[2437] ปาฬิยํ อนาคเตสุ สพฺเพสุ สปฺปิอาทีสุ อฏฺฐสุ อญฺญตรํ วิญฺญาเปตฺวา ภุญฺชนฺติยาปิ ทุกฺกฏนฺติ โยชนาฯ

อิติ วินยตฺถสารสนฺทีปนิยา วินยวินิจฺฉยวณฺณนาย

ปาฏิเทสนียกถาวณฺณนา นิฏฺฐิตาฯ

สิกฺขากรณียกถาวณฺณนา

[2438] ปาฏิเทสนียานนฺตรํ อุทฺทิฏฺฐานิ ปญฺจสตฺตติ เสขิยานิ มหาวิภงฺเค วุตฺตวินิจฺฉยาเนวาติ ตเทว อติทิสนฺโต อาห ‘‘เสขิยา ปน เย ธมฺมา’’ติอาทิฯ เย ปน ปญฺจสตฺตติ เสขิยา ธมฺมา ปาฏิเทสนียานนฺตรํ อุทฺทิฏฺฐา, เตสํ อตฺถวินิจฺฉโย มหาวิภงฺเค วุตฺโตวาติ โยชนา, อตฺถิเกหิ ตโตว คเหตพฺโพ, น ปุน อิธ ทสฺเสสฺสามีติ อธิปฺปาโยฯ

อิติ วินยตฺถสารสนฺทีปนิยา วินยวินิจฺฉยวณฺณนาย

สิกฺขากรณียกถาวณฺณนา นิฏฺฐิตาฯ

[2439-40] สวิภงฺคานํ อุภโตวิภงฺคสหิตานํ อุภโตปาติโมกฺขานํ ภิกฺขูนํ, ภิกฺขุนีนญฺจ ปาติโมกฺขานํ อฏฺฐกถาสาโร สพฺพฏฺฐกถานํ สารภูโต โย โส อตฺโถ วิเสสโต สมนฺตปาสาทิกายํ วุตฺโตฯ ตํ สพฺพํ สารภูตํ อตฺถํ สมาทาย โย วินยสฺสวินิจฺฉโย ภิกฺขูนํ, ภิกฺขุนีนญฺจ หิตตฺถาย มยา กโต วิรจิโตติ สมฺพนฺโธฯ

[2441] โน อมฺหากํ ปฏิภาณชํ ปฏิภาณโต ชาตํ อิมํ ตุ อิมํ วินยวินิจฺฉยํ ปน เย ชนฺตุโน สตฺตา สุณนฺติ , เต ชนฺตุโน ชนสฺส สตฺตโลกสฺส หิเต อธิสีลสิกฺขาปกาสกตฺตา อุปการเก สุมตสฺส โสภณนฺติ พุทฺธาทีหิ มตสฺส, โสภเณหิ วา พุทฺธาทีหิ มตสฺส ปฏิวิทฺธสฺส อมตมหานิพฺพานสฺส อยเน อญฺชสภูเต ชนสฺส ตายเน กายิกวาจสิกวีติกฺกมปฏิปกฺขตฺตา อปายภยนิวารณฏฺเฐน ตาณภูเต วินเย วินยปิฏเก ปกตญฺญุโน ยถาสภาวํ ชานนฺตา ตญฺญุโน ภวนฺติ ตํ ตํ กปฺปิยากปฺปิยํ เสวิตพฺพาเสวิตพฺพํ ชานนฺตา ภวนฺเตวาติ อตฺโถฯ

[2442] พหโว สารภูตา นยา เอตฺถาติ พหุสารนโย, ตสฺมิํ พหุสารนเยฯ ปรเม อุตฺตเม วินเย วินยปิฏเก วิสารทตํ เวสารชฺชํ อสํหีรญาณํ อภิปตฺถยตา วิเสสโต อิจฺฉนฺเตน พุทฺธิมตา ญาณาติสยมนฺเตน ยตินา สพฺพกาลํ ติวิธสิกฺขาปริปูรเณ อสิถิลปวตฺตสมฺมาวายาเมน ภิกฺขุนา อิมสฺมิํ วินยวินิจฺฉเย ปรมา อุตฺตริตรา มหตี อาทรตา กรณียตมา วิเสเสน กาตพฺพาเยวาติ อตฺโถฯ

[2443] อิจฺเจวํ สีลวิสุทฺธิสาธเน วินยปิฏเก เวสารชฺชเหตุตาย อิมสฺส วินยวินิจฺฉยสฺส สีลวิสุทฺธิอาทิสตฺตวิสุทฺธิปรมฺปราย อธิคนฺตพฺพสฺส อมตมหานิพฺพานสฺส ปตฺติยาปิ มูลภูตตํ ทสฺเสตุมาห ‘‘อวคจฺฉตี’’ติอาทิฯ

โย ปน ภิกฺขุ อตฺถยุตฺตํ มหตา ปโยชนตฺเถน, อภิเธยฺยตฺเถน จ สมนฺนาคตํ อิมํ วินยสฺสวินิจฺฉยํ อวคจฺฉติ อเวจฺจ ยาถาวโต ชานาติ, โส อปรมฺปรํ มรณาภาวา อมรํ ชรายาภาวา อชรํ ราคาทิกิเลสรชปฏิปกฺขตฺตา อรชํ อเนกปฺปการโรคานํ อปฺปวตฺติเหตุตฺตา อรุชํ สนฺติปทํ สพฺพกิเลสทรถปริฬาหานํ วูปสมเหตุตฺตา สนฺติสงฺขาตํ นิพฺพานปทํ อธิคจฺฉติ สีลวิสุทฺธิอาทิสตฺตวิสุทฺธิปรมฺปราย คนฺตฺวา ปฏิวิชฺฌตีติ โยชนาฯ

อิติ วินยตฺถสารสนฺทีปนิยา วินยวินิจฺฉยวณฺณนาย

ภิกฺขุนิวิภงฺคกถาวณฺณนา นิฏฺฐิตาฯ

ขนฺธกกถา

มหาวคฺโค

มหาขนฺธกกถา