‘‘โย อปฺปทุฏฺฐสฺส นรสฺส ทุสฺสติ,
สุทฺธสฺส โปสสฺส อนงฺคณสฺส;
ตเมว พาลํ ปจฺเจติ ปาปํ,
สุขุโม รโช ปฏิวาตํว ขิตฺโต’’ติฯ
3. ชฏาสุตฺตํ
[23]
‘‘อนฺโต ชฏา พหิ ชฏา, ชฏาย ชฏิตา ปชา;
ตํ ตํ โคตม ปุจฺฉามิ, โก อิมํ วิชฏเย ชฏ’’นฺติฯ
‘‘สีเล ปติฏฺฐาย นโร สปญฺโญ, จิตฺตํ ปญฺญญฺจ ภาวยํ;
อาตาปี นิปโก ภิกฺขุ, โส อิมํ วิชฏเย ชฏํฯ
‘‘เยสํ ราโค จ โทโส จ, อวิชฺชา จ วิราชิตา;
ขีณาสวา อรหนฺโต, เตสํ วิชฏิตา ชฏาฯ
‘‘ยตฺถ นามญฺจ รูปญฺจ, อเสสํ อุปรุชฺฌติ;
ปฏิฆํ รูปสญฺญา จ, เอตฺเถสา ฉิชฺชเต [วิชเฏ (ก.)] ชฏา’’ติฯ
4. มโนนิวารณสุตฺตํ
[24] ‘‘ยโต ยโต มโน นิวารเย,
น ทุกฺขเมติ นํ ตโต ตโต;
ส สพฺพโต มโน นิวารเย,
ส สพฺพโต ทุกฺขา ปมุจฺจติ’’ฯ
‘‘น สพฺพโต มโน นิวารเย,
น มโน สํยตตฺตมาคตํ;
ยโต ยโต จ ปาปกํ,
ตโต ตโต มโน นิวารเย’’ติฯ
5. อรหนฺตสุตฺตํ
[25]
‘‘โย โหติ ภิกฺขุ อรหํ กตาวี,
ขีณาสโว อนฺติมเทหธารี;
อหํ วทามีติปิ โส วเทยฺย,
มมํ วทนฺตีติปิ โส วเทยฺยา’’ติฯ