อิทญฺหิ ติสมุฏฺฐานํ, กฺริยํ สญฺญาวิโมกฺขกํ;
กายกมฺมํ วจีกมฺมํ, ติจิตฺตญฺจ ติเวทนํฯ
ปริณตกถาฯ
ปตฺตวคฺโค ตติโยฯ
[888]
เตเนกวตฺถุคฺคตรงฺคมาลํ;
สีลนฺตมาปตฺติวิปตฺติคาหํ;
ตรนฺติ ปญฺญตฺติมหาสมุทฺทํ;
วินิจฺฉยํ เย ปนิมํ ตรนฺติฯ
อิติ วินยวินิจฺฉเย นิสฺสคฺคิยกถา นิฏฺฐิตาฯ
ปาจิตฺติยกถา
[889]
สมฺปชานมุสาวาเท , ปาจิตฺติยมุทีริตํ;
ทวา รวา ภณนฺตสฺส, น โทสุมฺมตฺตกาทิโนฯ
[890]
อญฺญตฺถาปตฺติโย ปญฺจ, มุสาวาทสฺส การณา;
สมุฏฺฐานาทโย สพฺเพ, อทินฺนาทานตุลฺยกาฯ
สมฺปชานมุสาวาทกถาฯ
[891]
ชาติอาทีสุ วุตฺเตสุ, ทสสฺวกฺโกสวตฺถุสุ;
ภูเตน วา อภูเตน, เยน เกนจิ วตฺถุนาฯ
[892]
ยาย กายจิ ภาสาย, หตฺถมุทฺทาย วา ปน;
ปาราชิกมนาปนฺนํ, ภิกฺขุมาปนฺนเมว วาฯ
[893]
อญฺญตฺรญฺญาปเทเสน, โอมสนฺตสฺส ภิกฺขุโน;
ตตฺถ ปาจิตฺติยาปตฺติ, สมฺพุทฺเธน ปกาสิตาฯ
[894]
เตเหวญฺญาปเทเสน , ปาฬิมุตฺตปเทหิปิ;
สพฺพตฺถานุปสมฺปนฺนํ, อกฺโกสนฺตสฺส ทุกฺกฏํฯ
[895]
อนกฺโกสิตุกามสฺส, เกวลํ ทวกมฺยตา;
วทโต ปน สพฺพตฺถ, ทุพฺภาสิตมุทีริตํฯ
[896]
ปวิฏฺฐานุปสมฺปนฺน-ฏฺฐาเน อิธ จ ภิกฺขุนี;
อนาปตฺติ ปุรกฺขตฺวา, อตฺถธมฺมานุสาสนิํฯ
[897]
วทโต ปน ภิกฺขุสฺส, สมุฏฺฐานาทโย นยา;
อนนฺตรสมา วุตฺตา, ทุกฺขา โหเตตฺถ เวทนาฯ
โอมสวาทกถาฯ
[898]
อาปตฺติ ภิกฺขุเปสุญฺเญ, ทุวิธาการโต สิยา;
อตฺตโน ปิยกามสฺส, ปรเภทตฺถิโนปิ วาฯ
[899]
อกฺโกสนฺตสฺส ปริยาย-ปาฬิมุตฺตนเยหิ จ;
วจนสฺสุปสํหาเร, โหติ อาปตฺติ ทุกฺกฏํฯ
[900]
ตถา อนุปสมฺปนฺน-อกฺโกสํ หรโตปิ จ;
ฐิตา อนุปสมฺปนฺน-ฏฺฐาเน อิธ จ ภิกฺขุนีฯ
[901]
น เจว ปิยกามสฺส, น จ เภทตฺถิโนปิ วา;
ปาปานํ ครหตฺถาย, วทนฺตสฺส จ ภิกฺขุโนฯ
[902]
ตถา อุมฺมตฺตกาทีนํ, อนาปตฺตีติ ทีปิตา;
สมุฏฺฐานาทโย สพฺเพ, อทินฺนาทานสาทิสาฯ
เปสุญฺญกถาฯ
[903]
ฐเปตฺวา ภิกฺขุนิํ ภิกฺขุํ, อญฺเญน ปิฏกตฺตยํ;
ธมฺมํ สห ภณนฺตสฺส, ตสฺส ปาจิตฺติยํ สิยาฯ
[904]
ราโชวาทาทโย วุตฺตา, มหาปจฺจริยาทิสุ;
อนารุฬฺเหสุ สงฺคีติํ, อาปตฺติชนกาติ หิฯ
[905]
ทุกฺกฏํ โหติ ภิกฺขุสฺมิํ, ตถา ภิกฺขุนิยาปิ จ;
ภิกฺขุสฺสานุปสมฺปนฺน-สญฺญิโน วิมติสฺส วาฯ
[906]
เอกโต อุทฺทิสาเปติ, สชฺฌายํ วา กโรติ โย;
ภณนฺตํ ปคุณํ คนฺถํ, โอปาเตติ จ โย ปนฯ
[907]
ตสฺส จานุปสมฺปนฺน-สนฺติเก คณฺหโตปิ จ;
อุทฺเทสํ ตุ อนาปตฺติ, ภณเน เตน เอกโตฯ
[908]
วาจโต จ สมุฏฺฐาติ, วาจาจิตฺตทฺวยาปิ จ;
สมุฏฺฐานมิทํ วุตฺตํ, ปทโสธมฺมสญฺญิตํฯ
ปทโสธมฺมกถาฯ
[909]
สพฺพจฺฉนฺนปริจฺฉนฺเน, นิปชฺเชยฺย สเจ ปน;
เยภุยฺเยน ปริจฺฉนฺเน, ฉนฺเน เสนาสเนปิ วาฯ
[910]
ติสฺสนฺนํ ปน รตฺตีนํ, อุทฺธํ โย ปน รตฺติยํ;
ฐเปตฺวา ภิกฺขุํ อญฺเญน, ตสฺส ปาจิตฺติยํ สิยาฯ
[911]
วตฺถุํ ยํ ปน นิทฺทิฏฺฐํ, เมถุนสฺส ปโหนกํ;
อาปตฺยนฺตมโส เตน, ติรจฺฉานคเตนปิฯ
[912]
นิปนฺเน อุปสมฺปนฺเน, อิตโร เจ นิปชฺชติ;
อิตรสฺมิํ นิปนฺเน วา, สเจ ภิกฺขุ นิปชฺชติฯ
[913]
อุภินฺนํ อุฏฺฐหิตฺวา วา, นิปชฺชนปโยคโต;
อาปตฺตานุปสมฺปนฺน-คณนายปิ วา สิยาฯ
[914]
สเจ ปิธาย วา คพฺภํ, นิปชฺชติปิธาย วา;
อาปตฺตตฺถงฺคเต สูริเย, จตุตฺถทิวเส สิยาฯ
[915]
ทิยฑฺฒหตฺถุพฺเพเธน , ปาการจยนาทินา;
ปริกฺขิตฺตมฺปิ ตํ สพฺพํ, ปริกฺขิตฺตนฺติ วุจฺจติฯ
[916]
ภิกฺขุสฺสนฺตมโส ทุสฺส-กุฏิยํ วสโตปิ จ;
สหเสยฺยาย อาปตฺติ, โหตีติ ปริทีปิโตฯ
[917]
สพฺพจฺฉนฺนปริจฺฉนฺน-เยภุยฺยาทิปฺปเภทโต;
สตฺต ปาจิตฺติยาเนตฺถ, ทฏฺฐพฺพานิ สุพุทฺธินาฯ
[918]
อฑฺฒจฺฉนฺนปริจฺฉนฺเน, ทุกฺกฏํ ปริทีปิตํ;
สพฺพจูฬปริจฺฉนฺน-ฉนฺนาทีหิปิ ปญฺจธาฯ
[919]
อนาปตฺติ ทิรตฺตํ วา, ติรตฺตํ วสโต สห;
อรุณสฺส ปุเรเยว, ตติยาย จ รตฺติยาฯ
[920]
นิกฺขมิตฺวา วสนฺตสฺส, ปุน สทฺธิญฺจ ภิกฺขุโน;
ตถา สพฺพปริจฺฉนฺน-สพฺพจฺฉนฺนาทิเกปิ จฯ
[921]
เอวํ อนุปสมฺปนฺเน, นิปนฺเนปิ นิสีทโต;
เสสา เอฬกโลเมน, สมุฏฺฐานาทโย สมาฯ
สหเสยฺยกถาฯ
[922]
สเจ ตทหุชาตาย, อปิ โย มานุสิตฺถิยา;
สหเสยฺยํ ปกปฺเปยฺย, ตสฺส ปาจิตฺติยํ สิยาฯ
[923]
ทิสฺสมานกรูปาย, ยกฺขิยา เปติยา สห;
รตฺติยํ โย นิปชฺเชยฺย, เทวิยา ปณฺฑเกน วาฯ
[924]
เมถุนวตฺถุภูตาย, ติรจฺฉานคติตฺถิยา;
วตฺถูนํ คณนายสฺส, โหติ อาปตฺติ ทุกฺกฏํฯ
[925]
อิเธกทิวเสเนว , อาปตฺติ ปริทีปิตา;
เสโส อนนฺตเร วุตฺต-สทิโสว วินิจฺฉโยฯ
ทุติยสหเสยฺยกถาฯ
[926]
อุทฺธํ ฉปฺปญฺจวาจาหิ, วิญฺญุํ ปุริสวิคฺคหํ;
วินา ธมฺมํ ภณนฺตสฺส, โหติ ปาจิตฺติ อิตฺถิยาฯ
[927]
คาถาปาโท ปเนโกว, เอกวาจาติ สญฺญิโต;
ปทโสธมฺมํ นิทฺทิฏฺฐํ, ธมฺมมฏฺฐกถมฺปิ วาฯ
[928]
ฉนฺนํ อุปริ วาจานํ, ปทาทีนํ วสา ปน;
เทเสนฺตสฺส สิยาปตฺติ, ปทาทิคณนาย จฯ
[929]
นิมฺมินิตฺวา ฐิเตนาปิ, สทฺธิํ ปุริสวิคฺคหํ;
ยกฺเขนปิ จ เปเตน, ติรจฺฉานคเตนปิฯ
[930]
ฐิตสฺส มาตุคามสฺส, ธมฺมํ โย ปน ภาสติ;
ฉนฺนํ อุปริ วาจานํ, ตสฺส ปาจิตฺติยํ สิยาฯ
[931]
ปุริเส อิตฺถิสญฺญิสฺส, วิมติสฺส จ ปณฺฑเก;
อุตฺตริ ฉหิ วาจาหิ, วทโต โหติ ทุกฺกฏํฯ
[932]
อิตฺถิรูปํ คเหตฺวาน, ฐิตานํ ภาสโตปิ จ;
ทุกฺกฏํ ยกฺขิเปตีนํ, ติรจฺฉานคติตฺถิยาฯ
[933]
ปุริเส สติ วิญฺญุสฺมิํ, สยํ อุฏฺฐาย วา ปุน;
เทเสนฺตสฺส นิสีทิตฺวา, มาตุคามสฺส วา ตถาฯ
[934]
อญฺญิสฺสา ปุน อญฺญิสฺสา, อิตฺถิยา ภณโตปิ จ;
ฉหิ ปญฺจหิ วาจาหิ, อนาปตฺติ ปกาสิตาฯ
[935]
ปทโสธมฺมตุลฺยาว, สมุฏฺฐานาทโย มตา;
อยเมว วิเสโสติ, กฺริยากฺริยมิทํ ปนฯ
ธมฺมเทสนากถาฯ
[936]
มหคฺคตํ ปณีตํ วา, อาโรเจนฺตสฺส ภิกฺขุโน;
ฐเปตฺวา ภิกฺขุนิํ ภิกฺขุํ, ภูเต ปาจิตฺติยํ สิยาฯ
[937]
โน เจ ชานาติ โส วุตฺตํ, อาโรเจนฺตสฺส ภิกฺขุโน;
ปริยายวจเน จสฺส, โหติ อาปตฺติ ทุกฺกฏํฯ
[938]
อนาปตฺติ ตถารูเป, การเณ สติ ภาสโต;
สพฺพสฺสปิ จ สีลาทิํ, วทโต อาทิกมฺมิโนฯ
[939]
อุมฺมตฺตกปทํ เอตฺถ, น วุตฺตํ ตทสมฺภวา;
ภูตาโรจนกํ นาม, สมุฏฺฐานมิทํ มตํฯ
[940]
กายโต วาจโต กาย-วาจโต จ ติธา สิยา;
กุสลาพฺยากเตเหว, ทฺวิจิตฺตญฺจ ทฺวิเวทนํฯ
ภูตาโรจนกถาฯ
[941]
อาปตฺติํ ปน ทุฏฺฐุลฺลํ, อาโรเจนฺตสฺส ภิกฺขุโน;
อาปตฺตานุปสมฺปนฺเน, ฐเปตฺวา ภิกฺขุสมฺมุติํฯ
[942]
สงฺฆาทิเสสมาปนฺโน, โมเจตฺวา อสุจิํ อยํ;
ฆเฏตฺวา วตฺถุนาปตฺติํ, วทนฺตสฺเสว วชฺชตาฯ
[943]
อิธ สงฺฆาทิเสสาว, ทุฏฺฐุลฺลาปตฺติโย มตา;
ตสฺมา สุทฺธสฺส ทุฏฺฐุลฺลํ, วทํ ปาจิตฺติยํ ผุเสฯ
[944]
อทุฏฺฐุลฺลาย ทุฏฺฐุลฺล-สญฺญิโน วิมติสฺส วา;
อาปตฺติโยปิ วา เสสา, อาโรเจนฺตสฺส ทุกฺกฏํฯ
[945]
ตถา อนุปสมฺปนฺเน, ทุฏฺฐุลฺลํ ปญฺจธา มตํ;
อชฺฌาจารมทุฏฺฐุลฺลํ, อาโรเจตุํ น วฏฺฏติฯ
[946]
วตฺถุํ วา ปน อาปตฺติํ, อาโรเจนฺตสฺส เกวลํ;
อนาปตฺตีติ ญาตพฺพํ, ภิกฺขุสมฺมุติยา ตถาฯ
[947]
เอวมุมฺมตฺตกาทีนํ, สมุฏฺฐานาทโย นยา;
อทินฺนาทานตุลฺยาว, เวทนา ทุกฺขเวทนาฯ
ทุฏฺฐุลฺลาโรจนกถาฯ
[948]
ขเณยฺย วา ขณาเปยฺย, ปถวิํ โย อกปฺปิยํ;
เภทาเปยฺย จ ภินฺเทยฺย, ตสฺส ปาจิตฺติยํ สิยาฯ
[949]
สยเมว ขณนฺตสฺส, ปถวิํ ปน ภิกฺขุโน;
ปหารสฺมิํ ปหารสฺมิํ, ปาจิตฺติยมุทีริตํฯ
[950]
อาณาเปนฺตสฺส เอกาว, ทิวสํ ขณโตปิ จ;
ปุนปฺปุนาณาเปนฺตสฺส, วาจโต วาจโต สิยาฯ
[951]
‘‘ขณ โปกฺขรณิํ วาปิํ, อาวาฏํ ขณ กูปกํ’’;
อิจฺเจวํ ตุ วทนฺตสฺส, โกจิ โทโส น วิชฺชติฯ
[952]
‘‘อิมํ ขณ จ โอกาสํ, อิธ โปกฺขรณิํ ขณ;
อิมสฺมิํ ขณ โอกาเส’’, วตฺตุเมวํ น วฏฺฏติฯ
[953]
‘‘กนฺทํ ขณ กุรุนฺทํ วา, ถูณํ ขณ จ ขาณุกํ;
มูลํ ขณ จ ตาลํ วา’’, เอวํ วทติ วฏฺฏติฯ
[954]
‘‘อิมํ มูลํ อิมํ วลฺลิํ, อิมํ ตาลํ อิมํ นฬํ;
ขณา’’ติ นิยเมตฺวาน, วตฺตุํ ปน น วฏฺฏติฯ
[955]
อุสฺสิญฺจิตุํ สเจ สกฺกา, ฆเฏหิ ตนุกทฺทโม;
ภิกฺขุนา อปเนตพฺโพ, พหลํ น จ วฏฺฏติฯ
[956]
ภิชฺชิตฺวา นทิยาทีนํ, ปติตํ โตยสนฺติเก;
ตฏํ วฏฺฐํ วิโกเปตุํ, จาตุมาสมฺปิ วฏฺฏติฯ
[957]
สเจ ปตติ โตยสฺมิํ, เทเว วุฏฺเฐปิ วฏฺฏติ;
จาตุมาสมติกฺกนฺเต, โตเย เทโว หิ วสฺสติฯ
[958]
ปาสาณปิฏฺฐิยํ โสณฺฑิํ, ขณนฺติ ยทิ ตตฺถ ตุ;
รชํ ปตติ เจ ปุพฺพํ, ปจฺฉา เทโวภิวสฺสติฯ
[959]
โสเธตุํ ภินฺทิตุํ อนฺโต-จาตุมาสํ ตุ วฏฺฏติ;
จาตุมาสกโต อุทฺธํ, วิโกเปตุํ น วฏฺฏติฯ
[960]
วารินา ปฐมํ ปุณฺเณ, ปจฺฉา ปตติ เจ รชํ;
ตํ วฏฺฏติ วิโกเปตุํ, โตเย เทโว หิ วสฺสติฯ
[961]
อลฺลียติ ผุสายนฺเต, ปิฏฺฐิปาสาณเก รชํ;
จาตุมาสจฺจเย ตมฺปิ, วิโกเปตุํ น วฏฺฏติฯ
[962]
สเจ อกตปพฺภาเร, วมฺมิโก ปน อุฏฺฐิโต;
ยถาสุขํ วิโกเปยฺย, จาตุมาสจฺจเยปิ จฯ
[963]
อพฺโภกาเส สเจ วฏฺโฐ, จาตุมาสํ ตุ วฏฺฏติ;
รุกฺเข อุปจิกาทีนํ, มตฺติกายปิ โส นโยฯ
[964]
มูสิกุกฺกร โคกณฺฏ-คณฺฑุปฺปาทมเลสุปิ;
อยเมว นโย วุตฺโต, อสมฺพทฺเธสุ ภูมิยาฯ
[965]
เตเหว สทิสา โหนฺติ, กสินงฺคลมตฺติกา;
อจฺฉินฺนา ภูมิสมฺพนฺธา, สา ชาตปถวี สิยาฯ
[966]
เสนาสนมฺปิ อจฺฉนฺนํ, วินฏฺฐฉทนมฺปิ วา;
จาตุมาสกโต อุทฺธํ, โอวฏฺฐํ น วิโกปเยฯ
[967]
ตโต ‘‘โคปานสิํ ภิตฺติํ, ถมฺภํ วา ปทรตฺถรํ;
คณฺหิสฺสามี’’ติ สญฺญาย, คเหตุํ ปน วฏฺฏติฯ
[968]
คณฺหนฺตสฺสิฏฺฐกาทีนิ, สเจ ปตติ มตฺติกา;
อนาปตฺติ สิยาปตฺติ, มตฺติกํ ยทิ คณฺหติฯ
[969]
อตินฺโต มตฺติกาปุญฺโช, อนฺโตเคเห สเจ สิยา;
อโนวฏฺโฐ จ ภิกฺขูนํ, สพฺพทา โหติ กปฺปิโยฯ
[970]
วุฏฺเฐ ปุน จ เคหสฺมิํ, เคหํ ฉาเทนฺติ ตํ สเจ;
จาตุมาสจฺจเย สพฺโพ, ตินฺโต โหติ อกปฺปิโยฯ
[971]
ยตฺตกํ ตตฺถ ตินฺตํ ตุ, ตตฺตกํ โหตฺยกปฺปิยํ;
อตินฺตํ ตตฺถ ยํ ยํ ตุ, ตํ ตํ โหติ หิ กปฺปิยํฯ
[972]
เตมิโต วารินา โส เจ, เอกาพทฺโธว ภูมิยา;
ปถวี เจว สา ชาตา, น วฏฺฏติ ตโต ปรํฯ
[973]
อพฺโภกาเส จ ปากาโร, โอวฏฺโฐ มตฺติกามโย;
จาตุมาสจฺจเย ‘‘ชาตา, ปถวี’’ติ ปวุจฺจติฯ
[974]
ตตฺถ ลคฺคํ รชํ สณฺหํ, อฆํสนฺโตว มตฺตโส;
ฉุปิตฺวา อลฺลหตฺเถน, สเจ คณฺหาติ วฏฺฏติฯ
[975]
สเจ อิฏฺฐกปากาโร, เยภุยฺยกถเล ปน;
ฐาเน ติฏฺฐติ โส ตสฺมา, วิโกเปยฺย ยถาสุขํฯ
[976]
อพฺโภกาเส ฐิตํ ถมฺภํ, จาเลตฺวา ปนิโต จิโต;
ปถวิํ ตุ วิโกเปตฺวา, คเหตุํ น จ วฏฺฏติฯ
[977]
อญฺญมฺปิ สุกฺขรุกฺขํ วา, ขาณุกํ วาปิ คณฺหโต;
อยเมว นโย โทโส, อุชุมุทฺธรโต น จฯ
[978]
ปาสาณํ ยทิ วา รุกฺขํ, อุจฺจาเลตฺวา ปวฏฺฏติ;
น โทโส สุทฺธจิตฺตสฺส, สเจ ปถวิ ภิชฺชติฯ
[979]
ผาเลนฺตานมฺปิ ทารูนิ, สาขาทีนิ จ กฑฺฒโต;
อยเมว นโย วุตฺโต, ภูมิยํ สุทฺธเจตโสฯ
[980]
กณฺฏกํ สูจิมฏฺฐิํ วา, ขิลํ วา ภูมิยํ ปน;
อาโกเฏตุํ ปเวเสตุํ, ภิกฺขุโน น จ วฏฺฏติฯ
[981]
‘‘อหํ ปสฺสาวธาราย, ภินฺทิสฺสามี’’ติ เมทินิํ;
ภิกฺขุสฺส ปน ปสฺสาว-เมวํ กาตุํ น วฏฺฏติฯ
[982]
อนาปตฺติ กโรนฺตสฺส, สเจ ภิชฺชติ เมทินี;
สมชฺชโต สมํ กาตุํ, ฆํสิตุํ น จ วฏฺฏติฯ
[983]
ปาทงฺคุฏฺเฐน วา ภูมิํ, ลิขิตุมฺปิ น วฏฺฏติ;
ภินฺทนฺเตน จ ปาเทหิ, ตถา จงฺกมิตุมฺปิ วาฯ
[984]
ปถวิํ อลฺลหตฺเถน, ฉุปิตฺวา สุขุมํ รชํ;
อฆํสนฺโต คเหตฺวา เจ, หตฺถํ โธวติ วฏฺฏติฯ
[985]
สยํ ทหติ เจ ภูมิํ, ทหาเปติ ปเรหิ วา;
อาปตฺตนฺตมโส ปตฺตํ, ทหนฺตสฺสาปิ ภิกฺขุโนฯ
[986]
ฐาเนสุ ยตฺตเกสฺวคฺคิํ, เทติ ทาเปติ วา ปน;
ตตฺตกาเนว ภิกฺขุสฺส, โหนฺติ ปาจิตฺติยานิปิฯ
[987]
ฐเปตุํ ภิกฺขุโน อคฺคิํ, ภูมิยํ น จ วฏฺฏติ;
กปาเล ปตฺตปจเน, ฐเปตุํ ปน วฏฺฏติฯ
[988]
อคฺคิํ อุปริ ทารูนํ, ฐเปตุํ น จ วฏฺฏติ;
ทหนฺโต ตานิ คนฺตฺวา โส, ภูมิํ ทหติ เจ ปนฯ
[989]
เอเสว จ นโย วุตฺโต, อิฏฺฐกาวาสกาทิสุ;
ฐเปตุํ อิฏฺฐกาทีนํ, มตฺถเกสฺเวว วฏฺฏติฯ
[990]
กสฺมา ปนาติ เจ? เตส-มนุปาทานภาวโต;
ขาณุเก สุกฺขรุกฺเข วา, อคฺคิํ ทาตุํ น วฏฺฏติฯ
[991]
อนาปตฺติ ติณุกฺกํ ตุ, คเหตฺวา ปน คจฺฉโต;
ฑยฺหมาเน ตุ หตฺถสฺมิํ, สเจ ปาเตติ ภูมิยํฯ
[992]
ปุน ตํ ปติตฏฺฐาเน, ทตฺวา ตสฺส ปนินฺธนํ;
อคฺคิํ วฏฺฏติ กาตุนฺติ, มหาปจฺจริยํ รุตํฯ
[993]
ตสฺสาปถวิยํเยว, ปถวีติ จ สญฺญิโน;
วิมติสฺสุภยตฺถาปิ, ทุกฺกฏํ ปริยาปุตํฯ
[994]
อนาปตฺติ ‘‘อิมํ ชาน, อิมมาหร เทหิ’’ติ;
วทนฺตสฺส, สจิตฺตญฺจ, ติสมุฏฺฐานเมว จฯ
ปถวีขณนกถาฯ
มุสาวาทวคฺโค ปฐโมฯ
[995]
ภวนฺตสฺส จ ภูตสฺส, ภูตคามสฺส ภิกฺขุโน;
ปาตพฺยตานิมิตฺตํ ตุ, ปาจิตฺติยมุทีริตํฯ
[996]
อุทกฏฺโฐ ถลฏฺโฐติ, ทุวิโธ โหติ โส ปน;
ติลพีชาทิโก ตตฺถ, สปณฺโณปิ อปณฺณโกฯ
[997]
อุทกฏฺโฐติ วิญฺเญยฺโย, สพฺโพ เสวาลชาติโก;
วิโกเปนฺตสฺส ตํ สพฺพํ, ตสฺส ปาจิตฺติยํ สิยาฯ
[998]
วิยูหิตฺวา ตุ หตฺเถน, นฺหายิตุํ ปน วฏฺฏติ;
โหติ ตสฺส จ สพฺพมฺปิ, ฐานญฺหิ สกลํ ชลํฯ
[999]
อุทเกน วินา เจจฺจ, ตํ ปนุทฺธริตุํ ชลา;
น จ วฏฺฏติ ภิกฺขุสฺส, ฐานสงฺกมนญฺหิ ตํฯ
[1000]
อุทเกนุกฺขิปิตฺวา ตํ, ปกฺขิปนฺตสฺส วาริสุ;
วฏฺฏตีติ จ นิทฺทิฏฺฐํ, สพฺพอฏฺฐกถาสุปิฯ
[1001]
ชเล วลฺลิติณาทีนิ, อุทฺธรนฺตสฺส โตยโต;
วิโกเปนฺตสฺส วา ตตฺถ, โหติ ปาจิตฺติ ภิกฺขุโนฯ
[1002]
ปเรหุปฺปาฏิตาเนตฺถ, วิโกเปนฺตสฺส ทุกฺกฏํ;
คจฺฉนฺติ หิ ยโต ตานิ, พีชคาเมน สงฺคหํฯ
[1003]
ถลฏฺเฐ ฉินฺนรุกฺขานํ, ฐิโต หริตขาณุโก;
อุทฺธํ วฑฺฒนโก ตสฺส, ภูตคาเมน สงฺคโหฯ
[1004]
นาฬิเกราทิกานมฺปิ, ขาณุ อุทฺธํ น วฑฺฒติ;
ตสฺมา ตสฺส กโต โหติ, พีชคาเมน สงฺคโหฯ
[1005]
ตถา กทลิยา ขาณุ, ผลิตาย ปกาสิโต;
อผลิตาย โย ขาณุ, ภูตคาเมน โส มโตฯ
[1006]
ผลิตา กทลี ยาว, นีลปณฺณา จ ตาว สา;
นฬเวฬุติณาทีน-มยเมว วินิจฺฉโยฯ
[1007]
อคฺคโต ปน ปฏฺฐาย, ยทายํ เวฬุ สุสฺสติ;
ตทา สงฺคหิโต โหติ, พีชคาเมน นามโสฯ
[1008]
อินฺทสาลาทิรุกฺขานํ, พีชคาเมน สงฺคโห;
ฉินฺทิตฺวา ฐปิตานํ ตุ, วิญฺเญยฺโย วินยญฺญุนาฯ
[1009]
มณฺฑปาทีนมตฺถาย, นิกฺขณนฺติ จ เต สเจ;
นิคฺคเต มูลปณฺณสฺมิํ, ภูตคาเมน สงฺคโหฯ
[1010]
มูลมตฺเตปิ วา เยสํ, ปณฺณมตฺเตปิ วา ปน;
นิคฺคเตปิ กโต เตสํ, พีชคาเมน สงฺคโหฯ
[1011]
สกนฺทา ปน ตาลฏฺฐิ, พีชคาโมติ วุจฺจติ;
ปตฺตวฏฺฏิ ยทา นีลา, นิคฺคจฺฉติ ตทา น จฯ
[1012]
นาฬิเกรตจํ ภิตฺวา, ทนฺตสูจีว องฺกุโร;
นิคฺคจฺฉติ ตทา โสปิ, พีชคาโมติ วุจฺจติฯ
[1013]
มิคสิงฺคสมานาย, สติยา ปตฺตวฏฺฏิยา;
อนิคฺคเตปิ มูลสฺมิํ, ภูตคาโมติ วุจฺจติฯ
[1014]
น โหนฺติ หริตา ยาว, วีหิอาทีนมงฺกุรา;
นิคฺคเตสุปิ ปณฺเณสุ, พีชคาเมน สงฺคโหฯ
จตฺตาโร ภาณวารา นิฏฺฐิตาฯ
[1015]
อมฺพชมฺพุฏฺฐิกาทีน-เมเสว จ วินิจฺฉโย;
วนฺทากา วาปิ อญฺญํ วา, รุกฺเข ชายติ ยํ ปนฯ
[1016]
รุกฺโขวสฺส สิยา ฐานํ, วิโกเปตุํ น วฏฺฏติ;
อมูลวลฺลิอาทีน-มยเมว วินิจฺฉโยฯ
[1017]
ปาการาทีสุ เสวาโล, อคฺคพีชนฺติ วุจฺจติ;
ยาว ทฺเว ตีณิ ปตฺตานิ, น สญฺชายนฺติ ตาว โสฯ
[1018]
ปตฺเตสุ ปน ชาเตสุ, วตฺถุ ปาจิตฺติยสฺส โส;
ฆํสิตฺวา ปน ตํ ตสฺมา, อปเนตุํ น วฏฺฏติฯ
[1019]
เสวาเล พหิ ปานีย-ฆฏาทีนํ ตุ ทุกฺกฏํ;
อพฺโพหาโรว โส อนฺโต, ปูวาทีสุปิ กณฺณกํฯ
[1020]
ปาสาณททฺทุเสวาล-เสเลยฺยปฺปภุตีนิ จ;
โหนฺติ ทุกฺกฏวตฺถูนิ, อปตฺตานีติ นิทฺทิเสฯ
[1021]
ปุปฺผิตํ ตุ อหิจฺฉตฺตํ, อพฺโพหาริกตํ คตํ;
สเจ ตํ มกุฬํ โหติ, โหติ ทุกฺกฏวตฺถุกํฯ
[1022]
รุกฺเข ตจํ วิโกเปตฺวา, ตถา ปปฺปฏิกมฺปิ จ;
นิยฺยาสมฺปิ ปนลฺลสฺมิํ, คเหตุํ น จ วฏฺฏติฯ
[1023]
นุหิอาทีสุ รุกฺเขสุ, ตาลปณฺณาทิเกสุ วา;
ลิขโต ตตฺถชาเตสุ, ปาจิตฺติยมุทีรเยฯ
[1024]
ปุปฺผํ ปณฺฑุปลาสํ วา, ผลํ วา ปกฺกเมว วา;
ปาเตนฺตสฺส จ จาเลตฺวา, ปาจิตฺติยมุทีริตํฯ
[1025]
นาเมตฺวา ผลินิํ สาขํ, ทาตุํ วฏฺฏติ คณฺหโต;
สยํ ขาทิตุกาโม เจ, ทาตุเมวํ น วฏฺฏติฯ
[1026]
อุกฺขิปิตฺวา ปรํ กญฺจิ, คาหาเปตุมฺปิ วฏฺฏติ;
ปุปฺผานิ โอจินนฺเตสุ, อยเมว วินิจฺฉโยฯ
[1027]
เยสํ รุหติ รุกฺขานํ, สาขา เตสมฺปิ สาขินํ;
กปฺปิยํ ตมกาเรตฺวา, วิโกเปนฺตสฺส ทุกฺกฏํฯ
[1028]
อยเมว นโย อลฺล-สิงฺคิเวราทิเกสุปิ;
ทุกฺกฏํ พีชคาเมสุ, นิทฺทิฏฺฐตฺตา มเหสินาฯ
[1029]
‘‘รุกฺขํ ฉินฺท ลตํ ฉินฺท, กนฺทํ มูลมฺปิ อุทฺธร;
อุปฺปาเฏหี’’ติ วตฺตุมฺปิ, วฏฺฏเตวานิยามโตฯ
[1030]
‘‘อมฺพํ ชมฺพุมฺปิ นิมฺพํ วา, ฉินฺท ภินฺทุทฺธรา’’ติ วา;
คเหตฺวา ปน นามมฺปิ, วฏฺฏเตวานิยามโตฯ
[1031]
‘‘อิมํ รุกฺขํ อิมํ วลฺลิํ, อิมํ ฉลฺลิํ อิมํ ลตํ;
ฉินฺท ภินฺทา’’ติ วา วตฺตุํ, นิยเมตฺวา น วฏฺฏติฯ
[1032]
ปูเรตฺวา อุจฺฉุขณฺฑานํ, ปจฺฉิโย อาหรนฺติ เจ;
สพฺพเมว กตํ โหติ, เอกสฺมิํ กปฺปิเย กเตฯ
[1033]
เอกโต ปน พทฺธานิ, อุจฺฉุทารูนิ โหนฺติ เจ;
กปฺปิยํ กโรนฺโต ปน, ทารุํ วิชฺฌติ วฏฺฏติฯ
[1034]
วลฺลิยา รชฺชุยา วาปิ, ยาย พทฺธานิ ตานิ หิ;
ภาชเนน สมานตฺตา, ตํ วิชฺฌติ น วฏฺฏติฯ
[1035]
ภตฺตํ มริจปกฺเกหิ, มิสฺเสตฺวา อาหรนฺติ เจ;
เอกสิตฺเถปิ ภตฺตสฺส, สเจ วิชฺฌติ วฏฺฏติฯ
[1036]
อยเมว นโย วุตฺโต, ติลตณฺฑุลกาทิสุ;
เอกาพทฺเธ กปิตฺเถปิ, กฏาเห กปฺปิยํ กเรฯ
[1037]
กฏาหํ ยทิ มุญฺจิตฺวา, อนฺโต จรติ มิญฺชกํ;
ภินฺทาเปตฺวา กปิตฺถํ ตํ, กาเรตพฺพํ ตุ กปฺปิยํฯ
[1038]
อภูตคามพีเชสุ, ภูตคามาทิสญฺญิโน;
ตตฺถ เวมติกสฺสาปิ, โหติ อาปตฺติ ทุกฺกฏํฯ
[1039]
อตถาสญฺญิโน ตตฺถ, อสญฺจิจฺจาสติสฺส จ;
อุมฺมตฺตกาทิกานญฺจ, อนาปตฺติ ปกาสิตาฯ
[1040]
อิทญฺจ ติสมุฏฺฐานํ, กฺริยํ สญฺญาวิโมกฺขกํ;
กายกมฺมํ วจีกมฺมํ, ติจิตฺตญฺจ ติเวทนํฯ
ภูตคามกถาฯ
[1041]
กเต สงฺเฆน กมฺมสฺมิํ, อญฺญวาทวิเหสเก;
ตถา ปุน กโรนฺตสฺส, โหติ ปาจิตฺติยทฺวยํฯ
[1042]
ติกปาจิตฺติยํ ธมฺเม, อธมฺเม ติกทุกฺกฏํ;
กมฺเม อโรปิเต เจวํ, วทนฺตสฺส จ ทุกฺกฏํฯ
[1043]
อาปตฺติํ วาปิ อาปนฺนํ, อชานนฺตสฺส, ‘‘ภณฺฑนํ;
ภวิสฺสตี’’ติ สญฺญิสฺส, คิลานสฺส น โทสตาฯ
[1044]
อทินฺนาทานตุลฺยาว, สมุฏฺฐานาทโย นยา;
กฺริยากฺริยมิทํ วุตฺตํ, เวทนา ทุกฺขเวทนาฯ
อญฺญวาทกถาฯ
[1045]
อยสํ กตฺตุกาโมว, สมฺมตสฺส หิ ภิกฺขุโน;
วทนฺโต อุปสมฺปนฺเน, อุชฺฌาเปติ จ ขียติฯ
[1046]
ตสฺมิํ วตฺถุทฺวเย ตสฺส, โหติ ปาจิตฺติยทฺวยํ;
ติกปาจิตฺติยํ ธมฺเม, อธมฺเม ติกทุกฺกฏํฯ
[1047]
อวณฺณํนุปสมฺปนฺน-สนฺติเก ปน ภิกฺขุโน;
อสมฺมตสฺส ภิกฺขุสฺส, ภาสโต ยสฺส กสฺสจิฯ
[1048]
สามเณรสฺส วา วณฺณํ, สมฺมตาสมฺมตสฺสปิ;
วทโต ทุกฺกฏํ โหติ, ยสฺส กสฺสจิ สนฺติเกฯ
[1049]
ฉนฺทาทีนํ วเสเนว, กโรนฺตํ ภณโต ปน;
อนาปตฺติ กฺริยาเสส-มนนฺตรสมํ มตํฯ
อุชฺฌาปนกถาฯ
[1050]
อชฺโฌกาเส ตุ มญฺจาทิํ, อตฺตโน วา ปรสฺส วา;
อตฺถาย สนฺถราเปตฺวา, สนฺถริตฺวาปิ วา ปนฯ
[1051]
เนวุทฺธเรยฺย สงฺฆสฺส, อุทฺธราเปยฺย วา น ตํ;
ปกฺกมนฺโต สเจ ตสฺส, โหติ ปาจิตฺติ ภิกฺขุโนฯ
[1052]
วสฺสิเก จตุโร มาเส, สเจ เทโว น วสฺสติ;
อชฺโฌกาเส ตถา จาปิ, ฐเปตุํ น จ วฏฺฏติฯ
[1053]
ยตฺถ วสฺสติ เหมนฺเต, จตฺตาโร อปเรปิ จ;
ฐเปตุํ ตตฺถ มญฺจาทิํ, อฏฺฐ มาเส น วฏฺฏติฯ
[1054]
กากาทีนํ นิวาสสฺมิํ, รุกฺขมูเล กทาจิปิ;
มญฺจาทิํ ปน สงฺฆสฺส, ฐเปตุํ น จ วฏฺฏติฯ
[1055]
อญฺญสฺสตฺถาย ยํ กิญฺจิ, สนฺถตํ ยทิ สงฺฆิกํ;
ยตฺถ กตฺถจิ วา ฐาเน, เยน เกนจิ ภิกฺขุนาฯ
[1056]
ยาว โส น นิสีเทยฺย, ‘‘คจฺฉา’’ติ น วเทยฺย วา;
ตาว สนฺถารกสฺเสว, ภาโร ตนฺติ ปวุจฺจติฯ
[1057]
สเจ ตํ สามเณเรน, สนฺถราเปติ สนฺถตํ;
สนฺถราปิตภิกฺขุสฺส, ปลิโพโธติ ทีปิโตฯ
[1058]
สนฺถตํ ภิกฺขุนา ตํ เจ, ภาโร ตสฺเสว ตาว ตํ;
ยาว อาณาปโก ตตฺถ, อาคนฺตฺวา น นิสีทติฯ
[1059]
ภิกฺขุํ วา สามเณรํ วา, อารามิกมุปาสกํ;
อนาปุจฺฉา นิยฺยาเตตฺวา, สงฺฆิกํ สยนาสนํฯ
[1060]
เลฑฺฑุปฺปาตมติกฺกมฺม, คจฺฉโต ปฐเม ปเท;
ทุกฺกฏํ, ทุติเย วาเร, ปาจิตฺติยมุทีริตํฯ
[1061]
ฐตฺวา โภชนสาลายํ, วตฺวา โย สามเณรกํ;
อสุกสฺมิํ ทิวาฏฺฐาเน, ปญฺญาเปหีติ มญฺจกํฯ
[1062]
นิกฺขมิตฺวา สเจ ตสฺมา, ฐานา อญฺญตฺถ คจฺฉติ;
ปาทุทฺธาเรน โส ภิกฺขุ, กาเรตพฺโพติ ทีปิโตฯ
[1063]
ติกปาจิตฺติยํ วุตฺตํ, ติกาตีเตน สตฺถุนา;
ตถา ปุคฺคลิเก เตน, ทีปิตํ ติกทุกฺกฏํฯ
[1064]
จิมิลิํ ตฏฺฏิกํ จมฺมํ, ผลกํ ปาทปุญฺฉนิํ;
ภูมตฺถรณกํ วาปิ, อุตฺตรตฺถรณมฺปิ วาฯ
[1065]
ทารุมตฺติกภณฺฑานิ , ปตฺตาธารกเมว วา;
อพฺโภกาเส ฐเปตฺวา ตํ, คจฺฉโต โหติ ทุกฺกฏํฯ
[1066]
สเจ อารญฺญเกนาปิ, อโนวสฺเส จ โน สติ;
ลคฺเคตฺวา ปน รุกฺขสฺมิํ, คนฺตพฺพํ ตุ ยถาสุขํฯ
[1067]
ยถา อุปจิกาทีหิ, น ขชฺชติ น ลุชฺชติ;
ตถา กตฺวาปิ ตํ สพฺพํ, คนฺตุํ ปน จ วฏฺฏติฯ
[1068]
อนาปตฺตุทฺธราเปตฺวา, อาปุจฺฉิตฺวาปิ คจฺฉโต;
อตฺตโน สนฺตเก รุทฺเธ, อาปทาสุปิ ภิกฺขุโนฯ
[1069]
สมุฏฺฐานาทโย สพฺเพ, กถิเนน สมา มตา;
กฺริยากฺริยมิทํ วุตฺต-มยเมว วิเสสตาฯ
ปฐมเสนาสนกถาฯ
[1070]
ภิสิจิมิลิกา ภูม-ตฺถรณํ อุตฺตรตฺถรํ;
ตฏฺฏิกา จมฺมขณฺโฑ จ, ปจฺจตฺถรนิสีทนํฯ
[1071]
สนฺถาโร ติณปณฺณานํ, เสยฺยา ทสวิธา สิยา;
สพฺพจฺฉนฺนปริจฺฉนฺเน, วิหาเร ภิกฺขุ โย ปนฯ
[1072]
เอตํ ทสวิธํ เสยฺยํ, สนฺถริตฺวาปิ วา สยํ;
อนุทฺธริตฺวานาปุจฺฉา, อติกฺกมติ ตํ สเจฯ
[1073]
อารามสฺสูปจารํ วา, ปริกฺเขปํ ปนสฺส วา;
ปฐเม ทุกฺกฏํ ปาเท, ปาจิตฺติ ทุติเย สิยาฯ
[1074]
เสนาสนสฺส เสยฺยาย, อุภเยสํ วินาสโต;
คจฺฉโต สนฺถริตฺวนฺโต-คพฺเภ ปาจิตฺติ วณฺณิตาฯ
[1075]
อุปจาเร วิหารสฺส, ทุกฺกฏํ มณฺฑปาทิเก;
คจฺฉโต สนฺถริตฺวา วา, เสยฺยามตฺตํ วินาสโตฯ
[1076]
ติกปาจิตฺติยํ วุตฺตํ, สงฺฆิเก ทสวตฺถุเก;
ตถา ปุคฺคลิเก ตสฺส, ทีปิตํ ติกทุกฺกฏํฯ
[1077]
อนาปตฺตุทฺธริตฺวา วา, อาปุจฺฉํ วาปิ คจฺฉโต;
ปลิพุทฺเธปิ วาญฺเญน, อตฺตโน สนฺตเกปิ วาฯ
[1078]
สาเปกฺโขว จ คนฺตฺวา ตํ, ตตฺถ ฐตฺวาปิ ปุจฺฉติ;
สมุฏฺฐานาทโย สพฺเพ, อนนฺตรสมา มตาฯ
ทุติยเสนาสนกถาฯ
[1079]
โย ปุพฺพุปคตํ ภิกฺขุํ, ชานํ อนุปขชฺช จ;
กปฺเปยฺย สงฺฆิกาวาเส, เสยฺยํ ปาจิตฺติยสฺส เจฯ
[1080]
ปาทโธวนปาสาณา, ปวิสนฺตสฺส ภิกฺขุโน;
ยาว ตํ มญฺจปีฐํ วา, นิกฺขมนฺตสฺส วา ปนฯ
[1081]
มญฺจปีฐกโต ยาว, ปสฺสาวฏฺฐานเมว ตุ;
เอตฺถนฺตเร อิทํ ฐานํ, อุปจาโรติ วุจฺจติฯ
[1082]
ตตฺถ พาเธตุกามสฺส, อุปจาเร ตุ ภิกฺขุโน;
ทสสฺวญฺญตรํ เสยฺยํ, สนฺถรนฺตสฺส ทุกฺกฏํฯ
[1083]
นิสีทนฺตสฺส วา ตตฺถ, นิปชฺชนฺตสฺส วา ปน;
ตถา ทฺเวปิ กโรนฺตสฺส, โหติ ปาจิตฺติยทฺวยํฯ
[1084]
ปุนปฺปุนํ กโรนฺตสฺส, ปโยคคณนาวสา;
ติกปาจิตฺติยํ วุตฺตํ, ปุคฺคเล ติกทุกฺกฏํฯ
[1085]
วุตฺตูปจารํ มุญฺจิตฺวา, เสยฺยํ สนฺถรโตปิ วา;
วิหารสฺสูปจาเร วา, อชฺโฌกาเสปิ วา ปนฯ
[1086]
สนฺถราปยโต วาปิ, ตตฺถ ตสฺส นิสีทโต;
สพฺพตฺถ ทุกฺกฏํ วุตฺตํ, นิวาโส จ นิวาริโตฯ
[1087]
อนาปตฺติ คิลานสฺส, สีตาทุปฺปีฬิตสฺส วา;
อาปทาสุปิ ภิกฺขุสฺส, ตถา อุมฺมตฺตกาทิโนฯ
[1088]
สมุฏฺฐานาทโย สพฺเพ, ปฐมนฺติมวตฺถุนา;
สทิสาติ จ วิญฺเญยฺยา, โหตีทํ ทุกฺขเวทนํฯ
อนุปขชฺชกถาฯ
[1089]
วิหารา สงฺฆิกา ภิกฺขุํ, นิกฺกฑฺเฒยฺย สเจ ปน;
นิกฺกฑฺฒาเปยฺย วา กุทฺโธ, ตสฺส ปาจิตฺติยํ สิยาฯ
[1090]
พหุภูมาปิ ปาสาทา, ปโยเคเนกเกน โย;
นิกฺกฑฺเฒติ สเจ ตสฺส, เอกา ปาจิตฺติ ทีปิตาฯ
[1091]
ฐเปตฺวา จ ฐเปตฺวา จ, นิกฺกฑฺฒนฺตสฺส อนฺตรา;
ทฺวารานํ คณนายสฺส, โหนฺติ ปาจิตฺติโย ปนฯ
[1092]
‘‘นิกฺขมา’’ติ วทนฺตสฺส, วาจายปิ อยํ นโย;
อาณตฺติยา ขเณเยว, อาณาเปนฺตสฺส ทุกฺกฏํฯ
[1093]
สเจ โส สกิมาณตฺโต, ทฺวาเรปิ พหุเก ปน;
อติกฺกาเมติ เอกาว, พหุกานิ พหูนิ เจฯ
[1094]
ตสฺสูปฏฺฐานสาลาทิ-วิหารสฺสูปจารโต ;
กาเยนปิ จ วาจาย, ตถา นิกฺกฑฺฒเนปิ จฯ
[1095]
วิหารสฺสูปจารา วา, วิหารา วาปิ เจตรํ;
นิกฺกฑฺฒนฺตสฺส สพฺเพสํ, ปริกฺขารมฺปิ ทุกฺกฏํฯ
[1096]
อสมฺพทฺเธสุ ภิกฺขุสฺส, ปริกฺขาเรสุ ปณฺฑิโต;
วตฺถูนํ คณนายสฺส, ทุกฺกฏํ ปริทีปเยฯ
[1097]
อนฺเตวาสิมลชฺชิํ วา, ตถา สทฺธิวิหาริกํ;
นิกฺกฑฺฒนฺตสฺส อุมฺมตฺตํ, สยํ อุมฺมตฺตกสฺส จฯ
[1098]
อตฺตโน วสนฏฺฐานา, ตถา วิสฺสาสิกสฺส วา;
ปริกฺขารญฺจ วา เตสํ, อนาปตฺติ ปกาสิตาฯ
[1099]
สงฺฆารามาปิ สพฺพสฺมา, ตถา กลหการกํ;
อิทํ ตุ ติสมุฏฺฐานํ, เวทนา ทุกฺขเวทนาฯ
นิกฺกฑฺฒนกถาฯ
[1100]
มชฺฌิมาสีสฆฏฺฏาย, เวหาสกุฏิยูปริ;
อาหจฺจปาทเก มญฺเจ, ปีเฐ วา ปน ภิกฺขุโนฯ
[1101]
นิสีทนฺตสฺส วา ตสฺมิํ, นิปชฺชนฺตสฺส วา ปน;
ปโยคคณนาเยว, ตสฺส ปาจิตฺติโย สิยุํฯ
[1102]
ติกปาจิตฺติยํ วุตฺตํ, ปุคฺคเล ติกทุกฺกฏํ;
เหฏฺฐา อปริโภเค วา, สีสฆฏฺฏาย วา ปนฯ
[1103]
อเวหาสวิหาเร วา, อตฺตโน สนฺตเกปิ วา;
วิสฺสาสิกวิหาเร วา, น โทสุมฺมตฺตกาทิโนฯ
[1104]
ยตฺถ ปฏาณิ วา ทินฺนา, ตตฺถ ฐตฺวา ลเคติ วา;
อิทเมฬกโลเมน, สมุฏฺฐานํ สมํ มตํฯ
เวหาสกุฏิกถาฯ
[1105]
ยาว ทฺวารสฺส โกสมฺหา, อคฺคฬฏฺฐปนาย ตุ;
ภิกฺขุนา ลิมฺปิตพฺพํ วา, เลปาเปตพฺพเมว วาฯ
[1106]
เญยฺโย อาโลกสนฺธีนํ, ปริกมฺเมปฺยยํ นโย;
ฉทนสฺส ทฺวตฺติปริยายํ, ฐิเตน หริเต ปนฯ
[1107]
อธิฏฺเฐยฺยํ ตโต อุทฺธํ, อธิฏฺเฐติ สเจ ปน;
ตสฺส ปาจิตฺติยํ โหติ, ทุกฺกฏํ ตตฺถ ติฏฺฐโตฯ
[1108]
ปิฏฺฐิวํเส ฐิโต โกจิ, ฉทนสฺส มุขวฏฺฏิยา;
ยสฺมิํ ฐาเน ฐิตํ ภิกฺขุํ, โอโลเกนฺโต น ปสฺสติฯ
[1109]
ตสฺมิํ ฐาเน ปน ฐาตุํ, เนว ภิกฺขุสฺส วฏฺฏติ;
วิหารสฺส ปตนฺตสฺส, ปตโนกาสโต หิ ตํฯ
[1110]
อูนกทฺวตฺติปริยาเย, อติเรโกติ สญฺญิโน;
ตตฺถ เวมติกสฺสาปิ, โหติ อาปตฺติ ทุกฺกฏํฯ
[1111]
น โทโส ทฺวตฺติปริยาเย, เลเณ ติณกุฏีสุ วา;
สมุฏฺฐานาทโย สพฺเพ, สญฺจริตฺตสมา มตาฯ
ทฺวตฺติปริยายกถาฯ
[1112]
ชานํ สปฺปาณกํ โตยํ, ติณํ วา มตฺติกมฺปิ วา;
ยทิ สิญฺเจยฺย ปาจิตฺติ, สิญฺจาเปยฺย ปเรหิ วาฯ
[1113]
อจฺฉินฺทิตฺวา สเจ ธารํ, มตฺติกํ สิญฺจโต ปน;
เอกสฺมิมฺปิ ฆเฏ เอกา, ปาจิตฺติ ปริทีปิตาฯ
[1114]
วิจฺฉินฺทติ สเจ ธารํ, ปโยคคณนาวสา;
สมฺมุขมฺปิ กโรนฺตสฺส, มาติกํ สนฺทมานกํฯ
[1115]
เอกาว เจ สิยาปตฺติ, ทิวสมฺปิ จ สนฺทตุ;
พนฺธโต ตตฺถ ตตฺถสฺส, ปโยคคณนา สิยาฯ
[1116]
สเจ สกฏปุณฺณมฺปิ, มตฺติกํ ติณเมว วา;
อุทเก ปกฺขิปนฺตสฺส, เอกา ปาจิตฺติ เอกโตฯ
[1117]
เอเกกํ ปกฺขิปนฺตสฺส, ปโยคคณนาย เจ;
ขยํ วา อาวิลตฺตํ วา, ชลํ คจฺฉติ ตาทิเสฯ
[1118]
‘‘สิญฺจาหี’’ติ วทนฺตสฺส, โหติ อาปตฺติ ทุกฺกฏํ;
เอกายาณตฺติยา เอกา, ทิวสมฺปิ จ สิญฺจโตฯ
[1119]
อปฺปาเณ อุทเก สุทฺเธ, สปฺปาณมิติ สญฺญิโน;
สพฺพตฺถ วิมติสฺสาปิ, โหติ อาปตฺติ ทุกฺกฏํฯ
[1120]
สพฺพตฺถาปาณสญฺญิสฺส, อสญฺจิจฺจาสติสฺส วา;
อชานโต อนาปตฺติ, ตถา อุมฺมตฺตกาทิโนฯ
[1121]
สปฺปาณกตฺตํ โตยสฺส, สปฺปาณนฺติ วิชานนํ;
วินา วธกจิตฺเตน, ติณาทีนํ นิเสจนํฯ
[1122]
จตฺตาเรวสฺส องฺคานิ, นิทฺทิฏฺฐานิ มเหสินา;
อทินฺนาทานตุลฺยาว, สมุฏฺฐานาทโย นยาฯ
[1123]
อิทํ ปณฺณตฺติวชฺชญฺจ, ติจิตฺตญฺจาติ ทีปิตํ;
อิทเมเวตฺถ นิทฺทิฏฺฐํ, ตสฺส จสฺส วิเสสนํฯ
สปฺปาณกกถาฯ
เสนาสนวคฺโค ทุติโยฯ
[1124]
ภิกฺขุสฺสาฏฺฐงฺคยุตฺตสฺส, ภิกฺขุโนวาทสมฺมุติ;
อิธ ญตฺติจตุตฺเถน, อนุญฺญาตา มเหสินาฯ
[1125]
โย ตายาสมฺมโต ภิกฺขุ, ครุธมฺเมหิ อฏฺฐหิ;
เอกํ สมฺพหุลา วาปิ, ภิกฺขุนิสงฺฆเมว วาฯ
[1126]
โอสาเรนฺโตว เต ธมฺเม, โอวเทยฺย สเจ ปน;
โอวาทปริโยสาเน, ตสฺส ปาจิตฺติยํ สิยาฯ
[1127]
อญฺเญน ปน ธมฺเมน, โอวทนฺตสฺส ทุกฺกฏํ;
เอกโตอุปสมฺปนฺนํ, ครุธมฺเมหิ วา ตถาฯ
[1128]
ภิกฺขูนํ สนฺติเกเยว, อุปสมฺปนฺนภิกฺขุนิํ;
ตถา, ลิงฺควิปลฺลาเส, ปาจิตฺเตว ปกาสิตาฯ
[1129]
สมฺมตสฺสาปิ ภิกฺขุสฺส, ทุกฺกฏํ สมุทีริตํ;
โอวาทํ อนิยาเทตฺวา, ธมฺเมนญฺเญน ภาสโตฯ
[1130]
‘‘สมคฺคมฺหา’’ติ วุตฺเตปิ, อญฺเญโนวทโต ตถา;
‘‘วคฺคมฺหา’’ติ จ วุตฺเตปิ, ครุธมฺเมหิ ทุกฺกฏํฯ
[1131]
อคณฺหนฺตสฺส โอวาทํ, อปจฺจาหรโตปิ ตํ;
ฐเปตฺวา ทุกฺกฏํ พาลํ, คิลานํ คมิกํ สิยาฯ
[1132]
อธมฺเม ปน กมฺมสฺมิํ, อธมฺมนฺติ จ สญฺญิโน;
วคฺเค ภิกฺขุนิสงฺฆสฺมิํ, ติกปาจิตฺติยํ สิยาฯ
[1133]
ตถา เวมติกสฺสาปิ, ธมฺมกมฺมนฺติ สญฺญิโน;
นว ปาจิตฺติโย วุตฺตา, สมคฺเคปิ จ ตตฺตกาฯ
[1134]
นวกานํ วสา ทฺวินฺนํ, อฏฺฐารส ภวนฺติ ตา;
ทุกฺกฏํ ธมฺมกมฺเมปิ, สตฺตรสวิธํ สิยาฯ
[1135]
‘‘โอสาเรหี’’ติ วุตฺโต วา, ปญฺหํ ปุฏฺโฐ กเถติ วา;
สิกฺขมานาย วา เนว, โทโส อุมฺมตฺตกาทิโนฯ
[1136]
วาจุคฺคตาว กาตพฺพา, ปคุณา ทฺเวปิ มาติกา;
สุตฺตนฺตโต จ จตฺตาโร, ภาณวารา ปกาสิตาฯ
[1137]
เอโก ปริกถตฺถาย, กถามคฺโค ปกาสิโต;
มงฺคลามงฺคลตฺถาย, ติสฺโสเยวานุโมทนาฯ
[1138]
อุโปสถาทิอตฺถาย, กมฺมากมฺมวินิจฺฉโย;
กมฺมฏฺฐานํ ตถา เอกํ, อุตฺตมตฺถสฺส ปาปกํฯ
[1139]
เอตฺตกํ อุคฺคเหตฺวาน, ปญฺจวสฺโส พหุสฺสุโต;
มุญฺจิตฺวา นิสฺสยํ กามํ, วสิตุํ ลภติสฺสโรฯ
[1140]
วาจุคฺคตา วิภงฺคา ทฺเว, ปคุณา พฺยญฺชนาทิโต;
จตูสฺวปิ นิกาเยสุ, เอโก วา โปตฺถโกปิ จฯ
[1141]
กมฺมากมฺมญฺจ วตฺตานิ, อุคฺคเหตพฺพเมตฺตกํ;
สพฺพนฺติมปริจฺเฉโท, ทสวสฺโส สเจ ปนฯ
[1142]
พหุสฺสุโต ทิสาโมกฺโข, เยนกามํคโม สิยา;
ปริสํ ลภเต กามํ, อุปฏฺฐาเปตุมิสฺสโรฯ
[1143]
ยสฺส สาฏฺฐกถํ สพฺพํ, วาจุคฺคํ ปิฏกตฺตยํ;
โสยํ พหุสฺสุโต นาม, ภิกฺขุโนวาทโก สิยาฯ
[1144]
อสฺสาสมฺมตตาทีนิ , ตีณิ องฺคานิ ทีปเย;
ปทโสธมฺมตุลฺยาว, สมุฏฺฐานาทโย นยาฯ
โอวาทกถาฯ
[1145]
ปาจิตฺติ ครุธมฺเมหิ, ธมฺเมนญฺเญน วา ปน;
โหตฺยตฺถงฺคเต สูริเย, โอวทนฺตสฺส ภิกฺขุนิํฯ
[1146]
ติกปาจิตฺติยํ วุตฺตํ, สมฺมตสฺสาปิ ภิกฺขุโน;
เอกโตอุปสมฺปนฺนํ, โอวทนฺตสฺส ทุกฺกฏํฯ
[1147]
ตถานตฺถงฺคเต สูริเย, คเต อตฺถนฺติ สญฺญิโน;
ตตฺถ เวมติกสฺสาปิ, โหติ อาปตฺติ ทุกฺกฏํฯ
[1148]
อุทฺเทสาทินเยนสฺส, อนาปตฺติ ปกาสิตา;
อนนฺตรสมา เสสา, สมุฏฺฐานาทโย นยาฯ
อตฺถงฺคตสูริยกถาฯ
[1149]
ภิกฺขุนิํ โอวทนฺตสฺส, คนฺตฺวา ภิกฺขุนุปสฺสยํ;
ครุธมฺเมหิ อญฺญตฺร, กาลา ปาจิตฺติยํ สิยาฯ
[1150]
สเจ อสมฺมโต โหติ, โหติ ปาจิตฺติยทฺวยํ;
อตฺถงฺคเต จ สูริเย, สเจ วทติ ตีณิปิฯ
[1151]
อญฺเญน ปน ธมฺเมน, วทโต ทุกฺกฏทฺวยํ;
เอกํ ปาจิตฺติยํ โหติ, ภิกฺขุโน รตฺติเหตุกํฯ
[1152]
สมฺมตสฺสาปิ ภิกฺขุสฺส, โหติ ปาจิตฺติยทฺวยํ;
ครุธมฺมนิทานสฺส, สมฺมตตฺตา อภาวโตฯ
[1153]
ตสฺเสวญฺเญน ธมฺเมน, โอวทนฺตสฺส ทุกฺกฏํ;
สมฺมตตฺตา อนาปตฺติ, เอกา ปาจิตฺติ รตฺติยํฯ
[1154]
ติกปาจิตฺติยํ วุตฺตํ, ทุกฺกฏํ อิตรทฺวเย;
เอกโตอุปสมฺปนฺนํ, โอวทนฺตสฺส ทุกฺกฏํฯ
[1155]
ตถา อญฺเญน ธมฺเมน, คนฺตฺวา ภิกฺขุนุปสฺสยํ;
สมุฏฺฐานาทโย สพฺเพ, กถิเนน สมา มตาฯ
ภิกฺขุนุปสฺสยกถาฯ
[1156]
จีวราทีนมตฺถาย , โอวทนฺตีติ ภิกฺขุนิํ;
วทโต สมฺมเต ภิกฺขุ, ตสฺส ปาจิตฺติยํ สิยาฯ
[1157]
ติกปาจิตฺติยํ วุตฺตํ, ตเถว ติกทุกฺกฏํ;
สงฺเฆนาสมฺมตํ ภิกฺขุํ, วทนฺตสฺส จ ทุกฺกฏํฯ
[1158]
ตเถวานุปสมฺปนฺนํ, สมฺมตํ วา อสมฺมตํ;
น โทโส อามิสตฺถาย, โอวทนฺตสฺส ภาสโตฯ
[1159]
ตถา อุมฺมตฺตกาทีนํ, อนาปตฺติ ปกาสิตา;
อิทญฺหิ ติสมุฏฺฐานํ, เวทนา ทุกฺขเวทนาฯ
อามิสกถาฯ
[1160]
สเจ ภิกฺขุนิยา ภิกฺขุ, ทเทยฺย ปน จีวรํ;
อญฺญาติกาย ปาจิตฺติ, ฐเปตฺวา ปาริวตฺตกํฯ
[1161]
จีวรสฺส ปฏิคฺคาห-สิกฺขาปทสโม นโย;
อวเสโส มโต สทฺธิํ, สมุฏฺฐานาทินา ปนฯ
[1162]
ตตฺถ ภิกฺขุนิยา ทินฺนํ, จีวรํ อิธ ภิกฺขุนา;
ตตฺถ นิสฺสคฺคิยํ สุทฺธ-ปาจิตฺติ อิธ สูจิตาฯ
จีวรทานกถาฯ
[1163]
จีวรํ โย หิ สิพฺเพยฺย, สิพฺพาเปยฺย ปเรน วา;
อญฺญาติกาย ปาจิตฺติ, โหติ ภิกฺขุนิยา ปนฯ
[1164]
ยํ วา นิวาสิตุํ สกฺกา, ยํ วา ปารุปนูปคํ;
จีวรนฺติ อธิปฺเปโต, อิทเมตฺถ มเหสินาฯ
[1165]
สยํ สูจิํ ปเวเสตฺวา, สิพฺพนฺตสฺส จ ภิกฺขุโน;
สูจินีหรเณ ตสฺส, ปาจิตฺติยมุทีริตํฯ
[1166]
สตกฺขตฺตุมฺปิ วิชฺฌิตฺวา, สกิํ นีหรโต ปน;
เอกํ ปาจิตฺติยํ วุตฺตํ, ปโยคสฺส วสา พหูฯ
[1167]
‘‘สิพฺพา’’ติ ปน อาณตฺโต, อวิเสเสน ภิกฺขุนา;
นิฏฺฐาเปติ สเจ สพฺพํ, เอกํ ปาจิตฺติยํ สิยาฯ
[1168]
‘‘ยเมตฺถ จีวเร กมฺมํ, ภาโร สพฺพํ ตวา’’ติ หิ;
อาณตฺโต ภิกฺขุนา สพฺพํ, นิฏฺฐาเปติ สเจ ปนฯ
[1169]
ภิกฺขุสฺสาณาปกสฺเสว, เอกายาณตฺติยา ปน;
โหนฺติ ปาจิตฺติยาปตฺติ, อเนการาปเถ ปเถฯ
[1170]
ปุนปฺปุนาณาเปนฺตสฺส, อเนกาณตฺติยํ ปน;
กา หิ นาม กถา อตฺถิ? ติกปาจิตฺติยํ สิยาฯ
[1171]
ญาติกาย จ อญฺญาติ-สญฺญิสฺส วิมติสฺส วา;
เอกโตอุปสมฺปนฺน-จีวเร ทุกฺกฏํ สิยาฯ
[1172]
ฐเปตฺวา จีวรํ อญฺญํ, ปริกฺขารญฺจ สิพฺพโต;
อนาปตฺติ วินิทฺทิฏฺฐา, สิกฺขมานาทิกายปิฯ
[1173]
สญฺจริตฺตสมุฏฺฐานํ, กฺริยํ ปณฺณตฺติวชฺชกํ;
กายกมฺมํ วจีกมฺมํ, ติจิตฺตญฺจ ติเวทนํฯ
จีวรสิพฺพนกถาฯ
[1174]
ภิกฺขุ ภิกฺขุนิยา สทฺธิํ, สํวิธาย ปเนกโต;
ปฏิปชฺเชยฺย มคฺคํ เจ, อญฺญตฺร สมยา อิธฯ
[1175]
คามนฺตโรกฺกเม วาปิ, อทฺธโยชนติกฺกเม;
อคามเก อรญฺเญ วา, โหติ อาปตฺติ ภิกฺขุโนฯ
[1176]
เอตฺถากปฺปิยภูมฏฺโฐ, สํวิธานํ กโรติ โย;
สํวิธานนิมิตฺตํ ตุ, ทุกฺกฏํ ตสฺส ทีปิตํฯ
[1177]
สํวิธานํ กโรนฺตสฺส, ฐตฺวา กปฺปิยภูมิยํ;
สํวิธานนิมิตฺตํ ตุ, น วทนฺตสฺส ทุกฺกฏํฯ
[1178]
อุภยตฺถาปิ ปาจิตฺติ, คจฺฉนฺตสฺเสว ภิกฺขุโน;
อนนฺตรสฺส คามสฺส, อุปจาโรกฺกเม สิยาฯ
[1179]
ตตฺราปิ ปฐเม ปาเท, ทุกฺกฏํ สมุทีริตํ;
ทุติเย ปทวารสฺมิํ, ปาจิตฺติยมุทีริตํฯ
[1180]
อนฺตรา สํวิธาเนปิ, ภิกฺขุโน ทุกฺกฏํ สิยา;
ทฺวารมคฺควิสงฺเกเต, สติ จาปตฺติ วุจฺจติฯ
[1181]
อสํวิทหิเต กาเล, วิทหิโตติ สญฺญิโน;
ภิกฺขุสฺเสว วิธานสฺมิํ, โหติ อาปตฺติ ทุกฺกฏํฯ
[1182]
สมเย วิทหิตฺวา วา, วิสงฺเกเตน คจฺฉโต;
อาปทาสุ อนาปตฺติ, ตถา อุมฺมตฺตกาทิโนฯ
[1183]
อิทํ จตุสมุฏฺฐานํ, กายโต กายวาจโต;
กายจิตฺตา สมุฏฺฐาติ, กายวาจาทิกตฺตยาฯ
สํวิธานกถาฯ
[1184]
เอกมุชฺชวนิํ นาวํ, ตถา โอชวนิมฺปิ วา;
อภิรูเหยฺย ปาจิตฺติ, สทฺธิํ ภิกฺขุนิยา สเจฯ
[1185]
สคามตีรปสฺเสน , คามนฺตรวเสน วา;
อคามตีรปสฺเสน, คมเน อทฺธโยชเนฯ
[1186]
ตถา โยชนวิตฺถิณฺณ-นทีมชฺเฌน คจฺฉโต;
อทฺธโยชนสงฺขาย, โหนฺติ ปาจิตฺติโย ปนฯ
[1187]
ยถาสุขํ สมุทฺทสฺมิํ, สพฺพอฏฺฐกถาสุ หิ;
นทิยํเยว อาปตฺติ, น สมุทฺเท วิจาริตาฯ
[1188]
ติตฺถสมฺปาทนตฺถาย, อุทฺธํ วา นทิยา อโธ;
สเจ หรนฺติ ตํยุตฺตา, อนาปตฺติ ปกาสิตาฯ
[1189]
ตถา สํวิทหิตฺวา วา, ติริยํ ตรณาย วา;
อาปทาสุ วิเสโส หิ, อนนฺตรสโม มโตฯ
นาวาภิรุหนกถาฯ
[1190]
ญตฺวา ภิกฺขุนิยา ภตฺตํ, ภุญฺชโต ปริปาจิตํ;
หิตฺวา คิหิสมารมฺภํ, โหติ ปาจิตฺติ ภิกฺขุโนฯ
[1191]
โภชนํ ปญฺจธา วุตฺตํ, คหเณ ตสฺส ทุกฺกฏํ;
อชฺโฌหาเรสุ สพฺเพสุ, ตสฺส ปาจิตฺติโย สิยุํฯ
[1192]
สนฺตกํ ญาตกาทีนํ, คิหิสมฺปาทิตมฺปิ วา;
วินา ภิกฺขุนิยา โทโส, ภุญฺชโต ปริปาจิตํฯ
[1193]
ปริปาจิตสญฺญิสฺส , ภิกฺขุสฺสาปริปาจิเต;
อุโภสุ วิมติสฺสาปิ, โหติ สพฺพตฺถ ทุกฺกฏํฯ
[1194]
เอกโตอุปสมฺปนฺน-ปริปาจิตโภชนํ;
อชฺโฌหารวเสเนว, ทุกฺกฏํ ปริภุญฺชโตฯ
[1195]
อญฺญํ วา ปน ยํ กิญฺจิ, ฐเปตฺวา ปญฺจโภชนํ;
ภุญฺชนฺตสฺส อนาปตฺติ, ยาคุขชฺชผลาทิกํฯ
[1196]
สมุฏฺฐานาทโย ตุลฺยา, ปฐมนฺติมวตฺถุนา;
อิทํ ปณฺณตฺติวชฺชํ ตุ, ติจิตฺตญฺจ ติเวทนํฯ
ปริปาจิตกถาฯ
[1197]
ทุติยานิยเตเนว, ทสมํ สทิสํ มตํ;
อิทํ สิกฺขาปทํ สพฺพํ, สมุฏฺฐานนยาทินาฯ
รโหนิสชฺชกถาฯ
ภิกฺขุนิวคฺโค ตติโยฯ
[1198]
เอโก อาวสโถ ปิณฺโฑ, อคิลาเนน ภิกฺขุนา;
ภุญฺชิตพฺโพ ตโต อุทฺธํ, ปาจิตฺติ ปริภุญฺชโตฯ
[1199]
อโนทิสฺเสว ปญฺญตฺเต, ยาวทตฺเถว ภิกฺขุนา;
ภุญฺชิตพฺพํ สกิํ ตตฺถ, ตโต อุทฺธํ น วฏฺฏติฯ
[1200]
ทุติเย ทิวเส ตตฺถ, คหเณ ทุกฺกฏํ มตํ;
อชฺโฌหาเรสุ สพฺเพสุ, ตสฺส ปาจิตฺติโย มตาฯ
[1201]
กุเลเนเกน ปญฺญตฺเต, สห นานากุเลหิ วา;
นาเนกฏฺฐานเภเทสุ, เอกภาโคว วฏฺฏติฯ
[1202]
นานาฏฺฐาเนสุ ปญฺญตฺโต, โย จ, นานากุเลหิ วา;
ภุญฺชโต ปน สพฺพตฺถ, น โทโส ปฏิปาฏิยาฯ
[1203]
ปฏิปาฏิมเสเสน, เขเปตฺวา ปุน ภุญฺชโต;
อาทิโต ปน ปฏฺฐาย, น จ กปฺปติ ภิกฺขุโนฯ
[1204]
อนาปตฺติ คิลานสฺส, อาคจฺฉนฺตสฺส คจฺฉโต;
โอทิสฺสปิ จ ปญฺญตฺเต, ปริตฺเต ภุญฺชโต สกิํฯ
[1205]
ยาคุอาทีนิ นิจฺจมฺปิ, ภุญฺชิตุํ ปน วฏฺฏติ;
เสสเมฬกโลเมน, สมุฏฺฐานาทิกํ สมํฯ
อาวสถกถาฯ
[1206]
อญฺญตฺร สมยา วุตฺตา, ปาจิตฺติ คณโภชเน;
คโณติ ปน นิทฺทิฏฺฐา, จตฺตาโร วา ตตุตฺตริํฯ
[1207]
ยํ นิมนฺตนโต วาปิ, ลทฺธํ วิญฺญตฺติโตปิ วา;
โภชนํ ปน ปญฺจนฺนํ, โหติ อญฺญตรํ อิธฯ
[1208]
โภชนานมฺปิ ปญฺจนฺนํ, คเหตฺวา นามเมว ตุ;
นิมนฺเตติ สเจ ภิกฺขู, จตฺตาโร พหุเกปิ วาฯ
[1209]
‘‘โอทนํ โภชนํ ภตฺตํ, สมฺปฏิจฺฉถ คณฺหถ’’;
อิติ เววจเนเหว, อถ ภาสนฺตเรน วาฯ
[1210]
ตโต ตสฺส จ เต ภิกฺขู, สาทิยิตฺวา นิมนฺตนํ;
เอกโต นานโต วา เจ, คนฺตฺวา คณฺหนฺติ เอกโตฯ
[1211]
สพฺเพสํ โหติ ปาจิตฺติ, คณโภชนการณา;
เอกโต คหณํ เอตฺถ, คณโภชนการณํฯ
[1212]
เอกโต นานโต วาปิ, คมนํ โภชนมฺปิ วา;
การณนฺติ น ตํ วิญฺญู, ภณนฺติ คณโภชเนฯ
[1213]
สเจปิ โอทนาทีนํ, คเหตฺวา นามเมว วา;
เอกโต นานโต วาปิ, วิญฺญาเปตฺวา มนุสฺสเกฯ
[1214]
นานโต เวกโต คนฺตฺวา, สเจ คณฺหนฺติ เอกโต;
เอวมฺปิ ปน โหตีติ, วณฺณิตํ คณโภชนํฯ
[1215]
ทุวิธสฺสาปิ เอตสฺส, ปฏิคฺคหณการณา;
ทุกฺกฏํ โหติ ปาจิตฺติ, อชฺโฌหาเรสุ ทีปิตาฯ
[1216]
สมเยสุ อนาปตฺติ, สตฺตสฺวปิ ปกาสิตา;
คเหตฺวา เอกโต ทฺวินฺนํ, ติณฺณํ วา ภุญฺชตํ ตถาฯ
[1217]
มุนินานุปสมฺปนฺน-จาริปตฺตานิมนฺติตา ;
จตุตฺเถ เอกโต กตฺวาปิ, คณเภโท ปกาสิโตฯ
[1218]
เนว สมยลทฺธานํ, วเสนปิ หิ สพฺพโส;
คณเภโท ปนาปตฺติ, เวทิตพฺพา วิภาวินาฯ
[1219]
โภชนานญฺจ ปญฺจนฺนํ, วเสน คณโภชเน;
นตฺเถว จ วิสงฺเกตํ, ยาคุอาทีสุ ตํ สิยาฯ
[1220]
คณโภชนสญฺญิสฺส, ภิกฺขุสฺสาคณโภชเน;
ตตฺถ เวมติกสฺสาปิ, โหติ อาปตฺติ ทุกฺกฏํฯ
[1221]
โภชนานิ จ ปญฺเจว, ฐเปตฺวา ยาคุอาทิสุ;
อนาปตฺตีติ ญาตพฺพา, นิจฺจภตฺตาทิเกสุปิฯ
[1222]
ตถา อุมฺมตฺตกาทีนํ, สมุฏฺฐานาทินา ปน;
อิทํ เอฬกโลเมน, สทิสนฺติ ปกาสิตํฯ
คณโภชนกถาฯ
[1223]
พหูหิ โย ภิกฺขุ มนุสฺสเกหิ;
นิมนฺติโต ปญฺจหิ โภชเนหิ;
หิตฺวา สเจ ปุพฺพนิมนฺตนาย;
วิกปฺปนํ ปญฺจสุ ยสฺส กสฺสฯ
[1224]
ปจฺฉา นิมนฺติตํ ภตฺตํ, ตถา อุปฺปฏิปาฏิยา;
ภุญฺชโต เอกสิตฺถมฺปิ, ตสฺส ปาจิตฺติยํ สิยาฯ
[1225]
โภชนานํ ตุ ปญฺจนฺนํ, เยน เกน นิมนฺติโต;
ตํ ฐเปตฺวา สเจ อญฺญํ, โภชนํ ปริภุญฺชติฯ
[1226]
เตสเมว จ ปญฺจนฺนํ, โภชนานํ มเหสินา;
เอตํ ปรมฺปรํ นาม, โภชนํ ปริทีปิตํฯ
[1227]
ยตฺถ ขีรํ รสํ วาปิ, อากิรนฺติ สเจ ปน;
เยน อชฺโฌตฺถฏํ ภตฺตํ, สพฺพเมกรสํ สิยาฯ
[1228]
โกฏิโต ปน ปฏฺฐาย, สํสฏฺฐํ ปริภุญฺชโต;
อนาปตฺตีติ นิทฺทิฏฺฐํ, มหาปจฺจริยํ ปนฯ
[1229]
ปรมฺปรนฺติ สญฺญาย, อปรมฺปรโภชเน;
ตตฺถ เวมติกสฺสาปิ, ทุกฺกฏํ ปริภุญฺชโตฯ
[1230]
สกเลนปิ คาเมน, ปูเคน นิคเมน วา;
นิมนฺติตสฺส วา นิจฺจ-ภตฺเต โทโส น วิชฺชติฯ
[1231]
สมุฏฺฐานาทโย สพฺเพ, กถิเนนาทินา สมา;
กฺริยากฺริยมิทํ วุตฺตํ, โภชนญฺจาวิกปฺปนํฯ
ปรมฺปรโภชนกถาฯ
[1232]
ปูวา ปเหณกตฺถาย, ปฏิยตฺตา สเจ ปน;
ปาเถยฺยตฺถาย มนฺถา วา, เย หิ ตตฺถ จ ภิกฺขุนาฯ
[1233]
ทฺวตฺติปตฺตา คเหตพฺพา, ปูรา ปูเวหิ สตฺตุหิ;
ตโต เจ อุตฺตริํ ตสฺส, โหติ ปาจิตฺติ คณฺหโตฯ
[1234]
คเหตฺวา นิกฺขมนฺเตน, ‘‘ทฺวตฺติปตฺตา มยา อิธ;
คหิตา ปน ปูวา’’ติ, ภิกฺขุํ ทิสฺวา วเท พุโธฯ
[1235]
‘‘มา โข ตฺวํ ปฏิคณฺหา’’ติ, อวทนฺตสฺส ทุกฺกฏํ;
คณฺหโตปิ จ ตํ สุตฺวา, โหติ อาปตฺติ ทุกฺกฏํฯ
[1236]
อูนกทฺวตฺติปตฺเตสุ, อติเรโกติ สญฺญิโน;
ตตฺถ เวมติกสฺสาปิ, โหติ อาปตฺติ ทุกฺกฏํฯ
[1237]
เยน ตตฺถ ตโย ลทฺธา, ปตฺตปูรา ตโต ปน;
ทฺเว สงฺฆสฺส ปทาตพฺพา, ทฺเว เจ เอโก, น เอกโตฯ
[1238]
อปเหณกปาเถยฺยํ, อวเสสมฺปิ วา ตโต;
สนฺตกํ ญาตกาทีนํ, เทนฺตานมฺปิ ตทูนกํฯ
[1239]
คณฺหโตปิ อนาปตฺติ, ตถา อุมฺมตฺตกาทิโน;
สมุฏฺฐานาทโย สพฺเพ, สญฺจริตฺตสมา มตาฯ
กาณมาตุกถาฯ
[1240]
อญฺเญน ปน ปญฺจนฺนํ, โภชนานํ ปวาริโต;
ปาจิตฺตินติริตฺตํ เจ, ปุน ภุญฺชติ โภชนํฯ
[1241]
อสนํ โภชนญฺเจว, หตฺถปาสาภิหารตา;
กายวาจาปฏิกฺเขโป, ปญฺจงฺเคหิ ปวารณาฯ
[1242]
โอทโน สตฺตุ กุมฺมาโส, มจฺโฉ มํสนฺติ สพฺพโส;
นิปฺปปญฺเจน นิทฺทิฏฺฐํ, โภชนํ ปญฺจธา มตํฯ
[1243]
โอทโน ตตฺถ สตฺตนฺนํ, ธญฺญานํ โอทโน มโต;
ภชฺชิตานํ ตุ ธญฺญานํ, จุณฺณํ ‘‘สตฺตู’’ติ วุจฺจติฯ
[1244]
กุมฺมาโส ยวกุมฺมาโส, มจฺโฉ วุจฺจติ โอทโก;
มํสมฺปิ กปฺปิยมํสํ, อยเมตฺถ วินิจฺฉโยฯ
[1245]
สาลิ วีหิ ยโว กงฺคุ, วรโก โคธุโม ตถา;
กุทฺรูสโกติ สตฺเตเต, ธญฺญา ธญฺเญน เทสิตาฯ
[1246]
สามากาทิติณํ สพฺพํ, กุทฺรูเสเนว ทีปิตํ;
นีวาโร สาลิยํ วุตฺโต, วรเก วรกโจรโกฯ
[1247]
สตฺตนฺนํ ปน ธญฺญานํ, โอทโน ยาคุ วา ปน;
องฺคสมฺปตฺติยา ยุตฺตา, สญฺชเนติ ปวารณํฯ
[1248]
หตฺเถน คหิโตกาเส, โอธิํ ทสฺเสติ ยา ปน;
ยาคุสา อิธ สพฺพาปิ, โอทโนติ ปวุจฺจติฯ
[1249]
อพฺภุณฺหา ปน ยา ยาคุ, อุทฺธโนโรปิตา ตนุ;
สเจ โอธิํ น ทสฺเสติ, น ชเนติ ปวารณํฯ
[1250]
ปุน สา สีตลีภูตา, ฆนภาวํ คตา สเจ;
โอธิํ ทสฺเสติ โส ปุพฺเพ, ตนุภาโว น รกฺขติฯ
[1251]
ตกฺกธญฺญรสาทีนิ, อาโรเปตฺวา พหูนิปิ;
ผลปณฺณกฬีรานิ, ปกฺขิปิตฺวาน ตตฺถ จฯ
[1252]
ตณฺฑุเล มุฏฺฐิมตฺเตปิ, ปกฺขิปิตฺวา ปจนฺติ เจ;
โอธิํ ปน จ ทสฺเสติ, สญฺชเนติ ปวารณํฯ
[1253]
รเส ธญฺญรเส ขีเร, วากิริตฺวาน โอทนํ;
‘‘ยาคุํ คณฺหถ, ยาคุ’’นฺติ, วตฺวา เทนฺติ สเจ ปนฯ
[1254]
กิญฺจาปิ ตนุกา โหติ, สญฺชเนติ ปวารณํ;
ตํ ปจิตฺวา สเจ เทนฺติ, ยาคุสงฺคหิตา ปนฯ
[1255]
ฉุปนฺติ มจฺฉมํสํ วา, ตนุกายปิ ยาคุยา;
สเจ สาสปมตฺตมฺปิ, ปญฺญายติ ปวารณํฯ
[1256]
มจฺฉมํสรโส สุทฺโธ, สํสตฺโต รสยาคุ วา;
น จากปฺปิยมํสํ วา, สญฺชเนติ ปวารณํฯ
[1257]
ฐเปตฺวา วุตฺตธญฺญานํ, โอทนํ ปน สพฺพโส;
เวฬุตณฺฑุลกาทีนํ, น ปวาเรติ โอทโนฯ
[1258]
ปุถุกา วา ตโต ตาหิ, กตภตฺตมฺปิ สตฺตุปิ;
สุทฺธา น ปน ปูวา วา, ปวาเรนฺติ กทาจิปิฯ
[1259]
ขรปาเกน ภฏฺฐานํ, วีหีนํ ตณฺฑุเล ปน;
โกฏฺเฏตฺวา เทนฺติ ตํ จุณฺณํ, สตฺตุสงฺคหิตํ มตํฯ
[1260]
ภชฺชิตานํ ตุ วีหีนํ, น ปวาเรนฺติ ตณฺฑุลา;
เตสํ ปน จ ยํ จุณฺณํ, ตํ ชเนติ ปวารณํฯ
[1261]
ขรปาเกน ภฏฺฐานํ, วีหีนํ กุณฺฑกมฺปิ จ;
สตฺตุนํ โมทโก วาปิ, สญฺชเนติ ปวารณํฯ
[1262]
สมปาเกน ภฏฺฐานํ, สุกฺขานํ อาตเปน จ;
กุณฺฑกํ ปน วีหีนํ, น ชเนติ ปวารณํฯ
[1263]
ลาชา วา ปน เตเหว, กตภตฺตมฺปิ สตฺตุ วา;
ขชฺชกํ ปน สุทฺธํ วา, น ชเนติ ปวารณํฯ
[1264]
ปูริตํ มจฺฉมํเสหิ, ตํ ชเนติ ปวารณํ;
ยํ กิญฺจิ ภชฺชิตํ ปิฏฺฐํ, น ปวาเรติ สุทฺธกํฯ
[1265]
ยเวหิ กตกุมฺมาโส, ปวาเรติ, น จาปโร;
มจฺฉมํเสสุ วตฺตพฺพํ, ปากฏตฺตา น วิชฺชติฯ
[1266]
ขาทนฺโต กปฺปิยํ มํสํ, นิเสเธติ อกปฺปิยํ;
น โส เตน ปวาเรติ, อวตฺถุตฺตาติ ทีปิตํฯ
[1267]
ตเถวากปฺปิยํ มํสํ, ขาทนฺโต กปฺปิยํ สเจ;
นิเสเธติ ปวาเรติ, วตฺถุกตฺตาติ วณฺณิตํฯ
[1268]
มํสํ ปน จ ขาทนฺโต, กปฺปิยํ วา อกปฺปิยํ;
ปวาเรติ นิเสเธติ, กิญฺจิ กปฺปิยโภชนํฯ
[1269]
สเจ อกปฺปิยํ มํสํ, ขาทนฺโตว อกปฺปิยํ;
นิเสธํ น ปวาเรติ, ตถา อญฺญํ อกปฺปิยํฯ
[1270]
สเจ อชฺโฌหฏํ โหติ, สิตฺถเมกมฺปิ ภิกฺขุนา;
ปตฺเต หตฺเถ มุเข วาปิ, โภชนํ ปน วิชฺชติฯ
[1271]
ปวารณปโหนํ เจ, ปฏิกฺขิปติ โภชนํ;
ปวาเรติ สเจ นตฺถิ, น ปวาเรติ กตฺถจิฯ
[1272]
คิลิตฺวา จ มุเข ภตฺตํ, เสสมาทาย คจฺฉติ;
อนฺตรา จ นิเสเธนฺโต, น ปวาเรติ โภชนํฯ
[1273]
มุเข จ ภตฺตํ คิลิตญฺจ หตฺเถ;
ภตฺตํ ตุ อญฺญสฺส จ ทาตุกาโม;
ปตฺเต จ ภตฺตํ ปุน ทาตุกาโม;
ปฏิกฺขิปนฺโต น ปวาริโต โสฯ
[1274]
อสนสฺส อุปจฺเฉทา, น ปวาเรติ โสติ หิ;
กถยนฺติ มหาปญฺญา, การณาการณญฺญุโนฯ
[1275]
คณฺหโต ปจฺฉิมํ องฺคํ, ททโต ปุริมํ ปน;
อุภินฺนํ อฑฺฒเตยฺยํ เจ, วินา หตฺถํ ปสาริตํฯ
[1276]
ตสฺมิํ อภิหฏํ ฐาเน, ปวารณปโหนกํ;
ตาทิสํ ภุญฺชมาโนว, นิเสเธติ ปวาริโตฯ
[1277]
หตฺเถ อาธารเก วาปิ, ปตฺตํ อูรูสุ วา ฐิตํ;
อาหริตฺวา สเจ ภิกฺขุ, ‘‘ภตฺตํ คณฺหา’’ติ ภาสติฯ
[1278]
อนนฺตเร นิสินฺโนว, ตํ ปฏิกฺขิปโต ปน;
อภิหารสฺส จาภาวา, นตฺถิ ตสฺส ปวารณาฯ
[1279]
ภตฺตปจฺฉิํ ปณาเมตฺวา, ฐเปตฺวา ปุรโต ‘‘อิทํ;
คณฺหาหี’’ติ จ วุตฺเตปิ, อยเมว วินิจฺฉโยฯ
[1280]
อนนฺตรสฺส ภิกฺขุสฺส, ทียมาเน ปเนตโร;
ปิทหนฺโต สกํ ปตฺตํ, หตฺเถหิ น ปวาริโตฯ
[1281]
กาเยนาภิหฏํ ภตฺตํ, ปฏิกฺขิปติ โย ปน;
กาเยน วาปิ วาจาย, โหติ กสฺส ปวารณาฯ
[1282]
เอโก อภิหเฏ ภตฺเต, ปวารณภยา ปน;
‘‘อากิรากิร โกฏฺเฏตฺวา, โกฏฺเฏตฺวา ปูรยา’’ติ จฯ
[1283]
สเจ วทติ ตสฺสาปิ, น ปนตฺถิ ปวารณา;
อิจฺเจวาห มหาเถโร, มหาปทุมนามโกฯ
[1284]
สมํสญฺหิ รสํ เนตฺวา, คณฺหถาติ รสํ วเท;
ตํ สุตฺวา จ นิเสเธนฺโต, เนว โหติ ปวาริโตฯ
[1285]
‘‘คณฺห มจฺฉรสํ สารํ, คณฺห มํสรส’’นฺติ วา;
‘‘อิทํ คณฺหา’’ติ วา วุตฺเต, ปฏิกฺเขเป ปวารณาฯ
[1286]
สเจ มํสํ วิสุํ กตฺวา, ‘‘คณฺห มํสรส’’นฺติ วา;
วเทยฺยตฺถิ จ มํสํ เจ, ปฏิกฺเขเป ปวารณาฯ
[1287]
โอทเนน จ ปุจฺฉนฺตํ, ‘‘มุหุตฺตํ อาคเมหิ’’ติ;
คหณตฺถํ ฐเปนฺตสฺส, เนว ตสฺส ปวารณาฯ
[1288]
กฬีรปนสาทีหิ, มิสฺสกํ มจฺฉมํสกํ;
‘‘กฬีรสูปกํ คณฺห, ปนสพฺยญฺชน’’นฺติ วาฯ
[1289]
วทนฺติ เจ ปฏิกฺเขเป, เนว โหติ ปวารณา;
อปวารณเหตูนํ, นาเมน ปน วุตฺตโตฯ
[1290]
‘‘มจฺฉสูป’’นฺติ วา วุตฺเต, ‘‘มํสสูป’’นฺติ วา ปน;
‘‘อิทํ คณฺหา’’ติ วา วุตฺเต, โหติเยว ปวารณาฯ
[1291]
เอเสว จ นโย วุตฺโต, เญยฺโย มํสกรมฺพเก;
สพฺเพสุ มจฺฉมํเสหิ, มิสฺสเกสุ อยํ นโยฯ
[1292]
ภตฺตสมฺมิสฺสิตํ ยาคุํ, อาหริตฺวา สเจ ปน;
‘‘ยาคุํ คณฺหา’’ติ วุตฺตสฺมิํ, น ปวาเรติ วารยํฯ
[1293]
‘‘ภตฺตํ คณฺหา’’ติ วุตฺเต ตุ, ปวาเรติ ปฏิกฺขิปํ;
เยน วาปุจฺฉิโต ตสฺส, อตฺถิตายาติ การณํฯ
[1294]
‘‘ยาคุมิสฺสกํ คณฺหา’’ติ, วุตฺเต ตตฺถ จ ยาคุ เจ;
สมา พหุตรา วา สา, น ปวาเรติ โส กิรฯ
[1295]
มนฺทา ยาคุ, พหุํ ภตฺตํ, สเจ โหติ ปวารณา;
อิทํ สพฺพตฺถ นิทฺทิฏฺฐํ, การณํ ปน ทุทฺทสํฯ
[1296]
รสํ พหุรเส ภตฺเต, ขีรํ วา พหุขีรเก;
คณฺหถาติ วิสุํ กตฺวา, เทติ นตฺถิ ปวารณาฯ
[1297]
คจฺฉนฺเตเนว โภตฺตพฺพํ, คจฺฉนฺโต เจ ปวาริโต;
ภุญฺชิตพฺพํ ฐิเตเนว, ฐตฺวา ยทิ ปวาริโตฯ
[1298]
อุทกํ วาปิ ปตฺวา โส, สเจ ติฏฺฐติ กทฺทมํ;
อติริตฺตํ ตุ กาเรตฺวา, ภุญฺชิตพฺพํ ตโต ปุนฯ
[1299]
ปีฐเก โย นิสีทิตฺวา, ปวาเรติ สเจ ปน;
อาสนํ อวิจาเลตฺวา, ภุญฺชิตพฺพํ ยถาสุขํฯ
[1300]
สเจ มญฺเจ นิสีทิตฺวา, ปวาเรติ ตโต ปน;
อิโต สํสริตุํ เอตฺโต, อีสกมฺปิ น ลพฺภติฯ
[1301]
เตน มญฺเจน นํ สทฺธิํ, วฏฺฏตญฺญตฺร เนนฺติ เจ;
เอวํ สพฺพตฺถ ญาตพฺพํ, วิญฺญุนา วินยญฺญุนาฯ
[1302]
นิปชฺชิตฺวาว โภตฺตพฺพํ, นิปนฺโน เจ ปวาริโต;
วาเรตุกฺกุฏิโก หุตฺวา, ภุญฺชิตพฺพํ ตเถว จฯ
[1303]
อถาลเมตํ สพฺพนฺติ, วตฺตพฺพํ เตน ภิกฺขุนา;
อติริตฺตํ กโรนฺเตน, โอนเมตฺวาน ภาชนํฯ
[1304]
กปฺปิยํ ปน กาตพฺพํ, น ปตฺเตเยว เกวลํ;
ปจฺฉิยํ ยทิ วา กุณฺเฑ, กาตุํ วฏฺฏติ ภาชเนฯ
[1305]
ปวาริตานํ อปวาริตานํ;
อญฺเญสเมตํ ปน วฏฺฏเตว;
เยนาติริตฺตํ ตุ กตํ ฐเปตฺวา;
ตเมว เจกํ ปริภุญฺชิตพฺพํฯ
[1306]
กปฺปิยํ ปน กาเรตฺวา, ภุญฺชนฺตสฺเสว ภิกฺขุโน;
พฺยญฺชนํ วาปิ ยํ กิญฺจิ, ปตฺเต ตสฺสากิรนฺติ เจฯ
[1307]
อติริตฺตํ ตุ กาเรตฺวา, ภุญฺชิตพฺพํ ตถา ปุน;
เยน ตํ อกตํ ยํ วา, กาตพฺพํ เตน ตํ วิสุํฯ
[1308]
กตํ อกปฺปิยาทีหิ, อติริตฺตํ ตุ สตฺตหิ;
น คิลานาติริตฺตญฺจ, ตํ โหตินติริตฺตกํฯ
[1309]
โยปิ ปาโตว เอกมฺปิ, สิตฺถํ ภุตฺวา นิสีทติ;
อุปกฏฺฐูปนีตมฺปิ, กาตุํ ลภติ กปฺปิยํฯ
[1310]
อาหารตฺถาย ยามาทิ-กาลิกํ ปฏิคณฺหโต;
อนามิสํ ตเมวสฺส, ทุกฺกฏํ ปริภุญฺชโตฯ
[1311]
ตถา อนติริตฺตนฺติ, สญฺญิโน อติริตฺตเก;
ตตฺถ เวมติกสฺสาปิ, ทุกฺกฏํ ปริทีปิตํฯ
[1312]
อนาปตฺตาติริตฺตํ ตุ, การาเปตฺวาน ภุญฺชโต;
คิลานสฺสาติริตฺตํ วา, ตถา อุมฺมตฺตกาทิโนฯ
[1313]
สมุฏฺฐานาทโย สพฺเพ, กถิเนน สมา มตา;
กปฺปิยากรณญฺเจว, โภชนญฺจ กฺริยากฺริยํฯ
ปฐมปวารณกถาฯ
[1314]
โย ปนานติริตฺเตน, ปวาเรยฺย ปวาริตํ;
ชานํ อาสาทนาเปกฺโข, ภุตฺเต ปาจิตฺติ ตสฺส ตุฯ
[1315]
ทุกฺกฏํ อภิหาเร จ, คหเณ อิตรสฺส หิ;
อชฺโฌหารปโยเคสุ, สพฺเพสุปิ จ ทุกฺกฏํฯ
[1316]
โภชนสฺสาวสานสฺมิํ, ปาจิตฺติ ปริทีปิตา;
อภิหารกภิกฺขุสฺส, สพฺพํ ตสฺเสว ทสฺสิตํฯ
[1317]
ปวาริโตติ สญฺญิสฺส, ภิกฺขุสฺมิํ อปวาริเต;
วิมติสฺสุภยตฺถาปิ, ทุกฺกฏํ ปริทีปิตํฯ
[1318]
อนาปตฺตาติริตฺตํ วา, การาเปตฺวาว เทติ เจ;
คิลานสฺสาวเสสํ วา, อญฺญสฺสตฺถาย เทติ วาฯ
[1319]
เสสํ สพฺพมเสเสน, อนนฺตรสมํ มตํ;
โอมสวาทตุลฺยาว, สมุฏฺฐานาทโย นยาฯ
ทุติยปวารณกถาฯ
[1320]
ขาทนียํ วา โภชนียํ วา;
กิญฺจิ วิกาเล โย ปน ภิกฺขุ;
ขาทติ ภุญฺชติ วาปิ จ ตํ;
โส ชินวุตฺตํ โทสมุเปติฯ
[1321]
ยมามิสคตญฺเจตฺถ, วนมูลผลาทิกํ;
กาลิเกสฺวสมฺโมหตฺถํ, เวทิตพฺพมิทํ ปนฯ
[1322]
มูลํ กนฺทํ มุฬาลญฺจ, มตฺถกํ ขนฺธกํ ตจํ;
ปตฺตํ ปุปฺผํ ผลํ อฏฺฐิ, ปิฏฺฐํ นิยฺยาสเมว จฯ
[1323]
มูลขาทนียาทีนํ, มุขมตฺตนิทสฺสนํ;
ภิกฺขูนํ ปาฏวตฺถาย, นามตฺเถสุ นิโพธถฯ
[1324]
มูลกํ ขารกญฺเจว, วตฺถุลํ ตณฺฑุเลยฺยกํ;
ตมฺพกํ ชชฺฌริกญฺจ, จจฺจุ วชกลีปิ จฯ
[1325]
มูลานิ เอวมาทีนํ, สากานํ อามิเส ปน;
สงฺคหํ อิธ คจฺฉนฺติ, อาหารตฺถํ ผรนฺติ หิฯ
[1326]
ฉฑฺเฑนฺติ ชรฏฺฐํ เฉตฺวา, ยํ ตํ วชกลิสฺส ตุ;
ตํ ยาวชีวิกํ วุตฺตํ, เสสานํ ยาวกาลิกํฯ
[1327]
หลิทฺทิ สิงฺคิเวรญฺจ, วจตฺตํ อติวิสํ วจํ;
อุสีรํ ภทฺทมุตฺตญฺจ, ตถา กฏุกโรหิณีฯ
[1328]
อิจฺเจวมาทิกํ อญฺญํ, ปญฺจมูลาทิกํ พหุ;
นานปฺปการกํ มูลํ, วิญฺเญยฺยํ ยาวชีวิกํฯ
[1329]
มสาลุปิณฺฑลาทีนํ , วลฺลีนํ อาลุวสฺส จ;
กนฺโท อุปฺปลชาตีนํ, ตถา ปทุมชาติยาฯ
[1330]
กทลีสิคฺคุตาลานํ, มาลุวสฺส จ เวฬุยา;
สตาวริ กเสรูนํ, กนฺโท อมฺพาฏกสฺส จฯ
[1331]
อิจฺเจวมาทโย กนฺทา;
ทสฺสิตา ยาวกาลิกา;
โธโต โส อามิเส วุตฺโต;
กนฺโท โย ขีรวลฺลิยาฯ
[1332]
อโธโต ลสุณญฺเจว, ขีรกาโกลิอาทโย;
กนฺทา วากฺยปถาตีตา, วิญฺเญยฺยา ยาวชีวิกาฯ
[1333]
ปุณฺฑรีกมุฬาลญฺจ , มุฬาลํ ปทุมสฺส จ;
เอวมาทิมเนกมฺปิ, มุฬาลํ ยาวกาลิกํฯ
[1334]
ตาลหินฺตาลกุนฺตาล-นาฬิเกราทิสมฺภวํ;
หลิทฺทิสิงฺคิเวรานํ, มุฬาลํ ยาวชีวิกํฯ
[1335]
ตาลหินฺตาลกุนฺตาล-กฬีโร เกตกสฺส จ;
กทลีนาฬิเกรานํ, มตฺถกํ มูลกสฺส จฯ
[1336]
ขชฺชุเรรกเวตฺตานํ, อุจฺฉุเวฬุนฬาทินํ;
สตฺตนฺนํ ปน ธญฺญานํ, กฬีโร สาสปสฺส จฯ
[1337]
อิจฺเจวมาทโยเนเก, มตฺถกา ยาวกาลิกา;
อญฺเญ หลิทฺทิอาทีนํ, มตฺถกา ยาวชีวิกาฯ
[1338]
ตาลกุนฺตาลกาทีนํ, ฉินฺทิตฺวา ปาติโต ปน;
คโต ชรฏฺฐพุนฺโท โส, สงฺคหํ ยาวชีวิเกฯ
[1339]
ขนฺธขาทนียํ นาม, อุจฺฉุขนฺโธ ปกาสิโต;
สาลกลฺยาณิยา ขนฺโธ, ตถา ปถวิยํ คโตฯ
[1340]
เอวมุปฺปลชาตีนํ, ทณฺฑโก ยาวกาลิโก;
ปณฺณทณฺฑุปฺปลาทีนํ, สพฺโพ ปทุมชาติยาฯ
[1341]
ยาวชีวิกสงฺขาตา , กรมทฺทาทิทณฺฑกา;
ตเจสุจฺฉุตโจเวโก, สรโส ยาวกาลิโกฯ
[1342]
มูลกํ ขารโก จจฺจุ, ตมฺพโก ตณฺฑุเลยฺยโก;
วตฺถุโล จีนมุคฺโค จ, อุมฺมา วชกลี ตถาฯ
[1343]
ชชฺฌรี กาสมทฺโท จ, เสลฺลุ สิคฺคุ จ นาฬิกา;
วรุโณ อคฺคิมนฺโถ จ, ชีวนฺตี สุนิสนฺนโกฯ
[1344]
ราชมาโส จ มาโส จ, นิปฺผาโว มิคปุปฺผิกา;
วณฺฏโก ภูมิโลณีติ, เอวมาทิมเนกกํฯ
[1345]
ปตฺตขาทนียํ นาม, กถิตํ ยาวกาลิกํ;
อิตรา จ มหาโลณิ, ทีปิตา ยาวชีวิกาฯ
[1346]
ยาวกาลิกมิจฺเจว, กถิตํ อมฺพปลฺลวํ;
นิมฺพสฺส กุฏชสฺสาปิ, ปณฺณํ สุลสิยาปิ จฯ
[1347]
กปฺปาสิกปโฏลานํ , เตสํ ปุปฺผผลานิ จ;
ผณิชฺชกชฺชุกานญฺจ, ปณฺณํ ตํ ยาวชีวิกํฯ
[1348]
อฏฺฐนฺนํ มูลกาทีนํ, ปุปฺผํ นิปฺผาวกสฺส จ;
ตถา ปุปฺผํ กรีรสฺส, ปุปฺผํ วรุณกสฺส จฯ
[1349]
ปุปฺผํ กเสรุกสฺสาปิ, ชีวนฺตี สิคฺคุปุปฺผกํ;
ปทุมุปฺปลชาตีนํ, ปุปฺผานํ กณฺณิกาปิ จฯ
[1350]
นาฬิเกรสฺส ตาลสฺส, ตรุณํ เกตกสฺส จ;
อิจฺเจวมาทิกํ ปุปฺผ-มเนกํ ยาวกาลิกํฯ
[1351]
ยาวกาลิกปุปฺผานิ, ฐเปตฺวา ปน เสสกํ;
ยาวชีวิกปุปฺผนฺติ, ทีปเย สพฺพเมว จฯ
[1352]
ติลกมกุลสาลมลฺลิกานํ ;
กกุธกปิตฺถกกุนฺทกฬีนํ;
กุรวกกรวีรปาฏลีนํ;
กุสุมมิทํ ปน ยาวชีวิกํฯ
[1353]
อมฺพมฺพาฏกชมฺพูนํ, ผลญฺจ ปนสสฺส จ;
มาตุลุงฺคกปิตฺถานํ, ผลํ ตินฺติณิกสฺส จฯ
[1354]
ตาลสฺส นาฬิเกรสฺส, ผลํ ขชฺชูริยาปิ จ;
ลพุชสฺส จ โจจสฺส, โมจสฺส มธุกสฺส จฯ
[1355]
พทรสฺส กรมทฺทสฺส, ผลํ วาติงฺคณสฺส จ;
กุมฺภณฺฑติปุสานญฺจ, ผลํ เอฬาลุกสฺส จฯ
[1356]
ราชายตนผลํ ปุสฺส-ผลํ ติมฺพรุกสฺส จ;
เอวมาทิมเนกมฺปิ, ผลํ ตํ ยาวกาลิกํฯ
[1357]
ติผลํ ปิปฺผลี ชาติ-ผลญฺจ กฏุกปฺผลํ;
โคฏฺฐผลํ พิลงฺคญฺจ, ตกฺโกลมริจานิ จฯ
[1358]
เอวมาทีนิ วุตฺตานิ, อวุตฺตานิ จ ปาฬิยํ;
ผลานิ ปน คจฺฉนฺติ, ยาวชีวิกสงฺคหํฯ
[1359]
ปนสมฺพาฏกฏฺฐีนิ, สาลฏฺฐิ ลพุชฏฺฐิ จ;
จิญฺจาพิมฺพผลฏฺฐีนิ, โปกฺขรฏฺฐิ จ สพฺพโสฯ
[1360]
ขชฺชูริเกตกาทีนํ , ตถา ตาลผลฏฺฐิ จ;
เอวมาทีนิ คจฺฉนฺติ, ยาวกาลิกสงฺคหํฯ
[1361]
ปุนฺนาคมธุกฏฺฐีนิ, เสลฺลฏฺฐิ ติผลฏฺฐิ จ;
เอวมาทีนิ อฏฺฐีนิ, นิทฺทิฏฺฐานิ อนามิเสฯ
[1362]
สตฺตนฺนํ ปน ธญฺญานํ, อปรณฺณานเมว จ;
ปิฏฺฐํ ปนสสาลานํ, ลพุชมฺพาฏกสฺส จฯ
[1363]
ตาลปิฏฺฐํ ตถา โธตํ, ปิฏฺฐํ ยํ ขีรวลฺลิยา;
เอวมาทิมเนกมฺปิ, กถิตํ ยาวกาลิกํฯ
[1364]
อโธตํ ตาลปิฏฺฐญฺจ, ปิฏฺฐํ ยํ ขีรวลฺลิยา;
อสฺสคนฺธาทิปิฏฺฐญฺจ, โหติ ตํ ยาวชีวิกํฯ
[1365]
นิยฺยาโส อุจฺฉุนิพฺพตฺโต, เอโก สตฺตาหกาลิโก;
อวเสโส จ หิงฺคาทิ, นิยฺยาโส ยาวชีวิโกฯ
[1366]
มูลาทีสุ มยา กิญฺจิ, มุขมตฺตํ นิทสฺสิตํ;
เอตสฺเสวานุสาเรน, เสโส เญยฺโย วิภาวินาฯ
[1367]
‘‘ภุญฺชิสฺสามิ วิกาเล’’ติ, อามิสํ ปฏิคณฺหโต;
กาเล วิกาลสญฺญิสฺส, กาเล เวมติกสฺส จฯ
[1368]
ทุกฺกฏํ, กาลสญฺญิสฺส, อนาปตฺติ ปกาสิตา;
อิทํ เอฬกโลเมน, สมุฏฺฐานาทินา สมํฯ
วิกาลโภชนกถาฯ
[1369]
โภชนํ สนฺนิธิํ กตฺวา, ขาทนํ วาปิ โย ปน;
ภุญฺเชยฺย วาปิ ขาเทยฺย, ตสฺส ปาจิตฺติยํ สิยาฯ
[1370]
ภิกฺขุ ยํ สามเณรานํ, ปริจฺจชตฺยนาลโย;
นิทหิตฺวา สเจ ตสฺส, เทนฺติ ตํ ปุน วฏฺฏติฯ
[1371]
สยํ ปฏิคฺคเหตฺวาน, อปริจฺจตฺตเมว ยํ;
ทุติเย ทิวเส ตสฺส, นิหิตํ ตํ น วฏฺฏติฯ
[1372]
ตโต อชฺโฌหรนฺตสฺส, เอกสิตฺถมฺปิ ภิกฺขุโน;
ปาจิตฺติ กถิตา สุทฺธา, สุทฺธจิตฺเตน ตาทินาฯ
[1373]
อกปฺปิเยสุ มํเสสุ, มนุสฺสสฺเสว มํสเก;
ถุลฺลจฺจเยน ปาจิตฺติ, ทุกฺกเฏน สเหตเรฯ
[1374]
ยามกาลิกสงฺขาตํ , ปาจิตฺติ ปริภุญฺชโต;
ทุกฺกฏาปตฺติยา สทฺธิํ, อาหารตฺถาย ภุญฺชโตฯ
[1375]
สเจ ปวาริโต หุตฺวา, อนฺนํ อนติริตฺตกํ;
ภุญฺชโต ปกตํ ตสฺส, โหติ ปาจิตฺติยทฺวยํฯ
[1376]
ถุลฺลจฺจเยน สทฺธิํ ทฺเว, มํเส มานุสเก สิยุํ;
เสเส อกปฺปิเย มํเส, ทุกฺกเฏน สห ทฺวยํฯ
[1377]
ยามกาลิกสงฺขาตํ, ภุญฺชโต สติ ปจฺจเย;
สามิเสน มุเขน ทฺเว, เอกเมว นิรามิสํฯ
[1378]
ตเมวชฺโฌหรนฺตสฺส, อาหารตฺถาย เกวลํ;
ทฺวีสุ เตสุ วิกปฺเปสุ, ทุกฺกฏํ ปน วฑฺฒติฯ
[1379]
วิกาเล ภุญฺชโต สุทฺธํ, สนฺนิธิปจฺจยาปิ จ;
วิกาลโภชนา เจว, โหติ ปาจิตฺติยทฺวยํฯ
[1380]
มํเส ถุลฺลจฺจยญฺเจว, ทุกฺกฏมฺปิ จ วฑฺฒติ;
มนุสฺสมํเส เสเส จ, ยถานุกฺกมโต ทฺวยํฯ
[1381]
นตฺเถวานติริตฺตมฺปิ, วิกาเล ปริภุญฺชโต;
โทโส สพฺพวิกปฺเปสุ, ภิกฺขุโน ตนฺนิมิตฺตโกฯ
[1382]
วิกาลปจฺจยา วาปิ, น โทโส ยามกาลิเก;
สตฺตาหกาลิกํ ยาว-ชีวิกํ ปฏิคณฺหโตฯ
[1383]
อาหารสฺเสว อตฺถาย, คหเณ ทุวิธสฺส ตุ;
อชฺโฌหารปโยเคสุ, ทุกฺกฏํ ตุ นิรามิเสฯ
[1384]
อถ อามิสสํสฏฺฐํ, คเหตฺวา ฐปิตํ สเจ;
ปุน อชฺโฌหรนฺตสฺส, ปาจิตฺเตว ปกาสิตาฯ
[1385]
กาโล ยาโม จ สตฺตาหํ, อิติ กาลตฺตยํ อิทํ;
อติกฺกมยโต โทโส, กาลํ ตํ ตํ ตุ กาลิกํฯ
[1386]
อตฺตนา ตีณิ สมฺภินฺน-รสานิ อิตรานิ หิ;
สภาวมุปเนเตว, ยาวกาลิกมตฺตโนฯ
[1387]
เอวเมว จ เสเสสุ, กาลิเกสุ วินิทฺทิเส;
อิเมสุ ปน สพฺเพสุ, กาลิเกสุ จตูสฺวปิฯ
[1388]
กาลิกทฺวยมาทิมฺหิ, อนฺโตวุตฺถญฺจ สนฺนิธิ;
อุภยมฺปิ น โหเตว, ปจฺฉิมํ กาลิกทฺวยํฯ
[1389]
อกปฺปิยาย กุฏิยา, วุตฺเถนนฺตทฺวเยน ตํ;
คหิตํ ตทเห วาปิ, ทฺวยํ ปุพฺพํ น วฏฺฏติฯ
[1390]
มุขสนฺนิธิ นามายํ, อนฺโตวุตฺถํ น กปฺปติ;
อิติ วุตฺตํ ทฬฺหํ กตฺวา, มหาปจฺจริยํ ปนฯ
[1391]
น โทโส นิทหิตฺวาปิ, ปฐมํ กาลิกตฺตยํ;
ตํ ตํ สกํ สกํ กาล-มนติกฺกมฺม ภุญฺชโตฯ
[1392]
ตถา อุมฺมตฺตกาทีนํ, อนาปตฺติ ปกาสิตา;
สมเมฬกโลเมน, สมุฏฺฐานาทินา อิทํฯ
สนฺนิธิการกถาฯ
[1393]
โภชนานิ ปณีตานิ, อคิลาโน ปนตฺตโน;
อตฺถาย วิญฺญาเปตฺวาน, ปาจิตฺติ ปริภุญฺชโตฯ
[1394]
‘‘สปฺปินา เทหิ ภตฺตํ เม, สสปฺปิํ สปฺปิมิสฺสกํ;
สปฺปิภตฺตญฺจ เทหี’’ติ, วิญฺญาเปนฺตสฺส ทุกฺกฏํฯ
[1395]
วิญฺญาเปตฺวา ตถา ตํ เจ, ทุกฺกฏํ ปฏิคณฺหโต;
ปุน อชฺโฌหรนฺตสฺส, ปาจิตฺติ ปริยาปุตาฯ
[1396]
สุทฺธานิ สปฺปิอาทีนิ, วิญฺญาเปตฺวาน ภุญฺชโต;
เสขิเยสุปิ วิญฺญตฺติ, ทุกฺกฏํ ปริทีปเยฯ
[1397]
ตสฺมา ปณีตสํสฏฺฐํ, วิญฺญาเปตฺวาว ภุญฺชโต;
สตฺตธญฺญมยํ ภตฺตํ, ปาจิตฺติยมุทีรเยฯ
[1398]
สเจ ‘‘โคสปฺปินา มยฺหํ, เทหิ ภตฺต’’นฺติ ยาจิโต;
อชิยา สปฺปิอาทีหิ, วิสงฺเกตํ ททาติ เจฯ
[1399]
‘‘สปฺปินา เทหิ’’ วุตฺโต เจ, นวนีตาทิเกสุปิ;
เทติ อญฺญตเรนสฺส, วิสงฺเกตนฺติ ทีปิตํฯ
[1400]
เยน เยน หิ วิญฺญตฺตํ, ตสฺมิํ มูเลปิ ตสฺส วา;
ลทฺเธปิ ปน ตํ ลทฺธํ, โหติเยว น อญฺญถาฯ
[1401]
ฐเปตฺวา สปฺปิอาทีนิ, อาคตานิ หิ ปาฬิยํ;
อญฺเญหิ วิญฺญาเปนฺตสฺส, โหติ อาปตฺติ ทุกฺกฏํฯ
[1402]
สพฺเพหิ สปฺปิอาทีหิ, วิญฺญาเปตฺวาว เอกโต;
ภุญฺชเตกรสํ กตฺวา, นว ปาจิตฺติโย มตาฯ
[1403]
อกปฺปิเยน วุตฺเตปิ, สปฺปินา เทติ เตน เจ;
คหเณ ปริโภเคปิ, ทุกฺกฏํ ปริทีปิตํฯ
[1404]
คิลานสฺส คิลาโนติ, สญฺญิโน วิมติสฺส วา;
ทุกฺกฏํ มุนินา วุตฺตํ, อนาปตฺติ ปกาสิตาฯ
[1405]
คิลานกาเล วิญฺญตฺต-มคิลานสฺส ภุญฺชโต;
คิลานสฺสาวเสสํ วา, ญาตกาทีนเมว วาฯ
[1406]
อิทํ จตุสมุฏฺฐานํ, กายโต กายวาจโต;
กายจิตฺตา ตถา กาย-วาจาจิตฺตตฺตยาปิ จฯ
ปณีตโภชนกถาฯ
[1407]
อทินฺนญฺหิ มุขทฺวารํ, อาหารํ อาหเรยฺย โย;
ทนฺตโปโนทกํ หิตฺวา, ตสฺส ปาจิตฺติยํ สิยาฯ
[1408]
หตฺถปาโสภินีหาโร, มชฺฌิมุจฺจารณกฺขโม;
มนุสฺโส วามนุสฺโส วา, เทติ กายาทินา ติธาฯ
[1409]
ปฏิคฺคณฺหาติ ตํ ภิกฺขุ, ทียมานํ สเจ ทฺวิธา;
เอวํ ปญฺจงฺคสํโยเค, คหณํ ตสฺส รูหติฯ
[1410]
ทายโก คคนฏฺโฐ เจ, ภูมฏฺโฐ เจตโร สิยา;
ภูมฏฺฐสฺส จ สีเสน, คคนฏฺฐสฺส เทหิโนฯ
[1411]
ยมาสนฺนตรํ องฺคํ, โอริมนฺเตน ตสฺส ตุ;
ทาตุํ วาปิ คเหตุํ วา, วินา หตฺถํ ปสาริตํฯ
[1412]
หตฺถปาโส มิเนตพฺโพ, นคฏฺฐาทีสฺวยํ นโย;
เอวรูเป ปน ฐาเน, ฐตฺวา เจ เทติ วฏฺฏติฯ
[1413]
ปกฺขี วา มุขตุณฺเฑน, หตฺถี โสณฺฑาย วา ปน;
สเจ ยํ กิญฺจิ ปุปฺผํ วา, ผลํ วา เทติ วฏฺฏติฯ
[1414]
ภตฺตพฺยญฺชนปุณฺณานิ, ภาชนานิ พหูนิปิ;
สีเสนาทาย ภิกฺขุสฺส, คนฺตฺวา กสฺสจิ สนฺติกํฯ
[1415]
อีสกํ ปน โอนตฺวา, ‘‘คณฺหา’’ติ ยทิ ภาสติ;
เตน หตฺถํ ปสาเรตฺวา, เหฏฺฐิมํ ปน ภาชนํฯ
[1416]
ปฏิจฺฉิตพฺพํ ตํ เอก- เทเสนาปิ จ ภิกฺขุนา;
โหนฺติ เอตฺตาวตา ตานิ, คหิตาเนว สพฺพโสฯ
[1417]
ตโต ปฏฺฐาย ตํ สพฺพํ, โอโรเปตฺวา ยถาสุขํ;
อุคฺฆาเฏตฺวา ตโต อิฏฺฐํ, คเหตุํ ปน วฏฺฏติฯ
[1418]
ปจฺฉิอาทิมฺหิ วตฺตพฺพ-มตฺถิ กิํ เอกภาชเน;
กาชภตฺตํ หรนฺโต เจ, โอนตฺวา เทติ วฏฺฏติฯ
[1419]
ติํสหตฺโถ สิยา เวฬุ, อนฺเตสุ จ ทุเว ฆฏา;
สปฺปิโน, คหิเตกสฺมิํ, สพฺพํ คหิตเมว ตํฯ
[1420]
พหุปตฺตา จ มญฺเจ วา, ปีเฐ วา กฏสารเก;
ฐปิตา ทายโก หตฺถ-ปาเส ฐตฺวาน เทติ เจฯ
[1421]
ปฏิคฺคหณสญฺญาย, มญฺจาทีนิ สเจ ปน;
นิสีทติ ผุสิตฺวา โย, ยญฺจ ปตฺเตสุ ทียติฯ
[1422]
คหิตํ เตน ตํ สพฺพํ, โหติเยว น สํสโย;
ปฏิคฺคเหสฺสามิจฺเจว, มญฺจาทีนิ สเจ ปนฯ
[1423]
คหิตํ โหติ ตํ สพฺพํ, อารุหิตฺวา นิสีทติ;
อาหจฺจ กุจฺฉิยา กุจฺฉิํ, ฐิตา ปตฺตา หิ ภูมิยํฯ
[1424]
ยํ ยํ องฺคุลิยา วาปิ, ผุสิตฺวา สูจิยาปิ วา;
นิสินฺโน ตตฺถ ตตฺเถว, ทียมานํ ตุ วฏฺฏติฯ
[1425]
กฏสาเร มหนฺตสฺมิํ, ตถา หตฺถตฺถราทิสุ;
คณฺหโต หตฺถปาสสฺมิํ, วิชฺชมาเน ตุ วฏฺฏติฯ
[1426]
ตตฺถชาตกปณฺเณสุ, คเหตุํ น จ วฏฺฏติ;
น ปเนตานิ กาเยน, ปฏิพทฺธานิ โหนฺติ หิฯ
[1427]
อสํหาริมปาสาเณ , ผลเก วาปิ ตาทิเส;
ขาณุพทฺเธปิ วา มญฺเจ, คหณํ เนว รูหติฯ
[1428]
ตินฺติณิกาทิปณฺเณสุ, ภูมิยํ ปตฺถเฏสุ วา;
ธาเรตุมสมตฺถตฺตา, คหณํ น จ รูหติฯ
[1429]
หตฺถปาสมติกฺกมฺม, ทีฆทณฺเฑน เทติ เจ;
วตฺตพฺโพ ภิกฺขุนาคนฺตฺวา, เทหีติ ปริเวสโกฯ
[1430]
สเจ ปตฺเต รโช โหติ, โธวิตพฺโพ ชเล สติ;
ตสฺมิํ อสติ ปุญฺฉิตฺวา, คเหตพฺโพ อเสสโตฯ
[1431]
ปิณฺฑาย วิจรนฺตสฺส, รชํ ปตติ เจ ปน;
ภิกฺขา ปฏิคฺคเหตฺวาว, คเหตพฺพา วิชานตาฯ
[1432]
อปฺปฏิคฺคหิเต ภิกฺขุํ, คณฺหโต ปน ทุกฺกฏํ;
ปฏิคฺคเหตฺวานาปตฺติ, ปจฺฉา ตํ ปริภุญฺชโตฯ
[1433]
‘‘ปฏิคฺคเหตฺวา เทถา’’ติ, วุตฺเต ตํ วจนํ ปน;
อสุตฺวานาทิยิตฺวา วา, เทนฺติ เจ นตฺถิ ทุกฺกฏํฯ
[1434]
ปจฺฉา ปฏิคฺคเหตฺวาว, คเหตพฺพํ วิชานตา;
สเจ รชํ นิปาเตติ, มหาวาโต ตโต ตโตฯ
[1435]
น สกฺกา จ สิยา ภิกฺขํ, คเหตุํ ยทิ ภิกฺขุนา;
อญฺญสฺส ทาตุกาเมน, คเหตุํ ปน วฏฺฏติฯ
[1436]
สามเณรสฺส ตํ ทตฺวา, ทินฺนํ วา เตน ตํ ปุน;
ตสฺส วิสฺสาสโต วาปิ, ภุญฺชิตุํ ปน วฏฺฏติฯ
[1437]
ภิกฺขาจาเร สเจ ภตฺตํ, สรชํ เทติ ภิกฺขุโน;
‘‘ปฏิคฺคเหตฺวา ภิกฺขํ ตฺวํ, คณฺห วา ภุญฺช วา’’ติ จฯ
[1438]
วตฺตพฺโพ โส ตถา เตน, กตฺตพฺพญฺเจว ภิกฺขุนา;
รชํ อุปริ ภตฺตสฺส, ตสฺสุปฺลวติ เจ ปนฯ
[1439]
กญฺชิกํ ตุ ปวาเหตฺวา, ภุญฺชิตพฺพํ ยถาสุขํ;
อนฺโต ปฏิคฺคเหตพฺพํ, ปวิฏฺฐํ ตุ สเจ ปนฯ
[1440]
ปติตํ สุกฺขภตฺเต เจ, อปนียาว ตํ รชํ;
สุขุมํ เจ สภตฺตมฺปิ, ภุญฺชิตพฺพํ ยถาสุขํฯ
[1441]
อุฬุงฺเกนาหริตฺวาปิ , เทนฺตสฺส ปฐมํ ปน;
เถโว อุฬุงฺกโต ปตฺเต, สเจ ปตติ วฏฺฏติฯ
[1442]
ภตฺเต อากิรมาเน ตุ, จรุเกน ตโต ปน;
มสิ วา ฉาริกา วาปิ, สเจ ปตติ ภาชเนฯ
[1443]
ตสฺส จาภิหฏตฺตาปิ, น โทโส อุปลพฺภติ;
อนนฺตรสฺส ภิกฺขุสฺส, ทียมานํ ตุ ปตฺตโตฯ
[1444]
อุปฺปภิตฺวา สเจ ปตฺเต, อิตรสฺส จ ภิกฺขุโน;
ปตติ วฏฺฏเตวายํ, ปฏิคฺคหิตเมว ตํฯ
[1445]
ปายาสสฺส จ ปูเรตฺวา, ปตฺตํ เจ เทนฺติ ภิกฺขุโน;
อุณฺหตฺตา ปน ตํ เหฏฺฐา, คเหตุํ น จ สกฺกติฯ
[1446]
วฏฺฏตีติ จ นิทฺทิฏฺฐํ, คเหตุํ มุขวฏฺฏิยํ;
น สกฺกา เจ คเหตพฺโพ, ตถา อาธารเกนปิฯ
[1447]
สเจ อาสนสาลายํ, คเหตฺวา ปตฺตมตฺตโน;
นิทฺทายติ นิสินฺโนว, ทียมานํ น ชานติฯ
[1448]
เนวาหริยมานํ วา, อปฺปฏิคฺคหิตเมว ตํ;
อาโภคํ ปน กตฺวา เจ, นิสินฺโน โหติ วฏฺฏติฯ
[1449]
สเจ หตฺเถน มุญฺจิตฺวา, ปตฺตํ อาธารกมฺปิ วา;
เปลฺเลตฺวา ปน ปาเทน, นิทฺทายติ หิ วฏฺฏติฯ
[1450]
ปาเทนาธารกํ อกฺก-มิตฺวาปิ ปฏิคณฺหโต;
ชาครสฺสาปิ โหเตว, คหณสฺมิํ อนาทโรฯ
[1451]
ตสฺมา ตํ น จ กาตพฺพํ, ภิกฺขุนา วินยญฺญุนา;
ยํ ทียมานํ ปตติ, คเหตุํ ตํ ตุ วฏฺฏติฯ
[1452]
ภุญฺชนฺตานญฺจ ทนฺตา วา, ขียนฺติปิ นขาปิ วา;
ตถา ปตฺตสฺส วณฺโณ วา, อพฺโพหารนโย อยํฯ
[1453]
สตฺถเกนุจฺฉุอาทีนิ, ผาเลนฺตานํ สเจ มลํ;
ปญฺญายติ หิ ตํ เตสุ, สิยา นวสมุฏฺฐิตํฯ
[1454]
ปฏิคฺคเหตฺวา ตํ ปจฺฉา, ขาทิตพฺพํ ตุ ภิกฺขุนา;
น ปญฺญายติ เจ ตสฺมิํ, มลํ วฏฺฏติ ขาทิตุํฯ
[1455]
ปิสนฺตานมฺปิ เภสชฺชํ, โกฏฺเฏนฺตานมฺปิ วา ตถา;
นิสโททุกฺขลาทีนํ, ขียเนปิ อยํ นโยฯ
[1456]
เภสชฺชตฺถาย ตาเปตฺวา, วาสิํ ขีเร ขิปนฺติ เจ;
อุฏฺเฐติ นีลิกา ตตฺถ, สตฺถเก วิย นิจฺฉโยฯ
[1457]
สเจ อามกตกฺเก วา, ขีเร วา ปกฺขิปนฺติ ตํ;
สามปากนิมิตฺตมฺหา, น ตุ มุจฺจติ ทุกฺกฏาฯ
[1458]
ปิณฺฑาย วิจรนฺตสฺส, วสฺสกาเลสุ ภิกฺขุโน;
ปตฺเต ปตติ เจ โตยํ, กิลิฏฺฐํ กายวตฺถโตฯ
[1459]
ปจฺฉา ปฏิคฺคเหตฺวา ตํ, ภุญฺชิตพฺพํ ยถาสุขํ;
เอเสว จ นโย วุตฺโต, รุกฺขมูเลปิ ภุญฺชโตฯ
[1460]
สตฺตาหํ ปน วสฺสนฺเต, เทเว สุทฺธํ ชลํ สเจ;
อพฺโภกาเสปิ วา ปตฺเต, โตยํ ปตติ วฏฺฏติฯ
[1461]
โอทนํ ปน เทนฺเตน, สามเณรสฺส ภิกฺขุนา;
ทาตพฺโพ อจฺฉุปนฺเตน, ตสฺส ปตฺตคโตทนํฯ
[1462]
ปฏิคฺคเหตฺวา วา ปตฺตํ, ทาตพฺโพ ตสฺส โอทโน;
ฉุปิตฺวา เทติ เจ ภตฺตํ, ตํ ปนุคฺคหิตํ สิยาฯ
[1463]
อญฺญสฺส ทาตุกาเมน, ปริจฺจตฺตํ สเจ ปน;
ยาว หตฺถคตํ ตาว, ปฏิคฺคหิตเมว ตํฯ
[1464]
‘‘คณฺหา’’ติ นิรเปกฺโขว, ปตฺตมาธารเก ฐิตํ;
สเจ วทติ ปจฺฉา ตํ, ปฏิคฺคณฺเหยฺย ปณฺฑิโตฯ
[1465]
สาเปกฺโขเยว โย ปตฺตํ, ฐเปตฺวาธารเก ปน;
‘‘เอตฺโต ปูวมฺปิ ภตฺตํ วา, กิญฺจิ คณฺหา’’ติ ภาสติฯ
[1466]
สามเณโรปิ ตํ ภตฺตํ, โธวิตฺวา หตฺถมตฺตโน;
อตฺตปตฺตคตํ ภตฺตํ, อผุสิตฺวา สเจ ปนฯ
[1467]
ปกฺขิปนฺโต สตกฺขตฺตุํ, อุทฺธริตฺวาปิ คณฺหตุ;
ตํปฏิคฺคหเณ กิจฺจํ, ปุน ตสฺส น วิชฺชติฯ
[1468]
อตฺตปตฺตคตํ ภตฺตํ, ผุสิตฺวา ยทิ คณฺหติ;
ปจฺฉา ปฏิคฺคเหตพฺพํ, สํสฏฺฐตฺตา ปเรน ตํฯ
[1469]
ภิกฺขูนํ ยาคุอาทีนํ, ปจเน ภาชเน ปน;
ปกฺขิปิตฺวา ฐเปนฺเตน, อญฺญสฺสตฺถาย โอทนํฯ
[1470]
ภาชนุปริ หตฺเถสุ, สามเณรสฺส ปกฺขิเป;
ปติตํ หตฺถโต ตสฺมิํ, น กโรติ อกปฺปิยํฯ
[1471]
ปริจฺจตฺตญฺหิ ตํ เอวํ, อกตฺวากิรเตว เจ;
ภุญฺชิตพฺพํ ตุ ตํ กตฺวา, ปตฺตํ วิย นิรามิสํฯ
[1472]
สเจ ยาคุกุฏํ ปุณฺณํ, สามเณโร หิ ทุพฺพโล;
ภิกฺขุํ ปฏิคฺคหาเปตุํ, น สกฺโกติ หิ ตํ ปุนฯ
[1473]
กุฏสฺส คีวํ ปตฺตสฺส, ฐเปตฺวา มุขวฏฺฏิยํ;
ภิกฺขุนา อุปนีตสฺส, อาวชฺเชติ หิ วฏฺฏติฯ
[1474]
อถ วา ภูมิยํเยว, หตฺเถ ภิกฺขุ ฐเปติ เจ;
อาโรเปติ ปวฏฺเฏตฺวา, ตตฺถ เจ ปน วฏฺฏติฯ
[1475]
ภตฺตปจฺฉุจฺฉุภาเรสุ, อยเมว วินิจฺฉโย;
ทฺเว ตโย สามเณรา วา, เทนฺติ เจ คหณูปคํฯ
[1476]
ภารเมกสฺส ภิกฺขุสฺส, คเหตุํ ปน วฏฺฏติ;
เอเกน วา ตถา ทินฺนํ, คณฺหนฺติ ทฺเว ตโยปิ วาฯ
[1477]
มญฺจสฺส ปาเท ปีฐสฺส, ปาเท เตลฆฏาทิกํ;
ลคฺเคนฺติ ตตฺถ ภิกฺขุสฺส, วฏฺฏเตว นิสีทิตุํฯ
[1478]
อปฺปฏิคฺคหิตํ เหฏฺฐา-มญฺเจ เจ เตลถาลกํ;
สมฺมุชฺชนฺโต จ ฆฏฺเฏติ, น ปนุคฺคหิตํ สิยาฯ
[1479]
ปฏิคฺคหิตสญฺญาย, อปฺปฏิคฺคหิตํ ปน;
คณฺหิตฺวา ปุน ตํ ญตฺวา, ฐเปตุํ ตตฺถ วฏฺฏติฯ
[1480]
วิวริตฺวา สเจ ปุพฺเพ, ฐปิตํ ปิหิตมฺปิ จ;
ตเถว ตํ ฐเปตพฺพํ, กตฺตพฺพํ น ปนญฺญถาฯ
[1481]
พหิ ฐเปติ เจ เตน, ฉุปิตพฺพํ น ตํ ปุน;
ยทิ ฉุปติ เจ ญตฺวา, ตํ ปนุคฺคหิตํ สิยาฯ
[1482]
ปฏิคฺคหิตเตลสฺมิํ, อุฏฺเฐติ ยทิ กณฺณกา;
สิงฺคีเวราทิเก มูเล, ฆนจุณฺณมฺปิ วา ตถาฯ
[1483]
ตํสมุฏฺฐานโต สพฺพํ, ตญฺเญวาติ ปวุจฺจติ;
ปฏิคฺคหณกิจฺจํ ตุ, ตสฺมิํ ปุน น วิชฺชติฯ
[1484]
ตาลํ วา นาฬิเกรํ วา, อารุฬฺโห โกจิ ปุคฺคโล;
ตตฺรฏฺโฐ ตาลปิณฺฑิํ โส, โอตาเรตฺวาน รชฺชุยาฯ
[1485]
สเจ วทติ ‘‘คณฺหา’’ติ, น คเหตพฺพเมว จ;
ตมญฺโญ ปน ภูมฏฺโฐ, คเหตฺวา เทติ วฏฺฏติฯ
[1486]
ฉินฺทิตฺวา เจ วติํ อุจฺฉุํ, ผลํ วา เทติ คณฺหิตุํ;
ทณฺฑเก อผุสิตฺวาว, นิคฺคตํ ปน วฏฺฏติฯ
[1487]
สเจ น ปุถุโล โหติ, ปากาโร อติอุจฺจโก;
อนฺโตฏฺฐิตพหิฏฺฐานํ, หตฺถปาโส ปโหติ เจฯ
[1488]
อุทฺธํ หตฺถสตํ คนฺตฺวา, สมฺปตฺตํ ปุน ตํ ปน;
คณฺหโต ภิกฺขุโน โทโส, โกจิ เนวูปลพฺภติฯ
[1489]
ภิกฺขุโน สามเณรํ ตุ, ขนฺเธน วหโต สเจ;
ผลํ คเหตฺวา ตตฺเถว, นิสินฺโน เทติ วฏฺฏติฯ
[1490]
อปโรปิ วหนฺโตว, ภิกฺขุํ โย โกจิ ปุคฺคโล;
ผลํ ขนฺเธ นิสินฺนสฺส, ภิกฺขุโน เทติ วฏฺฏติฯ
[1491]
คเหตฺวา ผลินิํ สาขํ, ฉายตฺถํ ยทิ คจฺฉติ;
ปุน จิตฺเต สมุปฺปนฺเน, ขาทิตุํ ปน ภิกฺขุโนฯ
[1492]
สาขํ ปฏิคฺคหาเปตฺวา, ผลํ ขาทติ วฏฺฏติ;
มกฺขิกานํ นิวารตฺถํ, คหิตายปฺยยํ นโยฯ
[1493]
กปฺปิยํ ปน กาเรตฺวา, ปฏิคฺคณฺหาติ ตํ ปุน;
โภตฺตุกาโม สเจ มูล-คหณํเยว วฏฺฏติฯ
[1494]
มาตาปิตูนมตฺถาย, คเหตฺวา สปฺปิอาทิกํ;
คจฺฉนฺโต อนฺตรามคฺเค, ยํ อิจฺฉติ ตโต ปนฯ
[1495]
ตํ โส ปฏิคฺคหาเปตฺวา, ปริภุญฺชติ วฏฺฏติ;
ตํ ปฏิคฺคหิตํ มูล-คหณํเยว วฏฺฏติฯ
[1496]
สามเณรสฺส ปาเถยฺย-ตณฺฑุเล ภิกฺขุ คณฺหติ;
ภิกฺขุสฺส สามเณโรปิ, คเหตฺวา ปน คจฺฉติฯ
[1497]
ตณฺฑุเลสุ หิ ขีเณสุ, อตฺตนา คหิเตสุ โส;
สเจ ยาคุํ ปจิตฺวาน, ตณฺฑุเลหิตเรหิปิฯ
[1498]
อุภินฺนํ ทฺวีสุ ปตฺเตสุ, อากิริตฺวา ปนตฺตโน;
ยาคุํ ภิกฺขุสฺส ตํ ทตฺวา, สยํ ปิวติ ตสฺส เจฯ
[1499]
สนฺนิธิปจฺจยา เนว, น อุคฺคหิตการณา;
สามเณรสฺส ปีตตฺตา, โทโส ภิกฺขุสฺส วิชฺชติฯ
[1500]
มาตาปิตูนมตฺถาย, เตลาทิํ หรโตปิ จ;
สาขํ ฉายาทิอตฺถาย, อิมสฺส น วิเสสตาฯ
[1501]
ตสฺมา หิสฺส วิเสสสฺส, จินฺเตตพฺพํ ตุ การณํ;
ตสฺส สาลยภาวํ ตุ, วิเสสํ ตกฺกยามหํฯ
[1502]
ตณฺฑุเล ปน โธวิตฺวา, นิจฺจาเลตุญฺหิ เจลโก;
น สกฺโกติ สเจ เต จ, ตณฺฑุเล ภาชนมฺปิ จฯ
[1503]
ปฏิคฺคเหตฺวา โธวิตฺวา, อาโรเปตฺวา ปนุทฺธนํ;
ภิกฺขุนาคฺคิ น กาตพฺโพ, วิวริตฺวาปิ ปกฺกตาฯ
[1504]
ญาตพฺพา ปกฺกกาลสฺมิํ, โอโรเปตฺวา ยถาสุขํ;
ภุญฺชิตพฺพํ, น ปจฺฉสฺส, ปฏิคฺคหณการณํฯ
[1505]
อาโรเปตฺวา สเจ ภิกฺขุ, อุทฺธนํ สุทฺธภาชนํ;
อุทกํ ยาคุอตฺถาย, ตาเปติ ยทิ วฏฺฏติฯ
[1506]
ตตฺเต ปนุทเก โกจิ, เจ ปกฺขิปติ ตณฺฑุเล;
ตโต ปฏฺฐาย เตนคฺคิ, น กาตพฺโพว ภิกฺขุนาฯ
[1507]
ปฏิคฺคเหตฺวา ตํ ยาคุํ, ปาตุํ วฏฺฏติ ภิกฺขุโน;
สเจ ปจติ ปจฺฉา ตํ, สามปากา น มุจฺจติฯ
[1508]
ตตฺถชาตผลํ กิญฺจิ, สห จาเลติ วลฺลิยา;
ตสฺเสว จ ตโต ลทฺธํ, ผลํ กิญฺจิ น วฏฺฏติฯ
[1509]
ผลรุกฺขํ ปรามฏฺฐุํ, ตมปสฺสยิตุมฺปิ วา;
กณฺฏเก พนฺธิตุํ วาปิ, ภิกฺขุโน กิร วฏฺฏติฯ
[1510]
สณฺฑาเสน จ ทีเฆน, คเหตฺวา ถาลกํ ปน;
ปจโต ภิกฺขุโน เตลํ, ภสฺมํ ปตติ ตตฺถ เจฯ
[1511]
อมุญฺจนฺเตน หตฺเถน, ปจิตฺวา เตลถาลกํ;
โอตาเรตฺวาว ตํ ปจฺฉา, ปฏิคฺคณฺเหยฺย วฏฺฏติฯ
[1512]
ปฏิคฺคเหตฺวา องฺคาเร, ตานิ ทารูนิ วา ปน;
ฐปิตานิ สเจ โหนฺติ, ปุพฺพคาโหว วฏฺฏติฯ
[1513]
อุจฺฉุํ ขาทติ เจ ภิกฺขุ, สามเณโรปิ อิจฺฉติ;
‘‘ฉินฺทิตฺวา ตฺวมิโต คณฺห’’, อิติ วุตฺโต จ คณฺหติฯ
[1514]
นตฺเถว อวเสสสฺส, ปฏิคฺคหณการณํ;
ขาทโต คุฬปิณฺฑมฺปิ, อยเมว วินิจฺฉโยฯ
[1515]
กาตุํ สาครโตเยน, โลณกิจฺจํ ตุ วฏฺฏติ;
ยาวชีวิกสงฺขาตํ, โตยตฺตา น ตุ คจฺฉติฯ
[1516]
อิทํ กาลวินิมฺมุตฺตํ, อุทกํ ปริทีปิตํ;
นิพฺพานํ วิย นิพฺพาน-กุสเลน มเหสินาฯ
[1517]
อุทเกน สมา วุตฺตา, หิมสฺส กรกาปิ จ;
กูปาทีสุ ชลํ ปาตุํ, พหลมฺปิ จ วฏฺฏติฯ
[1518]
เขตฺเตสุ กสิตฏฺฐาเน, พหลํ ตํ น วฏฺฏติ;
สนฺทิตฺวา ยทิ ตํ คนฺตฺวา, นทิํ ปูเรติ วฏฺฏติฯ
[1519]
โสพฺเภสุ กกุธาทีนํ, ชเล ปุปฺผสมากุเล;
น ญายติ รโส เตสํ, น ปฏิคฺคหณการณํฯ
[1520]
สเรณุกานิ ปุปฺผานิ, ปานียสฺส ฆเฏ ปน;
ปกฺขิตฺตานิ สเจ โหนฺติ, ปฏิคฺคณฺเหยฺย ตํ ปนฯ
[1521]
ปฏิคฺคเหตฺวา เทยฺยานิ, วาสปุปฺผานิ ตตฺถ วา;
กมลฺลิกาสุ ทินฺนาสุ, อพฺโพหาโรติ วฏฺฏติฯ
[1522]
อปฺปฏิคฺคหิตสฺเสว , ทนฺตกฏฺฐสฺส โย รโส;
อชานนฺตสฺส ปาจิตฺติ, โส เจ วิสติ ขาทโตฯ
[1523]
สรีรฏฺเฐสุ ภูเตสุ, กิํ วฏฺฏติ? น วฏฺฏติ?
กปฺปากปฺปิยมํสานํ, ขีรํ สพฺพมฺปิ วฏฺฏติฯ
[1524]
กณฺณกฺขิคูถโก ทนฺต- มลํ มุตฺตํ กรีสกํ;
เสมฺหํ สิงฺฆาณิกา เขโฬ, อสฺสุ โลณนฺติ วฏฺฏติฯ
[1525]
ยํ ปเนตฺถ สกฏฺฐานา, จวิตฺวา ปติตํ สิยา;
ปตฺเต วา ปน หตฺเถ วา, ปฏิคฺคณฺเหยฺย ตํ ปุนฯ
[1526]
องฺคลคฺคมวิจฺฉนฺนํ, ปฏิคฺคหิตเมว ตํ;
อุณฺหยาคุํ ปิวนฺตสฺส, เสโท หตฺเถสุ ชายติฯ
[1527]
ปิณฺฑาย วิจรนฺตสฺส, เสโท หตฺถานุสารโต;
โอโรหติ สเจ ปตฺตํ, น ปฏิคฺคหณการณํฯ
[1528]
สามํ คเหตฺวา จตฺตาริ, วิกฏานิ นทายเก;
สปฺปทฏฺฐกฺขเณเยว, น โทโส ปริภุญฺชโตฯ
[1529]
ปถวิํ มตฺติกตฺถาย, ขณิตุํ ฉินฺทิตุมฺปิ วา;
ตรุมฺปิ ฉาริกตฺถาย, ภิกฺขุโน ปน วฏฺฏติฯ
[1530]
อจฺเฉทคาหนิรเปกฺขนิสชฺชโต จ;
สิกฺขปฺปหานมรเณหิ จ ลิงฺคเภทา;
ทาเนน ตสฺส จ ปรสฺส อภิกฺขุกสฺส;
สพฺพํ ปฏิคฺคหณเมติ วินาสเมวํฯ
[1531]
ทุรูปจิณฺเณ นิทฺทิฏฺฐํ, คหณุคฺคหิตสฺสปิ;
อนฺโตวุตฺเถ สยํปกฺเก, อนฺโตปกฺเก จ ทุกฺกฏํฯ
[1532]
ปฏิคฺคหิตเก ตสฺมิํ, อปฺปฏิคฺคหิตสญฺญิโน;
ตตฺถ เวมติกสฺสาปิ, โหติ อาปตฺติ ทุกฺกฏํฯ
[1533]
ปฏิคฺคหิตสญฺญิสฺส , ทนฺตโปโนทเกสุปิ;
น โทเสฬกโลเมน, สมุฏฺฐานาทโย สมาฯ
[1534]
นวมชฺฌิมเถรภิกฺขุนีนํ;
อวิเสเสน ยติจฺฉิตพฺพโก;
สกโล อสมาสโตว มยา;
กถิโต เอตฺถ วินิจฺฉโย ตโตฯ
ทนฺตโปนกถาฯ
โภชนวคฺโค จตุตฺโถฯ
[1535]
ยํ กิญฺจิเจลกาทีนํ, ติตฺถิยานํ ปนามิสํ;
เทนฺตสฺเสกปโยเคน, เอกํ ปาจิตฺติยํ สิยาฯ
[1536]
วิจฺฉินฺทิตฺวาน เทนฺตสฺส, ปโยคคณนาวสา;
โหนฺติ ปาจิตฺติโย ตสฺส, ติกปาจิตฺติยํ สิยาฯ
[1537]
อุทกํ ทนฺตโปนํ วา, เทนฺตสฺส จ อติตฺถิเย;
ติตฺถิโยติ จ สญฺญิสฺส, ทุกฺกฏํ วิมติสฺส จฯ
[1538]
ทาเปนฺตสฺส ปนญฺเญน, สามเณราทิเกน วา;
นิกฺขิตฺตภาชเน เตสํ, เทนฺตสฺส พหิเลปนํฯ
[1539]
ฐเปตฺวา โภชนํ เตสํ, สนฺติเก ‘‘คณฺหถา’’ติ จ;
วทนฺตสฺส อนาปตฺติ, สมุฏฺฐาเนฬกูปมํฯ
อเจลกกถาฯ
[1540]
ทาเปตฺวา วา อทาเปตฺวา, ภิกฺขุ ยํ กิญฺจิ อามิสํ;
กตฺตุกาโม สเจ สทฺธิํ, หสนาทีนิ อิตฺถิยาฯ
[1541]
อุยฺโยเชติ หิ ‘‘คจฺฉา’’ติ, วตฺวา ตปฺปจฺจยา ปน;
ตสฺสุยฺโยชนมตฺตสฺมิํ, ทุกฺกฏํ ปฐเมน จฯ
[1542]
ปาเทนสฺสุปจารสฺมิํ, อติกฺกนฺเต จ ทุกฺกฏํ;
ทุติเยนสฺส ปาจิตฺติ, สีมาติกฺกมเน ปนฯ
[1543]
ทสฺสเน อุปจารสฺส, หตฺถา ทฺวาทส เทสิตา;
ปมาณํ สวเน เจวํ, อชฺโฌกาเส น เจตเรฯ
[1544]
ภิกฺขุสฺมิํ ติกปาจิตฺติ, อิตเร ติกทุกฺกฏํ;
อุภินฺนํ ทุกฺกฏํ วุตฺตํ, กลิสาสนโรปเนฯ
[1545]
อุยฺโยเชนฺตสฺส กิจฺเจน, น โทสุมฺมตฺตกาทิโน;
อทินฺนาทานตุลฺยาว, สมุฏฺฐานาทโย นยาฯ
อุยฺโยชนกถาฯ
[1546]
ขุทฺทเก ปิฏฺฐิวํสํ โย, อติกฺกมฺม นิสีทติ;
สโภชเน กุเล ตสฺส, โหติ ปาจิตฺติ ภิกฺขุโนฯ
[1547]
หตฺถปาสํ อติกฺกมฺม, ปิฏฺฐิสงฺฆาฏกสฺส จ;
สยนสฺส ปนาสนฺเน, ฐาเน โทโส มหลฺลเกฯ
[1548]
อสยนิฆเร ตสฺส, สยนิฆรสญฺญิโน;
ตตฺถ เวมติกสฺสาปิ, ทุกฺกฏํ ปริทีปิตํฯ
[1549]
นิสีทนฺตสฺสนาปตฺติ, ภิกฺขุสฺส ทุติเย สติ;
วีตราเคสุ วา เตสุ, นิกฺขนฺเตสุ อุโภสุ วาฯ
[1550]
นิสินฺนสฺสานติกฺกมฺม, ปเทสํ วุตฺตลกฺขณํ;
สมุฏฺฐานาทโย ตุลฺยา, ปฐมนฺติมวตฺถุนาฯ
สโภชนกถาฯ
[1551]
จตุตฺเถ ปญฺจเม เจว, วตฺตพฺพํ นตฺถิ กิญฺจิปิ;
วตฺตพฺพํ ยญฺจ ตํ สพฺพํ, วุตฺตํ อนิยตทฺวเยฯ
[1552]
สมุฏฺฐานํ ปเนเตสํ, อนนฺตรสมํ มตํ;
อยเมว วิเสโสติ, เตสเมสญฺจ ทีปิโตฯ
รโหปฏิจฺฉนฺนรโหนิสชฺชกถาฯ
[1553]
โภชนานํ ตุ ปญฺจนฺนํ, วุตฺโต อญฺญตเรน โย;
สนฺตํ ภิกฺขุมนาปุจฺฉา, อาปชฺเชยฺย กุเลสุ เจฯ
[1554]
จาริตฺตํ ตสฺส ปาจิตฺติ, อญฺญตฺร สมยา สิยา;
ฐเปตฺวา สมยํ ภิกฺขุ, ทุวิธํ วุตฺตลกฺขณํฯ
[1555]
อวีติวตฺเต มชฺฌณฺเห, ฆรมญฺญสฺส คจฺฉติ;
ฆรูปจาโรกฺกมเน, ปฐเมน หิ ทุกฺกฏํฯ
[1556]
อติกฺกนฺเต ฆรุมฺมาเร, อปรมฺปิ จ ทุกฺกฏํ;
ทุติเยน จ ปาเทน, ปาจิตฺติ สมติกฺกเมฯ
[1557]
ฐิตฏฺฐาเน สเจ ภิกฺขุํ, โอโลเกตฺวา น ปสฺสติ;
‘‘อสนฺต’’นฺติ อนาปุจฺฉา, ปวิฏฺโฐ นาม วุจฺจติฯ
[1558]
สเจ ทูเร ฐิโต โหติ, อสนฺโต นาม ภิกฺขุ โส;
นตฺถิ อาโรจเน กิจฺจํ, คเวสิตฺวา อิโต จิโตฯ
[1559]
น โทโส สมเย สนฺตํ, อาปุจฺฉิตฺวา จ คจฺฉโต;
ภิกฺขุํ ฆเรน มคฺโค เจ, อารามํ คจฺฉโตปิ จฯ
[1560]
ติตฺถิยานมฺปิ เสยฺยํ วา, ตถา ภิกฺขุนุปสฺสยํ;
อาปทาสนสาลํ วา, ภตฺติยสฺส ฆรมฺปิ วาฯ
[1561]
อิทํ ปน สมุฏฺฐานํ, กถิเนน สมํ มตํ;
กฺริยากฺริยมจิตฺตญฺจ, ติจิตฺตญฺจ ติเวทนํฯ
จาริตฺตกถาฯ
[1562]
สพฺพาปิ สาทิตพฺพาว, จตุมาสปวารณา;
ภิกฺขุนา อคิลาเนน, ปุน นิจฺจปวารณาฯ
[1563]
‘‘วิญฺญาเปสฺสามิ โรคสฺมิํ, สติ เม ปจฺจเย’’ติ จ;
น ปฏิกฺขิปิตพฺพา สา, ‘‘โรโค ทานิ น เม’’ติ จฯ
[1564]
ติกปาจิตฺติยํ วุตฺตํ, ทุกฺกฏํ นตตุตฺตริํ;
ตตุตฺตรินฺติ สญฺญิสฺส, ตตฺถ เวมติกสฺส จฯ
[1565]
นตตุตฺตริสญฺญิสฺส, เยหิ เยน ปวาริโต;
ตโต อญฺเญหิ วา ภิยฺโย, อาจิกฺขิตฺวา ยถาตถํฯ
[1566]
วิญฺญาเปนฺตสฺส ภิกฺขุสฺส, อญฺญสฺสตฺถาย วา ปน;
ญาตกานมนาปตฺติ, อตฺตโน วา ธเนนปิฯ
[1567]
ตถา อุมฺมตฺตกาทีนํ, อนาปตฺติ ปกาสิตา;
สมุฏฺฐานาทโย สพฺเพ, สญฺจริตฺตสมา มตาฯ
เภสชฺชกถาฯ
[1568]
อุยฺยุตฺตํ ภิกฺขุโน เสนํ, ทสฺสนตฺถาย คจฺฉโต;
อญฺญตฺร ปจฺจยา ตสฺส, ทุกฺกฏํ ตุ ปเท ปเทฯ
[1569]
ทสฺสนสฺสุปจารสฺมิํ, ฐตฺวา ปาจิตฺติ ปสฺสโต;
อุปจารํ วิมุญฺจิตฺวา, ปสฺสนฺตสฺส ปโยคโตฯ
[1570]
อาโรหา ปน จตฺตาโร, ทฺเว ทฺเว ตํปาทรกฺขกา;
เอวํ ทฺวาทสโปโส จ, เอโก หตฺถีติ วุจฺจติฯ
[1571]
ทฺเวปาทรกฺขา อาโรโห, เอโก ติปุริโสหโย;
เอโก สารถิ โยเธโก, อาณิรกฺขา ทุเว ชนาฯ
[1572]
จตุโปโส รโถ วุตฺโต, จตุสจฺจวิภาวินา;
จตฺตาโร ปทหตฺถา จ, ปุริสา ปตฺตีติ วุจฺจติฯ
[1573]
วุตฺตลกฺขณสมฺปนฺนา , อยํ ปจฺฉิมโกฏิยา;
จตุรงฺคสมายุตฺตา, เสนา นาม ปวุจฺจติฯ
[1574]
หตฺถิอาทีสุ เอเกกํ, ทสฺสนตฺถาย คจฺฉโต;
อนุยฺยุตฺเตปิ อุยฺยุตฺต-สญฺญิสฺสาปิ จ ทุกฺกฏํฯ
[1575]
อตฺตโน จ ฐิโตกาสํ, สมฺปตฺตํ ปน ปสฺสติ;
อาปทาสุ อนาปตฺติ, ตถารูเป จ ปจฺจเยฯ
อุยฺยุตฺตกถาฯ
[1576]
จตุตฺเถ ทิวเส อตฺถ-งฺคเต สูริเย อโรควา;
สเจ ติฏฺฐตุ เสนาย, นิสีทตุ นิปชฺชตุฯ
[1577]
อากาเส อิทฺธิยา เสยฺยํ, ปกปฺเปตุ จ อิทฺธิมา;
โหเตว ตสฺส ปาจิตฺติ, ติกปาจิตฺติยํ สิยาฯ
[1578]
อูนเก จ ติรตฺตสฺมิํ, อติเรโกติ สญฺญิโน;
ตตฺถ เวมติกสฺสาปิ, โหติ อาปตฺติ ทุกฺกฏํฯ
[1579]
ปุรารุณาว นิกฺขมฺม, ตติยาย จ รตฺติยา;
น โทโส ปุน วสนฺตสฺส, คิลานสฺสาปทาสุปิฯ
เสนาวาสกถาฯ
[1580]
อุยฺโยธิกํ พลคฺคํ วา, เสนาพฺยูหมฺปิ วา ปน;
ทสฺสนตฺถายนีกํ วา, โหติ ปาจิตฺติ คจฺฉโตฯ
[1581]
ปุริเม ปน โย วุตฺโต, ‘‘หตฺถี ทฺวาทสโปริโส’’;
อิติ เตน ตโย หตฺถี, ‘‘หตฺถานีก’’นฺติ ทีปิตํฯ
[1582]
เสเสสุปิ จ เอเสว, นโย เญยฺโย วิภาวินา;
ติณฺณเมฬกโลเมน, สมุฏฺฐานาทโย สมาฯ
อุยฺโยธิกกถาฯ
อเจฬกวคฺโค ปญฺจโมฯ
[1583]
ปิฏฺฐาทีหิ กตํ มชฺชํ, สุรา นามาติ วุจฺจติ;
ปุปฺผาทีหิ กโต สพฺโพ, อาสโว โหติ เมรยํฯ
[1584]
พีชโต ปน ปฏฺฐาย, ปิวนฺตสฺสุภยมฺปิ จ;
ปโยเค จ ปโยเค จ, โหติ ปาจิตฺติ ภิกฺขุโนฯ
[1585]
ติกปาจิตฺติยํ วุตฺตํ, อมชฺเช มชฺชสญฺญิโน;
ตตฺถ เวมติกสฺสาปิ, โหติ อาปตฺติ ทุกฺกฏํฯ
[1586]
อมชฺชํ มชฺชวณฺณญฺจ, มชฺชคนฺธรสมฺปิ จ;
อริฏฺฐํ โลณโสวีรํ, สุตฺตกํ ปิวโตปิ จฯ
[1587]
วาสคาหาปนตฺถาย, ปกฺขิปิตฺวาน อีสกํ;
สูปาทีนํ ตุ ปาเกปิ, อนาปตฺติ ปกาสิตาฯ
[1588]
โหเตฬกสมุฏฺฐานํ, อจิตฺตํ วตฺถุชานนา;
อิทญฺจากุสเลเนว, ปานโต โลกวชฺชกํฯ
สุราปานกถาฯ
[1589]
เยน เกนจิ องฺเคน, หสาธิปฺปายิโน ปน;
ผุสโต อุปสมฺปนฺนํ, โหติ ปาจิตฺติ ภิกฺขุโนฯ
[1590]
สพฺพตฺถ ทุกฺกฏํ กาย-ปฏิพทฺธาทิเก นเย;
ตเถวานุปสมฺปนฺเน, ทีปิตํ ติกทุกฺกฏํฯ
[1591]
เอตฺถ จานุปสมฺปนฺน-ฏฺฐาเน ติฏฺฐติ ภิกฺขุนี;
ขิฑฺฑาธิปฺปายิโน ตมฺปิ, ผุสนฺตสฺส จ ทุกฺกฏํฯ
[1592]
อนาปตฺติ นหสาธิ-ปฺปายสฺส ผุสโต ปรํ;
สติ กิจฺเจ ผุสนฺตสฺส, ตถา อุมฺมตฺตกาทิโนฯ
องฺคุลิปโตทกกถาฯ
[1593]
ชเล นิมุชฺชนาทีน-มตฺถาย ปน เกวลํ;
ปทวาเรสุ สพฺเพสุ, โอตรนฺตสฺส ทุกฺกฏํฯ
[1594]
กีฬาเปกฺโข สเจ หุตฺวา, ชเล อุปริโคปฺผเก;
นิมุชฺเชยฺยปิ วา ภิกฺขุ, อุมฺมุชฺเชยฺย ตเรยฺย วาฯ
[1595]
ปโยเค จ ปโยเค จ, ตสฺส ปาจิตฺติยํ สิยา;
อนฺโตเยโวทเก ตสฺส, นิมุชฺชิตฺวาน คจฺฉโตฯ
[1596]
หตฺถปาทปโยเคหิ, ปาจิตฺติํ ปริทีปเย;
หตฺเถเหว ตรนฺตสฺส, หตฺถวาเรหิ การเยฯ
[1597]
เยน เยน ปนงฺเคน, ภิกฺขุโน ตรโต ชลํ;
ตสฺส ตสฺส ปโยเคน, ปาจิตฺติํ ปริทีปเยฯ
[1598]
ตรุโต ตีรโต วาปิ, ปาจิตฺติ ปตโต ชเล;
ติกปาจิตฺติยํ วุตฺตํ, ตเถว ติกทุกฺกฏํฯ
[1599]
ปาเชนฺโตปิ สเจ นาวํ, อริตฺเตน ผิเยน วา;
อุสฺสาเรนฺโตปิ ตีเร วา, นาวํ กีฬติ ทุกฺกฏํฯ
[1600]
หตฺเถน วาปิ ปาเทน, กฏฺเฐน กถลาย วา;
อุทกํ นีหรนฺตสฺส, โหติ อาปตฺติ ทุกฺกฏํฯ
[1601]
อุทกํ กญฺชิกํ วาปิ, จิกฺขลฺลํ วาปิ วิกฺขิปํ;
กีฬนฺตสฺสาปิ ภิกฺขุสฺส, โหติ อาปตฺติ ทุกฺกฏํฯ
[1602]
วิคาหิตฺวา ชลํ กิจฺเจ, สติ นิมฺมุชฺชนาทิกํ;
กโรนฺตสฺส อนาปตฺติ, ตถา ปารญฺจ คจฺฉโตฯ
[1603]
สมุฏฺฐานาทโย ตุลฺยา, ปฐมนฺติมวตฺถุนา;
อนนฺตรสฺสิมสฺสาปิ, นตฺถิ กาจิ วิเสสตาฯ
หสธมฺมกถาฯ
[1604]
วุจฺจมาโน สเจ ภิกฺขุ, ปญฺญตฺเตเนว ภิกฺขุนา;
อกตฺตุกามตายสฺส, วจนํ ธมฺมเมว วาฯ
[1605]
โย อสิกฺขิตุกาโมว, น กโรติ ปนาทรํ;
ตสฺสานาทริเย ตสฺมิํ, ปาจิตฺติยมุทีรเยฯ
[1606]
ติกปาจิตฺติยํ วุตฺตํ, ติกาตีเตน สตฺถุนา;
ตเถวานุปสมฺปนฺนา-นาทเร ติกทุกฺกฏํฯ
[1607]
สุตฺเตเนวาภิธมฺเมน, อปญฺญตฺเตน ภิกฺขุนา;
ทุกฺกฏํ สามเณเรน, วุตฺตสฺส อุภเยนปิฯ
[1608]
‘‘อาจริยานมยํ คาโห, อมฺหากํ ตุ ปเวณิยา;
อาคโต’’ติ ภณนฺตสฺส, น โทสุมฺมตฺตกาทิโนฯ
[1609]
เอตฺถ เนว คเหตพฺโพ, คารยฺหาจริยุคฺคโห;
โอมสวาทตุลฺยาว, สมุฏฺฐานาทโย นยาฯ
อนาทริยกถาฯ
[1610]
ภยสญฺชนนตฺถาย, รูปาทิํ อุปสํหเร;
ภยานกํ กถํ วาปิ, กเถยฺย ปรสนฺติเกฯ
[1611]
ทิสฺวา วา ปน ตํ สุตฺวา, มา วา ภายตุ, ภายตุ;
อิตรสฺส ตุ ภิกฺขุสฺส, โหติ ปาจิตฺติ ตงฺขเณฯ
[1612]
ติกปาจิตฺติยํ วุตฺตํ, ตเถว ติกทุกฺกฏํ;
สามเณรํ คหฏฺฐํ วา, ภิํสาเปนฺตสฺส ภิกฺขุโนฯ
[1613]
นภิํสาเปตุกามสฺส, อนาปตฺตาทิกมฺมิโน;
สมุฏฺฐานาทิ สพฺพมฺปิ, อนนฺตรสมํ มตํฯ
ภิํสาปนกถาฯ
[1614]
โชติํ ตปฺเปตุกาโม เจ, ชลาเปยฺย ชเลยฺย วา;
ฐเปตฺวา โหติ ปาจิตฺติ, ตถารูปํ ตุ ปจฺจยํฯ
[1615]
สยํ สมาทหนฺตสฺส, ยาว ชาลา น ชายติ;
ตาว สพฺพปโยเคสุ, โหติ อาปตฺติ ทุกฺกฏํฯ
[1616]
ชาลุฏฺฐาเน ปนาปตฺติ, ปาจิตฺติ ปริทีปิตา;
ชาลาเปนฺตสฺส อญฺเญน, โหติ อาปตฺติ ทุกฺกฏํฯ
[1617]
คิลานสฺส คิลาโนติ, สญฺญิสฺส วิมติสฺส วา;
อลาตํ อุกฺขิปนฺตสฺส, อวิชฺฌาตํ ตุ ทุกฺกฏํฯ
[1618]
วิชฺฌาตํ ตุชฺชลนฺตสฺส, ยถาวตฺถุกตา มตา;
อนาปตฺติ คิลานสฺส, กตํ อญฺเญน วา ปนฯ
[1619]
วิสิพฺเพนฺตสฺส องฺคารํ, ปทีปุชฺชาลนาทิเก;
สมุฏฺฐานาทโย สพฺเพ, สญฺจริตฺตสมา มตาฯ
โชติสมาทหนกถาฯ
[1620]
อปุณฺเณ อทฺธมาสสฺมิํ, เทเส เจ มชฺฌิเม ปน;
‘‘นฺหายิสฺสามี’’ติ จุณฺณํ วา, มตฺติกํ วาปิ โคมยํฯ
[1621]
อภิสงฺขรโต สพฺพ-ปโยเคสุปิ ทุกฺกฏํ;
นฺหานสฺส ปริโยสาเน, โหติ ปาจิตฺติ ภิกฺขุโนฯ
[1622]
อติเรกทฺธมาสูน-สญฺญิโน วิมติสฺส วา;
ทุกฺกฏํ อติเรกทฺธ- มาเส จ สมเยสุ จฯ
[1623]
นฺหายนฺตสฺส อนาปตฺติ, นทีปารมฺปิ คจฺฉโต;
วาลิกํ อุกฺกิริตฺวาน, กตาวาเฏสุ วา ตถาฯ
[1624]
ปจฺจนฺติเมปิ วา เทเส, สพฺเพสํ อาปทาสุปิ;
อิทเมฬกโลเมน, สมุฏฺฐานาทินา สมํฯ
นฺหานกถาฯ
[1625]
จีวรํ ยํ นิวาเสตุํ, สกฺกา ปารุปิตุมฺปิ วา;
ฉนฺนมญฺญตรํ ภิกฺขุ, รชิตฺวา ยตฺถ กตฺถจิฯ
[1626]
ปเทเส กํสนีเลน, ปตฺตนีเลน วา ปน;
เยน เกนจิ กาเฬน, กทฺทเมนปิ วา ตถาฯ
[1627]
มงฺคุลสฺส มยูรสฺส, ปิฏฺฐิอกฺขิปฺปมาณกํ;
อกตฺวา กปฺปิยํ พินฺทุํ, ปาจิตฺติ ปริภุญฺชโตฯ
[1628]
ปาฬิกณฺณิกกปฺโป วา, น จ วฏฺฏติ กตฺถจิ;
เอกํ วาปิ อเนกํ วา, พินฺทุ วฏฺฏติ วฏฺฏกํฯ
[1629]
อาทินฺเนปิ อนาทินฺน-สญฺญิโน วิมติสฺส จ;
ทุกฺกฏํ มุนินา วุตฺตํ, อนาปตฺติ ปกาสิตาฯ
[1630]
กปฺเป นฏฺเฐปิ วา สทฺธิํ, เตน สํสิพฺพิเตสุ วา;
กฺริยากฺริยมิทํ วุตฺตํ, สมุฏฺฐาเนฬกูปมํฯ
ทุพฺพณฺณกรณกถาฯ
[1631]
วิกปฺปนา ทุเว วุตฺตา, สมฺมุขาสมฺมุขาติปิ;
สมฺมุขาย วิกปฺเปนฺโต, ภิกฺขุสฺเสกสฺส สนฺติเกฯ
[1632]
เอกตฺตํ พหุภาวํ วา, ทูรสนฺติกตมฺปิ วา;
จีวรานํ ตุ ชานิตฺวา, ยถาวจนโยคโตฯ
[1633]
‘‘อิมาหํ จีวรํ ตุยฺหํ, วิกปฺเปมี’’ติ นิทฺทิเส;
กปฺปเตตฺตาวตา กามํ, นิเธตุํ, น จ กปฺปติฯ
[1634]
ปริโภคาทิกํ เตน, อปจฺจุทฺธฏโต ปน;
เตน ปจฺจุทฺธเฏเยว, ปริโภคาทิ วฏฺฏติฯ
[1635]
‘‘สนฺตกํ ปน มยฺหํ ตฺวํ, ปริภุญฺช ปริจฺจช;
ยถาปจฺจยํ กโรหี’’ติ, วุตฺเต ปจฺจุทฺธฏํ สิยาฯ
[1636]
อปรา สมฺมุขา วุตฺตา, ภิกฺขุสฺเสกสฺส สนฺติเก;
ยสฺส กสฺสจิ นามํ ตุ, คเหตฺวา สหธมฺมินํฯ
[1637]
‘‘อิมาหํ จีวรํ ติสฺส- ภิกฺขุโน, ติสฺสเถริยา;
วิกปฺเปมี’’ติ วตฺตพฺพํ, วตฺตพฺพํ ปุน เตนปิฯ
[1638]
‘‘ติสฺสสฺส ภิกฺขุโน วา ตฺวํ, ตสฺสา ติสฺสาย เถริยา;
สนฺตกํ ปริภุญฺชาหิ, วิสฺสชฺเชหี’’ติ วา ตถาฯ
[1639]
ตโต ปภุติ สพฺพมฺปิ, ปริโภคาทิ วฏฺฏติ;
เอวํ ปรมฺมุขายาปิ, วตฺตพฺพํ เอกสนฺติเกฯ
[1640]
‘‘อิมาหํ จีวรํ ตุยฺหํ, วิกปฺปตฺถาย ทมฺมิ’’ติ;
ปุน เตนปิ วตฺตพฺพํ, ‘‘โก เต มิตฺโต’’ติ ภิกฺขุนาฯ
[1641]
อิตเรนปิ วตฺตพฺพํ, ‘‘ติสฺโส ติสฺสา’’ติ วา ปุน;
วตฺตพฺพํ ภิกฺขุนา เตน, ‘‘อิทํ ติสฺสสฺส สนฺตกํฯ
[1642]
ติสฺสาย เถริยา วา ตฺวํ, สนฺตกํ ปริภุญฺช วา;
วิสฺสชฺเชหี’’ติ วา วุตฺเต, โหติ ปจฺจุทฺธฏํ ปุนฯ
[1643]
อิจฺเจตาสุ ปน ทฺวีสุ, ยาย กายจิ จีวรํ;
วิกปฺเปตฺวา สธมฺเมสุ, ยสฺส กสฺสจิ ปญฺจสุฯ
[1644]
อปจฺจุทฺธารกํ วาปิ, อวิสฺสาเสน ตสฺส วา;
เยน ตํ วินยํ กมฺมํ, กตํ ปนิธ ภิกฺขุนาฯ
[1645]
จีวรํ ปริภุญฺเชยฺย, โหติ ปาจิตฺติ ภิกฺขุโน;
ตญฺเจวาธิฏฺฐหนฺตสฺส, วิสฺสชฺชนฺตสฺส ทุกฺกฏํฯ
[1646]
ปจฺจุทฺธารกวตฺเถสุ , อปจฺจุทฺธารสญฺญิโน;
ตตฺถ เวมติกสฺสาปิ, โหติ อาปตฺติ ทุกฺกฏํฯ
[1647]
ปจฺจุทฺธารณสญฺญิสฺส, วิสฺสาสา ปริภุญฺชโต;
อนาปตฺติ สมุฏฺฐานํ, กถิเนนาทินา สมํฯ
วิกปฺปนกถาฯ
[1648]
อธิฏฺฐานุปคํ ปตฺตํ, จีวรํ วาปิ ตาทิสํ;
ตถา สูจิฆรํ กาย-พนฺธนํ วา นิสีทนํฯ
[1649]
อปเนตฺวา นิเธนฺตสฺส, หสาเปกฺขสฺส เกวลํ;
โหติ ปาจิตฺติยํ อญฺญํ, อาณาเปนฺตสฺส ทุกฺกฏํฯ
[1650]
เตนาปนิหิเต ตสฺส, ปาจิตฺติํ ปริทีปเย;
วุตฺตํ อนุปสมฺปนฺน-สนฺตเก ติกทุกฺกฏํฯ
[1651]
วินา วุตฺตปฺปการานิ, ปตฺตาทีนิ ตโต ปน;
อญฺญํ อปนิเธนฺตสฺส, โหติ อาปตฺติ ทุกฺกฏํฯ
[1652]
สพฺเพสฺวนุปสมฺปนฺน-สนฺตเกสุปิ ทุกฺกฏํ;
ทุนฺนิกฺขิตฺตมนาปตฺติ, ปฏิสามยโต ปนฯ
[1653]
ตถา ‘‘ธมฺมกถํ กตฺวา, ทสฺสามี’’ติ นิเธติ เจ;
อวิเหเสตุกามสฺส, อกีฬสฺสาทิกมฺมิโนฯ
[1654]
สมุฏฺฐานาทโย ตุลฺยา, ทุติยนฺติมวตฺถุนา;
อิทํ อกุสเลเนว, สจิตฺตญฺจ ติเวทนํฯ
จีวราปนิธานกถาฯ
สุราปานวคฺโค ฉฏฺโฐฯ
[1655]
ติรจฺฉานคตํ ปาณํ, มหนฺตํ ขุทฺทกมฺปิ วา;
โหติ ปาจิตฺติยาปตฺติ, มาเรนฺตสฺสสฺส ภิกฺขุโนฯ
[1656]
อปฺปาเณ ปาณสญฺญิสฺส, วิมติสฺสุภยตฺถ จ;
ทุกฺกฏํ ตุ อนาปตฺติ, อสญฺจิจฺจ อชานโตฯ
[1657]
น จ มาเรตุกามสฺส, ตถา อุมฺมตฺตกาทิโน;
สมุฏฺฐานาทโย ตุลฺยา, ตติยนฺติมวตฺถุนาฯ
สญฺจิจฺจปาณกถาฯ
[1658]
สปฺปาณกํ ชลํ ชานํ, ปาจิตฺติ ปริภุญฺชโต;
ปโยคพหุตายสฺส, ปาจิตฺติพหุตา สิยาฯ
[1659]
เอเกเนว ปโยเคน, อวิจฺฉิชฺช สเจ ปน;
ปิวโต ปตฺตปูรมฺปิ, เอกํ ปาจิตฺติยํ สิยาฯ
[1660]
ตาทิเสนุทเกนสฺส, อาวิญฺฉิตฺวาน สามิสํ;
โธวโต ปน ปตฺตํ วา, นิพฺพาเปนฺตสฺส ยาคุโยฯ
[1661]
หตฺเถน ตํ อุฬุงฺเกน, คเหตฺวา นฺหายโตปิ วา;
ปโยเค จ ปโยเค จ, ปาจิตฺติ ปริทีปิตาฯ
[1662]
อปฺปาณเกปิ สปฺปาณ-สญฺญิสฺส อุภยตฺถปิ;
วิมติสฺสาปิ ภิกฺขุสฺส, โหติ อาปตฺติ ทุกฺกฏํฯ
[1663]
สปฺปาเณปิ จ อปฺปาเณ, อปฺปาณมิติ สญฺญิโน;
น โทโส ‘‘ปริโภเคน, น มรนฺตี’’ติ ชานโตฯ
[1664]
ปตนํ สลภาทีนํ, ญตฺวา สุทฺเธน เจตสา;
ปทีปุชฺชลนญฺเจตฺถ, ญตฺวา สปฺปาณภาวตํฯ
[1665]
ภุญฺชโต ชลสญฺญาย, เญยฺยา ปณฺณตฺติวชฺชตา;
สิญฺจเน สิญฺจนํ วุตฺตํ, ปริโภเค อิทํ ปนฯ
[1666]
อยเมว วิเสโสติ, ตสฺส เจว ปนสฺส จ;
อทินฺนาทานตุลฺยาว, สมุฏฺฐานาทโย นยาฯ
สปฺปาณกกถาฯ
[1667]
นิหตํ ตุ ยถาธมฺมํ, กิจฺจาธิกรณํ ปุน;
นิหาตพฺพนฺติ ปาจิตฺติ, อุกฺโกเฏนฺตสฺส ภิกฺขุโนฯ
[1668]
‘‘อกตํ ทุกฺกตํ กมฺมํ, กาตพฺพํ ปุนเทวิ’’ติ;
วทตา ปน ตํ กมฺมํ, อุจฺจาเลตุํ น วฏฺฏติฯ
[1669]
สเจ วิปฺปกเต กมฺเม, ปฏิกฺโกสติ ตํ ปุน;
สญฺญาเปตฺวาว กาตพฺพํ, น กาตพฺพํ ปนญฺญถาฯ
[1670]
อธมฺเม ปน กมฺมสฺมิํ, ธมฺมกมฺมนฺติ สญฺญิโน;
วิมติสฺสุภยตฺถาปิ, โหติ อาปตฺติ ทุกฺกฏํฯ
[1671]
‘‘อธมฺเมน จ วคฺเคน, น จ กมฺมารหสฺส วา;
กต’’นฺติ ชานโต นตฺถิ, โทโส อุกฺโกฏเน ปนฯ
[1672]
ตถา อุมฺมตฺตกาทีน-มนาปตฺติ ปกาสิตา;
โอมสวาทตุลฺยาว, สมุฏฺฐานาทโย นยาฯ
อุกฺโกฏนกถาฯ
[1673]
สงฺฆาทิเสสํ ทุฏฺฐุลฺลํ, อาปตฺติํ ภิกฺขุโน ปน;
ญตฺวา ฉาทยโต ตสฺส, ปาจิตฺติ ปริยาปุตาฯ
[1674]
นิกฺขิปิตฺวา ธุรํ ตสฺส, ปฏิจฺฉาทนเหตุกํ;
อาโรเจติ สจญฺญสฺส, โสปิ อญฺญสฺส วาติ หิฯ
[1675]
เอวํ สตมฺปิ ภิกฺขูนํ, สหสฺสมฺปิ จ ตาว ตํ;
อาปชฺชเตว อาปตฺติํ, ยาว โกฏิ น ฉิชฺชติฯ
[1676]
มูเลนาโรจิตสฺเสว , ทุติยสฺส ปกาสิเต;
ตติเยน นิวตฺติตฺวา, โกฏิ ฉินฺนาติ วุจฺจติฯ
[1677]
ทุฏฺฐุลฺลาย จ ทุฏฺฐลฺล-สญฺญี ปาจิตฺติยํ ผุเส;
อิตเรสุ ปน ทฺวีสุ, ทุกฺกฏํ ปริทีปิตํฯ
[1678]
อทุฏฺฐุลฺลาย สพฺพตฺถ, นิทฺทิฏฺฐํ ติกทุกฺกฏํ;
สพฺพตฺถานุปสมฺปนฺน-วาเรสุปิ จ ทุกฺกฏํฯ
[1679]
‘‘สงฺฆสฺส เภทนาทีนิ, ภวิสฺสนฺตี’’ติ วา ปน;
น จ ฉาเทตุกาโม วา, สภาคํ วา น ปสฺสติฯ
[1680]
‘‘ปญฺญายิสฺสติ กมฺเมน, สเกนายนฺติ กกฺขโฬ’’;
อนาโรเจติ เจ โทโส, นตฺถิ อุมฺมตฺตกาทิโนฯ
[1681]
ธุรนิกฺเขปตุลฺยาว, สมุฏฺฐานาทโย นยา;
กายกมฺมํ วจีกมฺมํ, อกฺริยํ ทุกฺขเวทนํฯ
ทุฏฺฐุลฺลกถาฯ
[1682]
อูนวีสติวสฺสํ โย, กเรยฺย อุปสมฺปทํ;
ตสฺส ปาจิตฺติยํ โหติ, เสสานํ โหติ ทุกฺกฏํฯ
[1683]
อุปสมฺปาทิโต เจโส, ชานตา วา อชานตา;
โหเตวานุปสมฺปนฺโน, กาตพฺโพ ปุนเรว โสฯ
[1684]
ทสวสฺสจฺจเยนสฺส, อุปชฺฌายสฺส เจ สโต;
อุปสมฺปาทเน โทโส, อญฺเญสํ นตฺถิ โกจิปิฯ
[1685]
มุญฺจิตฺวา ปน ตํ ภิกฺขุํ, คโณ เจ ปริปูรติ;
โหนฺติ เต สูปสมฺปนฺนา, น โทโส โกจิ วิชฺชติฯ
[1686]
อุปชฺฌาโย สเจ หุตฺวา, คณํ อาจริยมฺปิ วา;
ปริเยสติ ปตฺตํ วา, สมฺมนฺนติ จ มาฬกํฯ
[1687]
‘‘อุปสมฺปาทยิสฺสามิ’’ , อิติ สพฺเพสุ ตสฺส หิ;
ญตฺติยา จ ตถา ทฺวีสุ, กมฺมวาจาสุ ทุกฺกฏํฯ
[1688]
กมฺมวาจาย โอสาเน, ปาจิตฺติ ปริทีปิตา;
อูนวีสติสญฺญิสฺส, ปริปุณฺเณปิ ปุคฺคเลฯ
[1689]
วิมติสฺสุภยตฺถาปิ, โหติ อาปตฺติ ทุกฺกฏํ;
ปริปุณฺโณติ สญฺญิสฺส, อุภยตฺถ น โทสตาฯ
[1690]
ตถา อุมฺมตฺตกสฺสาปิ, อาทิกมฺมิกภิกฺขุโน;
อทินฺนาทานตุลฺยาว, สมุฏฺฐานาทโย นยาฯ
อูนวีสติกถาฯ
[1691]
เถยฺยสตฺเถน ชานนฺโต, สํวิธาย สเจ ปน;
มคฺคํ คจฺฉติ สทฺธิํ โย, ตสฺส ปาจิตฺติยํ สิยาฯ
[1692]
คมเน สํวิธาเน จ, วตฺตพฺโพ โย วินิจฺฉโย;
โส จ ภิกฺขุนิวคฺคสฺมิํ, วุตฺตตฺตา น จ อุทฺธโฏฯ
[1693]
มคฺคาฏวิวิสงฺเกเต, ยถาวตฺถุกเมว ตุ;
เตสฺวสํวิทหนฺเตสุ, สยํ วิทหโตปิ จฯ
[1694]
ตเถวาเถยฺยสตฺเถปิ, เถยฺยสตฺถนฺติ สญฺญิโน;
วิมติสฺสุภยตฺถาปิ, โหติ อาปตฺติ ทุกฺกฏํฯ
[1695]
อเถยฺยสตฺถสญฺญิสฺส , อสํวิทหโตปิ จ;
อาปทาสุ อนาปตฺติ, วิสงฺเกเต จ กาลิเกฯ
[1696]
เถยฺยสตฺถสมุฏฺฐานํ, กถิตํ กายจิตฺตโต;
กายวาจาจิตฺตโต จ, ติจิตฺตญฺจ ติเวทนํฯ
เถยฺยสตฺถกถาฯ
[1697]
โหติ ภิกฺขุนิยา สทฺธิํ, สํวิธาเนน สตฺตมํ;
สมุฏฺฐานาทินา ตุลฺยํ, วิเสโส นตฺถิ โกจิปิฯ
สํวิธานกถาฯ
[1698]
กมฺมํ กิเลโส ปาโก จ, อุปวาโท อติกฺกโม;
อนฺตรายกรา เอเต, ปญฺจ ธมฺมา ปกาสิตาฯ
[1699]
‘‘อนนฺตรายิกา เอเต, ยถา โหนฺติ ตถา อหํ;
เทสิตํ มุนินา ธมฺม-มาชานามี’’ติ โย วเทฯ
[1700]
ติกฺขตฺตุํ เตหิ วตฺตพฺโพ, เย ปสฺสนฺติ สุณนฺติ จ;
‘‘มา เหวํ อวจายสฺมา’’, อิติ ภิกฺขูหิ โส ปนฯ
[1701]
ทุกฺกฏํ อวทนฺตสฺส, ตํ อนิสฺสชโตปิ จ;
ญตฺติยา จ ตถา ทฺวีหิ, กมฺมวาจาหิ ทุกฺกฏํฯ
[1702]
กมฺมวาจาย โอสาเน, ปาจิตฺติ ปริทีปิตา;
ติกปาจิตฺติยํ วุตฺตํ, อธมฺเม ติกทุกฺกฏํฯ
[1703]
นาปตฺตากตกมฺมสฺส, ปฏินิสฺสชโตปิ จ;
สมุฏฺฐานาทโย สพฺเพ, วุตฺตา สมนุภาสเนฯ
อริฏฺฐกถาฯ
[1704]
ญตฺวากตานุธมฺเมน, ตถาวาทิกภิกฺขุนา;
สํวเสยฺย จ ภุญฺเชยฺย, ปาจิตฺติ สห เสยฺย วาฯ
[1705]
อุโปสถาทิกํ กมฺมํ, กโรโต สห เตน หิ;
กมฺมสฺส ปริโยสาเน, ตสฺส ปาจิตฺติยํ สิยาฯ
[1706]
เอเกเนว ปโยเคน, คณฺหโต อามิสํ พหุํ;
ททโตปิ ตถา เอกํ, พหูนิ จ พหูสฺวปิฯ
[1707]
อุกฺขิตฺตเก นิปนฺนสฺมิํ, อิตโร เสติ เจ ปน;
อิตรสฺมิํ นิปนฺเน วา, ปโร เสติ อุโภปิ วาฯ
[1708]
นิปชฺชนปโยคานํ, วเสนาปตฺติโย สิยุํ;
เอกนานูปจาเรสุ, เอกจฺฉนฺเน วินิจฺฉโยฯ
[1709]
อนุกฺขิตฺเตปิ อุกฺขิตฺต-สญฺญิโน ปน ภิกฺขุโน;
วิมติสฺสุภยตฺถาปิ, ทุกฺกฏํ ปริทีปิตํฯ
[1710]
อนาปตฺตุภยตฺถาปิ, อนุกฺขิตฺตกสญฺญิโน;
นิสฺสฏฺโฐติ จ ตํ ทิฏฺฐิํ, สญฺญิสฺโสสาริโตติ จฯ
[1711]
ตถา อุมฺมตฺตกาทีนํ, อิทํ ปณฺณตฺติวชฺชกํ;
อทินฺนาทานตุลฺยาว, สมุฏฺฐานาทโย นยาฯ
อุกฺขิตฺตกถาฯ
[1712]
ตถา วินาสิตํ ชานํ, อุปลาเปยฺย เตน วา;
อุปฏฺฐาเปยฺย ปาจิตฺติ, สํภุญฺเชยฺย วเสยฺย วาฯ
[1713]
สํวาเสน จ ลิงฺเคน, ทณฺฑกมฺเมน นาสนา;
ติสฺโส เอตฺถ อธิปฺเปตา, ทณฺฑกมฺเมน นาสนาฯ
[1714]
สมฺโภคา สหเสยฺยา จ, อนนฺตรสมา มตา;
ตตฺถ วุตฺตนเยเนว, เวทิตพฺโพ วินิจฺฉโยฯ
[1715]
สมุฏฺฐานาทโย สพฺเพ, อริฏฺเฐน สมา มตา;
น เหตฺถ กิญฺจิ วตฺตพฺพํ, สพฺพํ อุตฺตานเมวิทํฯ
กณฺฏกกถาฯ
สปฺปาณกวคฺโค สตฺตโมฯ
[1716]
วุจฺจมาโน หิ ภิกฺขูหิ, ภิกฺขุ สิกฺขาปเทน โย;
‘‘สิกฺขาปเท ปเนตสฺมิํ, น สิกฺขิสฺสามิ ตาวหํฯ
[1717]
ยาว นาญฺญํ วิยตฺตญฺจ, ปกตญฺญุํ พหุสฺสุตํ;
ปุจฺฉามี’’ติ ภณนฺตสฺส, ตสฺส ปาจิตฺติยํ สิยาฯ
[1718]
สตฺถุนานุปสมฺปนฺเน, ทีปิตํ ติกทุกฺกฏํ;
น สลฺเลขายิทํ โหติ, วุจฺจมานสฺสุโภหิปิฯ
[1719]
อปญฺญตฺเตน ตสฺเสวํ, วทโต โหติ ทุกฺกฏํ;
น โทสุมฺมตฺตกาทีนํ, ‘‘สิกฺขิสฺสามี’’ติ ภาสโตฯ
สหธมฺมิกกถาฯ
[1720]
อุทฺทิฏฺเฐหิ กิเมเตหิ, กุกฺกุจฺจาทินิทานโต;
โหติ ปาจิตฺติยาปตฺติ, สิกฺขาปทวิวณฺณเนฯ
[1721]
ติกปาจิตฺติยํ วุตฺตํ, ตเถว ติกทุกฺกฏํ;
วิวณฺเณนุปสมฺปนฺน-สนฺติเก ตํ สเจ ปนฯ
[1722]
ทุกฺกฏํ ปนุภินฺนมฺปิ, อญฺญธมฺมวิวณฺณเน;
นวิวณฺเณตุกามสฺส, ‘‘สุตฺตนฺตํ ปริยาปุณฯ
[1723]
วินยํ ปน ปจฺฉาปิ, หนฺท ปริยาปุณิสฺสสิ’’;
อิจฺเจวํ ตุ วทนฺตสฺส, ตถา อุมฺมตฺตกาทิโนฯ
[1724]
อนาปตฺตีติ ญาตพฺพํ, สมุฏฺฐานาทโย นยา;
อนนฺตรสฺสิมสฺสาปิ, โอมสวาทสาทิสาฯ
วิเลขนกถาฯ
[1725]
อญฺญาเณน ปนาปตฺติ, โมกฺโข เนวสฺส วิชฺชติ;
กาเรตพฺโพ ตถา ภิกฺขุ, ยถา ธมฺโม ฐิโต ปนฯ
[1726]
ตสฺสาโรปนิโย โมโห, อุตฺตริมฺปิ หิ ภิกฺขุโน;
ทุติเยเนว กมฺเมน, นินฺทิตฺวา ตญฺหิ ปุคฺคลํฯ
[1727]
เอวํ อาโรปิเต โมเห, ยทิ โมเหติ โย ปน;
ตสฺมิํ โมหนเก วุตฺตา, ปาจิตฺติ ปน ปุคฺคเลฯ
[1728]
อธมฺเม ปน กมฺมสฺมิํ, ทีปิตํ ติกทุกฺกฏํ;
ตถานาโรปิเต โมเห, ทุกฺกฏํ ปริกิตฺติตํฯ
[1729]
น จ โมเหตุกามสฺส, วิตฺถาเรนาสุตสฺสปิ;
อูนเก ทฺวตฺติกฺขตฺตุํ วา, วิตฺถาเรนาสุตสฺส จฯ
[1730]
อนาปตฺตีติ วิญฺเญยฺยํ, ตถา อุมฺมตฺตกาทิโน;
สมุฏฺฐานาทโย สพฺเพ, อนนฺตรสมา มตาฯ
โมหนกถาฯ
[1731]
กุทฺโธ เทติ ปหารํ เจ, ตสฺส ปาจิตฺติยํ สิยา;
สมฺปหริตุกาเมน, ปหาเร ภิกฺขุโน ปนฯ
[1732]
ทินฺเน ภิชฺชตุ สีสํ วา, ปาโท วา ปริภิชฺชตุ;
โส เจ มรตุ วา, มา วา, ปาจิตฺติ ปริทีปิตาฯ
[1733]
วิรูปกรณาเปกฺโข, ‘‘อิจฺจายํ น วิโรจติ’’;
กณฺณํ วา ตสฺส นาสํ วา, ยทิ ฉินฺทติ ทุกฺกฏํฯ
[1734]
ตเถวานุปสมฺปนฺเน, อิตฺถิยา ปุริสสฺส วา;
ติรจฺฉานคตสฺสาปิ, ปหารํ เทติ ทุกฺกฏํฯ
[1735]
สเจ ปหรติตฺถิญฺจ, ภิกฺขุ รตฺเตน เจตสา;
ครุกา ตสฺส อาปตฺติ, วินิทฺทิฏฺฐา มเหสินาฯ
[1736]
ปหารํ เทติ โมกฺขาธิ-ปฺปาโย โทโส น วิชฺชติ;
กาเยน กายพทฺเธน, ตถา นิสฺสคฺคิเยน วาฯ
[1737]
ปสฺสิตฺวา อนฺตรามคฺเค, โจรํ ปจฺจตฺถิกมฺปิ วา;
เหเฐตุกามมายนฺตํ, ‘‘มา อิธาคจฺฉุปาสก’’ฯ
[1738]
อิติ วตฺวา ปนายนฺตํ, ‘‘คจฺฉ เร’’ติ จ มุคฺครํ;
สตฺถํ วาปิ คเหตฺวา วา, ปหริตฺวา ตุ ยาติ เจฯ
[1739]
อนาปตฺติ สเจ เตน, ปหาเรน มเตปิ จ;
เอเสว จ นโย วุตฺโต, ธุตฺตวาฬมิเคสุปิฯ
[1740]
ติกปาจิตฺติยํ วุตฺตํ, เสเส จ ติกทุกฺกฏํ;
กายจิตฺตสมุฏฺฐานํ, สจิตฺตํ ทุกฺขเวทนํฯ
ปหารกถาฯ
[1741]
กายํ วา กายพทฺธํ วา, อุจฺจาเรยฺย สเจ ปน;
โหติ ปาจิตฺติยาปตฺติ, ตสฺสุคฺคิรณปจฺจยาฯ
[1742]
อุคฺคิริตฺวา วิรทฺโธ โส, ปหารํ เทติ เจ ปน;
อสมฺปหริตุกาเมน, ทินฺนตฺตา ทุกฺกฏํ สิยาฯ
[1743]
สเจ เตน ปหาเรน, ปหฏสฺส จ ภิกฺขุโน;
หตฺถาทีสุปิ ยํ กิญฺจิ, องฺคํ ภิชฺชติ ทุกฺกฏํฯ
[1744]
เสโส อนนฺตเร วุตฺต-นเยน วินยญฺญุนา;
สมุฏฺฐานาทินา สทฺธิํ, เวทิตพฺโพ วินิจฺฉโยฯ
ตลสตฺติกถาฯ
[1745]
อมูลเกน สงฺฆาทิ-เสเสน ปน ภิกฺขุ โย;
โจทาเปยฺยปิ โจเทยฺย, ตสฺส ปาจิตฺติยํ สิยาฯ
[1746]
ติกปาจิตฺติยํ ตตฺถ, ทิฏฺฐาจารวิปตฺติยา;
โจทโต ทุกฺกฏาปตฺติ, เสเส จ ติกทุกฺกฏํฯ
[1747]
ตถาสญฺญิสฺสนาปตฺติ , ตถา อุมฺมตฺตกาทิโน;
โอมสวาทตุลฺยาว, สมุฏฺฐานาทโย นยาฯ
อมูลกกถาฯ
[1748]
สญฺจิจฺจ ปน กุกฺกุจฺจํ, อุปฺปาเทนฺตสฺส ภิกฺขุโน;
‘‘อูนวีสติวสฺโส ตฺวํ, มญฺเญ’’ อิจฺเจวมาทินาฯ
[1749]
โหติ วาจาย วาจาย, ปาจิตฺติ ปน ภิกฺขุโน;
ตถารูเป ปนญฺญสฺมิํ, สเจ อสติ ปจฺจเยฯ
[1750]
ติกปาจิตฺติยํ วุตฺตํ, เสเส จ ติกทุกฺกฏํ;
นอุปฺปาเทตุกามสฺส, กุกฺกุจฺจํ นตฺถิ วชฺชตาฯ
[1751]
‘‘หิเตสิตายหํ มญฺเญ, นิสินฺนํ อิตฺถิยา สห;
วิกาเล จ ตยา ภุตฺตํ, มา เอว’’นฺติ จ ภาสโตฯ
[1752]
ตถา อุมฺมตฺตกาทีน-มนาปตฺติ ปกาสิตา;
สมุฏฺฐานาทโย สพฺเพ, อนนฺตรสมา มตาฯ
สญฺจิจฺจกถาฯ
[1753]
สเจ ภณฺฑนชาตานํ, ภิกฺขูนํ ปน ภิกฺขุ โย;
ติฏฺเฐยฺยุปสฺสุติํ โสตุํ, ตสฺส ปาจิตฺติยํ สิยาฯ
[1754]
‘‘ยํ อิเม ตุ ภณิสฺสนฺติ, ตํ โสสฺสามี’’ติ คจฺฉโต;
โจเทตุกามตายสฺส, ทุกฺกฏํ ตุ ปเท ปเทฯ
[1755]
ปุรโต คจฺฉโต โสตุํ, โอหียนฺตสฺส ทุกฺกฏํ;
คจฺฉโต ตุริตํ วาปิ, อยเมว วินิจฺฉโยฯ
[1756]
ฐิโตกาสํ ปนาคนฺตฺวา, ยทิ มนฺเตนฺติ อตฺตโน;
อุกฺกาสิตฺวาปิ วา เอตฺถ, ญาเปตพฺพมหนฺติ วาฯ
[1757]
ตสฺเสวมกโรนฺตสฺส , ปาจิตฺติ สวเน สิยา;
ติกปาจิตฺติยํ วุตฺตํ, เสเส จ ติกทุกฺกฏํฯ
[1758]
‘‘อิเมสํ วจนํ สุตฺวา, โอรมิสฺส’’นฺติ คจฺฉโต;
ตถา อุมฺมตฺตกาทีน-มนาปตฺติ ปกาสิตาฯ
[1759]
เถยฺยสตฺถสมุฏฺฐานํ, อิทํ โหติ กฺริยากฺริยํ;
กายกมฺมํ วจีกมฺมํ, สโทสํ ทุกฺขเวทนํฯ
อุปสฺสุติกถาฯ
[1760]
ธมฺมิกานํ ตุ กมฺมานํ, ฉนฺทํ ทตฺวา สเจ ปน;
ปจฺฉา ขียติ ปาจิตฺติ, วาจโต วาจโต สิยาฯ
[1761]
อธมฺเม ปน กมฺมสฺมิํ, ธมฺมกมฺมนฺติ สญฺญิโน;
วิมติสฺสุภยตฺถาปิ, โหติ อาปตฺติ ทุกฺกฏํฯ
[1762]
‘‘อธมฺเมน จ วคฺเคน, ตถากมฺมารหสฺส จ;
อิเม กมฺมํ กโรนฺตี’’ติ, ญตฺวา ขียติ ตสฺส จฯ
[1763]
ตถา อุมฺมตฺตกาทีน-มนาปตฺติ ปกาสิตา;
อมูลกสมานาว, สมุฏฺฐานาทโย นยาฯ
กมฺมปฏิพาหนกถาฯ
[1764]
ยาว อาโรจิตํ วตฺถุ, อวินิจฺฉิตเมว วา;
ฐปิตา ญตฺติ วา นิฏฺฐํ, กมฺมวาจา น คจฺฉติฯ
[1765]
เอตสฺมิํ อนฺตเร กมฺมํ, โกเปตุํ ปริสาย หิ;
หตฺถปาสํ ชหนฺตสฺส, โหติ อาปตฺติ ทุกฺกฏํฯ
[1766]
อทตฺวา ชหิเต ฉนฺทํ, ตสฺส ปาจิตฺติยํ สิยา;
ธมฺมกมฺเม อธมฺเม จ, วิมติสฺส จ ทุกฺกฏํฯ
[1767]
อธมฺเมปิ จ กมฺมสฺมิํ, ธมฺมกมฺมนฺติ สญฺญิโน;
‘‘สงฺฆสฺส ภณฺฑนาทีนิ, ภวิสฺสนฺตี’’ติ สญฺญิโนฯ
[1768]
คิลาโน วา คิลานสฺส, กรณีเย น โทสตา;
น จ โกเปตุกามสฺส, กมฺมํ ปสฺสาวนาทินาฯ
[1769]
ปีฬิตสฺสาคมิสฺสามิ, อิจฺเจวํ คจฺฉโตปิ วา;
สมํ สมนุภาเสน, สมุฏฺฐานํ กฺริยากฺริยํฯ
ฉนฺทํ อทตฺวา คมนกถาฯ
[1770]
สมคฺเคน จ สงฺเฆน, สทฺธิํ ทตฺวาน จีวรํ;
สมฺมตสฺส หิ ภิกฺขุสฺส, ปจฺฉา ขียติ โย ปนฯ
[1771]
ตสฺส วาจาย วาจาย, ปาจิตฺติ ปริทีปิตา;
ติกปาจิตฺติยํ ธมฺม- กมฺเม วุตฺตํ ตุ จีวรํฯ
[1772]
ฐเปตฺวาญฺญปริกฺขารํ, ทตฺวา ขียติ ทุกฺกฏํ;
สงฺเฆนาสมฺมตสฺสาปิ, จีวรํ อญฺญเมว วาฯ
[1773]
ตเถวานุปสมฺปนฺเน, สพฺพตฺถาปิ จ ทุกฺกฏํ;
ฉนฺทาทีนํ วเสเนว, กโรนฺตญฺจ สภาวโตฯ
[1774]
ขียนฺตสฺส อนาปตฺติ, ตถา อุมฺมตฺตกาทิโน;
อมูลกสมา เญยฺยา, สมุฏฺฐานาทโย นยาฯ
ทุพฺพลกถาฯ
[1775]
อิทํ ติํสกกณฺฑสฺมิํ, อนฺติเมน จ สพฺพถา;
ตุลฺยํ ทฺวาทสมํ สพฺพํ, อยเมว วิเสสตาฯ
[1776]
ตตฺถ นิสฺสคฺคิยํ วุตฺตํ, อตฺตโน ปริณามนา;
อิธ สุทฺธิกปาจิตฺติ, ปุคฺคเล ปริณามนาฯ
ปริณามนกถาฯ
สหธมฺมิกวคฺโค อฏฺฐโมฯ
[1777]
อนิกฺขนฺเต เจ ราชสฺมิํ, อนิกฺขนฺตาย เทวิยา;
สยนียฆรา ตสฺส, อุมฺมารํ โย อติกฺกเมฯ
[1778]
ทุกฺกฏํ ปฐเม ปาเท, ปาจิตฺติ ทุติเย สิยา;
เทวิยา วาปิ รญฺโญ วา, สเจ น วิทิตาคโมฯ
[1779]
ปฏิสํวิทิเต เนว-ปฏิสํวิทิตสญฺญิโน;
ตตฺถ เวมติกสฺสาปิ, ทุกฺกฏํ ปริทีปิตํฯ
[1780]
ปฏิสํวิทิตสญฺญิสฺส, เนว จ ขตฺติยสฺส วา;
น ขตฺติยาภิเสเกน, อภิสิตฺตสฺส วา ปนฯ
[1781]
อุโภสุภินฺนมญฺญสฺมิํ, นิกฺขนฺเต วิสโตปิ วา;
น โทสุมฺมตฺตกาทีนํ, กถิเนน กฺริยากฺริยํฯ
อนฺเตปุรกถาฯ
[1782]
รชตํ ชาตรูปํ วา, อุคฺคณฺหนฺตสฺส อตฺตโน;
ตสฺส นิสฺสคฺคิยาปตฺติ, อุคฺคณฺหาปยโตปิ วาฯ
[1783]
คณปุคฺคลสงฺฆานํ, นวกมฺมสฺส เจติเย;
อุคฺคณฺหาปยโต โหติ, ทุกฺกฏํ คณฺหโตปิ วาฯ
[1784]
อวเสสญฺจ มุตฺตาทิ-รตนํ อตฺตโนปิ วา;
สงฺฆาทีนมฺปิ อตฺถาย, อุคฺคณฺหนฺตสฺส ทุกฺกฏํฯ
[1785]
สเจ กปฺปิยวตฺถุํ วา, วตฺถุํ วาปิ อกปฺปิยํ;
ตาลปณฺณมฺปิ วา โหตุ, มาตุกณฺณปิลนฺธนํฯ
[1786]
ภณฺฑาคาริกสีเสน, ยํ กิญฺจิ คิหิสนฺตกํ;
ตสฺส ปาจิตฺติยาปตฺติ, ปฏิสามยโต ปนฯ
[1787]
‘‘อิทํ ฐเปตฺวา เทหี’’ติ, วุตฺเตน ปน เกนจิ;
‘‘น วฏฺฏตี’’ติ วตฺวา ตํ, น นิเธตพฺพเมว ตุฯ
[1788]
‘‘ฐเปหี’’ติ จ ปาเตตฺวา, สเจ คจฺฉติ ปุคฺคโล;
ปลิโพโธ หิ นาเมโส, ฐเปตุํ ปน วฏฺฏติฯ
[1789]
อนุญฺญาเต ปนฏฺฐาเน, อุคฺคเหตฺวา อนาทรา;
สมฺมา อนิกฺขิปนฺตสฺส, โหติ อาปตฺติ ทุกฺกฏํฯ
[1790]
อนุญฺญาเต ปนฏฺฐาเน, คเหตฺวา รตนํ ปน;
นิกฺขิปนฺตสฺส วา สมฺมา, ภณฺฑํ รตนสมฺมตํฯ
[1791]
คณฺหนฺตสฺส จ วิสฺสาสํ, ตาวกาลิกเมว จ;
น โทสุมฺมตฺตกาทีนํ, สญฺจริตฺตสโมทยํฯ
รตนกถาฯ
[1792]
มชฺฌณฺหสมยา อุทฺธํ, อรุณุคฺคมโต ปุเร;
เอตสฺมิํ อนฺตเร กาโล, วิกาโลติ ปวุจฺจติฯ
[1793]
สนฺตํ ภิกฺขุมนาปุจฺฉา, วิกาเล ปจฺจยํ วินา;
ปริกฺขิตฺตสฺส คามสฺส, ปริกฺเขโปกฺกเม ปนฯ
[1794]
อปริกฺขิตฺตคามสฺส, อุปจาโรกฺกเมปิ วา;
ทุกฺกฏํ ปฐเม ปาเท, ปาจิตฺติ ทุติเย สิยาฯ
[1795]
อถ สมฺพหุลา คามํ, วิกาเล ปวิสนฺติ เจ;
อาปุจฺฉิตฺวาว คนฺตพฺพํ, อญฺญมญฺญํ น จญฺญถาฯ
[1796]
คจฺฉนฺติ เจ ตโต อญฺญํ, ตโต อญฺญนฺติ วฏฺฏติ;
ปุน อาปุจฺฉเน กิจฺจํ, นตฺถิ คามสเตปิ จฯ
[1797]
ปสฺสมฺเภตฺวาน อุสฺสาหํ, วิหารตฺถาย นิคฺคตา;
ปวิสนฺติ สเจ อญฺญํ, ปุจฺฉิตพฺพํ ตุ อนฺตราฯ
[1798]
กตฺวา กุลฆเร ภตฺต- กิจฺจํ อญฺญตฺถ วา ปน;
สเจ จริตุกาโม โย, สปฺปิภิกฺขาย วา สิยาฯ
[1799]
อาปุจฺฉิตฺวาว คนฺตพฺพํ, ปสฺเส เจ ภิกฺขุ ลพฺภติ;
อสนฺเต ปน นตฺถีติ, คนฺตพฺพํ ตุ ยถาสุขํฯ
[1800]
โอตริตฺวา มหาวีถิํ, ภิกฺขุํ ยทิ จ ปสฺสติ;
นตฺถิ อาปุจฺฉเน กิจฺจํ, จริตพฺพํ ยถาสุขํฯ
[1801]
คามมชฺเฌน มคฺเคน, คจฺฉนฺตสฺเสว ภิกฺขุโน;
‘‘จริสฺสามี’’ติ อุปฺปนฺเน, เตลภิกฺขาย มานเสฯ
[1802]
อาปุจฺฉิตฺวาว คนฺตพฺพํ, ปสฺเส เจ ภิกฺขุ วิชฺชติ;
อโนกฺกมฺม จรนฺตสฺส, มคฺคา อาปุจฺฉเนน กิํ?
[1803]
ติกปาจิตฺติยํ , กาเล, วิกาโลยนฺติ สญฺญิโน;
กาเล เวมติกสฺสาปิ, โหติ อาปตฺติ ทุกฺกฏํฯ
[1804]
อาปุจฺฉิตฺวาว สนฺตํ วา, อนาปุจฺฉา อสนฺตกํ;
กิจฺเจ อจฺจายิเก วาปิ, ปวิสนฺตสฺส ภิกฺขุโนฯ
[1805]
คจฺฉโต อนฺตรารามํ, ภิกฺขุนีนํ อุปสฺสยํ;
ตถา อาสนสาลํ วา, ติตฺถิยานํ อุปสฺสยํฯ
[1806]
สิยา คาเมน มคฺโค เจ, อนาปตฺตาปทาสุปิ;
สมุฏฺฐานาทโย สพฺเพ, กถิเนน สมา มตาฯ
[1807]
น เกวลมนาปุจฺฉา, อพนฺธิตฺวา จ พนฺธนํ;
อปารุปิตฺวา สงฺฆาฏิํ, คจฺฉโตปินวชฺชตาฯ
วิกาลคามปฺปเวสนกถาฯ
[1808]
อฏฺฐิทนฺตมยํ สูจิ-ฆรํ วาปิ วิสาณชํ;
การาปเน จ กรเณ, ภิกฺขุโน โหติ ทุกฺกฏํฯ
[1809]
ลาเภ เภทนกํ ตสฺส, ปาจิตฺติยมุทีริตํ;
อญฺญสฺสตฺถาย กรเณ, ตถา การาปเนปิ จฯ
[1810]
อญฺเญน จ กตํ ลทฺธา, ทุกฺกฏํ ปริภุญฺชโต;
อนาปตฺตารณิเก วิเธ, คณฺฐิกญฺชนิกาสุปิฯ
[1811]
ทกปุญฺฉนิยา วาสิ-ชเฏ อุมฺมตฺตกาทิโน;
สมุฏฺฐานาทโย นยา, สญฺจริตฺตสมา มตาฯ
สูจิฆรกถาฯ
[1812]
นวํ มญฺจมฺปิ ปีฐํ วา, การาเปนฺเตน ภิกฺขุนา;
อฏฺฐงฺคุลปฺปมาเณน, สุคตงฺคุลโต ปนฯ
[1813]
การาเปตพฺพเมวํ ตุ, ฐเปตฺวา เหฏฺฐิมาฏนิํ;
สจฺเฉทา ตสฺส ปาจิตฺติ, ตมติกฺกมโต สิยาฯ
[1814]
อญฺญสฺสตฺถาย กรเณ, ตถา การาปเนปิ จ;
อญฺเญน จ กตํ ลทฺธา, ทุกฺกฏํ ปริภุญฺชโตฯ
[1815]
อนาปตฺติ ปมาเณน, กโรนฺตสฺสปฺปมาณิกํ;
ลภิตฺวา ตสฺส ปาเทสุ, ฉินฺทิตฺวา ปริภุญฺชโตฯ
[1816]
เนว ฉินฺทิตุกาโม เจ, นิขณิตฺวา ปมาณโต;
อุตฺตานํ วาปิ อฏฺฏํ วา, พนฺธิตฺวา ปริภุญฺชโตฯ
มญฺจกถาฯ
[1817]
มญฺจํ วา ปน ปีฐํ วา, ตูโลนทฺธํ กเรยฺย โย;
ตสฺสุทฺทาลนกํ วุตฺตํ, ปาจิตฺติยมนีตินาฯ
[1818]
อนาปตฺติ ปนาโยเค, พนฺธเน อํสพทฺธเก;
พิพฺโพหเน ปริสฺสาเว, ถวิกาทีสุ ภิกฺขุโนฯ
[1819]
อญฺเญน จ กตํ ลทฺธา, อุทฺทาเลตฺวา นิเสวโต;
อนนฺตรสฺสิมสฺสาปิ, สญฺจริตฺตสมา นยาฯ
ตูโลนทฺธกถาฯ
[1820]
นิสีทนํ กโรนฺเตน, กาตพฺพํ ตุ ปมาณโต;
ปมาณาติกฺกเม ตสฺส, ปโยเค ทุกฺกฏํ สิยาฯ
[1821]
ปฏิลาเภน สจฺเฉทํ, ปาจิตฺติยมุทีริตํ;
ทฺวีสุ ฐาเนสุ ผาเลตฺวา, ตสฺส ติสฺโส ทสา สิยุํฯ
[1822]
อนาปตฺติ ปมาเณน, กโรนฺตสฺส ตทูนกํ;
วิตานาทิํ กโรนฺตสฺส, สญฺจริตฺตสมา นยาฯ
นิสีทนกถาฯ
[1823]
โรเค กณฺฑุปฏิจฺฉาทิ, กาตพฺพา หิ ปมาณโต;
ปมาณาติกฺกเม ตสฺส, ปโยเค ทุกฺกฏํ สิยาฯ
[1824]
ปฏิลาเภน สจฺเฉทํ, ปาจิตฺติยมุทีริตํ;
อนาปตฺตินโยเปตฺถ, อนนฺตรสโม มโตฯ
กณฺฑุปฏิจฺฉาทิกถาฯ
[1825]
ปมาเณเนว กาตพฺพา, ตถา วสฺสิกสาฏิกา;
ปมาณาติกฺกเม ตสฺส, อนนฺตรสโม นโยฯ
วสฺสิกสาฏิกกถาฯ
[1826]
จีวเรน สเจ ตุลฺย-ปฺปมาณํ สุคตสฺส ตุ;
จีวรํ ภิกฺขุ กาเรยฺย, กรเณ ทุกฺกฏํ สิยาฯ
[1827]
ปฏิลาเภน สจฺเฉทํ, ปาจิตฺติยมุทีริตํ;
อนนฺตรสโมเยว, อนาปตฺตินโย มโตฯ
[1828]
ทีฆโส จ ปมาเณน, นว ตสฺส วิทตฺถิโย;
ติริยํ ฉ วินิทฺทิฏฺฐา, สุคตสฺส วิทตฺถิยาฯ
[1829]
อญฺเญน จ กตํ ลทฺธา, เสวโต ทุกฺกฏํ ภเว;
สมุฏฺฐานาทโย สพฺเพ, สญฺจริตฺตสมา มตาฯ
นนฺทกถาฯ
ราชวคฺโค นวโมฯ
อิติ วินยวินิจฺฉเย ปาจิตฺติยกถา นิฏฺฐิตาฯ
ปาฏิเทสนียกถา
[1830]
โย จนฺตรฆรํ ภิกฺขุ, ปวิฏฺฐาย ตุ หตฺถโต;
อญฺญาติกาย ยํ กิญฺจิ, ตสฺส ภิกฺขุนิยา ปนฯ
[1831]
สหตฺถา ปฏิคฺคณฺเหยฺย, ขาทนํ โภชนมฺปิ วา;
คหเณ ทุกฺกฏํ โภเค, ปาฏิเทสนิยํ สิยาฯ
[1832]
รถิกายปิ วา พฺยูเห, สนฺธิสิงฺฆาฏเกสุ วา;
หตฺถิสาลาทิเก ฐตฺวา, คณฺหโตปิ อยํ นโยฯ
[1833]
รถิกาย สเจ ฐตฺวา, เทติ ภิกฺขุนิ โภชนํ;
อาปตฺติ อนฺตราราเม, ฐตฺวา คณฺหาติ ภิกฺขุ เจฯ
[1834]
เอตฺถนฺตรฆรํ ตสฺสา, ปวิฏฺฐาย หิ วากฺยโต;
ภิกฺขุสฺส จ ฐิตฏฺฐานํ, นปฺปมาณนฺติ วณฺณิตํฯ
[1835]