ฯ นโม ตสฺส ภควโต อรหโต สมฺมาสมฺพุทฺธสฺสฯ

วินยวินิจฺฉยฏีกา

(ปฐโม ภาโค)

คนฺถารมฺภกถา

(ก)

อาทิจฺจวํสมฺพรปาตุภูตํ ;

พฺยามปฺปภามณฺฑลเทวจาปํ;

ธมฺมมฺพุนิชฺฌาปิตปาปฆมฺมํ;

วนฺทามหํ พุทฺธ มหมฺพุวนฺตํฯ

(ข)

ปสนฺนคมฺภีรปทาฬิโสตํ;

นานานยานนฺตตรงฺคมาลํ;

สีลาทิขนฺธามิตมจฺฉคุมฺพํ ;

วนฺทามหํ ธมฺม มหาสวนฺติํฯ

(ค)

สีโลรุเวลํ ธุตสงฺขมาลํ;

สนฺโตสโตยํ สมถูมิจิตฺตํ;

ปธานกิจฺจํ อธิจิตฺตสารํ;

วนฺทามหํ สงฺฆ มหาสมุทฺทํฯ

(ฆ)

เย ตนฺติธมฺมํ มุนิราชปุตฺตา;

ยาวชฺชกาลํ ปริปาลยนฺตา;

สํวณฺณนํ นิมฺมลมานยิํสุ;

เต ปุพฺพเก จาจริเย นมามิฯ

(ง)

โย ธมฺมเสนาปติตุลฺยนาโม;

ตถูปโม สีหฬทีปทีโป;

มมํ มหาสามิมหายตินฺโท;

ปาเปสิ วุฑฺฒิํ ชินสาสนมฺหิฯ

(จ)

ฏีกา กตา อฏฺฐกถาย เยน;

สมนฺตปาสาทิกนามิกาย;

องฺคุตฺตรายฏฺฐกถาย เจว;

สตฺถนฺตรสฺสาปิ จ โชติสตฺถํฯ

(ฉ)

นิกายสามคฺคิวิธายเกน;

รญฺญา ปรกฺกนฺติภุเชน สมฺมา;

ลงฺกิสฺสเรนาปิ กโตปหารํ;

วนฺเท ครุํ คารวภาชนํ ตํฯ

(ช)

นมสฺสมาโนหมลตฺถเมวํ ;

วตฺถุตฺตยํ วนฺทิตวนฺทเนยฺยํ;

ยํ ปุญฺญสนฺโทหมมนฺทภูตํ;

ตสฺสานุภาเวน หตนฺตราโยฯ

(ฌ)

โย พุทฺธโฆสาจริยาสเภน;

วิญฺญุปฺปสตฺเถนปิ สุปฺปสตฺโถ;

โส พุทฺธทตฺตาจริยาภิธาโน;

มหากวี เถริยวํสทีโปฯ

(ญ)

อกาสิ ยํ วินยวินิจฺฉยวฺหยํ;

สอุตฺตรํ ปกรณมุตฺตมํ หิตํ;

อเปกฺขตํ วินยนเยสุ ปาฏวํ;

ปุราสิ ยํ วิวรณมสฺส สีหฬํฯ

(ฏ)