6. ยชมานสุตฺตํ
[262] เอกํ สมยํ ภควา ราชคเห วิหรติ คิชฺฌกูเฏ ปพฺพเตฯ อถ โข สกฺโก เทวานมินฺโท เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ อฏฺฐาสิฯ เอกมนฺตํ ฐิโต โข สกฺโก เทวานมินฺโท ภควนฺตํ คาถาย อชฺฌภาสิ –
‘‘ยชมานานํ มนุสฺสานํ, ปุญฺญเปกฺขาน ปาณินํ;
กโรตํ โอปธิกํ ปุญฺญํ, กตฺถ ทินฺนํ มหปฺผล’’นฺติฯ
‘‘จตฺตาโร จ ปฏิปนฺนา, จตฺตาโร จ ผเล ฐิตา;
เอส สงฺโฆ อุชุภูโต, ปญฺญาสีลสมาหิโตฯ
‘‘ยชมานานํ มนุสฺสานํ, ปุญฺญเปกฺขาน ปาณินํ;
กโรตํ โอปธิกํ ปุญฺญํ, สงฺเฆ ทินฺนํ มหปฺผล’’นฺติฯ
7. พุทฺธวนฺทนาสุตฺตํ
[263] สาวตฺถิยํ เชตวเนฯ เตน โข ปน สมเยน ภควา ทิวาวิหารคโต โหติ ปฏิสลฺลีโนฯ อถ โข สกฺโก จ เทวานมินฺโท พฺรหฺมา จ สหมฺปติ เยน ภควา เตนุปสงฺกมิํสุ; อุปสงฺกมิตฺวา ปจฺเจกํ ทฺวารพาหํ นิสฺสาย อฏฺฐํสุฯ อถ โข สกฺโก เทวานมินฺโท ภควโต สนฺติเก อิมํ คาถํ อภาสิ –
‘‘อุฏฺเฐหิ วีร วิชิตสงฺคาม,
ปนฺนภาร อนณ วิจร โลเก;
จิตฺตญฺจ เต สุวิมุตฺตํ,
จนฺโท ยถา ปนฺนรสาย รตฺติ’’นฺติฯ
‘‘น โข, เทวานมินฺท, ตถาคตา เอวํ วนฺทิตพฺพาฯ เอวญฺจ โข, เทวานมินฺท, ตถาคตา วนฺทิตพฺพา –
‘‘อุฏฺเฐหิ วีร วิชิตสงฺคาม,
สตฺถวาห อนณ วิจร โลเก;
เทสสฺสุ ภควา ธมฺมํ,
อญฺญาตาโร ภวิสฺสนฺตี’’ติฯ
8. คหฏฺฐวนฺทนาสุตฺตํ
[264] สาวตฺถิยํฯ ตตฺร…เป.… เอตทโวจ – ‘‘ภูตปุพฺพํ, ภิกฺขเว, สกฺโก เทวานมินฺโท มาตลิํ สงฺคาหกํ อามนฺเตสิ – ‘โยเชหิ, สมฺม มาตลิ, สหสฺสยุตฺตํ อาชญฺญรถํฯ อุยฺยานภูมิํ คจฺฉาม สุภูมิํ ทสฺสนายา’ติฯ ‘เอวํ ภทฺทนฺตวา’ติ โข, ภิกฺขเว, มาตลิ สงฺคาหโก สกฺกสฺส เทวานมินฺทสฺส ปฏิสฺสุตฺวา สหสฺสยุตฺตํ อาชญฺญรถํ โยเชตฺวา สกฺกสฺส เทวานมินฺทสฺส ปฏิเวเทสิ – ‘ยุตฺโต โข เต, มาริส, สหสฺสยุตฺโต อาชญฺญรโถฯ ยสฺส ทานิ กาลํ มญฺญสี’’’ติฯ อถ โข, ภิกฺขเว, สกฺโก เทวานมินฺโท เวชยนฺตปาสาทา โอโรหนฺโต อญฺชลิํ กตฺวา [ปญฺชลิโก (ปี.), ปญฺชลิํ กตฺวา (ก.)] สุทํ ปุถุทฺทิสา นมสฺสติฯ อถ โข, ภิกฺขเว, มาตลิ สงฺคาหโก สกฺกํ เทวานมินฺทํ คาถาย อชฺฌภาสิ –
‘‘ตํ นมสฺสนฺติ เตวิชฺชา, สพฺเพ ภุมฺมา จ ขตฺติยา;
จตฺตาโร จ มหาราชา, ติทสา จ ยสสฺสิโน;
อถ โก นาม โส ยกฺโข, ยํ ตฺวํ สกฺก นมสฺสสี’’ติฯ
‘‘มํ นมสฺสนฺติ เตวิชฺชา, สพฺเพ ภุมฺมา จ ขตฺติยา;
จตฺตาโร จ มหาราชา, ติทสา จ ยสสฺสิโนฯ
‘‘อหญฺจ สีลสมฺปนฺเน, จิรรตฺตสมาหิเต;
สมฺมาปพฺพชิเต วนฺเท, พฺรหฺมจริยปรายเนฯ
‘‘เย คหฏฺฐา ปุญฺญกรา, สีลวนฺโต อุปาสกา;
ธมฺเมน ทารํ โปเสนฺติ, เต นมสฺสามิ มาตลี’’ติฯ
‘‘เสฏฺฐา หิ กิร โลกสฺมิํ, เย ตฺวํ สกฺก นมสฺสสิ;
อหมฺปิ เต นมสฺสามิ, เย นมสฺสสิ วาสวา’’ติฯ
‘‘อิทํ วตฺวาน มฆวา, เทวราชา สุชมฺปติ;
ปุถุทฺทิสา นมสฺสิตฺวา, ปมุโข รถมารุหี’’ติฯ
