[271-2] อิมํ ปรมํ อุตฺตมํ นิรุตฺตรํ เกนจิ วา วตฺตพฺเพน อุตฺตเรน รหิตํ นิทฺโทสํ อุตฺตรํ เอวํนามกํ ธีโร ปญฺญวา ภิกฺขุ อตฺถวเสน วิทิตฺวา ทุรุตฺตรํ กิจฺเฉน อุตฺตริตพฺพํ ปญฺญตฺตมหาสมุทฺทํ วินยมหาสาครํ สุเขเนว ยสฺมา อุตฺตรติ, ตสฺมา กงฺขจฺเฉเท วินยวิจิกิจฺฉาย ฉินฺทเน สตฺเถ สตฺถสทิเส อสฺมิํ สตฺเถ อิมสฺมิํ อุตฺตรปกรเณ อุสฺมายุตฺโต กมฺมชเตโชธาตุยา สมนฺนาคโต ชีวมาโน ภิกฺขุ นิจฺจํ นิรนฺตรํ สตฺโต อภิรโต นิจฺจํ โยคํ สตตาภิโยคํ กาตุํ ยุตฺโต อนุรูโปติ โยชนาฯ

ภิกฺขุนิวิภงฺโค นิฏฺฐิโตติ เอตฺถาปิ อุปฺปตฺติ วุตฺตนเยเนว เวทิตพฺพาฯ

อิติ อุตฺตเร ลีนตฺถปกาสนิยา

ภิกฺขุนิวิภงฺควณฺณนา นิฏฺฐิตาฯ

จตุวิปตฺติกถาวณฺณนา

[273] อิทานิ อุภยสาธารณํ กตฺวา วิปตฺติวาราทีนํ วิสิฏฺฐวารานํ สงฺคหํ กาตุมาห ‘‘กติ อาปตฺติโย’’ติอาทิฯ

[274] ภิกฺขุนี สเจ ฉาเทติ, จุตา โหติฯ สเจ เวมติกา ฉาเทติ, ถุลฺลจฺจยํ สิยาติ โยชนาฯ

[275] สงฺฆาทิเสสนฺติ ปรสฺส สงฺฆาทิเสสํฯ

[276] ‘‘กติ อาจารวิปตฺติปจฺจยา’’ติ ปทจฺเฉโทฯ

[277] อาจารวิปตฺตินฺติ อตฺตโน วา ปรสฺส วา อาจารวิปตฺติํฯ

[279] ปาปิกํ ทิฏฺฐินฺติ อเหตุกอกิริยนตฺถิกทิฏฺฐิอาทิํ ลามิกํ ทิฏฺฐิํฯ

[281] มนุสฺสุตฺตริธมฺมนฺติ อุตฺตริมนุสฺสธมฺมํฯ

[282] อาชีวเหตุ สญฺจริตฺตํ สมาปนฺโนติ โยชนาฯ ปริยายวจเนติ ‘‘โย เต วิหาเร วสติ, โส ภิกฺขุ อรหา’’ติอาทิเก เลสวจเนฯ ญาเตติ ยํ อุทฺทิสฺส วทติ, ตสฺมิํ มนุสฺสชาติเก วจนสมนนฺตรเมว ญาเตฯ

[283] วตฺวาติ อคิลาโน อตฺตโน อตฺถาย วิญฺญาเปตฺวาฯ ภิกฺขุนี ปน สเจ เอวํ โหติ, ภิกฺขุนี อคิลานา อตฺตโน อตฺถาย ปณีตโภชนํ วิญฺญาเปตฺวา ภุตฺตาวินี สเจ โหตีติ อธิปฺปาโยฯ ตสฺสา ปาฏิเทสนียํ สิยาติ โยชนาฯ

[284] ‘‘อตฺตโน อตฺถาย วิญฺญาเปตฺวานา’’ติ อิมินา ปรสฺส ญาตกปวาริเต ตสฺเสวตฺถาย วิญฺญาเปตฺวา เตน ทินฺนํ วา ตสฺส วิสฺสาเสน วา ปริภุญฺชนฺตสฺส เตสํ อตฺตโน อญฺญาตกอปฺปวาริเต สุทฺธจิตฺตตาย อนาปตฺตีติ ทีเปติฯ

อิติ อุตฺตเร ลีนตฺถปกาสนิยา

จตุวิปตฺติกถาวณฺณนา นิฏฺฐิตาฯ

อธิกรณปจฺจยกถาวณฺณนา

[285] วิวาทาธิกรณมฺหาติ ‘‘อธมฺมํ ‘ธมฺโม’ติ ทีเปตี’’ติอาทินยปฺปวตฺตา อฏฺฐารสเภทกรวตฺถุนิสฺสิตา วิวาทาธิกรณมฺหาฯ

[286] อุปสมฺปนฺนํ โอมสโต ภิกฺขุสฺส ปาจิตฺติ โหตีติ โยชนาฯ