เมนู

[282] อาชีวเหตุ สญฺจริตฺตํ สมาปนฺโนติ โยชนาฯ ปริยายวจเนติ ‘‘โย เต วิหาเร วสติ, โส ภิกฺขุ อรหา’’ติอาทิเก เลสวจเนฯ ญาเตติ ยํ อุทฺทิสฺส วทติ, ตสฺมิํ มนุสฺสชาติเก วจนสมนนฺตรเมว ญาเตฯ

[283] วตฺวาติ อคิลาโน อตฺตโน อตฺถาย วิญฺญาเปตฺวาฯ ภิกฺขุนี ปน สเจ เอวํ โหติ, ภิกฺขุนี อคิลานา อตฺตโน อตฺถาย ปณีตโภชนํ วิญฺญาเปตฺวา ภุตฺตาวินี สเจ โหตีติ อธิปฺปาโยฯ ตสฺสา ปาฏิเทสนียํ สิยาติ โยชนาฯ

[284] ‘‘อตฺตโน อตฺถาย วิญฺญาเปตฺวานา’’ติ อิมินา ปรสฺส ญาตกปวาริเต ตสฺเสวตฺถาย วิญฺญาเปตฺวา เตน ทินฺนํ วา ตสฺส วิสฺสาเสน วา ปริภุญฺชนฺตสฺส เตสํ อตฺตโน อญฺญาตกอปฺปวาริเต สุทฺธจิตฺตตาย อนาปตฺตีติ ทีเปติฯ

อิติ อุตฺตเร ลีนตฺถปกาสนิยา

จตุวิปตฺติกถาวณฺณนา นิฏฺฐิตาฯ

อธิกรณปจฺจยกถาวณฺณนา

[285] วิวาทาธิกรณมฺหาติ ‘‘อธมฺมํ ‘ธมฺโม’ติ ทีเปตี’’ติอาทินยปฺปวตฺตา อฏฺฐารสเภทกรวตฺถุนิสฺสิตา วิวาทาธิกรณมฺหาฯ

[286] อุปสมฺปนฺนํ โอมสโต ภิกฺขุสฺส ปาจิตฺติ โหตีติ โยชนาฯ