‘‘กุมฺภกาโร ปุเร อาสิํ, เวกฬิงฺเค [เวหฬิงฺเค (สี.), เวภฬิงฺเค (สฺยา. กํ.)] ฆฏีกโร;
มาตาเปตฺติภโร อาสิํ, กสฺสปสฺส อุปาสโกฯ
‘‘วิรโต เมถุนา ธมฺมา, พฺรหฺมจารี นิรามิโส;
อหุวา เต สคาเมยฺโย, อหุวา เต ปุเร สขาฯ
‘‘โสหเมเต ปชานามิ, วิมุตฺเต สตฺต ภิกฺขโว;
ราคโทสปริกฺขีเณ, ติณฺเณ โลเก วิสตฺติก’’นฺติฯ
‘‘เอวเมตํ ตทา อาสิ, ยถา ภาสสิ ภคฺคว;
กุมฺภกาโร ปุเร อาสิ, เวกฬิงฺเค ฆฏีกโร;
มาตาเปตฺติภโร อาสิ, กสฺสปสฺส อุปาสโกฯ
‘‘วิรโต เมถุนา ธมฺมา, พฺรหฺมจารี นิรามิโส;
อหุวา เม สคาเมยฺโย, อหุวา เม ปุเร สขา’’ติฯ
‘‘เอวเมตํ ปุราณานํ, สหายานํ อหุ สงฺคโม;
อุภินฺนํ ภาวิตตฺตานํ, สรีรนฺติมธาริน’’นฺติฯ
อาทิตฺตวคฺโค ปญฺจโมฯ
ตสฺสุทฺทานํ –
อาทิตฺตํ กิํททํ อนฺนํ, เอกมูลอโนมิยํ;
อจฺฉราวนโรปเชตํ, มจฺฉเรน ฆฏีกโรติฯ
6. ชราวคฺโค
1. ชราสุตฺตํ
[51]
‘‘กิํสุ ยาว ชรา สาธุ, กิํสุ สาธุ ปติฏฺฐิตํ;
กิํสุ นรานํ รตนํ, กิํสุ โจเรหิ ทูหร’’นฺติฯ
‘‘สีลํ ยาว ชรา สาธุ, สทฺธา สาธุ ปติฏฺฐิตา;
ปญฺญา นรานํ รตนํ, ปุญฺญํ โจเรหิ ทูหร’’นฺติฯ
2. อชรสาสุตฺตํ
[52]
‘‘กิํสุ อชรสา สาธุ, กิํสุ สาธุ อธิฏฺฐิตํ;
กิํสุ นรานํ รตนํ, กิํสุ โจเรหฺยหาริย’’นฺติฯ
‘‘สีลํ อชรสา สาธุ, สทฺธา สาธุ อธิฏฺฐิตา;
ปญฺญา นรานํ รตนํ, ปุญฺญํ โจเรหฺยหาริย’’นฺติฯ
3. มิตฺตสุตฺตํ
[53]
‘‘กิํสุ ปวสโต [ปถวโต (ปี. ก.)] มิตฺตํ, กิํสุ มิตฺตํ สเก ฆเร;
กิํ มิตฺตํ อตฺถชาตสฺส, กิํ มิตฺตํ สมฺปรายิก’’นฺติฯ
‘‘สตฺโถ ปวสโต มิตฺตํ, มาตา มิตฺตํ สเก ฆเร;
สหาโย อตฺถชาตสฺส, โหติ มิตฺตํ ปุนปฺปุนํ;
สยํกตานิ ปุญฺญานิ, ตํ มิตฺตํ สมฺปรายิก’’นฺติฯ
4. วตฺถุสุตฺตํ
[54]
‘‘กิํสุ วตฺถุ มนุสฺสานํ, กิํสูธ ปรโม สขา;
กิํสุ ภูตา อุปชีวนฺติ, เย ปาณา ปถวิสฺสิตา’’ติ [ปถวิํ สิตาติ (สี. สฺยา. กํ. ปี.)]ฯ
‘‘ปุตฺตา วตฺถุ มนุสฺสานํ, ภริยา จ [ภริยาว (สี.), ภริยา (สฺยา. กํ.)] ปรโม สขา;
วุฏฺฐิํ ภูตา อุปชีวนฺติ, เย ปาณา ปถวิสฺสิตา’’ติฯ
5. ปฐมชนสุตฺตํ
[55]
‘‘กิํสุ ชเนติ ปุริสํ, กิํสุ ตสฺส วิธาวติ;
กิํสุ สํสารมาปาทิ, กิํสุ ตสฺส มหพฺภย’’นฺติฯ
‘‘ตณฺหา ชเนติ ปุริสํ, จิตฺตมสฺส วิธาวติ;
สตฺโต สํสารมาปาทิ, ทุกฺขมสฺส มหพฺภย’’นฺติฯ