68]
‘‘เกนสฺสุ ปิหิโต โลโก, กิสฺมิํ โลโก ปติฏฺฐิโต;
เกนสฺสุ อุฑฺฑิโต โลโก, เกนสฺสุ ปริวาริโต’’ติฯ