เมนู

9. สตฺถารวนฺทนาสุตฺตํ

[265] สาวตฺถิยํ เชตวเนฯ ‘‘ภูตปุพฺพํ, ภิกฺขเว, สกฺโก เทวานมินฺโท มาตลิํ สงฺคาหกํ อามนฺเตสิ – ‘โยเชหิ, สมฺม มาตลิ, สหสฺสยุตฺตํ อาชญฺญรถํ, อุยฺยานภูมิํ คจฺฉาม สุภูมิํ ทสฺสนายา’ติฯ ‘เอวํ ภทฺทนฺตวา’ติ โข, ภิกฺขเว, มาตลิ สงฺคาหโก สกฺกสฺส เทวานมินฺทสฺส ปฏิสฺสุตฺวา สหสฺสยุตฺตํ อาชญฺญรถํ โยเชตฺวา สกฺกสฺส เทวานมินฺทสฺส ปฏิเวเทสิ – ‘ยุตฺโต โข เต, มาริส, สหสฺสยุตฺโต อาชญฺญรโถฯ ยสฺส ทานิ กาลํ มญฺญสี’’’ติฯ อถ โข, ภิกฺขเว, สกฺโก เทวานมินฺโท เวชยนฺตปาสาทา โอโรหนฺโต อญฺชลิํ กตฺวา สุทํ ภควนฺตํ นมสฺสติฯ อถ โข, ภิกฺขเว, มาตลิ สงฺคาหโก สกฺกํ เทวานมินฺทํ คาถาย อชฺฌภาสิ –

‘‘ยญฺหิ เทวา มนุสฺสา จ, ตํ นมสฺสนฺติ วาสว;

อถ โก นาม โส ยกฺโข, ยํ ตฺวํ สกฺก นมสฺสสี’’ติฯ

‘‘โย อิธ สมฺมาสมฺพุทฺโธ, อสฺมิํ โลเก สเทวเก;

อโนมนามํ สตฺถารํ, ตํ นมสฺสามิ มาตลิฯ

‘‘เยสํ ราโค จ โทโส จ, อวิชฺชา จ วิราชิตา;

ขีณาสวา อรหนฺโต, เต นมสฺสามิ มาตลิฯ

‘‘เย ราคโทสวินยา, อวิชฺชาสมติกฺกมา;

เสกฺขา อปจยารามา, อปฺปมตฺตานุสิกฺขเร;

เต นมสฺสามิ มาตลี’’ติฯ

‘‘เสฏฺฐา หิ กิร โลกสฺมิํ, เย ตฺวํ สกฺก นมสฺสสิ;

อหมฺปิ เต นมสฺสามิ, เย นมสฺสสิ วาสวา’’ติฯ

‘‘อิทํ วตฺวาน มฆวา, เทวราชา สุชมฺปติ;

ภควนฺตํ นมสฺสิตฺวา, ปมุโข รถมารุหี’’ติฯ