2. อชรสาสุตฺตํ

[52]

‘‘กิํสุ อชรสา สาธุ, กิํสุ สาธุ อธิฏฺฐิตํ;

กิํสุ นรานํ รตนํ, กิํสุ โจเรหฺยหาริย’’นฺติฯ

‘‘สีลํ อชรสา สาธุ, สทฺธา สาธุ อธิฏฺฐิตา;

ปญฺญา นรานํ รตนํ, ปุญฺญํ โจเรหฺยหาริย’’นฺติฯ

3. มิตฺตสุตฺตํ

[53]

‘‘กิํสุ ปวสโต [ปถวโต (ปี. ก.)] มิตฺตํ, กิํสุ มิตฺตํ สเก ฆเร;

กิํ มิตฺตํ อตฺถชาตสฺส, กิํ มิตฺตํ สมฺปรายิก’’นฺติฯ

‘‘สตฺโถ ปวสโต มิตฺตํ, มาตา มิตฺตํ สเก ฆเร;

สหาโย อตฺถชาตสฺส, โหติ มิตฺตํ ปุนปฺปุนํ;

สยํกตานิ ปุญฺญานิ, ตํ มิตฺตํ สมฺปรายิก’’นฺติฯ

4. วตฺถุสุตฺตํ

[54]

‘‘กิํสุ วตฺถุ มนุสฺสานํ, กิํสูธ ปรโม สขา;

กิํสุ ภูตา อุปชีวนฺติ, เย ปาณา ปถวิสฺสิตา’’ติ [ปถวิํ สิตาติ (สี. สฺยา. กํ. ปี.)]ฯ

‘‘ปุตฺตา วตฺถุ มนุสฺสานํ, ภริยา จ [ภริยาว (สี.), ภริยา (สฺยา. กํ.)] ปรโม สขา;

วุฏฺฐิํ ภูตา อุปชีวนฺติ, เย ปาณา ปถวิสฺสิตา’’ติฯ

5. ปฐมชนสุตฺตํ

[55]

‘‘กิํสุ ชเนติ ปุริสํ, กิํสุ ตสฺส วิธาวติ;

กิํสุ สํสารมาปาทิ, กิํสุ ตสฺส มหพฺภย’’นฺติฯ

‘‘ตณฺหา ชเนติ ปุริสํ, จิตฺตมสฺส วิธาวติ;

สตฺโต สํสารมาปาทิ, ทุกฺขมสฺส มหพฺภย’’นฺติฯ

6. ทุติยชนสุตฺตํ

[56]

‘‘กิํสุ ชเนติ ปุริสํ, กิํสุ ตสฺส วิธาวติ;

กิํสุ สํสารมาปาทิ, กิสฺมา น ปริมุจฺจตี’’ติฯ

‘‘ตณฺหา ชเนติ ปุริสํ, จิตฺตมสฺส วิธาวติ;

สตฺโต สํสารมาปาทิ, ทุกฺขา น ปริมุจฺจตี’’ติฯ

7. ตติยชนสุตฺตํ

[57]

‘‘กิํสุ ชเนติ ปุริสํ, กิํสุ ตสฺส วิธาวติ;

กิํสุ สํสารมาปาทิ, กิํสุ ตสฺส ปรายน’’นฺติฯ

‘‘ตณฺหา ชเนติ ปุริสํ, จิตฺตมสฺส วิธาวติ;

สตฺโต สํสารมาปาทิ, กมฺมํ ตสฺส ปรายน’’นฺติฯ

8. อุปฺปถสุตฺตํ

[58]

‘‘กิํสุ อุปฺปโถ อกฺขาโต, กิํสุ รตฺตินฺทิวกฺขโย;

กิํ มลํ พฺรหฺมจริยสฺส, กิํ สินานมโนทก’’นฺติฯ

‘‘ราโค อุปฺปโถ อกฺขาโต, วโย รตฺตินฺทิวกฺขโย;

อิตฺถี มลํ พฺรหฺมจริยสฺส, เอตฺถายํ สชฺชเต ปชา;

ตโป จ พฺรหฺมจริยญฺจ, ตํ สินานมโนทก’’นฺตฺนฺตฺติฯ

9. ทุติยสุตฺตํ

[59]

‘‘กิํสุ ทุติยา [ทุติยํ (สฺยา. กํ. ปี.)] ปุริสสฺส โหติ, กิํสุ เจนํ ปสาสติ;

กิสฺส จาภิรโต มจฺโจ, สพฺพทุกฺขา ปมุจฺจตี’’ติฯ

‘‘สทฺธา ทุติยา ปุริสสฺส โหติ, ปญฺญา เจนํ ปสาสติ;

นิพฺพานาภิรโต มจฺโจ, สพฺพทุกฺขา ปมุจฺจตี’’ติฯ

10. กวิสุตฺตํ

[60]

‘‘กิํสุ นิทานํ คาถานํ, กิํสุ ตาสํ วิยญฺชนํ;

กิํสุ สนฺนิสฺสิตา คาถา, กิํสุ คาถานมาสโย’’ติฯ