เมนู

สาธารณาสาธารณานํ มหาวิภงฺเค คตานํ สพฺพาปตฺติปเภทานํ ทสฺสโนปจารภูโต กตาปตฺติวาโร ทสฺสิโตติ ตํทสฺสเนน อปฺปธานา อิตเรปิ วารา อุปจารโต ทสฺสิตา โหนฺตีติ จ ตถา วุตฺตนฺติ เวทิตพฺพํฯ

อิติ อุตฺตเร ลีนตฺถปกาสนิยา

มหาวิภงฺคสงฺคหวณฺณนา นิฏฺฐิตาฯ

ภิกฺขุนิวิภงฺโค

[170] วินยสฺส วินิจฺฉเย ภิกฺขูนํ ปาฏวตฺถายาติ ภิกฺขุนีนํ ปาฏวสฺสาปิ ตทธีนตฺตา ปธานทสฺสนวเสน วุตฺตํฯ อถ วา ทสฺสนลิงฺคนฺตรสาธารณตฺเต อิจฺฉิเต ปุลฺลิงฺเคน, นปุํสกลิงฺเคน วา นิทฺเทโส สทฺทสตฺถานุโยคโตติ ‘‘ภิกฺขูน’’นฺติ ปุลฺลิงฺเคน วุตฺตํฯ

[171] นนฺทนฺตี สาทิยนฺตีฯ

[172] ติสฺโส อาปตฺติโย ผุเสติ โยชนาฯ ชาณุสฺส อุทฺธํ, อกฺขกสฺส อโธ คหณํ สาทิยนฺติยา ตสฺสา ปาราชิกนฺติ โยชนาฯ

[173] กายปฏิพทฺเธ วา คหณํ สาทิยนฺติยา ทุกฺกฏํฯ

[174] วชฺชนฺติ อญฺญิสฺสา ภิกฺขุนิยา ปาราชิกาปตฺติํฯ

[176] ตํ ลทฺธินฺติ อุกฺขิตฺตสฺส ยํ ลทฺธิํ อตฺตโน โรเจสิ, ตํ ลทฺธิํ น นิสฺสชฺชนฺตีติ โยชนาฯ

[178] ‘‘อิธ อาคจฺฉา’’ติ ปทจฺเฉโทฯ ‘‘วุตฺตา อาคจฺฉตี’’ติ ปทจฺเฉโทฯ

[179] หตฺถปาสปฺปเวสเนติ หตฺถปาสูปคมเนฯ ‘‘หตฺถคตปฺปเวสเน’’ติ วา ปาโฐ, โสเยว อตฺโถฯ

อิติ อุตฺตเร ลีนตฺถปกาสนิยา ภิกฺขุนิวิภงฺเค

ปาราชิกกถาวณฺณนา นิฏฺฐิตาฯ

[180] เอกสฺสาติ อตฺตโน อตฺตโน อฏฺฏการสฺส วาฯ อาโรจเนติ วตฺตพฺพสฺส โวหาริกานํ นิเวทเนฯ

[181] ทุติยาโรจเนติ ทุติยสฺส, ทุติยํ เอวํ อาโรจเนฯ

[182] ทฺวีหีติ ทฺวีหิ กมฺมวาจาหิฯ กมฺมวาโจสาเนติ กมฺมวาจาโอสาเนฯ

[183] ปริกฺเขเป อติกฺกนฺเตติ อตฺตโน คามโต คนฺตฺวา อิตรํ คามํ ปวิสนฺติยา ปฐเมน ปาเทน ตสฺส คามสฺส ปริกฺเขเป อติกฺกนฺเต, ปฐมปาเท ปริกฺเขปํ อติกฺกเมตฺวา อนฺโตคามสงฺเขปํ คเตติ อตฺโถฯ

[184] ทุติเยนาติ คามปริกฺเขปโต พหิ ฐิเตน ทุติยปาเทนฯ อติกฺกนฺเตติ ตสฺมิํ คามปริกฺเขเป อติกฺกนฺเต, ตสฺมิํ ปาเท อนฺโตคามํ ปเวสิเตติ อตฺโถฯ เสสํ อุตฺตานตฺถเมวฯ

อิติ อุตฺตเร ลีนตฺถปกาสนิยา ภิกฺขุนิวิภงฺเค

สงฺฆาทิเสสกถาวณฺณนา นิฏฺฐิตาฯ

[193] อิห ภิกฺขุนี ปตฺตสนฺนิจยํ กโรนฺตี โหติ, สา เอกํ นิสฺสคฺคิยํ ปาจิตฺติยํเยว ผุเสติ โยชนาฯ

[194] อกาลจีวรํ กาลจีวรํ กตฺวา ภาชาเปนฺติยาติ โยชนาฯ ปโยเคติ ภาชนปโยเคฯ

[195] ฉินฺเนติ อจฺฉินฺเนฯ

[196] ตโต ปรนฺติ ตโต ปฐมโต อญฺญํฯ

อิติ อุตฺตเร ลีนตฺถปกาสนิยา ภิกฺขุนิวิภงฺเค

นิสฺสคฺคิยกถาวณฺณนา นิฏฺฐิตาฯ

[199] ลสุณํ ขาทติ เจ, ทฺเว อาปตฺติโย ผุฏาติ โยชนาฯ

[200] ปโยเคติ สํหาราปนปโยเคฯ สํหเฏติ อตฺตนา สํหเฏ, ปเรน สํหราปิเต จ อาปตฺติ ปาจิตฺติ โหติฯ

[201] กเตติ ตลฆาเต กเตฯ

[202] ชตุนา มฏฺฐกนฺติ ชตุนา กตํ มฏฺฐทณฺฑกํฯ ‘‘ทุกฺกฏํ อาทินฺเน’’ติ ปทจฺเฉโทฯ

[204] ภุญฺชมานสฺส ภิกฺขุสฺส หตฺถปาเสติ โยชนาฯ หิตฺวา หตฺถปาสํฯ

[205] วิญฺญาเปตฺวาติ อนฺตมโส มาตรมฺปิ ยาจิตฺวาฯ อชฺโฌหาเร ปาจิตฺติํ ทีปเยติ โยชนาฯ

[206] อุจฺจาราทินฺติ อาทิ-สทฺเทน วิฆาสสงฺการมุตฺตานํ คหณํฯ

ลสุณวคฺควณฺณนา ปฐมาฯ

[209] อิธ อิมสฺมิํ รตฺตนฺธการวคฺเคฯ ปฐเม, ทุติเย, ตติเย, จตุตฺเถปิ วินิจฺฉโย ลสุณวคฺคสฺส ฉฏฺเฐน สิกฺขาปเทน ตุลฺโย สทิโสติ โยชนาฯ

[210] อาสเนติ ปลฺลงฺเก ตสฺโสกาสภูเตฯ สามิเก อนาปุจฺฉาติ ตสฺมิํ กุเล ยํ กิญฺจิ วิญฺญุมนุสฺสํ อนาปุจฺฉาฯ

[211] อโนวสฺสนฺติ ภิตฺติยา พหิ นิพฺพโกสพฺภนฺตรํฯ ทุติยาติกฺกเมติ ทุติเยน ปาเทน นิพฺพโกสสฺส อุทกปาตฏฺฐานาติกฺกเมฯ

[212] นิสีทิเตติ นิสินฺเนฯ

[213] ปโยเคติ อุชฺฌาปนปโยเคฯ

[214] นิรยาทินา อตฺตานํ วา ปรํ วา อภิสปฺเปนฺตี สปถํ กโรนฺตี ทฺเว ผุเสติ โยชนาฯ อภิสปฺปิเตติ อภิสปิเตฯ

[215] วธิตฺวาติ หตฺถาทีหิ ปหริตฺวาฯ ‘‘กโรติ เอก’’นฺติ ปทจฺเฉโทฯ

รตฺตนฺธการวคฺควณฺณนา ทุติยาฯ

[216] นคฺคาติ อนิวตฺถา วา อปารุตา วาฯ ปโยเคติ จุณฺณมตฺติกาอภิสงฺขรณาทิปโยเคฯ

[217] ปมาณาติกฺกนฺตนฺติ ‘‘ทีฆโสจตสฺโส วิทตฺถิโย สุคตวิทตฺถิยา, ติริยํ ทฺเว วิทตฺถิโย’’ติ (ปาจิ. 888) วุตฺตปมาณมติกฺกนฺตํฯ ปโยเคติ การาปนปโยเคฯ

[218] วิสิพฺเพตฺวาติ ทุสฺสิพฺพิตํ ปุน สิพฺพนตฺถาย วิสิพฺเพตฺวาฯ

[219] ปญฺจ อหานิ ปญฺจาหํ, ปญฺจาหเมว ปญฺจาหิกํ

สงฺฆาฏีนํ จาโร สงฺฆาฏิจาโร, ปริโภควเสน วา โอตาปนวเสน วา สงฺฆฏิตฏฺเฐน ‘‘สงฺฆาฏี’’ติ ลทฺธนามานํ ‘‘ติจีวรํ, อุทกสาฏิกา, สํกจฺจิกา’’ติ อิเมสํ ปญฺจนฺนํ จีวรานํ ปริวตฺตนํฯ อติกฺกเมติ ภิกฺขุนี อติกฺกเมยฺยฯ อสฺสา ปน เอกาว ปาจิตฺติ ปริทีปิตาติ โยชนาฯ

[220] สงฺกมนียนฺติ สงฺกเมตพฺพํฯ อญฺญิสฺสา สนฺตกํ อนาปุจฺฉา คหิตํ ปุน ทาตพฺพํ ปญฺจนฺนํ อญฺญตรํฯ

[221] คณจีวรลาภสฺสาติ ภิกฺขุนิสงฺเฆน ลภิตพฺพจีวรสฺสฯ อนฺตรายํ กโรตีติ ยถา เต ทาตุกามา น เทนฺติ, เอวํ ปรกฺกมติฯ

[222] ธมฺมิกนฺติ สมคฺเคน สงฺเฆน สนฺนิปติตฺวา กริยมานํฯ ปฏิพาหนฺตีติ ปฏิเสเธนฺตีฯ ปฏิพาหิเต ปฏิเสธิเตฯ

[223] อคาริกาทิโนติ อาทิ-สทฺเทน ‘‘ปริพฺพาชกสฺส วา ปริพฺพาชิกาย วา’’ติ (ปารา. 917) วุตฺเต สงฺคณฺหาติฯ สมณจีวรนฺติ กปฺปกตํ นิวาสนปารุปนุปคํฯ ปโยเคติ ทานปโยเคฯ

[224] จีวเร ทุพฺพลาสายาติ ทุพฺพลจีวรปจฺจาสาย ‘‘สเจ สกฺโกม, ทสฺสามา’’ติ เอตฺตกมตฺตํ สุตฺวา อุปฺปาทิตาย อาสายาติ อตฺโถฯ กาลนฺติ จีวรกาลสมยํฯ สมติกฺกเมติ ภิกฺขุนีหิ กาลจีวเร ภาชิยมาเน ‘‘อาคเมถ, อยฺเย, อตฺถิ สงฺฆสฺส จีวรปจฺจาสา’’ติ วตฺวา ตํ จีวรวิภงฺคํ สมติกฺกเมยฺยฯ

[225] ธมฺมิกํ กถินุทฺธารนฺติ สมคฺเคน สงฺเฆน กริยมานํ กถินสฺส อนฺตรุพฺภารํฯ ปฏิพาหนฺติยาติ นิวาเรนฺติยาฯ

นฺหานวคฺควณฺณนา ตติยาฯ

[226] ตุวฏฺเฏยฺยุนฺติ นิปชฺเชยฺยุํฯ อิตรํ ปาจิตฺติยํฯ

[227] ปโยเคติ ภิกฺขุนิยา อผาสุกกรณปโยเค กริยมาเนฯ

[228] ทุกฺขิตนฺติ คิลานํฯ นุปฏฺฐาเปนฺติยา วาปีติ ตสฺสา อุปฏฺฐานํ ปเรหิ อการาเปนฺติยา, สยํ วา อกโรนฺติยาฯ

[229] อุปสฺสยํ ทตฺวาติ กวาฏพนฺธํ อตฺตโน ปุคฺคลิกวิหารํ ทตฺวาฯ กฑฺฒิเตติ นิกฺกฑฺฒิเตฯ

[230] สํสฏฺฐาติ คหปตินา วา คหปติปุตฺเตน วา สํสฏฺฐวิหารี ภิกฺขุนี สงฺเฆน สํสฏฺฐวิหารโต นิวตฺติยมานาฯ ญตฺติยา ทุกฺกฏํ ผุเสติ สมนุภาสนกมฺมญตฺติยา ทุกฺกฏํ อาปชฺเชยฺยฯ

[231] อนฺโตรฏฺเฐติ ยสฺส วิชิเต วิหรติ, ตสฺส รฏฺเฐฯ ปฏิปนฺนายาติ จาริกํ กปฺเปนฺติยาฯ เสสกนฺติ ปาจิตฺติยํฯ

ตุวฏฺฏวคฺควณฺณนา จตุตฺถาฯ

[233] ราชาคาราทิกนฺติ อาทิ-สทฺเทน จิตฺตาคาราทีนํ คหณํฯ

[235] ปโยเคติ กปฺปาสวิจารณํ อาทิํ กตฺวา สพฺพปโยเคฯ อุชฺชวุชฺชวเนติ ยตฺตกํ หตฺเถน อญฺฉิตํ โหติ, ตสฺมิํ ตกฺกมฺหิ เวฐิเตฯ

[237] ปโยเคติ อคาริกสฺส วา ปริพฺพาชกสฺส วา ปริพฺพาชิกาย วา สหตฺถา ขาทนียาทีนํ ทานปโยเคฯ

[238] ‘‘สมํ อาปตฺติปเภทโต’’ติ ปทจฺเฉโทฯ

[239] ติรจฺฉานคตํ วิชฺชนฺติ ยํ กิญฺจิ พาหิรกํ อนตฺถสํหิตํ ปรูปฆาตกรํ หตฺถิสิกฺขาทิสิปฺปํ ปฐนฺติยาติ สิกฺขนฺติยาฯ ปโยเคติ ทุรุปสงฺกมนาทิปโยเคฯ ปเท ปเทติ ปทาทิวเสน ปริยาปุณนฺติยา ปเท ปเท อกฺขรปทานํ วเสนฯ

[240] นวเม ‘‘ปริยาปุณาตี’’ติ ปทํ, ทสเม ‘‘วาเจตี’’ติ ปทนฺติ เอวํ ปทมตฺตเมว อุภินฺนํ วิเสสกํ เภทกํฯ

จิตฺตาคารวคฺควณฺณนา ปญฺจมาฯ

[241] ตมารามนฺติ ยตฺถ ภิกฺขู รุกฺขมูเลปิ วสนฺติ, ตํ สภิกฺขุกํ ปเทสํฯ

[243] อกฺโกสตีติ ทสนฺนํ อกฺโกสวตฺถูนํ อญฺญตเรน สมฺมุขา วา ปรมฺมุขา วา อกฺโกสติฯ ปริภาสตีติ ภยทสฺสเนน ตชฺเชติฯ ‘‘ปาจิตฺติ อกฺโกสิเต’’ติ ปทจฺเฉโทฯ

[244] จณฺฑิกภาเวนาติ โกเธนฯ คณนฺติ ภิกฺขุนิสงฺฆํฯ ปริภาสตีติ ‘‘พาลา เอตา’’ติอาทีหิ วจเนหิ อกฺโกสติฯ ปโยเคติ ปริภาสนปโยเคฯ ปริภฏฺเฐติ อกฺโกสิเตฯ อิตรํ ปาจิตฺติยํฯ

[245] นิมนฺติตาติ คณโภชเน วุตฺตนเยน นิมนฺติตาฯ ปวาริตาติ ปวารณสิกฺขาปเท วุตฺตนเยน วาริตาฯ ขาทนํ โภชนมฺปิ วาติ ยาคุปูวขชฺชกํ, ยาวกาลิกํ มูลขาทนียาทิขาทนียํ, โอทนาทิโภชนมฺปิ วา ยา ภิกฺขุนี ภุญฺชนฺตี โหติ, สา ปน ทฺเวเยว อาปตฺติโย ผุเสติ โยชนาฯ

[247] มจฺฉรายนฺตีติ มจฺฉรํ กโรนฺตี, อตฺตโน ปจฺจยทายกกุลสฺส อญฺเญหิ สาธารณภาวํ อสหนฺตีติ อตฺโถ ปโยเคติ ตทนุรูเป กายวจีปโยเคฯ มจฺฉริเตติ มจฺฉรวเสน กตปโยเค นิปฺผนฺเนฯ

[248] อภิกฺขุเก ปนาวาเสติ ยโต ภิกฺขุนุปสฺสยโต อทฺธโยชนพฺภนฺตเร โอวาททายกา ภิกฺขู น วสนฺติ, มคฺโค วา อเขโม โหติ, น สกฺกา อนนฺตราเยน คนฺตุํ, เอวรูเป อาวาเสฯ ปุพฺพกิจฺเจสูติ ‘‘วสฺสํ วสิสฺสามี’’ติ เสนาสนปญฺญาปนปานียอุปฏฺฐาปนาทิปุพฺพกิจฺเจ ปน กริยมาเน ทุกฺกฏํ ภเวติ โยชนาฯ

[249] วสฺสํวุตฺถาติ ปุริมํ วา ปจฺฉิมํ วา เตมาสํ วุตฺถาฯ อุภโตสงฺเฆติ ภิกฺขุนิสงฺเฆ, ภิกฺขุสงฺเฆ จฯ ตีหิปิ ฐาเนหีติ ‘‘ทิฏฺเฐน วา’’ติอาทินา วุตฺเตหิ ตีหิ การเณหิฯ

[250] โอวาทตฺถายาติ ครุธมฺโมวาทนตฺถายฯ สํวาสตฺถายาติ อุโปสถปุจฺฉนตฺถาย เจว ปวารณตฺถาย จฯ น คจฺฉตีติ ภิกฺขุํ น อุปคจฺฉติฯ

[251] โอวาทมฺปิ น ยาจนฺตีติ อุโปสถาทิวเสน โอวาทูปสงฺกมนํ ภิกฺขุํ น ยาจนฺตี น ปุจฺฉนฺตีฯ อุโปสถนฺติ อุโปสถทิวสโต ปุริมทิวเส เตรสิยํ วา จาตุทฺทสิยํ วา อุโปสถํ น ปุจฺฉนฺตีฯ

[252] อปุจฺฉิตฺวาว สงฺฆํ วาติ สงฺฆํ วา คณํ วา อนปโลเกตฺวาวฯ ‘‘เภทาเปตี’’ติ อิทํ นิทสฺสนมตฺตํ ‘‘ผาลาเปยฺย วา โธวาเปยฺย วา อาลิมฺปาเปยฺย วา พนฺธาเปยฺย วา โมจาเปยฺย วา’’ติ อิเมสมฺปิ กิริยาวิกปฺปานํ สงฺคเหตพฺพตฺตาฯ

ปสาขชนฺติ นาภิยา เหฏฺฐา, ชาณุมณฺฑลานํ อุปริ ปเทเส ชาตํ คณฺฑํ วา รุธิตํ วาฯ ปโยเคติ เภทาปนาทิปโยเคฯ

อารามวคฺควณฺณนา ฉฏฺฐาฯ

[253] คพฺภินินฺติ อาปนฺนสตฺตํ สิกฺขมานํฯ วุฏฺฐาเปนฺตีติ อุปชฺฌายา หุตฺวา อุปสมฺปาเทนฺตีฯ ปโยเคติ คณปริเยสนาทิปโยเคฯ วุฏฺฐาปิเตติ อุปสมฺปาทิเต, กมฺมวาจาปริโยสาเนติ อตฺโถฯ

[255] สหชีวินินฺติ สทฺธิวิหารินิํฯ นานุคฺคณฺหนฺตีติ อุทฺเทสทานาทีหิ น สงฺคณฺหนฺตีฯ

คพฺภินิวคฺควณฺณนา สตฺตมาฯ

[258] ‘‘อลํ วุฏฺฐาปิเตนา’’ติ วุจฺจมานา ภิกฺขุนีหิ นิวาริยมานาฯ ขียตีติ อญฺญาสํ พฺยตฺตานํ ลชฺชีนํ วุฏฺฐานสมฺมุติํ ทียมานํ ทิสฺวา ‘‘อหเมว นูน พาลา’’ติอาทินา ภณมานา ขียติฯ ปโยเคติ ขียมานปโยเคฯ ขียิเตติ ขียนปโยเค นิฏฺฐิเตฯ

กุมาริภูตวคฺควณฺณนา อฏฺฐมาฯ

[260] ฉตฺตุปาหนนฺติ วุตฺตลกฺขณํ ฉตฺตญฺจ อุปาหนาโย จฯ ปโยเคติ ธารณปโยเคฯ

[261] ยาเนนาติ วยฺหาทินาฯ ยายนฺตีติ สเจ ยาเนน คตา โหติฯ

[262] สงฺฆาณินฺติ ยํ กิญฺจิ กฏูปคํฯ ธาเรนฺติยาติ กฏิยํ ปฏิมุจฺจนฺติยาฯ

[263] คนฺธวณฺเณนาติ เยน เกนจิ วณฺเณน จ เยน เกนจิ คนฺเธน จฯ คนฺโธ นาม จนฺทนาเลปาทิฯ วณฺโณ นาม กุงฺกุมหลิทฺทาทิฯ ปโยเคติ คนฺธาทิปโยเค รจนโต ปฏฺฐาย ปุพฺพปโยเคฯ

[266] อนาปุจฺฉาติ ‘‘นิสีทามิ, อยฺยา’’ติ อนาปุจฺฉิตฺวาฯ นิสีทิเต ภิกฺขุสฺส อุปจาเร อนฺตมโส ฉมาย นิสินฺเนฯ

[267] อโนกาสกตนฺติ ‘‘อสุกสฺมิํ นาม ฐาเน ปุจฺฉิสฺสามี’’ติ เอวํ อกตโอกาสํฯ

[268] ปวิสนฺติยาติ วินิจฺฉยํ อารามวคฺคสฺส ปฐเมเนว สิกฺขาปเทน สทิสํ กตฺวา วเทยฺยาติ โยชนาฯ

ฉตฺตุปาหนวคฺควณฺณนา นวมาฯ

อิติ อุตฺตเร ลีนตฺถปกาสนิยา ภิกฺขุนิวิภงฺเค

ปาจิตฺติยกถาวณฺณนา นิฏฺฐิตาฯ

[269-70] อฏฺฐสุ ปาฏิเทสนียสิกฺขาปเทสุปิ ทฺวิธา อาปตฺติ โหตีติ โยชนาฯ ตโตติ คหณเหตุฯ สพฺเพสูติ ปาฏิเทสนียสิกฺขาปเทสุฯ

ปาฏิเทสนียกถาวณฺณนาฯ

[271-2] อิมํ ปรมํ อุตฺตมํ นิรุตฺตรํ เกนจิ วา วตฺตพฺเพน อุตฺตเรน รหิตํ นิทฺโทสํ อุตฺตรํ เอวํนามกํ ธีโร ปญฺญวา ภิกฺขุ อตฺถวเสน วิทิตฺวา ทุรุตฺตรํ กิจฺเฉน อุตฺตริตพฺพํ ปญฺญตฺตมหาสมุทฺทํ วินยมหาสาครํ สุเขเนว ยสฺมา อุตฺตรติ, ตสฺมา กงฺขจฺเฉเท วินยวิจิกิจฺฉาย ฉินฺทเน สตฺเถ สตฺถสทิเส อสฺมิํ สตฺเถ อิมสฺมิํ อุตฺตรปกรเณ อุสฺมายุตฺโต กมฺมชเตโชธาตุยา สมนฺนาคโต ชีวมาโน ภิกฺขุ นิจฺจํ นิรนฺตรํ สตฺโต อภิรโต นิจฺจํ โยคํ สตตาภิโยคํ กาตุํ ยุตฺโต อนุรูโปติ โยชนาฯ

ภิกฺขุนิวิภงฺโค นิฏฺฐิโตติ เอตฺถาปิ อุปฺปตฺติ วุตฺตนเยเนว เวทิตพฺพาฯ

อิติ อุตฺตเร ลีนตฺถปกาสนิยา

ภิกฺขุนิวิภงฺควณฺณนา นิฏฺฐิตาฯ

จตุวิปตฺติกถาวณฺณนา

[273] อิทานิ อุภยสาธารณํ กตฺวา วิปตฺติวาราทีนํ วิสิฏฺฐวารานํ สงฺคหํ กาตุมาห ‘‘กติ อาปตฺติโย’’ติอาทิฯ

[274] ภิกฺขุนี สเจ ฉาเทติ, จุตา โหติฯ สเจ เวมติกา ฉาเทติ, ถุลฺลจฺจยํ สิยาติ โยชนาฯ

[275] สงฺฆาทิเสสนฺติ ปรสฺส สงฺฆาทิเสสํฯ

[276] ‘‘กติ อาจารวิปตฺติปจฺจยา’’ติ ปทจฺเฉโทฯ

[277] อาจารวิปตฺตินฺติ อตฺตโน วา ปรสฺส วา อาจารวิปตฺติํฯ

[279] ปาปิกํ ทิฏฺฐินฺติ อเหตุกอกิริยนตฺถิกทิฏฺฐิอาทิํ ลามิกํ ทิฏฺฐิํฯ

[281] มนุสฺสุตฺตริธมฺมนฺติ อุตฺตริมนุสฺสธมฺมํฯ